“Ga ting hpe jahpring nna dai hpe up nga lu mu” ngu shinggyim masha ni hpe Yehowa htet da ai gaw, mungkan ting hpe angwi ngwi hte hparadisu byin wa hkra galaw u, ngu ai lachyum re. (Nin 1:28) Mungkan ga hta htani htana asak hkrung na ni gaw, dai hkang da ai ga hpe hkan sa ra ai. Mungkan ga hta Edin sun n nga mat sai majaw, nnan kaw na galaw hpang ra ai. Hara Magedon ngut ai hpang, mungkan ga san seng na matu, galaw ra ai bungli ni grai law hkra nga na re. Grai nan bungli kyin na gaw teng sha re.

Dai gaw, Babelon kaw na bai wa ai Israela ni galaw wa ai bungli ni hpe bai dum shangun ai. Shanhte a mungdan gaw shaning 70 ting masha n nga wa ai. Raitim, Yehowa a shaman chyeju a majaw, grai tsawm ai mungdan byin wa na ngu Esaia tau hkrau tsun da ai. Myihtoi ga hta ndai hku tsun da ai: “De a nam mali hkan e Eden zawn, de a zaibru jang e Yehowa a sun zawn, shatai wu ai.” (Esa 51:3) Dai hte maren, Israela ni galaw  lu wa ai. Dai zawn sha, mungkan ga hpe madu lu na ni gaw, Yehowa a shaman chyeju hte atsawm uphkang lu na re. Dai bungli hta lawm mayu ai ngu ai hpe ya kaw na madun lu ai.

Galaw lu ai lam langai gaw, tinang a nta hte makau grup yin hpe san seng hkra galaw ai hku nna re. Makau grup yin na ni gara hku mi nga tim, tinang gaw san seng hkra nga ra ai. Nawku Htingnu, Zuphpawng Kaba Htingnu ni hpe jasan jaseng ai, gram lajang ai lam ni hta shang lawm mai ai. Mai byin yang hkye mawai bungli hta, shawang lit gun na matu mung shawk shawn mai ai. Dai gaw, ra wa yang jin jin rai nga ai ngu ai hpe madun nga ai re. Mungkan ga hta htani htana asak hkrung na ahkang lu ai shaloi, asung shang na ladat hpaji langai ngai hpe ngai sharin la lu na kun? ngu tinang hkum tinang san u. 

Ya-iru a kasha hpe hkrung rawt ya ngut ai hpang, shahpa lama ma jaw na matu Yesu htet ai. (Mrk 5:42, 43) Dai asak 12 ning re ai numsha hpe jaw sha na matu gaw n yak ai. Raitim, “lup ni hta rawng nga ai ni nlang hte gaw shi a nsen na nna, pru lu na ahkying du na ra ai” ngu ai Yesu a ga sadi hpring tsup wa ai shaloi, kade daram bungli law na hpe myit yu u. (Yhn 5:28, 29) Chyum Laika hta ahkri ahkrai n tsun da tim, hkrung rawt wa ai ni hpe malu masha, nga shara, bu hpun palawng jaw ra na re. Karum ya na matu jin jin re ai lam, ya kaw na pyi madun mai na kun? Ndai ga san ni hpe myit yu u. 

Tinang a nawku hpung de hpung kawan sa kawan na ngu ndau shana ai shaloi, shat daw mai na kun? Aten hpring magam gun ai ni, Behtela kaw na hkaw tsun lawk de bai sa ra ai shaloi, hpung kawan langai lit ngut mat ai shaloi, nga shara tam mu hkra karum ya mai na kun? Na a ginra hta, ginwang zuphpawng, laksan zuphpawng kaba ni galaw ai nga yang, zuphpawng garai n hpang shi yang hte ngut ai hpang, bungli galaw na matu, dat kasa ni hpe sa tau na matu, shawang lit gun mai na kun?

Kasa 24:15 hku nga yang, wan hkying hku law ai masha ni bai hkrung rawt wa na ngu anhte myit mada da ai. Shanhte kaw na law law gaw, Yehowa a lam chye na ahkang n lu ai sha si mat ai ni re. Shanhte bai hkrung rawt wa ai shaloi dai ahkaw ahkang lu na re. a Sadi dung ai, mahkrum madup nga ai Karai a mayam ni gaw, dai zawn sharin achyin ai lam hta karum ya na re. (Esa 11:9) Urawpa, Dingda Amerika hte Ahprika hta hkaw tsun wa ai nauna Shalawt gaw, dai ahkaw ahkang hpe myit mada nga ai. “Hkrung rawt wa ai ni hpe sharin ya na matu ngai myit mada nga ai. Moi prat hta asak hkrung wa ai marai langai ngai a lam hpe ngai hti hkrup ai shaloi, ‘Ndai wa she Yehowa a lam chye yang, shi a prat gaw grai shai nga na re’ ngu ngai myit hkrup ai. Shanhte hpa ni sum mat ai ngu ai hpe tsun dan mayu sai” ngu nna shi kabu gara hte tsun ai.

Mungkan ga de Yesu garai n sa shi yang, asak hkrung wa ai Yehowa a sadi dung ai mayam ni pyi, grai law hkra sharin la ra na re. Daniela gaw myihtoi ga ni hpe shi nan ka wa tim, shi n chye na wa ai. Dai myihtoi ga ni hpring tsup wa ai lam, shi hpe bai tsun dan lu na gaw kabu hpa re. (Dan 12:8) Ruhta hte Naomi hpe mung, shanhte a dinghku kaw na Meshia gara hku yu hkrat wa ai lam chye hkra karum ya lu na re. Ndai nhkru ai mungkan a myit bra ai lam ni, dip n-gun ni n nga ai sha, mungkan ting sharin achyin ai lamang hta shang lawm lu ai gaw kabu hpa re.

Dai lamang hta shang lawm na matu shajin nga ai lam, ya kaw na gara hku madun lu ai kun? Lam langai gaw, sharin achyin atsam rawt jat hkra shakut ai, dai ni aten na mungkan ting hkaw tsun bungli hta, ayan shang lawm ai hku nna re. (Mat 24:14) Ya aten hta, na a asak aprat hte kaga masa lam ni a majaw, shadawn sharam sha lu galaw tim, nang shakut ai lam ni gaw, hkrung rawt wa ai ni hpe sharin ya na matu jin jin rai nga ai lam madun mai ai.

Ndai ahkyak ai ga san ni hpe myit yu u. Mungkan ga hpe madu lu na matu, uphkang na matu, bai hkrung rawt wa ai ni hpe sharin achyin ya na matu, shara jahkrat ya na matu nang myit mada nga ai kun? Mungkan ga hpe madu lu ai shaloi, galaw ra na bungli ni hpe ya aten kaw na galaw nga ai hku nna, mungkan ga hta htani htana asak hkrung na matu shajin nga ai lam madun mai ai.