1. Yehowa hpan tawn da ai lam yawng hpe myit yu ai shaloi, anhte ni gara ga san san chye ai kun?

YEHOWA hpan da ai ninggawn tawa a lam hpe myit yu ai shaloi, shakawn kungdawn sara Dawi zawn hkamsha chye ai. Shi ndai hku kyu hpyi nna san wa ai: “Na a sumsing lamu gaw, na a layung a amu, Nang tawn da ai shata hte shagan ni hpe ngai mada yu yang: Nang a dum nga ai shinggyim masha hte, Nang kawan yu nga ai masha kasha gaw, hpa wa mi rai nga a hka?” (Shk 8:3, 4) Dawi zawn sha, anhte ni gaw ninggawn tawa hte shingdaw dat yang, kade daram kaji ai hpe myit hkrup na re. Raitim, Yehowa anhte hpe lanu lahku nga ai gaw mau hpa re. Yehowa gaw shawng nnan na shinggyim masha re ai, Adam yan Ewa hpe lanu lahku ai sha n-ga, shi a nta masha hku nna shabyin wa ai hpe mu lu na re.

2. Adam yan Ewa a matu, Yehowa yaw shada da ai lam gaw hpa rai kun?

² Adam yan Ewa gaw Yehowa a shawng nnan na mungkan ga kashu kasha ni rai nna, Yehowa gaw shanhte a tsawra myit nga ai sumsing kawa re. Shan yan kashu kasha law law shaprat na matu shi myit mada ai. “Nan kashu kasha shaprat nna mayat maya wa mu; ga ting hpe jahpring nna dai hpe up nga lu mu” ngu shan yan hpe Karai Kasang tsun ai. (Nin 1:28) Yehowa gaw, shan yan hpe kashu kasha shangai nna mungkan ga hpe lanu lahku shangun mayu ai. Shan yan a matu, Yehowa yaw shada da ai lam hte maren, madat mara nna rau jawm galaw na nga yang, shan yan a kashu kasha ni gaw Karai Kasang a nta masha ni hku nna htani htana nga lu na re.

3. Adam yan Ewa gaw Yehowa a dinghku hta arawng nga ai shara hpe lu da ai ngu hpa majaw lu tsun ai kun?

³ Adam yan Ewa gaw Yehowa a dinghku hta arawng nga ai shara hpe lu da ai. Shakawn 8:5 hta Yehowa shawng nnan hpan tawn da ai masha hte seng nna, Dawi ndai hku tsun wa ai: “Nang shi hpe Karai Kasang [shing nrai lamu kasa ni, NWT] hte loi mi sha shagrit da nna, Arawng sadang hte hpung shingkang shi hpe ka-up ya nu ai.” Yehowa gaw shinggyim masha ni hpe lamu kasa ni zawn,  dagu, nyan hpaji, atsam ningja ni gaw n jaw da ai. (Shk 103:20) Raitim, shinggyim masha ni gaw lamu kasa ni hta na “loi mi sha” grit nem ai. Dai gaw mau hpa re. Yehowa gaw anhte a shawng nnan na kanu kawa yan hpe hpan ai shaloi, grai kaja ai prat jaw wa ai.

4. Yehowa a dinghku hta Adam yan Ewa a shara hpa byin mat ai kun? Ndai sumhpa hta hpa lam bawngban lu na kun?

 ⁴ Yawn hpa gaw Adam yan Ewa gaw, Yehowa a dinghku hta shan yan a shara hpe sum kau ai. Dai majaw shan yan a kashu kasha ni hpe n kaja ai akyu ni lu la shangun mat ai. Dai lam hpe ndai sumhpa hta chye lu na re. Yehowa a yaw shada lam gaw n galai shai ai. Madat mara ai shinggyim masha ni hpe shi a kashu kasha ni hku nna htani htana byin shangun mayu ai. Anhte hpe Yehowa kade daram manu shadan ai hpe hkaja yu ga. Dai hpang, Karai Kasang a nta masha byin mayu ai lam madun na matu ya aten hpa galaw lu ai kun? ngu ai hpe bawngban mat na re. Yehowa a nta masha ni mungkan ga hta htani htana lu la na shaman chyeju a lam hpe mung bawngban lu na re.

5. Karai Kasang a hkrang bung sumla hte maren hpan da hkrum ai majaw, shi hpe anhte gara hku shagrau lu ai kun?

⁵ Yehowa gaw anhte hpe shi a hkrang bung sumla hte maren hpan da ai hku nna shagrau da ai. (Nin 1:26, 27) Anhte gaw Karai Kasang a hkrang bung sumla hte maren hpan da hkrum ai majaw, tsawra myit, matsan dum myit, sadi dung ai hte dinghpring ai zawn re ai shi a atsam ningja ni hpe madun lu ai, shalat lu ai. (Shk 86:15; 145:17) Dai atsam ningja ni hpe anhte shalat nga ai nga yang, Yehowa hpe shagrau ai, shi hpe chyeju dum ai lam madun nga ai re. (1 Pe 1:14-16) Anhte a sumsing kawa myit ra ai lam galaw na nga yang, anhte myit pyaw nna, myit dik lam lu la na re. Yehowa hta nga ai atsam ningja ni anhte hta mung nga ai majaw, shi a dinghku hta shi byin shangun mayu ai hte maren anhte byin lu ai.

6. Mungkan ga hpe hkyen lajang ai shaloi, shinggyim masha ni hpe Yehowa gara hku shagrau da ai kun?

⁶ Yehowa gaw anhte a matu grai kaja ai nta hpe lajang ya ai. Shawng nnan na shinggyim masha hpe garai n hpan shi ai shaning law law kaw na, shinggyim masha ni a matu mungkan ga hpe Yehowa lajang da ya ai. (Yob 38:4-6; Yer 10:12) Yehowa gaw tsawra myit nga nna gam jaw gam ya kam ai wa re ai majaw, anhte ngwi pyaw lu na matu kaja ai lam law law hpe hpan tawn da ya ai. (Shk 104:14, 15, 24) Karai Kasang gaw, shi hpan da ai lam ni hpe aten la nna myit sawn sumru yu ai shaloi, dai lam ni “kaja nga ai” hpe shi mu ai. (Nin 1:10, 12, 31) Mungkan ga hta shi hpan da ai tsawm htap ai lam yawng hpe up na matu, ahkang jaw ai hku nna, shinggyim masha ni hpe shagrau da ai. (Shk 8:6) Karai Kasang a yaw shada lam gaw, shi hpan da ai lam ni hpe hkum tsup ai shinggyim masha ni htani htana lanu lahku nna ngwi pyaw nga na matu re. Yehowa jaw da ai grai kaja ai dai ga sadi hpe galoi mung chyeju dum nga ai kun?

7. Wanglu wanglang lata lu ai ahkang nga ai lam hpe Yawshu 24:15 gaw gara hku madun dan ai kun?

⁷ Yehowa gaw anhte hpe wanglu wanglang lata lu ai kumhpa jaw da ai. Tinang a prat hta hpa galaw na ngu ai hpe anhte lata lu ai. (Yawshu 24:15 hpe hti u.) Shi hpe nawku na matu lata ai nga yang, anhte a tsawra myit rawng ai Karai Kasang kabu ai. (Shk 84:11; Gsh 27:11) Kaja ai dawdan lam law law jahkrat lu na matu, anhte a wanglu wanglang lata lu ai ahkang hpe akyu jashawn mai ai. Yesu a kasi ningli hpe yu yu ga.

8. Wanglu wanglang lata lu ai ahkang hpe Yesu akyu jashawn wa ai lam langai gaw hpa rai kun?

⁸ Yesu a kasi ningli hpe hkan sa ai hku nna, tinang a akyu hta kaga ni a akyu hpe shawng tawn na matu lata mai ai. Kalang mi hta Yesu hte shi a sape ni grai pu ba nga ai majaw, hkring sa la na matu simsa ai shara de sa taw ai. Raitim, shanhte n lu hkring sa wa ai. Masha wunawng wuwa gaw shanhte hpe mu tam mat nna, Yesu a  sharin achyin ai lam hpe madat na matu myit rawt nga ma ai. Shanhte hpe Yesu n pawt wa ai. De a malai, masha hpawng hpe matsan dum wa ai. Yesu hpa galaw wa ai kun? Shanhte hpe shi “law law wa sharin shaga ya” ai. (Mrk 6:30-34) Anhte a aten hte n-gun hpe kaga ni a matu akyu jashawn ai hku nna Yesu hpe kasi la ai nga yang, anhte a sumsing kawa hpe shagrau nga ai re. (Mat 5:14-16) Yehowa a nta masha byin mayu ai lam hpe madun nga ai mung re.

9. Kanu kawa ni hpa hpe myit dum ging ai kun?

⁹ Yehowa gaw shinggyim masha ni hpe ma shaprat lu ai atsam sha n-ga, Yehowa hpe tsawra nna nawku wa hkra sharin achyin ya na lit hpe mung jaw da ai. Nang gaw kanu kawa rai yang, dai laksan kumhpa hpe manu shadan ai kun? Yehowa gaw lamu kasa ni hpe grai kaja ai shaman chyeju jaw da tim, ma shaprat lu ai ahkaw ahkang hpe gaw n jaw da ai. Dai majaw, kanu kawa ni hku nna dai ahkaw ahkang hpe manu shadan ging ai. Kanu kawa ni gaw “madu a sharin achyin ai hte daru shadum ai lam” hta shanhte a ma ni hpe bau maka na ahkyak ai lit ap da hkrum ai. (Ehp 6:4; Trj 6:5-7; Shk 127:3) Kanu kawa ni karum lu na matu laili laika ni, video ni, yu ngwi nsen ni hte website kaw na sumhpa zawn re ai, Chyum Laika hta madung tawn ai hkingrai law law hpe Karai a uhpung gaw lajang da ya ai. Anhte a sumsing Kawa hte shi a Kasha gaw anhte a ma ni hpe tsawra ai lam dandawng nga ai. (Luk 18:15-17) Kanu kawa ni gaw Yehowa hpe kamhpa nna, shanhte a ma ni hpe atsawm lanu lahku ai nga yang Yehowa ra sharawng ai. Dai kanu kawa ni gaw, shanhte a ma ni hpe Yehowa a nta masha hku nna htani htana byin wa na myit mada lam nga hkra mung karum ya nga ai.

10-11. Gawng malai hkungga hku nna anhte a matu Yehowa hpa galaw ya wa ai kun?

¹⁰ Yehowa gaw shi a tsawra dik htum kasha hpe jaw da ai majaw, anhte gaw shi a nta masha kalang bai byin wa lu ai.  Laika pang mali hta tsun da ai hte maren, Adam yan Ewa gaw Yehowa a dinghku hta shanhte a shara hpe sum kau ai. Shanhte a kashu kasha ni a shara hpe mung sum kau ai. (Rom 5:12) Adam yan Ewa gaw, Karai Kasang a ga hpe dingsang n madat wa ai majaw, shan yan a sali wunli hpe dawm la kau hkrum ai hte gingdan ai. Raitim, shan yan a kashu kasha ni hte seng nna gaw gara hku? Yehowa gaw shan yan a kashu kasha ni kaw na gingdan ai ni hpe shi a nta masha ni hku nna, bau la na matu tsawra myit hte lajang wa ai. Shi a kasha shingtai Yesu Hkristu a gawng malai hkungga hku nna dai hpe lajang ya wa ai. (Yhn 3:16; Rom 5:19) Yesu a gawng malai hkungga a majaw sadi dung ai masha ni kaw na, 144000 gaw Karai a kasha ni hku nna bau la hkrum ai. —Rom 8:15-17; Shr 14:1.

¹¹ Dai hta n-ga, ndang hti lu ai wan hku law ai kaga sadi dung ai ni mung Karai a ra sharawng ai lam hpe madat mara let galaw nga ma ai. Shanhte gaw shaning 1000 htum nna hpang jahtum chyam dinglik hkrum ngut ai hpang, Yehowa a nta masha byin wa na matu myit mada ma ai. (Shk 25:14; Rom 8:20, 21) Dai myit mada lam a majaw shanhte a Hpan Madu Yehowa hpe “Wa” ngu nna, ya aten hta pyi shaga lu ai. (Mat 6:9) Hkrung rawt wa ai ni mung, shanhte kaw na Yehowa myit mada ai lam hpe sharin la na matu ahkaw ahkang lu la na re. Shi a lam matsun hpe hkan sa ai ni gaw hpang jahtum hta Karai a nta masha ni byin wa na re.

12. Gara ga san a mahtai hpe ya hkaja lu na kun?

¹² Anhte chye wa sai hte maren, Yehowa gaw shinggyim masha ni hpe lam amyu myu hte shi shawng shagrau wa ai. Namman chya hkam ai ni hpe shi a kasha ni hku bau la ai. Masha “wunawng wuwa kaba” hpe mung mungkan nnan hta shi a kashu kasha ni byin wa na matu myit mada lam jaw wa ai. (Shr 7:9) Yehowa a nta masha hku nna, htani htana byin mayu ai lam madun na matu ya hpa galaw lu ai kun?

13. Karai a nta masha byin lu na matu, anhte hpa galaw lu ai kun? (Marku 12:30)

¹³ Myit masin mahkra hte Yehowa hpe nawku nna shi hpe tsawra ai lam madun u. (Marku 12:30  hpe hti u.) Karai Kasang gaw anhte hpe kaja ai kumhpa law law jaw da ai. Dai kumhpa ni kaw na langai gaw shi hpe nawku lu ai atsam ningja re. Karai Kasang a hkang da ai ga hpe hkan sa ai hku nna Yehowa hpe tsawra ai lam anhte madun ai. (1 Yh 5:3) Anhte hpe Yehowa madat mara shangun mayu ai lam matsun ni kaw na langai re ai, sape shatai nna hkalup jaw mu ngu ai lam matsun hpe Yesu jaw wa ai. (Mat 28:19) Anhte shada da tsawra nga na matu mung shi lam matsun jaw wa ai. (Yhn 13:35) Yehowa gaw madat mara ai ni hpe shi hpe nawku ai mungkan grup nta masha hku nna hkap la ai. —Shk 15:1, 2.

14. Kaga ni hpe tsawra myit gara hku madun lu na kun? (Mahte 9:36-38; Roma 12:10)

¹⁴ Kaga ni hpe tsawra ai lam madun u. Tsawra myit gaw Yehowa a danleng dik htum atsam ningja re. (1 Yh 4:8) Anhte shi hpe garai n chye shi ai aten kaw na anhte hpe Yehowa tsawra myit madun ai. (1 Yh 4:9, 10) Kaga ni hpe tsawra myit madun ai gaw shi hpe kasi la nga ai re. (Ehp 5:1) Masha ni hpe tsawra myit madun mai ai kaja htum lam langai gaw aten naw nga ai laman, Yehowa a lam kaga ni hpe sharin ya ai hku nna re. (Mahte 9:36-38 hpe hti u.) Dai hku galaw ai gaw Karai Kasang a nta masha byin wa na matu, shanhte hpe ahkaw ahkang jaw nga ai re. Masha langai hkalup hkam ngut ai hpang, shi hpe matut tsawra nna hkungga ai lam madun ra ai. (1 Yh 4:20, 21) Dai hta hpa ni lawm ai kun? Lam langai gaw shi hta kaja ai yaw shada lam nga ai ngu ai hpe anhte kam ai hku nna re. Ga shadawn, shi hpa majaw galaw wa ai ngu ai hpe n chye na yang pyi, tinggyeng akyu a matu galaw wa ai re ngu anhte myit na n re. De a malai, shi gaw tinang hta grau ai ngu myit la nna hpunau wa hpe shagrau na re. —Roma 12:10 hpe hti u; Hpl 2:3.

15. Kadai ni hpe tsawra matsan dum myit madun ging ai kun?

¹⁵ Masha yawng hpe tsawra matsan dum myit madun u. Yehowa a nta masha hku nna htani htana byin mayu yang, anhte a prat hta Karai a Mungga hpe hkan sa ra ai. Ga shadawn, masha yawng hpe sha n-ga hpyen ni hpe pyi, tsawra matsan dum myit madun ging ai ngu Yesu sharin ya ai. (Luk 6:32-36) Kalang lang dai hku galaw na matu yak na re. Rai yang, Yesu zawn galaw lu na matu, myit chye na matu sharin la ra ai. Yehowa hpe madat mara na matu kaja htum galaw na, Yesu hpe kasi la na nga yang, shi a nta masha hku nna htani htana byin mayu ai lam anhte a sumsing Kawa hpe madun nga ai re.

16. Yehowa na dinghku a mying hpe gara hku makawp maga lu ai kun?

¹⁶ Yehowa na dinghku a mying hpe makawp maga u. Dinghku hta kanau gaw kahpu galaw ai lam ni hpe hkan galaw chye ai. Kahpu gaw shi a prat hta Chyum Laika npawt tara ni hpe hkan sa ai nga yang, kanau a man hta kaja ai kasi ningli madun nga ai re. N kaja ai lam ni hpe galaw dan yang, kanau mung dai hte maren hkan galaw chye ai. Yehowa a dinghku hta mung dai hte maren re. Sadi dung ai Hkristan langai gaw, hpang hta makam masham htak ai lam ni hpe myit sawn sumru ai (sh) akyang lailen htenza ai lam ni hpe lata ai, n kaja ai lam ni hpe hkan galaw mat ai nga yang, kaga ni mung dai hte maren galaw na matu gunglau hkrum chye ai. Dai zawn galaw ai ni gaw Yehowa hpe nawku ai dinghku a mying hpe hkra machyi shangun ai. (1 Ht 4:3-8) Dai zawn n kaja ai kasi ningli ni hpe koi ra ai. Anhte a tsawra myit rawng ai sumsing kawa kaw na tsan mat wa hkra, galaw ai lam ni hpe a hkang n mai jaw ai.

17. Gara zawn myit ai hpe koi ging ai kun? Hpa majaw kun?

¹⁷ Arung arai hpe n re ai sha Yehowa hpe kamhpa u. Shi a Mungdan hpe shawng tawn nna shi a tsang madang hte maren asak hkrung na nga yang, malu masha, bu na hpung na, nga shara lajang ya na ngu Yehowa ga sadi jaw ai. (Shk 55:22; Mat 6:33) Dai ga sadi a majaw, ndai mungkan a arung arai ni gaw anhte hpe shimlum lam jaw ai, ngwi pyaw lam jaw ai ngu nna myit na n re. Jet ai simsa lam lu mai ai lam langai gaw, Yehowa ra sharawng ai hpe galaw ai lam langai sha re hpe anhte chye ai. (Hpl 4:6, 7)  Arung arai law law hpe mari lu ai nga yang pyi, dai lam ni hpe lanu lahku na matu, akyu jashawn na matu, anhte hta aten hte n-gun nga n nga myit yu ra ai. Tinang a arung arai ni hpe grai ahkyak shatai ai baw byin wa chye ai kun? Karai Kasang gaw shi a nta masha ni hpe galaw ra ai bungli ni jaw da ai hpe dum ra ai. Dai gaw tinang hkum tinang myit bra mat na matu ahkang n jaw ging ai ngu ai lachyum re. Mungkan ga na sut gan hpe marin ai majaw, Yehowa hpe nawku lu ai ahkaw ahkang hte shi a kasha byin lu na ahkang hpe nyet kau ai ramma la kasha zawn, anhte n byin mayu ga ai. —Mrk 10:17-22.

18. Madat mara ai masha ni gaw gara shagrau ai lam hte gara shaman chyeju hpe htani htana lu la na kun?

¹⁸ Madat mara ai shinggyim masha ni gaw Yehowa hpe htani htana tsawra lu ai, nawku lu ai hku nna shagrau hkrum na re. Mungkan ga myit mada lam nga ai ni gaw, shanhte a matu hkum tsup ai hku nna, Karai Kasang lajang da ya ai tsawm htap ai mungkan ga hpe lanu lahku ai kaw na mung ngwi pyaw lam lu la na re. Kade n na yang, mungkan ga hte asak hkrung mahkrung yawng gaw Mungdan uphkang ai npu hta nnan bai byin wa na re. Karai Kasang a dinghku kaw na pru mat na matu, Adam yan Ewa dawdan ai aten kaw nna byin wa ai manghkang yawng hpe Yesu bai hparan ya na re. Yehowa gaw wan hku law ai masha ni hpe jahkrung ya nna hparadisu hta hkum tsup ai hkamja lam hte htani htana asak hkrung na ahkaw ahkang hpe mung jaw na re. (Luk 23:42, 43) Yehowa hpe nawku ai shinggyim masha ni hkum tsup wa ai shaloi, Dawi ka wa ai hte maren shanhte yawng gaw, “arawng sadang hte hpung shingkang” hpe lu la na re. —Shk 8:5.

19. Anhte hpa hpe galoi mung dum ging ai kun?

¹⁹ Nang gaw masha “wunawng wuwa” hta lawm taw ai nga yang, nang hta grai kaja ai myit mada lam nga nga ai re. Karai Kasang nang hpe tsawra nna shi a nta masha byin shangun mayu ai. Dai majaw, shi ra sharawng ai lam hpe lu hkra, nang galaw lu ai lam yawng hpe galaw u. Shani shagu na sak hkrung hkawm sa lam hta Karai a ga sadi hpe galoi mung dum nga u. Tsawra ai sumsing Kawa hpe nawku lu ai ahkang hte shi hpe htani htana shakawn lu ai myit mada lam hpe manu shadan u.