Kanu Kawa Ni A Matu
8: Kasi Ningli
Lachyum
Kasi la ging ai kanu kawa ni gaw, tinang tsun ai hte maren nga ai hku nna kasi madun ai. Ga shadawn, tinang n hkrum mayu ai marai langai gaw nta de sa chyai ai ngu saga. Kanu kawa ni gaw “nta kaw n nga ai ngu tsun dat u” ngu tsun yang, ma ni hpe jaw ai hku sharin ya na matu yak mat na re.
“‘Ngai tsun ai hku galaw u, ngai galaw ai hku hkum galaw’ ngu ai ga malai nga ai. Dai ga gaw ma ni a matu akyu n nga ai. Kashu kasha ni gaw pasi hte bung ai. Masha kaba ni galaw ai, tsun ai lam ni hpe hkan galaw chye ma ai. Tsun ai hte galaw ai n bung yang bai chye tsun ai.”—Debit.
Chyum Laika Npawt Tara: “Lagu lagut n mai, nga nna hkaw tsun nhtawm, nang nan lagu n ni?”—Roma 2:21.
Hpa Majaw Ahkyak Ai Kun?
Ma ni, ramma ni ntsa hta kanu kawa ni gaw grau nna shingkang ka-up lu ai. Dai majaw, kanu kawa ni gaw tsun ai hte galaw ai bung yang, kashu kasha ni hpe lam madun ya ai ni byin lu na re.
“Chyahkring hkring tsun taw ra ai majaw, madat gaw madat ya nga ai kun? nga nna myit hkrup na re. Raitim, kalang mi daram sha tinang tsun ai hku tinang n galaw hkrup yang gaw sa tsun ma ai. Masha kaba ni galaw ai lam shagu hpe ma ni chye na n re ngu shadu da tim pyi, shanhte atsawm yu nga chye ai.”—Niko.
Chyum Laika Npawt Tara: “Ntsa de na hpaji byeng-ya chyawm gaw, . . . hpyi hpun n chye ai hpaji byeng-ya rai nga ai.”—Yaku 3:17.
Galaw Mai Ai Lam
Tinang a tsang madang hpe san jep u. Gara zawn ban sa lam ni hpe yu chye ai kun? Tinang a ningrum ningtau hte kashu kasha ni hpe gara hku tsun shaga ai kun? Chye na ya ai wa kun? Kaning re ai manaw manang ni nga ai kun? Tinang gaw kashu kasha ni byin shangun mayu ai zawn byin nga ai kun?
“An la gaw tinang nan n lu hkan ai tsang madang ni hpe ma ni a matu n jahkrat ya ai.”—Hkristin.
Galaw shut ai lam ni a matu tawngban u. Nang gaw hkum tsup ai wa n re ai hpe ma ni chye ai. Tawngban ging ai shaloi, ningrum ningtau hpe rai rai, ma ni hpe rai rai “tawngban ai yaw” ngu tsun chye na nga yang dingman na matu, shagrit shanem na matu sharin ya lu na re.
“Ngai galaw shut ai shaloi, mara hpe yin la ai. Tawngban ai hpe ma ni na na matu ahkyak ai. N rai yang, mara hpe makoi magap da chye hkra shanhte hpe sharin ya ai hte bung mat na re.”—Rawbin.
“Kanu kawa ni gaw ma ni a ntsa shingkang ka-up lu dik htum re. Shanhte gaw kanu kawa ni hpe aten tup yu nga ai majaw, kasi ningli madun ai gaw kaja htum re. Kanu kawa ni a galaw hkawm sa ai lam ni hte tinang a ma ni hpe galoi mung sharin shaga lu na re.”—Winde.
