1. Gara zawn wenyi bandung ni jahkrat mai ai kun?

 HKRISTAN ajet ni re ai anhte gaw, Yehowa hpe tsawra ai. Karai a magam hta kaja htum sak jaw mayu ai. Dai zawn byin na matu, Hkristan atsam ningja ni shalat ai, akyu nga ai ladat hpaji ni sharin la ai, kaga ni hpe karum ya na matu ahkaw ahkang tam ai zawn re ai wenyi bandung ni jahkrat ra ai. b

2. Wenyi bandung ni jahkrat nna du dep hkra hpa majaw shakut ra ai kun?

² Wenyi bandung ni hpa majaw jahkrat ra ai kun? Madung gaw, tsawra myit nga ai sumsing Kawa hpe ngwi pyaw shangun mayu ai majaw re. Karai a magam hta, anhte a atsam ningja ni hpe atsawm jailang nga ai hpe mu ai shaloi, Yehowa pyaw ai. Dai sha n-ga, hpunau nauna ni hpe grau karum ya mayu ai majaw, wenyi lam hta rawt jat na matu shakut ai. (1 Ht 4:9, 10) Tengman ai lam hta kade daram na sai raitim, wenyi lam hta rawt jat hkra anhte galaw lu ai. Gara hku galaw mai ai hpe yu yu ga.

3. 1 Timohti 4:12-16 hku nga yang, Timohti hpe hpa galaw na matu kasa Pawlu n-gun jaw ai kun?

³ Ramma Timohti hpang de kasa Pawlu shawng nnan laika ka ai shaloi, Timohti gaw, mahkrum madup nga ai myitsu salang byin nga sai. Raitim, wenyi lam hta matut rawt jat na matu Pawlu n-gun jaw ai. (1 Timohti 4:12-16 hpe hti u.) Pawlu a ga ni hku nga yang, Timohti hpe daw lahkawng hta rawt jat shangun mayu ai. Tsawra ai lam, makam masham, san seng ai lam  zawn re ai Hkristan atsam ningja ni shalat ai lam hte shawa man hta Chyum Laika hti ai, n-gun jaw ai, sharin achyin ai zawn re ai atsam ningja ni rawt jat hkra galaw ai lam ni re. Timohti a kasi ningli hpe hkaja let, htap htuk ai bandung ni gaw, wenyi lam hta rawt jat na matu anhte hpe gara hku karum ya ai hpe bawngban na re. Hkaw tsun magam rawt jat lu ai ladat ni hpe mung bawngban na re.

4. Hpilipi 2:19-22 hku nga yang, Yehowa a magam hta asung shang ai ni byin na matu, Timohti hpe hpa gaw karum ya ai kun?

⁴ Yehowa a magam hta, asung shang ai wa byin na matu, Timohti hpe hpa gaw karum ya ai kun? Timohti a laklai ai Hkristan atsam ningja ni re. (Hpilipi 2:19-22 hpe hti u.) Pawlu a ga ni hku nga yang, Timohti gaw shagrit shanem ai. Sadi dung ai. Shakut shaja ai. Kamhpa mai ai wa re. Hpunau ni hpe tsawra nna, lanu lahku ai. Dai lam ni a majaw, Timohti hpe Pawlu tsawra ai re. Yakhkak ai lit ni hpe kam ai myit hte ap ya ai. (1 Ko 4:17) Dai zawn sha, anhte mung, Karai ra sharawng ai atsam ningja ni shalat ai hku nna, nawku hpung a matu grau asung shang ai ni byin wa na re. Yehowa mung tsawra na re.​—Shk 25:9; 138:6.

5. (a) Rawt jat ra ai Hkristan atsam ningja ni hpe gara hku chye lu na kun? (b) Sumla hta madun da ai hte maren, myit tau ya chye na matu ngu ai bandung hpe dep lu hkra nauna langai gara hku galaw ai kun?

⁵ Tup hkrak re ai bandung jahkrat u. Tinang rawt jat ra ai atsam ningja hpe chye hkra atsawm akyu hpyi u. Rawt jat mayu ai atsam ningja langai hpe lata u. Ga shadawn, myit tau ya chye na matu, kamsham shada hpe grau karum ya mayu ai myit nga na matu shakut mai na kun? Kaga ni hte htuk hkra chye nga na matu, mara raw ya na matu ra nga ai kun? Rawt jat ra ai daw hpe chye hkra, kamhpa mai ai manang kaw na hpaji hpyi ai mung akyu nga ai.​—Gsh 27:6.

6. Tinang shalat mayu ai atsam ningja ni dep lu na matu gara hku galaw mai ai kun?

⁶ Bandung dep lu hkra shakut u. Gara hku galaw mai ai kun? Lam langai gaw, rawt jat mayu ai atsam ningja a lam hpe atsawm hkaja ai hku nna re. Kaga ni hpe mara raw ya chye hkra shakut na ngu dawdan da ai ngu saga. Kaga ni hpe sharawng awng let mara raw ya ai, n raw ya ai ni a Chyum Laika labau ni hpe hti nna myit sawn sumru mai ai. Yesu a kasi ningli hpe myit yu ga. Shi gaw, kaga ni hpe sharawng awng let mara raw ya ai. (Luk 7:47, 48) Lai wa sai aten na mara ni hpe n re ai sha, kaja  wa na masa hpe sha myit maju jung ai. Dai hte n bung ai sha, Yesu prat na Hparishe ni gaw, “masha kaga hpe hpa n nawn ai.” (Luk 18:9) Dai lam ni hpe sumru ngut ai hpang, ‘ngai mung kaga ni hpe gara hku mu ai kun? Kaga ni a gara atsam ningja ni hpe myit maju jung na kun?’ ngu tinang hkum tinang san u. Tinang gaw marai langai ngai hpe mara raw ya na matu yak nga yang, dai wa a atsam ningja ni hpe ka jahkrat na matu shakut u. ‘Yesu nga yang, shi hpe gara hku mu na kun? Mara raw ya na kun?’ ngu tinang hkum tinang san u. Dai hku hkaja ai gaw, tinang a myit mang ai lam hpe galai shai na matu karum ya ai. Tinang hpe hkra machyi hkra galaw ai wa hpe mara raw ya na matu, nnan hta grai shakut shaja ra na re. Raitim, matut shakut na nga yang, sharawng awng let mara raw ya lu wa na re.

7. Ga Shagawp 22:29 hte maren, dai ni aten atsam nga ai ni hpe Yehowa gara lam ni hku nna akyu jashawn nga ai kun?

⁷ Jahkrat mai ai kaga bandung gaw, asung shang ai ladat hpaji langai ngai hpe sharin la ai re. Behtela nta, Zuphpawng Htingnu ni, Nawku Htingnu ni gawgap ai hta, masha grai ra nga ai hpe myit yu u. Bungli galaw ai masha law malawng gaw, mahkrum madup nga ai ni hte rau galaw ai kaw na, ladat hpaji ni hpe chye chyang wa ai. Sumla hta madun da ai hte maren, hpunau ni mung, nauna ni mung, Zuphpawng Htingnu ni, Nawku Htingnu ni gram lajang ai hta karum ya lu na matu sharin la ai. “Htani htana re ai . . . Hkawhkam” Yehowa hte “hkawhkam ni a Hkawhkam” Yesu Hkristu gaw, dai zawn bungli chye galaw ai ni hpe akyu jashawn nna, mauhpa bungli ni hpe ngut kre awng dang hkra galaw nga ai. (1 Tm 1:17; 6:15; Ga Shagawp 22:29 hpe hti u.) Tinang arawng lu na matu n re ai sha, Yehowa hpe shagrau na matu anhte a ladat hpaji ni hpe akyu jashawn mayu ai.​—Yhn 8:54.

8. Shalat la ra na atsam ningja hpe chye hkra, gara hku galaw mai ai kun?

⁸ Tup hkrak re ai bandung jahkrat u. Gara atsam ningja hpe shalat la mayu ai kun? Shalat la ra na atsam ningja ni hpe chye hkra, myitsu salang ni hte byin mai yang, ninghtawn hpung kawan hpe san u. Ga shadawn, ga shaga chye ai atsam, sharin achyin atsam rawt jat na matu shanhte hpaji jaw ai nga yang, gara daw hpe shaman ra na hte seng nna tup hkrak tsun dan na matu san mai ai. Dai hpang, rawt jat hkra shakut u. Gara hku nna kun?

9. Atsam langai ngai hpe sharin la ai hte seng nna na a bandung hpe dep lu hkra gara hku galaw mai ai kun?

⁹ Bandung dep lu hkra shakut u. Nang gaw sharin achyin ai atsam rawt jat mayu ai ngu saga. Laika Hti Ai Hte Sharin Achyin Ai Lam Hta Shakut Nga U ngu ai laika buk hpe atsawm hkaja u. Bat lapran zuphpawng hta, lit lu ai nga yang, atsam nga ai hpunau hpe shawng madat shangun nna, rawt jat ra ai daw hpe hpaji jaw na matu karum hpyi mai ai. Atsam rawng ai wa ngu mying lu ai daram sha n-ga, shakut shaja ai wa, kamhpa mai ai wa ngu ai mying kaja lu na matu mung shakut u.​—Gsh 21:5; 2 Ko 8:22.

10. Rawt jat hkra gara hku galaw mai ai hpe ga shadawn tsun dan u. 

¹⁰ Nang rawt jat mayu ai atsam gaw, na matu grai yak nga yang gara hku kun? Asum hkum jaw! Hpunau Geri gaw laika nau n chye ai. Zuphpawng ni hta, nsen ja ja hte laika hti na matu kade daram yak wa ai hpe shi naw dum ai. Raitim, matut shakut ai. Lu la wa ai shaman shakyang lam ni a majaw, ya nga yang, nawku hpung hta sha n-ga, ninghtawn hte ginwang zuphpawng ni hta mungga lu htawn sai.

11. Timohti zawn sha, kahtap nna lu wa na lit ni a matu atsam hpring wa hkra hpa gaw karum ya na kun?

 ¹¹ Timohti gaw, ga grai chye shaga ai wa rai kun? Chyum Laika hta n tsun da ai. Raitim, Pawlu a hpaji jaw ga hpe hkan sa ai majaw, lit ni hpe grau tang du hkra gun hpai lu wa ai. (2 Tm 3:10) Dai zawn sha, anhte a atsam ni rawt jat hkra shakut na nga yang, kahtap nna lu wa na lit ni a matu atsam hpring wa na re.

12. Kaga ni karum ya ai majaw nang gara hku akyu lu nga ai kun?

¹² Kaga ni karum ya ai majaw, anhte yawng akyu lu nga ai. Ga shadawn, tsi rung lung ai shaloi, Tsi Rung Matut Mahkai Komiti (sh) Machyi Masha Kawan Katsan Ai Hpung Ni hta lawm ai myitsu salang ni a kawan katsan nna n-gun jaw ai hpe anhte chyeju dum ai. Mayak mahkak hkrum ai aten hta, anhte tsun ai hpe myitsu salang ni atsawm madat ya nna, shalan shabran ya ai majaw, chyeju dum ai. Chyum ga sharin galaw na matu karum shingtau ra ai shaloi, mahkrum madup nga ai ningshawng gaw, rau hkan sa nna hpaji jaw ai majaw, chyeju dum ai. Anhte hpe karum ya lu ai majaw, shanhte mung ngwi pyaw lam hkamsha ai. Anhte mung, hpunau nauna ni hpe karum ya ai hku nna, dai zawn ngwi pyaw lam hkamsha lu ai. “Hkam sha ai hta jaw ya ai mahtang grau a nga ai” ngu Yesu tsun ai. (Kas 20:35) Dai lam ni hte (sh) kaga lam ni hte Yehowa a magam hta grau shang lawm mayu ai nga yang, hpa gaw karum ya lu ai kun?

13. Bandung jahkrat ai shaloi, gara lam hpe matsing da ging ai kun?

¹³ Tup hkrak n re ai bandung jahkrat ai hpe koi u. Ga shadawn, ‘nawku hpung hta grau magam gun mayu ai’ ngu myit hkrup chye ai. Raitim, dai zawn bandung hpe gara aten hta, gara hku dep lu na ngu ai hpe chye na matu yak chye ai. Dai majaw, tup hkrak re ai bandung jahkrat u. Dai bandung hpe ka matsing da u. Dep lu hkra gara hku galaw na ngu ai hpe mung ka da u.

14. Bandung ni jahkrat ai shaloi, rap ra ai lam hpa majaw nga ra ai kun?

¹⁴ Bandung jahkrat ai shaloi, rap ra ai lam nga ra ai. Hpa majaw kun? Masa lam nkau hpe anhte n lu hkang ai majaw re. Ga shadawn, kasa Pawlu gaw, Htesaloni mare hta nawku hpung nnan hpaw na matu karum ya wa ai. Tinang nan, dai kaw nga nna Hkristan nnan byin wa ai ni hpe karum ya mayu na re.  Raitim, ninghkap ai ni a majaw, dai mare kaw nna Pawlu pru mat ra ai. (Kas 17:1-5, 10) Matut nga na nga yang, shi a majaw hpunau ni shoihpa hkrum na re. Raitim, shi asum n jaw ai. Masa lam ni hte maren galai shai ai. Hpang hta, Htesaloni mare kaw na Hkristan nnan ni a makam masham ngang kang wa hkra, karum ya na matu, Timohti hpe shangun dat ai. (1 Ht 3:1-3) Ra nga ai gara shara kaw mi raitim, sa na matu Timohti jin jin re ai majaw, Htesaloni masha ni kabu na gaw teng sha re.

15. Anhte n hkang lu ai masa ni a majaw, bandung ni gara hku galai shai chye ai kun? Ga shadawn jaw u. 

¹⁵ Htesaloni mare hta, Pawlu hkrum wa ai kaw na nang sharin la mai ai. Hkaw tsun magam hta, laksan ahkaw ahkang langai lu na matu, anhte bandung jahkrat tim, tinang n hkang lu ai masa, galai shai lam ni a majaw, bandung n dep mat ai baw byin chye ai. (Hpj 9:11) Dai zawn byin nga yang, dep lu ai kaga bandung langai galai shai nna jahkrat dat u. Tek yan Haidi ngu ai yan la gaw, dai zawn galaw wa ai. Hkamja lam a majaw, Behtela kaw na hkring ra mat ai. Raitim, Yehowa hpe tsawra ai majaw, magam bungli hta grau shang lawm lu hkra ahkaw ahkang tam ai. Shawng nnan, aten galu ningshawng galaw hpang ai. Dai hpang, laksan ningshawng ni hku nna lit ap hkrum ai. Ningtau hpung kawan hku nna Tek shaman shakyang hkrum ai. Hpang hta, ninghtawn hpung kawan ni hpe asak masat dat ai majaw, dai laksan ahkaw ahkang hta matut galaw na matu asak grai kaba sai lam chye wa ai. Myit daw mat ai raitim, Yehowa a matu kaga lam ni hte magam gun lu ai lam hkap la ai. “Magam gun ai lam langai hpe sha myit maju n jung nga na matu, anhte sharin la wa ai” ngu Tek tsun ai.

16. Galati 6:4 kaw na hpa sharin la lu ai kun?

¹⁶ Prat hta hkrum ai masa nkau hpe n hkang lu ai. Dai majaw, Yehowa a man hta tinang a manu hpe, tinang lu da ai ahkaw ahkang hte manu n dawdan na matu, kaga ni lu da ai ahkaw ahkang hte n shingdaw na matu ahkyak ai. “Kaga ni a prat hte tinang a prat hpe shingdaw na nga yang, ngwi pyaw lam mat mat na” ngu Haidi tsun ai. (Galati 6:4 hpe hti u.) Dai majaw, asung jashawn hkam na matu ahkaw ahkang ni hpe tam ra ai. c

17. Laksan ahkaw ahkang ni a matu atsam hpring wa hkra hpa galaw mai ai kun?

¹⁷ Prat hpe asan sha tawn ai, n ra ai sha gumhpraw n hkoi ai hku nna Yehowa a magam hta grau shang lawm na matu ahkaw ahkang tam mai ai. Bandung galu hpe dep lu hkra karum ya lu ai bandung kadun ni jahkrat u. Ga shadawn, aten galu ningshawng galaw na matu bandung tawn ai nga yang, ya kaw nna aten kadun ningshawng matut galaw  chyam yu mai na kun? Magam tau byin na matu bandung tawn ai nga yang, Karai a magam hta grau shang lawm lu na matu, nawku hpung kaw na asak kaba ai ni hte machyi ai ni hpang de sa kawan na matu aten grau jaw mai na kun? Ya lu la ai mahkrum madup ni gaw, hpang de Karai a magam hta laksan ahkaw ahkang ni lu na matu karum ya lu ai. Gara lit ni lu wa tim, kaja htum galaw na matu dawdan da u.​—Rom 12:11.

18. Sumla hta madun da ai Bebali a kasi ningli kaw na hpa sharin la mai ai kun?

¹⁸ Wenyi bandung ni jahkrat na matu asak kaba sai ngu ai lam n nga ai. Asak 75 ning rai sai nauna Bebali a kasi ningli hpe yu yu ga. Hkamja lam a majaw, lam nau n lu hkawm sai. Raitim, Myit Dum Poi kemping hta hpring tup shang lawm mayu ai majaw, tup hkrak re ai bandung ni jahkrat ai. Kemping hta bandung dep lu wa ai majaw, grai pyaw ai. Nauna a shakut ai lam gaw, kaga ni hpe Karai a magam hta shang lawm na matu shadut ya ai. Shadawn sharam sha nga ai masa ni a lapran, dang lu ai daram galaw nga ai asak kaba ai hpunau nauna ni hpe Yehowa grai manu shadan ai.​—Shk 71:17, 18.

19. Anhte jahkrat mai ai wenyi bandung nkau mi gaw hpa ni rai kun?

¹⁹ Dep lu ai bandung ni hpe jahkrat u. Yehowa a myi man lu shangun ai atsam ningja ni shalat la u. Karai Kasang hte uhpung a matu asung shang na ladat hpaji ni hpe sharin la u. Hpunau nauna ni hpe grau sak jaw lu na matu ahkaw ahkang tam u. d Rai yang, Yehowa a shaman chyeju a majaw, Timohti zawn “na a kung hpan wa ai nyan masha mahkra a man e dan leng” wa na re.​—1 Tm 4:15.