• “Nye madu wa chyahkring hkring dinghku htak ai ngu hkamsha ai.”

• “Kaya jahkrum ai, tinang gaw myit shang sha na zawn n re ai, manu n dan ai ngu hkamsha ai.”

• “Kadai hpe mung dai lam n tsun dan gwi ai. Tinang hkrai hkamsha taw ai.”

• “Ngai hpe Yehowa lanu lahku ai lam n nga ai ngu hkamsha ai.”

Tinang a madu wa nse nsa sumla ni, video ni yu ai shaloi, madu jan kade daram hkamsha ai hpe dai ga ni gaw madun dan nga ai. Dai zawn lagu yu ai gaw shata hku, shaning hku na taw sai nga yang, madu wa hpe gara hku mung kam sana n re. “Shi gara zawn masha rai kun? Ngai hpe kaga hpa ni naw ip da ai kun? ngu ai hpe chye mayu wa ai” ngu nna madu jan langai tsun ai.

Madu jan ni, tinang a madu wa gaw nse nsa sumla ni, video ni yu ai nga yang, ndai sumhpa gaw nanhte a matu lajang da ya ai re. a Yehowa madi shadaw ya na ngu ai hpe kam shangun ai, shalan shabran ya ai Chyum Laika npawt tara ni hpe bawngban na re. Dai gaw hkamsha lam hte wenyi lam bai kaja hkra karum ya na re. b

Madu wa galaw ai lam yawng mayawng hpe n hkang lu tim, myit ru ai lam yawm hkra, grau myit simsa hkra galaw mai ai. Lawu na lam ni hpe yu yu ga.

Tinang hkum tinang mara hkum shagun. Tinang hta ra rawng ai lam nga ai majaw, madu wa nse nsa sumla ni, video ni yu ai ngu madu jan hkamsha chye ai. Elit c mung, shi hta ra rawng ai lam ni nga ai majaw rai na re ngu hkamsha ai. ‘Nye madu wa gaw ngai hpe n re ai sha, kaga num ni hpe hpa majaw yu mayu nga ai kun?’ ngu shi myit hkrup ai. Madu jan nkau gaw, shanhte galaw ai, myit ai lam ni a majaw masa grau sawng mat ai re ngu myit la nna, tinang hkum tinang mara shagun ma ai. “Ngai grai mazut ai hku bai htang hkrup ai majaw, grai masin pawt ai majaw dinghku hta masa grau sawng mat ai rai na re” ngu Daniye tsun ai.

Dai zawn hkamsha nga yang, na madu wa galaw ai lam ni a matu, nang hpe Yehowa mara n shagun ai hpe dum u. “Kadai rai ti mung, tinang a myit kayut ai  hta, len nang ai hte agaw hkalem ai hkrum nga yang gaw, gunglau ai hkrum nga ai” ngu Yaku 1:14 hta tsun ai. (Rom 14:12; Hpl 2:12) Nang hpe mara shagun na malai, na a sadi dung ai lam hpe Yehowa manu shadan ai.—2 Hl 16:9.

Madu wa nse nsa sumla ni, video ni yu ai gaw, madu jan hta ra rawng ai lam ni nga ai majaw n re. Nse nsa sumla ni, video ni yu ai gaw, hkum shan ra marin ai myit grau nga wa shangun ai. Dai zawn myit nga ai wa hpe gara num mung myit dik hkra n lu galaw ya ai ngu, hpaji du ni sanglang dan ai.

Ladu lai myit hkum tsang. Tinang a madu wa nse nsa sumla ni, video ni yu nga ai ngu nna sha aten tup myit hkrup nga ai ngu Kettarin tsun ai. “Nye madu wa hpe n mu yang myit tsang wa ai. Shani shagu grai myit tsang ai” ngu Hparanset tsun ai. Kaga madu jan ni mung, shanhte a madu wa a lam chye ai hpunau nauna ni a man hta kaya ai ngu tsun dan ma ai. Kaga ni rai yang, shanhte a masa hpe kadai n chye na ya ai ngu shadu ai majaw, garen gari ai ngu hkamsha ma ai.

Dai zawn hkamsha chye ai. Raitim, dai lam hpe sha myit taw na nga yang, grau myit ru na lam sha nga ai. De a malai, nang hte Yehowa a hku hkau lam hpe myit maju jung u. Dai hku galaw ai gaw, grau hkamjan lu hkra nang hpe karum ya lu ai.—Shk 62:2; Ehp 6:10.

Myit ru myit tsang hkrum wa ai num ni a lam Chyum Laika hta ka da ai. Shanhte a lam hti ai, myit sawn sumru ai gaw akyu nga ai. Yehowa kaw shanhte akyu hpyi ai majaw shalan shabran lam lu mat ai. Karai Kasang gaw shanhte a manghkang ni hpe ayan na n la kau ya ai raitim, myit simsa lam jaw ai. Ga shadawn, Hana gaw grai “yawn” ai majaw, “Yehowa man e na na akyu hpyi” wa ai. Matut hpa byin na hpe n chye tim, Hana myit simsa mat ai.—1 Sa 1:10, 12, 18; 2 Ko 1:3, 4.

Nawku hpung myitsu salang ni kaw karum hpyi u. Shanhte gaw “nbung chyip nna laru marang shingbyi shara” hte bung ai. (Esa 32:2) Na a hkamsha lam ni hpaw tsun dan lu na, nang hpe shalan shabran ya lu na, nauna langai ngai nga yang, myitsu salang ni gaw nang hpe tsun dan na re.—Gsh 17:17.

Nse nsa sumla ni, video ni yu ai akyang nga ai na madu wa hpe naw karum ya lu na kun? Lu yang lu na re. Manghkang langai hpe hparan ai shaloi, atsam kaba ai hpyen hpe gasat ai shaloi, “marai langai sha hta, lahkawng gaw grau” kaja nga ai ngu Chyum Laika hta tsun da ai. (Hpj 4:9-12) Sawk sagawn ai lam hku nga yang, madu wa mung nse nsa sumla ni,  video ni yu ai akyang hpe shamat na, madu jan mung madu wa hpe bai kam ya na nga yang, kaja ai akyu ni lu wa chye ai.

Nse nsa sumla ni, video ni yu ai akyang hpe madu wa kade daram shamat mayu ai, kade daram shakut ai ngu ai hta grai madung ai. Myit dawdan nna galaw lu na matu, Yehowa kaw akyu hpyi ai kun? Myitsu salang ni kaw karum hpyi ai kun? (2 Ko 4:7; Yak 5:14, 15) Electronic jak rai ni lang ai hte seng nna tinang hkum tinang sadi ai kun? Nse nsa sumla ni, video ni yu hkrup mat chye ai masa ni hpe koi ai kun? (Gsh 27:12) Na a karum shingtau hpe hkap la na matu, na ntsa dingman na matu shi sharawng ai kun? Rai yang, shi hpe naw karum ya lu na re.

Gara hku nna kun? Mahkrum madup langai hpe myit yu u. Itan hte Hpalisha dinghku de ai. Itan gaw kaji ai aten kaw na nse nsa sumla ni, video ni yu ai akyang nga ai. Yu mayu ai myit bai nga wa yang tsun dan rit ngu Itan hpe Hpalisha tsun ai. “Nye madu jan hpe dingman ai hku asan sha tsun dan ai. Gunglau hkrum chye ai masa ni hpe koi lu na matu shi karum ya ai. Ngai hpa galaw nga ai hpe shi ayan san ai. Intanet hpe shadawn sharam lang na matu karum ya ai” ngu Itan tsun ai. Teng sha nga yang, nse nsa sumla ni, video ni yu ai akyang nga ai majaw, Hpalisha myit hkra machyi ai lam ni gaw nga ai. “Raitim, ngai pawt nga ai, myit machyi nga ai majaw, shi dai akyang mat mat na mung n re. Ndai manghkang hpe an bawngban ngut ai hpang, ngai myit ru hkra n galaw na matu shi dawdan kau ai” ngu Hpalisha tsun ai.

Dai zawn bawngban ai gaw, nse nsa sumla ni, video ni yu ai akyang hpe koi lu hkra karum ya lu ai sha n-ga, madu wa hpe bai kam wa hkra mung karum ya lu ai. Dai sha n-ga, madu wa gaw shi gara hku hkamsha ai, hpa ni galaw ai, gara kaw du nga ai yawng hpe asan sha tsun dan yang, shan a lapran ip da ai lam hpa n nga sai.

Nang mung na madu wa hpe dai zawn karum ya lu na ngu shadu ai kun? Shadu ai nga yang, ndai sumhpa hpe rau hti nna bawngban yu u. Yaw shada lam gaw nse nsa sumla ni, video ni n yu mat na matu, madu wa hpe kam ai myit bai nga wa na matu re. Ndai manghkang hte seng nna, nang bawngban mayu ai hpe pawt na malai, nang gara hku hkamsha ai hpe madu wa chye na hkra shakut ging ai. Na a yaw shada lam gaw, madu wa shakut shaja ai hpe makau na karum ya na matu, na a kam ai myit bai lu hkra shakut na ahkang shi hpe jaw na matu re. Masha ni nse nsa sumla ni, video ni yu ai akyang hpa majaw nga wa ai, dai hpe gara hku tawt lai lu ai lam, lahkawng yan chye da ra ai. d

 Bawngban ai shaloi, ga law hkat wa na hpe tsang yang, rau hkan dung ya na matu, lahkawng yan hkau ai myitsu salang langai hpe karum hpyi u. Nse nsa sumla ni, video ni yu ai akyang mat mat sai nga yang pyi, madu wa hpe madu jan bai kam wa na matu aten la ra chye ai. Asum hkum jaw. Nan a hku hkau lam loi li kaja wa ai kun ngu ai hpe la yu u. Lahkawng yan myit galu ai nga yang, aten na wa ai hte maren dinghku makyit sumri bai ngang kang wa na re.—Hpj 7:8; 1 Ko 13:4.

Na a madu wa dai akyang bai nga wa ai gaw, myit malai n lu ai, hkye la n lu sai ngu ai lachyum kun? N re. Dai akyang hta myit chyung nga yang, prat tup dai hpe gasat nga ra na re. Mat mat sai ngu shadu da tim, shaning grai na ai hpang bai nga wa chye ai. Dai zawn bai n pru wa na matu grai sadi ra ai. Dai akyang mat sai ngu shadu yang pyi, tinang hkum tinang matut hkang ra ai. (Gsh 28:14; Mat 5:29; 1 Ko 10:12) “Myit mang na wenyi hta ningnan wa tai” ra ai. “N hkru ai hpe ndawng kau” ra ai. Dai hta, nse nsa sumla ni, video ni yu ai, tinang hkrai ngang kayut shamai ai zawn re ai n san seng ai akyang ni mung lawm ai. (Ehp 4:23; Shk 97:10; Rom 12:9) Na a madu wa dai zawn shakut mayu ai myit nga ai kun? Rai yang, masa nau n sawng shi ai. e

Raitim, na madu wa dai akyang mat mayu ai myit n nga yang gaw gara hku kun? Nang chyahkring hkring masin pawt ra na, myit daw ra na, sadi rung hkrum ai ngu hkamsha nga ra na re. Myit simsa na matu dai manghkang hpe Yehowa a lata hta ap da u. (1 Pe 5:7) Akyu hpyi ai, Chyum Laika hkaja ai, myit sawn sumru ai hku nna, Yehowa hte matut hku hkau hkra galaw u. Rai yang, Karai Kasang mung nang hte hku hkau wa na re. Karai Kasang gaw, “myit maku daw ai ni, shagrit shanem ai ni hte nga ai.” (Esa 57:15, NWT) Shanhte hpe mung ngwi pyaw lam bai lu hkra karum ya mayu ai. Tinang sha kaja htum Hkristan langai byin hkra shakut u. Myitsu salang ni kaw na karum shingtau hpyi u. Lani mi hta madu wa galai shai wa na ngu myit mada nga u.—Rom 2:4; 2 Pe 3:9.