1. “Karai Kasang a ngwi pyaw ai” lam gaw hpa rai kun? Dai hpe lu la ai kaw na anhte gara hku akyu lu ai kun? (Hpilipi 4:6, 7)

 NDAI mungkan na masha ni n chye ai simsa lam amyu mi nga ai. Dai gaw, “Karai Kasang a ngwi pyaw ai” lam rai nna, anhte a sumsing Kawa hte manu dan ai hku hkau lam kaw na lu wa ai simsa lam re. Karai Kasang a ngwi pyaw lam anhte hta nga yang, shimlum ai ngu hkamsha ai. (Hpilipi 4:6, 7 hpe hti u.) Shi hpe tsawra ai ni hte hku hkau ai lam kaw na mung, ngwi pyaw lam lu ai. “Ngwi pyaw ai a npawt Karai Kasang” hte hku hkau ai lam kaw na mung ngwi pyaw lam lu ai. (1 Ht 5:23) Anhte a Kawa hpe chye na, kamhpa na, madat mara na nga yang, mayak mahkak hkrum tim pyi, myit simsa hkra Karai Kasang a ngwi pyaw ai lam gaw karum ya lu ai.

2. Karai Kasang a ngwi pyaw lam lu la mai ai ngu anhte hpa majaw kam mai ai kun?

² Kap bra ana chyam bra ai, shingra tara tsin-yam hkrum ai, mung masa lam n ru n ra byin ai, zingri zingrat hkrum ai zawn re ai grai yakhkak ai masa ni hpe hkrum ai shaloi, Karai Kasang a simsa ai lam gaja wa lu mai na kun? Dai ni kaw na langai mi hpe hkrum yang, anhte grai hkrit ai. Raitim, Yesu gaw shi a hpang hkan ai ni hpe ndai hku tsun da ai: “Nanhte myit hkum ru myit, hkrit mung hkum hkrit myit.” (Yhn 14:27) Yesu a dai ga hpe hpunau nauna ni hkan sa ai gaw kabu hpa re. Grai sawng ai chyam dinglik lam ni hkrum ai shaloi, Yehowa a karum shingtau lam hte shanhte ni simsa lam tam mu ma ai.

3. Kap bra ana chyam bra ai gaw, anhte a simsa lam hpe gara hku hkra machyi shangun ai kun?

³ Kap bra ana chyam bra ai gaw, prat a daw yawng ngu na daram hpe galai shai mat shangun ai. Kobit 19 gaw, lam law law hta hkra machyi shangun ai hpe myit yu u. Sawk sagawn ai lam langai  hta, kap bra ana laman, masha ka-ang hkup jan gaw, n lu yup ai manghkang byin ai ngu tsun ai. Kap bra ana laman, myit daw myit tsang ai lam ni, tsa chyaru hte nanghpam tsi hpe shut ai hku jailang ai, nta kata hta dang sha ai lam ni hte tinang hkum tinang sat si na matu shakut ai lam ni grau law wa ai. Nang nga ai shara hta kap bra ana chyam bra nga ai nga yang, myit tsang lam hpe gara hku hkang lu na kun? Karai Kasang a ngwi pyaw lam hpe gara hku lu mai na kun?

4. Hpang jahtum nhtoi hte seng ai Yesu a myihtoi ga hpe chye da ai gaw, hpa majaw anhte hpe simsa lam jaw ai kun?

⁴ Hpang jahtum nhtoi ni laman, kap bra ana chyam bra ai lam gaw, “shara kaga kaga” hta byin na ngu Yesu tau hkrau tsun da ai. (Luk 21:11) Simsa lam lu mai ai ngu anhte gara hku chye lu ai kun? Kap bra ana ni chyam bra ai hpe anhte n mau ai. Byin wa na ngu Yesu tau hkrau tsun da ai lam ni byin nga ai hpe anhte chye ai. “Kajawng kaja hkum byin nga mu” ngu nna hpang jahtum nhtoi hta asak hkrung nga ai ni hpe, Yesu jaw wa ai hpaji jaw ga hpe anhte hkan sa ga ai.​—Mat 24:6, NWT.

5. (a) Hpilipi 4:8, 9 hta lawm ai hte maren, kap bra ana ni chyam bra ai shaloi, hpa hpe akyu hpyi ging ai kun? (b) Chyum Laika nsen bang da ai hpe madat ai gaw, nang hpe gara hku akyu lu shangun ai kun?

⁵ Kap bra ana chyam bra ai gaw, anhte hpe aloi hte sha hkrit tsang shangun ai. Nauna Desi dai zawn byin wa ai. b Kobit 19 a majaw, kawa doi, kahpu hte shanhte hpe yu ya ai sarawun si mat ai hpang, shi kaw mung kap bra ana kap nna, asak kaba ai kanu kaw mung bai kap mat na hpe shi tsang ai. Kap bra ana a majaw bungli n nga mat nna, lusha hte nga shara a matu gara hku jaw ra na hpe mung tsang ai. Dai lam ni a majaw shi grai myit tsang nna, shana n lu yup ai. Raitim, Desi simsa lam bai lu wa ai. Gara hku nna kun? Myit simsa hkra, kaja ai hku sha chye myit hkra, karum ya na matu Yehowa kaw laksan akyu hpyi wa ai. (Hpilipi 4:8, 9 hpe hti u.) Chyum Laika nsen bang da ai hpe madat ai hku nna, Yehowa shi hpe ga shaga ai hpe madat wa ai. Shi ndai hku tsun ai: “Laika hti ai wa a nsen gaw, nye a myit hpe simsa shangun nna, Yehowa a matsan dum myit hpe bai dum wa shangun ai.”​—Shk 94:19.

6. Tinang hkrai hkaja ai lam hte nawku zuphpawng ni gaw nang hpe gara hku karum ya lu ai kun?

⁶ Kap bra ana chyam bra nga ai laman, ayan na galaw nga ai lam ni hpe galaw lu na matu gaw n loi ai. Raitim, tinang hkrai hkaja ai (sh) zuphpawng lung ai lam ni hpe hkra machyi ai du hkra hkum byin shangun. Anhte a laili laika hte video hta lawm ai mahkrum madup ni gaw, na a hpunau nauna ni mung dai zawn mayak mahkak ni a lapran, Yehowa hpe sadi dung let nawku nga ai lam nang hpe shadum ya na re. (1 Pe 5:9) Zuphpawng ni gaw, Chyum Laika hta lawm ai n-gun lu shangun ai lam ni hpe bai myit yu na  matu nang hpe karum ya na re. Dai sha n-ga, kaga ni hpe n-gun jaw na matu, tinang nan mung n-gun lu na matu ahkaw ahkang lu shangun ai. (Rom 1:11, 12) Yehowa gaw, shi hpe nawku ai ni, machyi ai, hkrit ai, garen gari ai shaloi, gara hku madi shadaw ya ai lam hpe bai myit yu yang, na a makam masham ngang kang wa nna, nang hpe mung shi madi shadaw ya na lam kam wa na re.

7. Kasa Yawhan kaw na hpa sharin la lu ai kun?

⁷ Hpunau nauna ni hte matut mahkai na matu shakut u. Kap bra ana chyam bra ai shaloi, hpunau nauna ni hte rau nga ai aten hta pyi, tsan tsan nga ra chye ai. Dai zawn aten ni hta, kasa Yawhan zawn nang hkamsha na re. Shi a manang Geu hte myiman chyaw “hkrum” mayu ai. (3 Yh 13, 14) Raitim, aten ladaw mi daram Geu hte n lu hkrum na hpe Yawhan chye ai. Dai majaw, shi galaw lu ai lam hpe galaw wa ai. Geu hpang de laika ka ai. Hpunau nauna ni hpang de masha nan sa chyai na matu ayan na n mai byin ai nga yang, phone hte ga shaga ai, video shaga ai, laika sa ai hku nna shanhte hte matut mahkai u. Hpunau nauna ni hte ayan na matut mahkai yang, shimlum ai, simsa ai ngu hkamsha na re. Grau nna gaw, myit tsang ai ngu hkamsha ai shaloi, myitsu salang ni hpang de matut mahkai u, shanhte a tsawra myit hte n-gun jaw ai hpe hkap la u.​—Esa 32:1, 2.

8. Shingra tara tsin-yam gaw, na a simsa lam hpe gara hku hkra machyi shangun chye ai kun?

⁸ Hka kaba ai, nnang nawn (sh) wan hkru ai lam hpe hkrum ga ai nga yang, dai zawn hkrum ngut ai hpang hta pyi, aten na na myit tsang nga chye ai. Tsawra ai marai langai ngai n nga mat ai, arung arai ni sum mat ai nga yang, yawn hkyen ai, myit mada lam n nga ai (sh) masin pawt ai baw pyi byin chye ai. Dai gaw, arung arai ra marin ai, makam masham n nga ai ngu ai lachyum n re. Nang gaw grai yak ai chyam dinglik lam ni hpe hkrum ai aten hta, nkau mi mung, nang n kaja ai hku bai htang na matu myit mada chye ai. (Yob 1:11) Raitim, simsa lam hpe tam mu mai ai. Gara hku nna kun?

9. Shingra tara tsin-yam a matu Yesu anhte hpe gara hku hkyen lajang ya ai kun?

⁹ Yesu a myihtoi ga ni hpe dum u. Shingra tara tsin-yam hpe galoi hkrum na n re ngu, myit da ai ndai mungkan na masha ni hte n bung ai sha, anhte gaw shingra tara tsin-yam ni grau law wa na, anhte nan mung nkau hpe hkrum na hpe myit mada da ai. Jahtum garai n du shi yang, “nnang nawn kaba” ni hte kaga shingra tara tsin-yam ni byin wa na ngu shi hpang hkan ai ni hpe Yesu tsun wa ai. (Luk 21:11) “Tara tawt lai ai amu law wa na” ngu nna mung, Yesu tau hkrau tsun wa ai hte maren, tara tawt lai ai, dawsa ai, hkrit hpa gasat ai lam ni hpe anhte mu lu nga ai. (Mat 24:12) Yehowa hpe n nawku ai ni sha, dai zawn tsin-yam hkrum na ngu Yesu n tsun wa ai. Yehowa a sadi dung ai mayam law law gaw, shingra tara tsin-yam law law hpe hkrum nga ai. (Esa 57:1; 2 Ko 11:25) Shingra tara tsin-yam ni kaw na anhte hpe mauhpa lam hte Yehowa makawp maga ya na gaw n re. Raitim, matut nna myit simsa na matu, ra ai lam yawng hpe shi jaw na re.

10. Shingra tara tsin-yam a matu ya aten kaw na hkyen lajang ai gaw hpa majaw makam masham nga ai lam madun ai rai kun? (Ga Shagawp 22:3)

¹⁰ Hkyak hkyak byin wa na masa lam ni a matu, tau hkrau hkyen lajang da na nga yang, gaja wa byin wa ai shaloi myit simsa na matu grau loi na re. Dai zawn hkyen lajang da ai gaw, Yehowa hpe n kam ai ngu ai lachyum tsep kawp n re. Shingra tara tsin-yam a matu hkyen lajang da ai gaw, anhte hpe lanu lahku ai shi a atsam hpe kam ai lam madun ai re. Gara hku nna kun? Byin wa chye ai shingra tara tsin-yam ni a matu, tau hkrau hkyen lajang da na matu Chyum Laika hta anhte hpe hpaji jaw da ai. (Ga Shagawp 22:3 hpe hti u.) Magazine sumhpa ni, nawku hpung zuphpawng ni hte aten dep ndau shana ai lam ni hku nna, hkyak hkyak byin wa chye ai lam ni a matu, tau hkrau hkyen lajang da lu hkra, Karai a uhpung gaw, anhte hpe chyahkring hkring n-gun jaw ai. c Yehowa hpe anhte kam ai kun?  Rai yang, tsin-yam garai n byin shi ai ya aten kaw na dai hpaji jaw ga hpe hkan sa ging ai.

11. Magaret a mabyin kaw na hpa sharin la lu ai kun?

¹¹ Nauna Magaret a mahkrum madup hpe myit yu ga. Shi nga ai shara makau hta sharaw wan hkru hpang ai hte kalang ta, asuya ni gaw shi hpe nta kaw na pru mat na matu tsun ai. Masha law law kalang ta hprawng ma ai majaw, lam pat mat nna mawdaw ni mung n lu sa mat ai. Nbung hta wan hkut ni hkrai rai mat nna, Magaret mung mawdaw kaw na n mai pru mat ai. Raitim, shi tau hkrau hkyen lajang da ai majaw lawt lu wa ai. Shi a sumbu hta lamu ga sumla bang da ai majaw, dai shara kaw na lu pru ai kaga lam hpe tam mu wa ai. Hkyak hkyak byin wa ai aten hta gara de sa ra na hpe chye hkra, mawdaw hpe pyi tau hkrau nna gau yu wa ai. Tau hkrau hkyen lajang da ai majaw, Magaret asak lawt wa ai.

12. Shimlum lam hte seng ai lam matsun ni hpe hpa majaw hkan sa ging ai kun?

¹² Anhte hpe makawp maga na matu hte kaga ni shimlum na matu, ahkang aya nga ai ni gaw, shana n mai pru ai aming, htawt na matu (sh) kaga tatut re ai lam ni hpe galaw na matu hpyi shawn wa chye ai. Nkau gaw shanhte a arung arai ni hpe n kam tawn da ai majaw, dai zawn re ai lam matsun ni hpe n hkan sa ma ai. Hkristan ni gara hku bai htang ging ai kun? Chyum Laika hta anhte hpe ndai hku tsun da ai: “Dai madu a marang e, masha hta na san tawn da ai aya shagu a npu e, a taw nga mu; tsaw htum nga ai hkawhkam a npu e rai ti mung, . . . shi san dat ai munggyi ni a npu e rai ti mung, a taw nga mu.” (1 Pe 2:13, 14) Karai a uhpung mung anhte shimlum na matu, lam matsun ni jaw ai. Hkyak hkyak byin wa ai aten hta, anhte hpe matut mahkai lu na matu, ya lang nga ai phone nambat ni, hkring dat ni hpe myitsu salang ni hpe jaw da na matu ayan na shadum ya ai. Nang dai hku galaw ngut sai kun? Nga shara, shara htawt ai lam, hkye mawai arung arai ni lu mai ai lam, kaga ni hpe gara aten hta gara hku karum ra na ngu ai hte seng ai lam matsun ni mung lu chye ai. Dai ni hpe n madat ai nga yang, tinang hte myitsu salang ni asak shoihpa nga chye ai. Anhte hpe dai sadi dung ai la ni lanu lahku ya nga ai hpe dum u. (Heb 13:17) “Myitsu salang ni hte uhpung a lam matsun hpe hkan sa ai majaw asak lawt mat ai” ngu Magaret tsun ai.

13. Shara htawt ra ai Hkristan law law hpe hpa gaw ngwi pyaw simsa lam jaw ai kun?

¹³ Shingra tara tsin-yam, majan, mung masa lam ni a majaw, shara htawt ra ai hpunau nauna law law gaw,  shanhte a masa lam nnan hta nga manu na matu, wenyi lam ni hpe kalang ta bai galaw lu na matu dang lu ai daram shakut nga ma ai. Zingri zingrat lam a majaw, dum bru dum bra byin mat ai tsa ban 1 na Hkristan ni zawn sha shanhte gaw matut nna “mungga hkaw dan” ai. (Kas 8:4) Hkaw tsun ai gaw, yakhkak ai masa ni hta na, mungdan lam hpe sha myit maju jung na matu shanhte hpe karum ya ai. Akyu hku nna ngwi pyaw simsa lam hpe shanhte matut hkang da lu ai.

14. Zingri zingrat lam gaw anhte a simsa lam hpe gara hku nna mat mat shangun chye ai kun?

¹⁴ Zingri zingrat hkrum ai shaloi, anhte hpe ngwi pyaw simsa lam jaw lu ai lam law law hpe sum kau ra chye ai. Wanglu wanglang zuphpawng lu ai, hkaw tsun lu ai, rim hkrum na hpe n hkrit ra ai sha, hkawm sa lu ai majaw, anhte grai kabu ga ai. Dai zawn lam ni hpe n lu galaw mat ai shaloi, matut hpa byin wa na ngu ai hpe myit nna hkrit tsang wa chye ai. Dai zawn hkamsha ai gaw n shut ai. Raitim, sadi ra ai. Zingri zingrat lam ni a majaw myit daw wa chye ai ngu, shi hpang hkan ai ni hpe Yesu tsun ai. (Yhn 16:1, 2) Rai yang, zingri zingrat hkrum wa ai shaloi, simsa lam hpe gara hku matut hkang lu na kun?

15. Zingri zingrat lam hpe anhte hpa majaw n hkrit ging ai kun? (Yawhan 15:20; 16:33)

¹⁵ Chyum Laika hta anhte hpe ndai hku tsun da ai: “Hkristu Yesu hta tara hkungga ai lam hkan nang mayu ai ni nlang hte gaw, zingri zingrat ai hkrum lu na mara ai.” (2 Tm 3:12) Hpunau Andre gaw, shi a mungdan hta uhpung hte seng ai bungli hkum pat hkrum ai shaloi, dai hpe hkap la na matu yak wa ai. ‘Ndai kaw Yehowa Sakse ni grai law ai. Yawng hpe gara hku lu rim na?’ ngu nna shi myit wa ai. Dai zawn myit ai gaw, shi hpe grau myit tsang wa shangun ai. Kaga hpunau ni gaw, Yehowa a lata hta ap da nna, lani ni gaw rim hkrum na re ngu myit da ma ai. Dai majaw, Andre daram shanhte n tsang ma ai. Andre mung shanhte myit ai zawn myit nna, Karai Kasang hpe kam na matu dawdan kau ai. Kade n na yang, simsa lam lu wa nna, ya nga yang, mayak mahkak ni a lapran, ngwi pyaw nga sai. Anhte mung dai zawn byin lu ai. Zingri zingrat lam hpe myit mada da ra na lam, Yesu tsun ai shaloi, sadi mung dung lu ai lam shi tsun wa ai.​—Yawhan 15:20; 16:33 hpe hti u.

16. Zingri zingrat hkrum ai shaloi gara lam matsun ni hpe anhte madat mara ra ai kun?

 ¹⁶ Uhpung bungli hkum pat hkrum ai, nkau hpe sha galaw mai ai shaloi, ginjaw garan rung hte myitsu salang ni kaw na lam matsun ni hpe anhte lu wa chye ai. Dai gaw anhte hpe makawp maga na matu, wenyi malu masha ni hpe matut lu la na matu, hkaw tsun bungli hpe matut galaw lu na matu re. Lu la ai lam matsun hpe hpring tup n chye na yang pyi madat mara u. (Yak 3:17) Hpunau nauna ni a lam, nawku hpung a lam, n chye ging ai ni hpe galoi hkum tsun dan.​—Hpj 3:7.

17. Tsa ban 1 na kasa ni zawn sha, anhte hpa galaw na matu dawdan da ai kun?

¹⁷ Karai a masha ni hpe Satan gasat ai a madung lam gaw, “Yesu a sakse ga lang ai” majaw re. (Shr 12:17) Satan hte shi a mungkan a majaw hkum hkrit mat. Ninghkap ai lam ni nga tim, hkaw tsun ai hte sharin achyin ai gaw, ngwi pyaw simsa lam lu shangun ai. Tsa ban 1 hta, matut n hkaw tsun na matu Yuda ahkang aya nga ai ni tsun ai shaloi, kasa ni gaw Karai a ga madat nna matut hkaw tsun ai. Dai bungli gaw shanhte hpe ngwi pyaw shangun ai. (Kas 5:27-29, 41, 42) Anhte a bungli nkau hpe hkum pat ai shaloi, matut hkaw tsun ra tim, hpaji rawng ra ai. (Mat 10:16) Anhte kaja htum shakut na nga yang, Yehowa a myiman lu nga ai, asak hkye bungli hta shang lawm nga ai ngu ai myit a majaw simsa lam lu na re.

18. Jet ai simsa lam hpe kadai kaw na lu mai ai kun?

¹⁸ Yak dik htum aten hta pyi, simsa lam lu mai ai ngu ai hpe kam u. Dai zawn aten hta ra ai gaw, Yehowa sha jaw lu ai Karai a simsa lam re. Kap bra ana chyam bra ai, shingra tara tsin-yam, zingri zingrat hkrum ai shaloi, Yehowa hpe kamhpa u. Uhpung hte ani sha nga u. Grai kaja ai htawm hpang hpe myit mada nga u. Rai yang, “ngwi pyaw ai a npawt Karai Kasang gaw, nanhte hte rau a nga nga na ra ai.” (Hpl 4:9) Hpang na sumhpa hta, yakhkak hkrum nga ai hpunau nauna ni hpe Karai a ngwi pyaw lam lu hkra, gara hku karum ya mai ai lam bawngban mat na re.