1. Hpan Madu hte seng nna nang hpa hpe sharin la wa ai kun?

NANG gaw Yehowa Sakse langai hku nna kaba wa ai nga yang, ma kaji ten kaw na Yehowa a lam hpe sharin la wa na re. Shi gaw Hpan Madu re ai, shi hta ra sharawng hpa atsam ningja ni nga ai, shinggyim masha ni a matu kaja ai yaw shada lam nga ai hpe sharin la wa na re. —Nin 1:1; Kas 17:24-27.

2. Hpan Madu hpe kam ai ni hpe masha nkau gara hku mu mada ai kun?

² Raitim, Karai Kasang nga ai (sh) shi gaw Hpan Madu re ngu ai hpe masha law law n kam ma ai. De a malai, asak gaw shi hkrai byin wa ai, asan sha re ai asak hkrang kaw nna, grai shuk ai asak hkrang de gau ngwi ngwi galai mat ai ngu shanhte kam ma ai. Dai hku kam ai ni kaw na nkau gaw hpaji grai chye ai ni re. Chyum Laika gaw shut ai ngu nna hpung tang hpaji gaw sakse madun ai, Hpan Madu hpe kam ai ni gaw hpaji n rawng ai ni, gawng kya ai ni, anya ai ni re ngu shanhte tsun ma ai.

3. Tinang a makam masham hpe shangang shakang na matu hpa majaw ahkyak ai kun?

³ Hpaji du nkau mi a mu mada lam gaw, Yehowa gaw tsawra myit nga ai Hpan Madu re ngu ai anhte a makam masham hpe gawng kya shangun lu ai kun? Yehowa gaw Hpan Madu re ngu ai hpe anhte hpa majaw kam ai ngu ai hta grai madung ai. Dai hpe kam na matu shadut hkrum wa ai majaw kun? (sh) madi madun lam ni hpe tinang nan aten la nna san jep wa ai majaw kun? (1 Ko 3:12-15) Yehowa Sakse byin ai kade na sai raitim, anhte a makam masham hpe matut ngangkang hkra galaw ra ai. Dai hku galaw na nga yang, Karai a Mungga hte nhtan shai ai ni sharin ya nga ai “matsun maroi ga hkan ai zai byeng-ya hte lila rai nga ai hkalem hkalau ga” ni hte hkalem hkrum sana n re. (Kol 2:8; Heb 11:6) Ndai sumhpa hta anhte hpe karum ya lu ai lam 3 hpe bawngban mat na re. (1) Hpan Madu hpe masha law law hpa majaw n kam ai kun? (2) Hpan Madu hpe kam ai myit nga hkra gara hku galaw lu na kun? (3) Dai makam masham hpe ngangkang hkra gara hku matut galaw lu na kun?

4. Hebre 11:1 hku nga yang, jet ai makam masham gaw gara hta madung tawn ai kun?

⁴ Makam masham ngu ai gaw, madi madun lam n nga ai sha lama ma hpe kam nga ai lachyum re ngu masha nkau sawn la ma ai. Raitim, Chyum Laika hku nga yang, dai gaw jet ai makam masham n re. (Hebre 11:1 hpe hti u.) Yehowa, Yesu hte sumsing Mungdan zawn re ai, myi hte n mu lu nna gaja wa nga ai lam ni hpe kam ai gaw, kam mai ai madi madun lam ni hta madung nga ai hpe yu yu ga. (Heb 11:3) Yehowa Sakse langai byin wa ai hpungtang hpaji du langai ndai hku tsun ai: “Anhte a makam masham gaw hpa madi madun lam mung n nga ai hpe myi di chyip kam nga ai n re. Hpungtang hpaji hte seng ai lam ni hpe mung n yen kau ai.”

5. Asak gaw Hpan Madu n nga ai sha byin wa ai re ngu masha law law hpa majaw kam ai kun?

⁵ Anhte ndai hku san chye ai: ‘Hpan Madu nga ai ngu ai madi madun lam law law nga ai rai yang, asak yawng hpe Karai Kasang hpan wa ai n re ngu nna masha law law hpa majaw kam ma ai kun?’ Masha nkau gaw madi madun lam ni hpe tinang nan galoi n hkaja wa ai. Ya, Yehowa Sakse langai byin nga sai Robat ndai hku tsun ai: “Jawng hta hpan da ai lam hte seng nna galoi n sharin ya ai majaw, dai hpe ngai n kam wa ai. Asak 20 ning jan rai yang she, Yehowa Sakse ni hte tsun shaga hkat nna, Karai Kasang gaw yawng mayawng hpe hpan da ai, Chyum Laika hta kam mai ai madi madun lam ni nga ai ngu ai hpe chye wa ai.” *—“ Kanu Kawa Ni Hpe Hpyi Shawn Ai Lam” ngu ai lawk hpe yu u.

6. Hpan Madu nga ai ngu ai hpe masha nkau hpa majaw n kam ai kun?

⁶ Masha nkau gaw shanhte mu lu ai lam hpe sha kam ai majaw, Hpan Madu hpe n kam ai  ngu tsun ma ai. Raitim, gaja nga yang gaw n mu lu ai lam ni hpe shanhte kam ai. Ga shadawn hku nna, nbung gaw gaja wa nga ai hpe sakse madun lu ai majaw, dai hpe shanhte kam ai. Chyum Laika hta tsun da ai makam masham ngu ai hta myi hte n mu lu tim, gaja wa nga ai ngu ai hpe madun dan ai sakse ni lawm ai. (Heb 11:1) Aten la nna madi madun lam ni hpe tinang nan shakut nna hkaja yu ra ai. Raitim, masha law law gaw dai hku n galaw ma ai. Madi madun lam ni hpe tinang nan n hkaja ai masha langai gaw, Karai Kasang n nga ai ngu sawn la chye ai.

7. Karai Kasang gaw ninggawn tawa hpe hpan da ai ngu ai hpe hpaji du yawng ndang ma ai kun? Sanglang dan u.

⁷ Madi madun lam ni hpe hkaja ngut ai hpang, hpungtang hpaji du nkau gaw ninggawn tawa hpe Karai Kasang hpan tawn da ai re ngu kam wa ma ai. * Robat zawn, masha nkau  gaw hpan da ai lam hte seng nna dakkasu hta n lu sharin wa ai majaw, Hpan Madu n nga ai ngu nna kam wa ai rai na re. Raitim, hpungtang hpaji du law law gaw Yehowa hpe chye wa nna tsawra wa ma ai. Dai hpungtang hpaji du ni zawn, anhte a hpaji shingdu labau gara hku mi nga ai raitim, Karai Kasang hpe kam ai myit ngangkang nga ra ai. Kadai mung anhte a matu n galaw ya lu ai.

8-9. (a) Ya gara ga san hpe bawngban lu na kun? (b) Hpan da ai lam ni hpe hkaja ai kaw nna nang gara hku akyu lu la na kun?

⁸ Hpan Madu hpe kam ai myit nga hkra nang gara hku galaw lu na kun? Lam 4 hpe bawngban yu ga.

⁹ Hpan da ai lam ni hpe hkaja yu u. Dusat ni, hpun ni hte shagan ni a lam hpe sawk sagawn yu ai hku nna, Hpan Madu hpe kam ai myit nga hkra galaw lu ai. (Shk 19:1; Esa 40:26) Dai lam ni hpe grau hkaja magang, Yehowa gaw Hpan Madu re ai hpe grau kam wa magang rai na re. Anhte a laili laika ni hta hpan da ai lam amyu myu hpe sanglang da ai sumhpa ni lawm ai. Dai lam ni hpe chye na na matu yak tim pyi, n hti ai sha hkum shalai kau. Dang lu ai daram hkaja u. Kade n na shi ai shaning ni na, ginwang zuphpawng ni hta madun wa ai hpan da ai lam hte seng ai grai kaja ai video ni, anhte a website re ai jw.org hta bai yu na matu hkum malap.

10. Hpan Madu nga ai lam hpe sakse madun ai, ga shadawn langai hpe tsun dan u. (Roma 1:20)

¹⁰ Hpan da ai lam ni hpe hkaja ai shaloi, Hpan Madu hte seng nna sharin la lu ai lam ni hpe atsawm myit maju jung u.(Roma 1:20 hpe hti u.) Ga shadawn, jan gaw mungkan hta nga ai asak hkrung mahkrung ni ra kadawn ai nhtoi hte lum ai dat hpe madi shadaw ya ai. Raitim, jan lagaw nkau gaw anhte hpe shoihpa jaw lu ai. Anhte shinggyim masha ni gaw, dai zawn jan lagaw ni kaw na makawp maga lam ra ai. Anhte makawp maga hkrum nga ai. Gara hku nna kun? Mungkan grup-yin hta ozung dat htap mi nga ai. Dai gaw shoihpa nga ai jan lagaw ni kaw na, anhte hpe makawp maga ya ai. Shoihpa nga ai jan lagaw ni law wa yang, anhte hpe makawp maga ya ai dat ni mung grau law wa ai. Ya, ndai mabyin ni a shingdu hta marai langai ngai nga nna, shi gaw tsawra myit hte nyan hpaji rawng ai Hpan Madu re hpe myit hkrum ai n re i?

11. Hpan da ai lam ni hpe kam ai myit ngangkang shangun lu ai lam ni hpe gara kaw tam lu na kun? (“ Makam Masham Hpe Shangang Shakang Ya Lu Ai Lam Ni” ngu ai lawk hpe yu u.)

¹¹ Sin Langchyi Laika Dum-E hte jw.org hta sawk sagawn ai hku nna hpan da ai lam ni hpe kam ai myit ngangkang shangun ai lam ni hpe tam mu lu ai. “Shi Hkrai Shi Byin Wa Lu Na Kun?” ngu ai matut manoi sumhpa ni kaw na video ni hte sumhpa ni hpe hkaja mai ai. Dai hta dusat ni hte kaga hpan da ai lam ni hte seng nna, mauhpa mabyin ni hpe kadun mi hku nna madun da ai. Hpungtang hpaji du ni gaw, shing-ra tara hta shanhte mu lu ai lam ni hte maren hkan galaw na matu, gara hku shakut ai ngu ai ga shadawn ni mung lawm ai.

12. Chyum Laika hkaja ai shaloi, anhte sadi yu ging ai lam nkau gaw hpa ni rai kun?

¹² Chyum Laika hpe hkaja u. Laika pang 4 hta tsun da ai hpungtang hpaji du gaw, shawng nnan hta Hpan Madu hpe n kam ai. Raitim, hpang de shi kam wa ai. Shi ndai hku tsun ai: “Nye a makam masham gaw ngai hkaja wa ai hpungtang hpaji hta sha madung ai n re. Chyum Laika hpe atsawm hkaja wa ai hta mung madung ai.” Nang hta Chyum Laika sharin ya ai lam hte seng nna tup hkrak tengman ai machye machyang nga ngut chyalu rai na re. Raitim, Hpan Madu hpe kam ai myit nga na matu, Karai a Mungga hpe matut hkaja ra ai. (Ysh 1:8; Shk 119:97) Labau ni hte seng nna, Chyum Laika hta ahkri ahkrai tsun da ai hpe sadi yu u. Dai myihtoi ga ni gaw langai hte langai  matut manoi nna hkrak tup byin nga ai lam ni hpe mung myit maju jung yu u. Dai hku galaw na nga yang, tsawra myit nga ai Hpan Madu gaw anhte hpe hpan wa nna, Chyum Laika hpe mung shi shung ya wa ai ngu ai, na a makam masham hpe shangang shakang ya lu na re. —2 Tm 3:14; 2 Pe 1:21.

13. Karai a Mungga hta mu lu ai hpaji byeng-ya hte seng ai, ga shadawn langai gaw hpa rai kun?

¹³ Karai a Mungga hkaja ai shaloi, dai hta lawm ai hpaji jaw ga ni gaw, kade daram karum lu shangun ai hpe sadi yu u. Ga shadawn, gumhpraw hpe marin ai myit gaw shoihpa byin shangun nna, ‘yawn hkyen ai lam amyu myu’ hpe shabyin ya lu ai ngu, Chyum Laika hta shaning law law kaw na sadi jaw da ai. (1 Tm 6:9, 10; Gsh 28:20; Mat 6:24) Dai sadi jaw ga gaw, ya aten hte naw seng ai kun? Dai ni aten na masha ni a myit jasat hpe sawk sagawn da ai laika buk langai hta, ndai hku tsun da ai: “Arung arai ra marin ai ni gaw ngwi pyaw ai lam yawm wa nna, grau myit daw wa ai. Gumhpraw grau lu mayu ai masha ni gaw myit hkamja lam n nga wa ai, hkumhkrang hkamja lam hta mung manghkang grau law wa ai.” Gumhpraw marin ai hpe koi na matu, Chyum Laika hta sadi jaw da ai gaw grai kaja ai lam re. Akyu shabyin ya lu ai kaga Chyum Laika npawt tara ni hpe nang myit yu mai ai kun? Chyum Laika hpaji jaw ga ni hpe manu shadan magang, anhte a tsawra myit rawng ai Hpan Madu jaw ai hpaji byeng-ya hpe kamhpa magang rai na re. (Yak 1:5) Anhte a prat mung grau ngwi pyaw wa na re. —Esa 48:17, 18.

14. Chyum Laika hkaja ai gaw Yehowa hte seng nna hpa hpe sharin ya ai kun?

¹⁴ Yehowa hpe grau chye chyang wa hkra ngu ai bandung hte Chyum Laika hkaja u. (Yhn 17:3) Chyum Laika hkaja ai hte maren, Yehowa a lam hte shi a atsam ningja ni hpe grau sharin la lu wa na re. Dai lam ni gaw, hpan da ai lam ni hta dandawng nga ai atsam ningja ni hte maren sha re. Yehowa a atsam ningja ni hte seng nna hkaja ai gaw, Yehowa gaw gaja wa nga ai wa re hpe kam shangun ai. (Pru 34:6, 7; Shk 145:8, 9) Yehowa a lam hpe grau chye wa ai hte maren, shi hpe kam ai myit grau ngangkang wa na, shi hpe grau tsawra wa na, shi hte hku hkau lam grau ngangkang wa na re.

15. Na a makam masham hpe kaga ni hpe tsun da ai kaw nna nang gara hku akyu lu la na kun?

¹⁵ Karai Kasang hpe kam ai na a makam masham hte seng nna, kaga ni hpe tsun dan u. Dai hku galaw na nga yang, na a makam masham grau ngangkang wa na re. Raitim, nang sakse hkam dat ai marai langai ngai gaw, Karai Kasang gaja wa nga ai hte seng nna ga san san wa ai shaloi, gara hku bai htai ra na hpe n chye ai nga yang gaw gara hku kun? Anhte a laili laika ni hta dai ga san hpe htai ya ai Chyum daw ni hpe tam yu nna shi hpe bai tsun dan u. (1 Pe 3:15) Mahkrum madup nga ai kaga hpunau nauna langai ngai hpe mung karum hpyi mai ai. Dai wa gaw, Chyum Laika mahtai hpe hkap la ai raitim, n hkap la ai raitim, sawk sagawn ai lam kaw nna nang akyu lu la na re. Makam masham grau ngangkang wa na re. Hpan Madu n nga ai ngu tsun nga ai hpaji du ni hte hpaji chye ai zawn re ai ni tsun nga ai shut shai ai ga ni gaw, nang hpe aloi sha hkra machyi shangun lu sana n re.

16. Anhte a makam masham hpe matut ngangkang hkra n galaw yang, hpa byin wa lu ai kun?

¹⁶ Yehowa hpe nawku ai kade na sai raitim, shi hpe kam ai anhte a makam masham hpe matut ngangkang hkra galaw ra ai. Hpa majaw kun? Anhte n sadi ai nga yang, makam masha gawng kya wa chye ai majaw re. Makam masham ngu ai gaw, n mu lu ai lam a madi madun lam hta madung nga ai hpe myit dum u. Anhte n mu lu ai lam ni hpe aloi sha malap mat chye ai. Dai majaw, Pawlu gaw makam masham n nga ai hpe “kap loi la ai yubak” ngu tsun ai.  (Heb 12:1) Dai zawn n byin hkra gara hku galaw lu na kun? —2 Ht 1:3.

17. Makam masham ngangkang hkra hpa gaw karum ya lu ai kun?

¹⁷ Langai, chyoi pra ai wenyi lu hkra Yehowa kaw chyahkring hkring akyu hpyi u. Hpa majaw kun? Hpa majaw nga yang, makam masham ngu ai gaw wenyi asi ni kaw na langai re ai majaw re. (Gal 5:22, 23) Shi a chyoi pra ai wenyi a karum ai lam n lawm ai sha, anhte a Hpan Madu hpe kamsham hkra n lu galaw ai. Chyoi pra ai wenyi lu na matu, Yehowa kaw ayan hpyi shawng ai nga yang, shi mung jaw na re. (Luk 11:13) Laksan hku nna, “anhte a kamsham ai myit shalaw ya” rit ngu kyu hpyi mai ai. —Luk 17:5.

18. Shakawn 1:2,3 hku nga yang, anhte gara ahkaw ahkang lu la nga ai kun?

¹⁸ Lahkawng, Karai a Mungga hpe ayan hkaja u. (Shakawn 1:2, 3 hpe hti u.) Shakawn kungdawn laika hpe ka ai shaloi, Karai a Tara hpe ma hkra bai ka tawn da ai laika kachyi mi sha nga ai. Raitim, hkawhkam hte hkinjawng ni gaw lata hte bai ka wa nna, sanit ning hta kalang “numsha, lasha ma kaji kaba” ni hte Israela mung kaw nga ai maigan masha yawng gaw, Karai a Tara hpe madat na matu rau hpawng wa ma ai. (Trj 31:10-12) Yesu prat hta laika kasu ni hpe tara jawng ni hte masha kachyi mi a lata hta sha mu lu ai. Dai hte n bung ai sha, dai ni ten na masha law law gaw Karai a Mungga hpe daw hte daw (sh) buk ting hku nna lu la nga sai. Dai gaw grai kaja ai ahkaw ahkang re. Dai ahkaw ahkang hpe manu shadan ai lam anhte gara hku madu lu na kun?

19. Anhte a makam masham matut ngangkang hkra hpa galaw ra ai kun?

¹⁹ Karai a Mungga hpe ayan hti ai hku nna, dai ahkaw ahkang hpe manu shadan ai lam anhte madun lu ai. Aten lu ai shaloi hti ai daram sha n re ai sha, Chyum Laika hpe hti nna hkaja na matu, chyarang galaw da ging ai. Ayan hkaja nga na nga yang, anhte a makam masham mung ngangkang lu ai.

20. Anhte hpa galaw na matu dawdan da ging ai kun?

²⁰ Ndai mungkan a hpaji byeng-ya rawng ai ni hte myit kunghpan ai ni hte n bung ai sha, Karai a Mungga hta madung tawn ai ngangkang ai makam masham anhte hta nga ai. (Mat 11:25, 26) Chyum Laika hkaja ai akyu hku nna, mungkan a masa lam ni gaw hpa majaw dai daram sawng taw ai, Yehowa gaw dai hpe hpa galaw ya na ngu ai hpe chye wa ai. Dai majaw, anhte a makam masham ngangkang wa hkra, Hpan Madu hpe masha law law kam wa hkra, dang lu ai daram karum ya lu na matu dawdan da ga. (1 Tm 2:3, 4) Dai hta n-ga, mungkan hta nga ai asak hkrung mahkrung yawng gaw, Shingran 4:11 hta lawm ai ga ni hpe shakawn na aten hpe matut la nga ga. Dai hta ndai hku tsun ai: “Anhte a Madu [Yehowa] Karai Kasang e, nga yawng nga pra hte hpe nang hpan tawn da . . . ai majaw, nang gaw hpung shingkang, . . . lu la na ging dan nga ndai law.”