1-2. Ndai sumhpa hta hpa lam ni hpe bawngban lu na kun?

NANG gaja wa ra nga ai rai lawm ai, rai htuk langai gaw nang myit mada da ai aten hta n du wa ai nga yang, gara hku hkamsha ai kun? Myit htum mat na kun? Ga shagawp 13:12 hta tatut re ai lam langai hpe tsun da ai: “Myit mada ala jin yang, myit daw wa na ra ai.” Raitim, du wa na ngu na myit mada da ai rai htuk gaw, hpa majaw n du wa ai ngu ai hpe chye dat ai nga yang gaw taw? Myit galu nna sharawng awng let la nga mayu ai myit nga na re.

² Ndai sumhpa hta “ala nga” chye ai myit jasat nga na matu, karum ya lu ai Chyum Laika npawt tara nkau hpe hkaja lu na re. (Mik 7:7) Dai hpang, Yehowa hpe myit galu let la nga ra na masa lam lahkawng hpe mung bawngban mat na re. Hpang jahtum hku nna sharawng awng let la nga ai ni lu la na shaman chyeju ni a lam hpe mung bawngban mat na re.

3. Ga Shagawp 13:11 hta madun da ai npawt tara gaw hpa hpe dan leng shangun ai kun?

³ Anhte myit galu ra ai hpe madun dan ai ga shadawn langai hpe Chyum Laika hta ndai hku tsun da ai: “Chyahkring mi na laman lu la ai sut gan gaw yawm mat na ra ai. Gau ngwi ngwi mahkawng nna lu la ai sut gan gaw law htam wa na ra ai.” (Gsh 13:11, NWT) Npawt tara hpe mu ai kun? Lama ma hpe galaw ai shaloi, myit galu let galaw ai gaw hpaji rawng ai.

4. Ga Shagawp 4:18 hta mu lu ai npawt tara gaw gara lam hpe danleng shangun ai kun?

⁴ Ga Shagawp 4:18 hta anhte hpe ndai hku tsun da ai: “Ding hpring ai ni a lam chyawm gaw, jahpawt nhtoi hte bung nga ai; Dai gaw nhtoi leng hkra ahtoi ahkung wa nga ai.” Yehowa gaw shi a yaw shada lam hte seng nna, shi a amyu masha ni hpe gau ngwi ngwi chye na wa hkra karum ya nga ai ngu ai hpe dai Chyum daw gaw dang leng shangun ai. Ndai Chyum daw gaw  Hkristan langai wenyi lam hta rawt jat wa hkra, gara hku galaw ra na lam hpe chye na hkra karum ya ai. Masha langai wenyi lam hta rawt jat wa na matu aten jaw ra ai. Anhte gaw Karai a Mungga hte shi a uhpung kaw na lu la ai hpaji jaw ga ni hpe hkan sa na, atsawm hkaja na nga yang, Hkristu a myit jasat hpe gau ngwi ngwi shalat la lu na re. Karai Kasang a lam hpe mung grau nna chye wa na re. Dai lam hpe Yesu gara hku ga shadawn jaw wa ai hpe yu yu ga.

5. Gau ngwi ngwi rawt jat wa ai hpe tsun dan na matu, Yesu gara ga shadawn hpe lang wa ai kun?

⁵ Mungdan shiga gaw myit dingman ai ni a salum hta gau ngwi ngwi kaba wa ai nli tum hte bung ai lam hpe sanglang dan na matu, ga shadawn langai hpe Yesu tsun dan wa ai. Shi ndai hku tsun ai: “Shi n chye ai lam hta nli gaw prut wa nna, tu kaba wa nga ai. Aga gaw shi hkrai asi si wa ai hte, shawng e maku, hpang e htingkyang, dai hpang htingkyang hta e mam nsi hkum wa shangun ai.” (Mrk 4:27, 28) Yesu hpa hpe tsun mayu ai kun? Hpun gaw gau ngwi ngwi kaba wa ai zawn, Mungdan shiga hpe hkap la ai wa mung, gau ngwi ngwi rawt jat wa ai ngu nna shi sanglang dan ai. Ga shadawn, Chyum ga sharin langai Yehowa hte ni htep wa ai shaloi, shi galai shai wa ai lam law law hpe mung mu lu wa ai. (Ehp 4:22-24) Raitim, nli tum hpe kaba wa shangun lu ai gaw Yehowa sha re ai hpe dum ra ai.—1 Ko 3:7.

6-7. Mungkan ga hpe Yehowa hpan ai kaw na anhte hpa sharin la lu ai kun?

⁶ Yehowa gaw shi galaw ai lam yawng hpe aten la na galaw nga ai gaw bungli ngut kre lu na matu re. Shi a mying ningsang danleng na matu hte kaga ni akyu lu na matu, shi dai hku galaw nga ai re. Ga shadawn, shinggyim masha ni a matu mungkan ga hpe tsang hte tsang hkyen lajang ya wa ai lam hpe myit yu u.

⁷ Mungkan ga hpe Yehowa gara hku hpan ai hte seng nna tsun ai shaloi, Chyum Laika hta shi gaw mungkan ga a “dingdung dingda” hpe hkyen lajang da ai lam, mungkan ga a “npawt nhpang ni” hpe lup tawn da ai lam hte mungkan ga a “njut nlung” hpe mara da ai ngu nna tsun da ai. (Yob 38:5-7) Shi a bungli hpe bai myit sawn sumru na matu aten la ai. (Nin 1:10, 12) Yehowa hpan da ai lam ni gau ngwi  ngwi hkrang pru wa ai hpe lamu kasa ni mu ai shaloi, gara hku hkamsha nga ai hpe shingran yu mai ai kun? Shanhte a matu kade daram myit kahpra hpa rai nga na! Dai majaw shanhte kabu gara let shakawn wa ai. (Yob 38:7) Hpa sharin la lu ai kun? Yehowa gaw shi a hpan hpajang ai bungli ngut kre lu na matu, shaning hkying lam hku aten la wa ai. Raitim, Yehowa gaw shi hpan da ai lam ni hpe atsawm myit sawn sumru yu nna “nachying kaja nga ai” ngu tsun wa ai. —Nin 1:31.

8. Ya gara lam hpe hkaja lu na kun?

⁸ Ntsa na ga shadawn ni hta mu wa sai hte maren, myit galu ra ai hte seng nna danleng shangun ai npawt tara law law hpe Karai a Mungga hta mu lu ai. Yehowa hpe sharawng awng let la ra ai masa lam lahkawng hpe ya hkaja lu na re.

9. Yehowa hpe la ra ai masa lam langai gaw hpa rai kun?

⁹ Anhte a kyu hpyi ga hpe mahtai lu na matu la ra chye ai. Chyam dinglik lam ni hpe tawt lai lu hkra n-gun atsam jaw na matu, gawng kya ai lam ni hpe tawt lai lu hkra karum ya na matu kyu hpyi ai shaloi, myit mada ai aten hta na mahtai lu ai aten gaw grau na ai ngu hkamsha chye ai. Anhte a kyu hpyi ga ni hpe Yehowa hpa majaw kalang ta mahtai n jaw ai kun?

10. Anhte a kyu hpyi ga hpe mahtai lu na matu hpa majaw myit galu ra ai kun?

¹⁰ Anhte a kyu hpyi ga hpe Yehowa atsawm madat ya ai. (Shk 65:2) Myit majing hte kyu hpyi yang, anhte hta makam masham nga ai ngu na shi mu mada ya ai. (Heb 11:6) Anhte kyu hpyi ai hte maren asak hkrung na matu hte shi ra sharawng ai hpe galaw na matu, anhte gara hku dawdan ai lam hpe mung Yehowa myit lawm ai. (1 Yh 3:22) Dai majaw n kaja ai akyang (sh) gawngkya ai lam hpe tawt lai na matu shakut ai aten shagu, anhte a kyu hpyi ga hte maren galaw nna myit galu ai lam madun ra ai. Anhte a kyu hpyi ga nkau hpe kalang ta mahtai jaw na n re ngu ai hpe chye na hkra Yesu karum ya wa ai. Shi ndai hku tsun ai: “Hpyi mu, shaloi nanhte lu la na myit dai; tam mu, shaloi nanhte mu lu na myit dai; akawk mu, shaloi nanhte a matu hpaw na ra ai. Kaning rai nme law, hpyi ai wa kadai mung lu la ai; tam ai wa mung mu la ai, akawk nga ai wa hpe mung, hpaw ya wu ai.” (Mat 7:7, 8) Dai hpaji jaw ga hpe hkan sa nna “akyu hpyi ai hta shakut sharang rai” nga na nga yang, anhte a sumsing Kawa gaw kyu hpyi ga hpe madat ya na, mahtai mung jaw na re ngu ai hpe kam wa na re. —Kol 4:2.

11. Anhte a kyu hpyi ga hpe alawan mahtai n jaw ai ngu hkamsha ai shaloi, Hebre 4:16 gaw gara hku karum ya ai kun?

¹¹ Anhte a kyu hpyi ga hpe mahtai lu na matu, hpang hkrat nga ai zawn re tim, anhte a kyu hpyi ga hpe “ra kadawn ai aten” hta mahtai jaw na ngu Yehowa ga sadi jaw ai. (Hebre 4:16 hpe hti u.) * Dai majaw lam langai ngai gaw, anhte shadu da ai hte maren alawan n byin wa ai shaloi, Yehowa hpe mara n shagun ging ai. Ga shadawn, ndai mungkan hpe Karai a Mungdan jahtum kau ai hpe mu lu na matu, masha ni shaning law law kyu hpyi wa ma ai. De a matu kyu hpyi ging ai ngu nna Yesu mung tsun wa ai. (Mat 6:10) Raitim, shinggyim masha ni myit mada da ai aten hta jahtum n du wa ai majaw, Karai Kasang hpe kamsham ai lam gawng kya mat hkra ahkang jaw ai gaw hpaji n rawng ai lam re. (Hab 2:3; Mat 24:44) Yehowa hpe matut la nga nna makam masham hte kyu hpyi ai gaw hpaji rawng ai lam re. Jahtum gaw aten du yang du wa na re. Hpa majaw nga yang, Yehowa gaw “dai shani hte ahkying” hpe masat da sai majaw re. Dai shani  gaw anhte yawng a matu kaja htum aten rai na re. —Mat 24:36; 2 Pe 3:15.

12. Laksan hku nna gara masa lam hta myit galu na matu shakut ra ai kun?

¹² Tara rap ra ai lam hpe la nga ai laman anhte myit galu ra ai. Ndai mungkan masha ni gaw num, la, mungdan, amyu, htunghking n bung ai ni hpe n tara ai hku kanawn mazum ai. Nkau gaw hkumhkrang hte myit hkam n kaja ai ni hpe n tara ai hku kanawn mazum ai. Yehowa a masha law law gaw Chyum Laika hta madung tawn ai makam masham a majaw, n tara ai hku kanawn mazum hkrum nga ai. Dai zawn hkrum nga yang, Yesu a ga hpe myit hta bang da ra ai. Shi ndai hku tsun ai: “Jahtum du hkra shakut sharang ai wa gaw, hkye hkrang la ai hkrum na ra ai.” (Mat 24:13) Raitim, nawku hpung hta nga ai marai langai ngai mara kaba galaw ai hpe sadi hkrup ai nga yang gaw taw? Myitsu salang ni hpe dai lam shana ngut ai hpang, shanhte a lata hta ap da nna Yehowa lam matsun ai hte maren, shanhte galaw na hpe myit galu let la nga ai kun? Myitsu salang ni hpa galaw na kun?

13. Yehowa a lam matsun hte maren masa lam ni hpe lang ai shaloi hpa ni lawm ai kun?

¹³ Nawku hpung hta marai langai ngai mara kaba galaw ai hpe myitsu salang ni chye ai nga yang, masa lam hpe Yehowa mu ai zawn mu lu hkra, “ntsa de na hpaji byeng-ya” lu la na matu kyu hpyi ai. (Yak 3:17) Shanhte a yaw shada lam gaw “shi a shut hpyit ai lam hta na” bai nhtang wa lu hkra karum ya na matu re. (Yak 5:19, 20) Shanhte gaw nawku hpung hpe makawp maga na matu hte hkra machyi ai ni hpe shalan shabran na matu, galaw lu ai lam yawng hpe galaw mayu ma ai. (2 Ko 1:3, 4) Mara kaba ni hpe lang ai shaloi, myitsu salang ni gaw aten loi la nna mabyin ni hpe shawng chye hkra galaw ra ai. Dai hpang, shanhte gaw kyu hpyi ya na, Chyum Laika lam matsun ni hpe jaw na, mara galaw ai wa hpe ramdaw sharin shaga na re. (Yer 30:11) Myitsu salang ni gaw aten n gang taw ai nga yang pyi, dawdan lam hpe lawan wan n jahkrat ai. Masa lam ni hpe htap htuk ai hku lang ai nga yang, nawku hpung hta nga ai yawng a matu, kaja htum akyu hpe mu lu na re. Myitsu salang ni gaw, dai masa lam hpe jaw ai hku hparan ngut sai nga yang pyi, hkra machyi hkrum ai wa gaw matut nna naw hkamsha nga na re. Lama na, hkra machyi ai wa gaw nang rai taw ai nga yang, hkra machyi ai lam ni yawm mat hkra hpa galaw lu na kun?

14. Hpunau nauna langai a majaw hkra machyi nga ai hpe tawt lai lu hkra gara Chyum Laika kasi ningli gaw karum ya ai kun?

¹⁴ Marai langai (sh) hpunau nauna langai gaw nang hpe grai sawng ai hku hkra machyi  shangun ga ai kun? Masa lam ni hpe hparan lu na matu, Yehowa hpe gara hku la ra na lam sharin ya ai Chyum Laika kaw na kaja ai kasi ningli ni hpe tam mai ai. Ga shadawn, Yosep gaw kahpu ni a n tara ai hku kanawn mazum hkrum wa tim, shanhte na mara a majaw myit n machyi nga ai. De a malai, Yehowa a magam hpe matut myit maju jung wa ai majaw, shi a myit galu ai lam hte hkam jan lu ai atsam hpe Yehowa shaman chyeju jaw wa ai. (Nin 39:21) Aten ni na mat ai hpang, shi a myit n pyaw hpa mahkrum madup ni hpe tawt lai lu wa nna, Yehowa a shaman chyeju hpe mung mu lu wa ai. (Nin 45:5) Yosep zawn, anhte mung Yehowa hte ni htep hkra nga nna, tara rap ra ai lam hpe lu na matu, shi a lata hta ap da na nga yang shalan shabran lam lu la na re. —Shk 7:17; 73:28.

15. N tara ai lam hpe tawn da kau lu na matu, nauna langai hpe hpa gaw karum ya wa ai kun?

¹⁵ N tara ai lam yawng gaw Yosep a mahkrum madup zawn n sawng tim, n kaja ai hku kanawn mazum hkrum taw ai majaw hkra machyi nga chye ai. Yehowa hpe n nawku ai ni hte hpawn, marai langai ngai hte manghkang byin nga ai nga yang, Chyum Laika npawt tara ni hpe hkan sa ai gaw akyu lu la na re. (Hpl 2:3, 4) Mahkrum madup langai hpe yu yu ga. Nauna langai a bungli manang gaw kaga ni hpe shi a lam hte seng nna n kaja ai hku tsun ai, shatan ai hpe nauna na mat ai shaloi grai myit n pyaw mat ai. Nauna gaw kalang ta bai htang na malai, Yesu a kasi ningli hpe myit yu ai. Yesu gaw jahpoi asawng hkrum wa tim, kaga ni hpe bai htang ai lam n galaw ai. (1 Pe 2:21, 23) Dai majaw, shi mung byin wa ai lam ni hte seng nna, bai n nhtang na matu dawdan kau ai. Hpang hta shi a bungli manang gaw hkam n kaja nna, myit pu nga ai hpe chye mat ai. Shi hte seng nna bungli manang tsun wa ai ga ni gaw, shi hpe hkra machyi shangun mayu ai majaw tsun wa ai n re ngu sawn la kau ai. Nauna gaw n tara ai lam hpe hkamjan wa lu ai majaw, grai kabu nna simsa lam mung lu wa ai.

16. N tara ai lam hpe hkrum nga yang, nang hpe hpa gaw shalan shabran ya lu ai kun? (1 Petru 3:12)

¹⁶ N tara ai lam hpe hkamjan nga ai (sh) marai langai ngai a majaw hkra machyi nga ai nga yang, Yehowa gaw “myit maku daw ai ni” hte ani sha rai nga ai hpe dum u. (Shk 34:18) Shi gaw na a myit galu ai lam hte lit ni hpe shi kaw ap da ai hpe ra sharawng ai. (Shk 55:22) Shi gaw mungkan ting a tara agyi re. Shi n mu lu ai lam hpa mung n nga ai. (1 Petru 3:12 hpe  hti u.) Tinang n lu hparan ai manghkang ni hpe hkrum nga ai shaloi, Yehowa hpe sharawng awng ai myit hte la mayu ai kun?

17. Esaia 30:18 hta Yehowa hpa ga sadi jaw da ai kun?

¹⁷ Kade n na yang, anhte a sumsing Kawa gaw shi a Mungdan hku nna, law la ai shaman chyeju ni jaw na re. Esaia 30:18 hta ndai hku tsun ai: “Nanhte hpe chyeju myit madun na matu, Yehowa ala nga ai; nanhte hpe matsan dum na matu shi galu kaba nga ai: kaning rai nme law, Yehowa gaw tara ding ai Karai Kasang rai nga ai; shi hpe ala nga ai ni yawng, a lu ma ai.” Yehowa hpe myit mada ai ni gaw, ya aten hta sha n-ga, mungkan nnan hta mung shaman chyeju law law lu la na re.

18. Anhte hpe gara shaman chyeju la taw ai kun?

¹⁸ Karai a amyu masha ni mungkan nnan de du mat ai shaloi, dai ni aten hkrum nga ai myit tsang ai lam ni hte chyam dinglik ai lam ni hpe galoi mung hkrum sana n re. N tara ai lam ni hte machyi makaw ai lam ni nga sana n re. (Shr 21:4) Dai hta law htam hkra nga sana re majaw, ra kadawn ai lam ni a matu myit tsang ra sana n re. (Shk 72:16; Esa 54:13) Grai kaja ai shaman chyeju ni rai na re.

19. Ya aten hta anhte a matu, Yehowa hpa hpe gau ngwi ngwi lajang ya nga ai kun?

¹⁹ Ndai laman Yehowa gaw anhte a n kaja ai akyang lailen ni hpe tawt lai lu hkra, shi ra sharawng ai atsam ningja ni hpe shalat la lu hkra karum ya ai hku nna, shi up hkang ai npu hta asak hkrung lu hkra lajang ya nga ai. Myit hkum daw. Asum hkum jaw. Kaja htum gaw du wa sana re! Dai tsawm htap ai aten hpe la nga ai laman, Yehowa galaw ya na lam ni hpe myit galu nna la nga let kabu gara nga ga.