Mara raw ya ai ngu ai gaw, mara ngu na n sawn la ai, mara ni hpe n matsing da ai hpe tsun mayu ai re. Shut ai lam ni hpe n chye masu su kau ya ai hpe tsun mayu ai n re.

Chyum Laika Npawt Tara: “Shada da hkam mana ai hte, mara langai ngai nga yang gaw, shada da raw dat kau hkat nga mu.”​—Kolose 3:13.

“Marai langai ngai hpe tsawra yang, shi a gawng kya ai lam ni hpe n yu ai sha, shi gaw gara baw masha re ai hpe sha yu na re.”​—Erun.

Mara ni hpe matsing da yang, hkum hkrang hte myit masin hpe hkra machyi shangun ai. Dinghku hpe mung hkra machyi shangun ai.

“Kalang mi hta, ngai hpe myit grai hkra machyi shangun ai lam a majaw, nye madu wa gaw ngai hpe hpyi nem ai. Aloi hte sha mara n raw ya lu ai. Hpang jahtum gaw mara raw kau ya ai. Raitim, jau jau mara n raw kau ya lu ai majaw, grai myit malai lu ai. Dai gaw, n ra ai sha dinghku hta manghkang byin shangun ai.”​—Juliya.

Tinang Hkum San Jep Yu U

Ningrum ningtau wa a tsun shaga galaw hkawm sa ai lam a majaw myit daw ai shaloi, tinang hkum tinang ndai hku san u:

• ‘Ngai gaw hkra pyi n mai ai wa rai nga ai kun?’

• ‘Tawngban ra na daram ahkyak ai kun? N chye masu su kau ya lu ai kun?

Ningrum Ningtau Hte Bawngban U

• Shada da mara raw hkat lu na matu aten kade daram na ai kun?

• Alawan mara raw chye na matu hpa ni galaw mai ai kun?

Tatut Galaw Mai Ai Lam

• Myit hkra machyi ai shaloi, tinang a ningrum ningtau hpe n kaja ai hku hkum mu mada.

• “Anhte yawng gaw jahkring hkring shut chye ai” ngu ai hpe dum nna, ningrum ningtau hpe mara raw ya na matu shakut u.​—Yaku 3:2, NW.

“Lahkawng yan shut ai aten hkan gaw mara raw ya na matu loi ai. Raitim, maga mi na sha shut ai nga yang, mara raw ya na matu grai yak ai. Tawngban ai hpe hkap la na matu, mara raw ya na matu shagrit shanem myit ra ai.”​—Kimbali.

Chyum Laika Npawt Tara: “Shi hte myit alawan jahkrum u.”​—Mahte 5:25.