1. Hpa gaw ngwi pyaw shangun ai kun?

 YEHOWA gaw, anhte hpe ngwi pyaw shangun mayu ai. Kabu gara ai gaw, wenyi asi re ai hpe anhte chye ai. (Gal 5:22) Hkam la ai hta na, jaw ya ai mahtang grau ngwi pyaw shangun ai majaw, hkaw tsun magam hta myit masin mahkra hte shang lawm ai shaloi, hpunau nauna ni hpe lam amyu myu hku nna karum ai shaloi, ngwi pyaw lam hkamsha lu ai.​—Kas 20:35.

2-3. (a) Galati 6:4 hku nga yang, Yehowa a magam hta matut kabu gara lu na matu, gara lam lahkawng gaw karum ya lu ai kun? (b) Ndai sumhpa hta hpa lam bawngban na kun?

² Matut ngwi pyaw na matu, karum ya ai lam lahkawng hpe Galati 6:4 hta kasa Pawlu tsun da ai. (Hti u.) Langai, anhte a bandung gaw, Yehowa hpe tinang a kaja htum hpe sak jaw na matu rai ging ai. Tinang a kaja htum hpe sak jaw ai nga yang kabu gara ging ai. (Mat 22:36-38) Lahkawng, kaga ni hte n shingdaw ging ai. Hkamja lam, machye machyang, atsam ningja ni a majaw, hpa ni ngut kre awng dang lu wa ai raitim, Yehowa hpe chyeju dum ging ai. Anhte lu da ai lam yawng gaw Karai jaw da ai re. Hkaw tsun magam hta, kaga ni grau awng dang ai shaloi, kabu ya ging ai. Shanhte a atsam ningja hpe tingkyeng akyu a matu, mying gumhkawng na matu n jailang ai sha, Yehowa hpe shakawn na matu akyu jashawn nga ai majaw re. Shanhte hte shingjawng na malai, sharin la ging ai.

³ Hkaw tsun magam hta, galaw mayu ai daram n lu galaw ai shaloi, gara hku galaw na hpe ndai sumhpa hta bawngban mat na re. Tinang hta nga ai shaman chyeju ni hpe kaja htum gara hku sak jaw na kun? Kaga ni a kasi ningli ni kaw na hpa sharin la mai ai kun? ngu ai hpe bawngban na re.

4. Gara masa gaw myit daw shangun ai kun? Ga shadawn jaw u.

⁴ Yehowa a mayam nkau gaw, asak kaba wa ai majaw, hkam n kaja ai majaw, Karai a magam hta galaw mayu ai daram n lu galaw nga ai. Nauna Kero dai zawn byin wa ai. Moi aten hta, shi gaw grau ra ai shara hta magam gun wa ai. Dai shaloi, Chyum ga sharin 35 nga nna, apnawng nna hkalup hkam ai du hkra masha law law hpe karum ya lu wa ai. Hkaw tsun magam hta awng dang wa ai. Raitim, ya gaw hkamja lam a majaw, shinggan nau n lu sa sai. Shi ndai hku tsun ai: “Hkamja lam a majaw, kaga ni daram n lu galaw sai. Dai majaw, shanhte daram sadi n dung ai ngu hkamsha ai. Tinang a myit mang ai lam hte prat gaw, kaga ga rai nga ai majaw grai yak ai.” Yehowa a matu, Kero kaja htum sak jaw mayu ai gaw shakawn hpa re. Myit tau ya ai Karai Kasang gaw, shi a myit jasat hpe manu shadan na gaw teng sha re.

5. (a) Tinang a masa lam ni a majaw, myit daw nga yang, hpa hpe dum ging ai kun? (b) Sumla hta mu lu ai hte maren, hpunau langai gaw Karai a magam hta gara hku nna kaja htum sak jaw nga ai kun?

⁵ Kalang lang, tinang a masa lam ni a majaw, myit daw wa yang, ‘ngai hpe Yehowa hpa hpyi shawn ai kun?’ ngu tinang hkum tinang san u. Ya na masa hta, kaja htum sak jaw na matu sha Yehowa hpyi shawn ai. Ndai mabyin hpe myit yu ga: Asak 80 daram rai sai nauna gaw, Karai a magam hta, asak 40 aten na daram n lu galaw sai majaw myit daw nga ai. Kaja htum hpe sak jaw nga tim, Yehowa n ra sharawng ai ngu hkamsha nga ai. Karai Kasang gaja wa n ra ai kun? Asak 40 hta kaja htum sak jaw wa ai zawn, 80 hta mung kaja htum sak jaw nga ai re. Tinang galaw ai lam hpe Yehowa n ra ai ngu hkamsha nga yang, hpa hpe ra ai, n ra ai hpe masat ai gaw Yehowa re ai hpe dum u. Tinang kaja htum sak jaw nga dingsa, grai ram ai ngu Yehowa tsun na gaw teng sha re.​—Mahte 25:20-23 hte shingdaw yu u.

6. Mariya a mabyin kaw na hpa sharin la lu ai kun?

⁶ Tinang n lu galaw ai hpe n re ai sha, lu galaw ai hpe myit maju jung yang, grau ngwi pyaw wa na re. Hkamja lam a majaw, Karai a magam hta nau n shang lawm lu sai nauna Mariya a lam hpe myit yu ga. Nnan hta, myit daw wa nna, akyu n rawng ai ngu hkamsha ai. Raitim, yup-ra kaw sha nga ra ai nauna langai hpe sadi hkrup nna, karum ya na matu dawdan dat ai. Shi ndai hku tsun ai: “Shi hte rau phone hte, laika hte sakse hkam na matu lajang ai. Dai zawn karum ya lu ai majaw, nta bai wa shagu myit dik lam hkamsha ai.” Anhte mung n lu galaw ai hpe n re ai sha, lu galaw ai hpe myit maju jung yang, grau ngwi pyaw wa na re. Raitim, magam bungli hta grau galaw lu ai shaloi (sh) lam nkau hta grau chye galaw ai shaloi hpa galaw mai ai kun?

7. Kasa Petru gaw Hkristan ni hpe tatut re ai gara hpaji jaw ga tsun wa ai kun?

⁷ Tinang lu da ai shaman chyeju, atsam ningja ni hte kaga ni hpe madi shadaw na matu jailang u ngu nna, kasa Petru gaw shi a shawng nnan na laika hta hpunau nauna ni hpe n-gun jaw da ai. Shi ndai hku tsun ai: “Nanhte gaw Karai Kasang kaw na laksan chyeju kumhpa ni hpe hkam la lu ai hte maren, Karai Kasang a chyeju kumhpa amyu myu hpe kaja ai lit hkam hpareng wa zawn shada da a mai kaja ai akyu a matu jai lang nga mu.” (1 Pe 4:10, JCLB) Kaga ni manawn na, myit daw na tsang nna, tinang a shaman chyeju hpe hpring tup n jailang ai baw n byin ging ai. Dai hku galaw na nga yang, Yehowa hpe kaja htum sak jaw nga ai n re.

8. 1 Korinhtu 4:6, 7 hku nga yang, tinang a chyeju kumhpa hte seng nna shakawng ai hpe hpa majaw koi ging ai kun?

 ⁸ Tinang a chyeju kumhpa hpe hpring tup jailang ra ai raitim, n shakawng hkrup na matu sadi ra ai. (1 Korinhtu 4:6, 7 hpe hti u.) Ga shadawn, nang gaw, Chyum ga sharin lu hpang ai hta grai ram ai ngu saga. Dai chyeju kumhpa hpe n htingnut ai sha jailang u. N shakawng na matu gaw ahkyak ai. Hkaw tsun magam hta, ya sha Chyum ga sharin hpang lu wa ai ngu saga. Dai lam hpe bai tsun dan mayu ai. Dai shaloi, kaga nauna langai gaw, magazin lu garan ai mahkrum madup hpe tsun dan nga ai. Shi gaw, magazin sha lu garan wa ai. Tinang gaw, Chyum ga sharin hpang lu wa ai. Rai yang, hpa galaw na kun? Tinang a mahkrum madup gaw yawng hpe n-gun lu shangun na raitim, hpang she tsun dan na matu dawdan dat ai. Dai gaw, tsawra myit madun ai re. Chyum ga sharin hpang na matu saw shaga ai hpe matut galaw nga u. Nang hta chyeju kumhpa nga ai. Dai hpe akyu jashawn u.

9. Tinang a chyeju kumhpa hpe gara hku jailang ging ai kun?

⁹ Tinang lu da ai atsam yawng gaw, Karai Kasang kaw na re ai hpe dum u. Dai hpe mying gumhkawng na matu n re ai sha, nawku hpung hpe madi shadaw ya na matu jailang ging ai. (Hpl 2:3) Kaga ni hta na grau ai hpe madun na matu, tinang a n-gun atsam ni hpe n jailang ai sha, Karai a myit ra ai lam hpe galaw na matu, Shi hpe shakawn na matu, jailang na nga yang, myit dik lam lu na re.

10. Tinang hkum tinang kaga ni hte hpa majaw n shingdaw ging ai kun?

¹⁰ Anhte n sadi hkrup yang, tinang a atsam hpe kaga ni a gawngkya ai lam hte shingdaw hkrup chye ai. Ga shadawn, hpunau langai mungga htawn ai hta grai ram ai ngu saga. Dai gaw, shi a atsam re. Raitim, shi a myit hta mungga nau n chye htawn ai hpunau hpe yu kaji hkrup chye ai. Dai hpunau gaw, manam daw ai lam, kasha ni hpe bau maka ai lam, myit rawt let hkaw tsun ai lam hta gaw, grau galaw lu ai rai na re. Yehowa hpe magam gun na matu, kaga ni hpe karum ya na matu, tinang a atsam ni hpe jailang nga ai hpunau nauna ni nga ai gaw chyeju dum hpa re.

11. Yesu a kasi hpe hkan sa na matu hpa majaw shakut ging ai kun?

¹¹ Kaga ni hte n shingdaw ging tim, sadi dung ai ni a kasi ningli ni kaw na sharin la mai ai. Ga shadawn, anhte gaw, Yesu zawn hkum tsup ai ni n raitim, shi a kaja ai atsam ningja ni, galaw  ai lam ni kaw na sharin la mai ai. (1 Pe 2:21) Yesu a kasi ningli hpe htep lahti hkan sa na matu shakut na nga yang, Yehowa a matu grau kaja ai mayam ni byin wa na re. Hkaw tsun magam hta mung grau tang du wa na.

12-13. Hkawhkam Dawi kaw na hpa sharin la mai ai kun?

¹² N hkum tsup tim, kasi la ging ai sadi dung ai num, la ni a kasi law law Chyum Laika hta lawm ai. (Heb 6:11) Hkawhkam Dawi hpe “nye a myit hte tup ai” wa ngu Yehowa tsun ai. (Kas 13:22) Dawi gaw, hkum tsup ai wa n re. Mara kaba ni galaw wa ai. Raitim, anhte a matu kasi kaja ai wa re. Hpa majaw nga yang, sharin shaga hkrum ai shaloi, lawt ga n tsun ai. Sharin shaga ai hpe hkap la nna, galaw hkrup wa ai mara ni a matu jet ai myit malai lu ai. Dai majaw, shi hpe Yehowa mara raw ya ai.​—Shk 51:3, 4, 10-12.

¹³ Tinang hkum tinang ndai ga san ni san ai hku nna, Dawi kaw na sharin la mai ai: ‘Sharin shaga hkrum ai shaloi gara hku bai htang ai kun? Mara hpe kalang ta yin la ai kun? Lawt ga tsun ai kun? Kaga ni hpe mara shagun ai kun? Dai mara hpe kahtap n galaw hkrup hkra shakut ai kun?’ Chyum Laika kaw na kaga num, la ni a lam hti ai shaloi, dai ga san ni san mai ai. Shanhte hkrum wa ai mayak mahkak ni hpe nang hkrum nga ai kun? Shanhte hta gara atsam ningja ni nga ai kun? ‘Yehowa a dai sadi dung ai mayam ni hpe ngai gara hku kasi la mai na kun?’ ngu tinang hkum tinang san u.

14. Kamsham shada a kasi ningli hpe hkaja ai kaw na gara hku akyu lu mai ai kun?

¹⁴ Kamsham shada re ai asak kaji kaba yawng kaw na anhte sharin la mai ai. Ga shadawn, asak bung shada a shadut ai lam, nta masha ni a ninghkap ai lam, hkam n kaja ai lam zawn re ai mayak mahkak ni hpe sadi dung let hkam jan nga ai marai langai ngai hpe chye ai kun? Shi a gara atsam ningja hpe grau kasi la mayu ai kun? Shi a kasi kaja hpe myit sawn sumru ai gaw, tinang a mayak mahkak hpe hkam jan lu na matu karum ya ai. Ya aten na kasi la ging ai ni hpe lu da ai gaw, chyeju dum hpa, kabu hpa re.​—Heb 13:7; Yak 1:2, 3.

15. Kasa Pawlu n-gun jaw wa ai gara hpaji jaw ga gaw, Yehowa a magam hta matut ngwi pyaw na matu karum ya lu ai kun?

¹⁵ Nawku hpung hta zinlum lam, simsa lam rawt jat na matu anhte yawng tinang a kaja htum hpe jaw ra ai. Tsa ban langai na Hkristan ni a lam hpe myit yu u. Shaman chyeju amyu myu, lit amyu myu lu da ai. (1 Ko 12:4, 7-11) Raitim, shada da n shingjawng ai. Hka bra ai lam n nga ai. “Hkristu a hkum hpe shagrin” ya na matu, ra ai lam yawng hpe galaw u  ngu shanhte hpe Pawlu n-gun jaw ai. Ehpesu nawku hpung hpe ndai hku tsun ai: “Daw shan ni langai hte langai shachyen lu ai hte maren, tsaw ra ai hta de shatup hkra, tinang kung kaba wa ai lam, dai hkum hkrang gaw shabyin wu ai.” (Ehp 4:1-3, 11, 12, 16) Dai hte maren galaw ai majaw, zinlum ai lam, simsa ai lam ni rawt jat wa ai. Dai ni aten na nawku hpung ni hta mung, dai hte maren sha re.

16. Hpa galaw na matu dawdan da ging ai kun? (Hebre 6:10)

¹⁶ Tinang hkum tinang kaga ni hte n shingdaw na matu dawdan da u. Yesu kaw na sharin la u. Yesu a atsam ningja hpe kasi la u. Moi prat hte ya prat na makam masham ngang kang ai kasi ningli ni hpe hkan sa u. Kaja htum sak jaw na nga yang, ding hpring ai Karai Kasang gaw, na a “magam bungli gunhpai” ai lam hpe malap kau ya na n re. (Hebre 6:10 hpe hti u.) Nang myit masin mahkra hte magam gun nga ai hpe Yehowa manu shadan ai. Dai majaw, kabu gara let matut magam gun nga u.