1. Karai Kasang hpe gara hku aten jaw mai na kun?

TINANG tsawra ai ni hte rau nga lu ai hpe anhte grai ra sharawng ai. Yan la ni gaw, shana maga daw hta, sim sim sa sa rau nga lu ai hpe grai ra ma ai. Ramma ni mung, hku hkau ai manang ni hte kanawn mazum ai aten hpe grai ra ai. Anhte mung, hpunau nauna ni hte kanawn mazum ai hpe ra sharawng ai. Ra dik htum gaw, Karai hpe aten jaw nna kanawn mazum ai aten re. Akyu hpyi ai, Chyum Laika hti ai, Karai a yaw shada lam, atsam ningja ni hpe myit sawn sumru ai hku nna galaw ma ai. Karai hpe aten jaw ai gaw manu dan dik htum re.​—Shk 139:17.

2. Gara yak ai lam ni hkrum nga ai kun?

² Karai Kasang hpe aten jaw ai hpe anhte ra sharawng tim, yak ai lam ni gaw nga ai. Bungli grai law ai majaw, wenyi lam hpe aten jaw nna galaw na matu yak ai. Bungli, dinghku lit, kaga galaw ra ai lam ni a majaw, akyu hpyi na matu, Chyum Laika hkaja na matu, myit sawn sumru na matu aten n nga ai ngu hkamsha chye ai.

3. Aten hte seng nna hkrum chye ai manghkang gaw hpa rai kun?

³ Anhte a aten hpe kashun la ai kaga lam naw nga ai. Lam nkau hpe galaw ai gaw n shut tim, n sadi yang, aten ma mat nna, Karai hpe aten n lu jaw ai baw byin chye ai. Ga shadawn,  ban sa ra ai majaw, akyu nga ai hku ban sa la ai raitim, wenyi lam galaw na matu aten n nga mat chye ai. Dai majaw, ban sa lam hpe shi shara hte shi tawn ra ai.​—Gsh 25:27; 1 Tm 4:8.

4. Gara lam ni hpe bawngban na kun?

⁴ Prat hta shawng tawn ra ai lam ni hpe hpa majaw masat ra ai kun? Yehowa a matu kaja htum aten hpe gara hku jaw lu ai kun? Aten hpe hpaji rawng ai hku akyu jashawn ai gaw gara hku akyu nga ai kun? ngu ai lam ni hpe ndai sumhpa hta bawngban mat na re.

5. Ehpesu 5:15-17 hta lawm ai hpaji jaw ga hpe bai myit yu ai gaw kaja htum prat hpe lata na matu ramma ni hpe gara hku karum ya ai kun?

⁵ Kaja htum prat hpe lata u. Ramma ni gaw, prat hpe kaja htum byin mayu ma ai. Sara ni, n kamsham ai nta masha ni gaw, shang gumhpraw kaja ai bungli lu na matu, madang tsaw hpaji sharin yang kaja ai ngu n-gun jaw ma ai. Dai hpe lata yang, aten grai ma na re. Maga mi hta gaw, kanu kawa ni, nawku hpung kaw na manang ni gaw, Yehowa a magam hta aten hpe akyu jashawn na matu n-gun jaw ma ai. Yehowa hpe tsawra ai ramma ni kaja htum dawdan lu na matu, hpa gaw karum ya na kun? Ehpesu 5:15-17 hpe hti nna myit sawn sumru ai gaw karum ya lu ai. (Hti u.) Dai Chyum daw hpe hti nna, tinang hkum tinang ndai hku san mai ai: “Madu a myit ra ai lam” gaw hpa rai kun? Gara dawdan lam hpe Karai ra sharawng na kun? Gara dawdan lam gaw aten hpe akyu nga shangun na kun? Satan uphkang nga ai “ya na nhtoi ladaw ni gaw n shawp” ai. Kade n na yang, jahtum du sana hpe dum u. Dai majaw, prat hpe Yehowa ra sharawng ai hku akyu jashawn ai gaw hpaji rawng na re.

6. Mari hpa hpe lata wa ai kun? Dai gaw hpa majaw hpaji rawng ai kun?

⁶ Shawng tawn ra ai lam ni hpe masat u. Aten hpe kaja htum akyu jashawn lu na matu, grau ahkyak ai lam hpe chye lata ra ai. Dai hpe, Mari yan Marhta a nta de Yesu sa chyai ai shaloi na mabyin hta mu lu ai. Yesu sa chyai ai majaw, Marhta grai kabu nna, kaja htum malu masha ni hkyen lajang ya ai. Raitim, kanau Mari chyawm gaw, Yesu makau hta dung nna, shi sharin ya ai lam yawng hpe madat nga ai. Marhta galaw ai lam n shut tim, Mari gaw “kaja ai kumhtaw lata la nu ai” ngu Yesu tsun ai. (Luk 10:38-42) Dai aten hta, hpa ni jaw sha wa ai hpe, hpang hta Mari malap mat na re. Raitim, Yesu sharin ya ai lam ni hpe gaw galoi malap na n re. Yesu hpe aten jaw wa ai hpe Mari manu shadan ai zawn, anhte mung Yehowa hpe, aten jaw ai hpe manu shadan ai. Dai aten hpe kaja htum gara hku akyu jashawn mai na kun?

7. Akyu hpyi ai, Chyum Laika hkaja ai, myit sawn sumru ai gaw hpa majaw ahkyak ai kun?

⁷ Akyu hpyi ai, Chyum Laika hkaja ai, myit sawn sumru ai gaw, nawku dawjau ai lam hta lawm ai hpe chye da ra ai. Akyu hpyi ai gaw, anhte hpe tsawra ai sumsing Kawa hte matut mahkai nga ai re. (Shk 5:7) Chyum Laika hkaja ai gaw, nyan hpaji yawng a Npawt re ai “Karai Kasang hpe chye chyang ai nyan” lu la hkra galaw nga ai re. (Gsh 2:1-5) Myit sawn sumru ai gaw, Yehowa a atsam ningja ni, anhte hte hpawn, hpan da hkrum ai lam ni hte seng ai yaw shada lam hpe sung sung myit ai re. Dai gaw, aten hpe kaja htum akyu jashawn mai ai lam re. Dai hku galaw lu na matu hpa gaw karum ya na kun?

8. Aten hpe akyu jashawn ai hte seng nna Yesu kaw na hpa sharin la lu ai kun?

 ⁸ Byin mai yang, simsa ai shara hpe lata u. Yesu a lam hpe myit yu u. Magam garai n gun shi yang, nam maling hta, nhtoi 40 ya nga wa ai. (Luk 4:1, 2) Dai zawn simsa ai shara hta, Yehowa kaw akyu hpyi nna, shi hte seng ai Kawa a myit ra ai lam hpe myit sawn sumru wa na re. Dai gaw, kade n na yang hkrum wa na chyam dinglik lam ni a matu, hkyen lajang lu hkra karum ya ai. Yesu a kasi kaw na gara hku akyu lu mai ai kun? Na nta hta, masha law ai nga yang, simsa ai shara tam na matu n loi ai. Dai shaloi, nta shinggan hta simsa ai shara tam mai ai. Pyintit mungdan kaw na nauna Juli dai hku galaw wa ai. Shi hte madu wa gaw, shara grai gyip ai nta kaw nga ai majaw, gin jang ai lam n nga ai sha, tinang hkrai nga na matu n loi ai. Shi ndai hku tsun ai: “Dai majaw, shani shagu nampan sun de sa nna lam hkawm ai. Dai hta, myit n bra ai sha, tinang hkrai Yehowa hte ga shaga lu ai.”

9. Bungli law ai lapran Yehowa hte hku hkau lam hpe manu shadan ai lam Yesu gara hku madun ai kun?

⁹ Yesu gaw bungli grai law ai. Ginding aga hta, magam gun ai shaloi, shi sa ai shara shagu de masha hpawng galoi mung hkan nang ai. Kalang mi hta, shi hpe mu na matu, “mare ting, dai chyinghka lam makau e sa zup hpawng nga ma ai.” Dai hku byin nga tim, nhtoi garai n htoi shi yang, “machyi shim ai shara” de sa nna, Yehowa kaw akyu hpyi na matu Yesu aten la ai.​—Mrk 1:32-35.

10-11. Mahte 26:40, 41 hku nga yang, Getsemane sun hta sape ni hpe hpa galaw na matu Yesu n-gun jaw ai kun? Hpa byin wa ai kun?

¹⁰ Magam gun ai aten ngut na mahka re ai, ginding aga prat hpang jahtum shana hta, myit sawn sumru na, akyu hpyi na matu Getsemane sun na simsa ai shara de Yesu sa ai. (Mat 26:36) Dai aten hta sha, sape ni hpe akyu hpyi ai hte seng ai ahkyak ai lam sharin ya ai.

¹¹ Hpa byin wa ai hpe myit yu ga. Yesu hte kasa ni Getsemane sun de du ai shaloi, nsin grai sin sai. Yesu gaw “maja nga” mu ngu tsun nna, akyu hpyi na matu sa mat ai. (Mat 26:37-39) Dai shaloi, sape ni yup pyaw mat ai. Shanhte yup pyaw nga ai hpe mu ai majaw, “maja nga ai hte akyu hpyi nga mu” ngu Yesu kalang bai n-gun jaw ai. (Mahte 26:40, 41 hpe hti u.) Sape ni myit pu ba nga ai, “hkum shan mahtang n-gun kya nga ai” hpe Yesu chye na ya ai. Akyu hpyi na matu, lahkawng lang bai sa ai. Bai wa shagu sape ni yup pyaw nga ai.​—Mat 26:42-45.

12. Myit ru myit tsang lam ni, pu ba ai lam ni a majaw akyu hpyi na matu yak nga yang hpa galaw ging ai kun?

¹² Htap htuk ai aten hpe lata u. Kalang lang, myit ru myit tsang lam ni, pu ba ai lam ni a  majaw akyu hpyi na matu yak chye ai. Raitim, dai zawn byin ai gaw nang hkrai sha n re. Hpa galaw mai ai kun? Shana nsin sin ai shaloi akyu hpyi ai hta na, nau n pu ba shi ai nrim rim ai aten hta hpyi ai gaw grau kaja ai hpe nkau mi chye wa ai. Akyu hpyi ai hkrang nsam mung ahkyak ai hpe chye wa ma ai. Raitim, myit tsang lam ni law ai majaw, myit daw ai majaw, akyu hpyi na matu yak nga yang gaw gara hku kun? Yehowa hpe tinang a hkamsha lam ni tsun dan u. Tsawra myit kaba ai Karai Kasang chye na ya na re.​—Shk 139:4.

13. Akyu hpyi ai, hkaja ai, zuphpawng lung ai aten ni hta electronic hkingrai ni gaw gara hku dingbai dingna jaw ai kun?

¹³ Chyum Laika hti ai aten dingbai dingna n byin hkra galaw da u. Akyu hpyi ai sha Yehowa hte hku hkau lam lu shangun ai n re. Chyum Laika hti ai, zuphpawng lung ai mung, shi hte hku hkau shangun ai. Chyum Laika hti ai, zuphpawng lung ai aten ni hpe kaja htum byin hkra gara hku galaw mai ai kun? Dai aten ni hta, ‘hpa ni gaw dingbai dingna jaw ai kun?’ ngu tinang hkum tinang san u. Phone ni, laika ni shang wa ai kun? Ya prat hta, masha law law kaw phone ni, kaga jak rai ni nga ma ai. Lama ma hpe myit maju jung nga ai aten hta, tinang makau hta phone nga ai gaw dingbai dingna byin shangun ai ngu hpaji du ni tsun ma ai. “Tinang galaw nga ai hta myit n lu jung mat ai. Myit bra mat ai” ngu myit hte seng ai hpaji du langai tsun ai. Ninghtawn, ginwang zuphpawng ni garai n hpang shi yang, kaga ni hpe dingbai dingna n byin hkra, phone setting hpe galai shai da na matu tsun chye ai. Yehowa hte rau nga ai aten hta mung, anhte hpe dingbai dingna n byin hkra dai hku galaw da ging ai.

14. Hpilipi 4:6, 7 hku nga yang, myit maju jung lu na matu, Yehowa gara hku karum ya na kun?

¹⁴ Myit maju jung lu hkra Yehowa kaw akyu hpyi u. Chyum Laika hkaja ai, zuphpawng lung ai aten ni hta myit bra nga yang, Yehowa kaw karum hpyi u. Myit tsang ai lam ni nga yang, hti ai lam, na ai lam ni hpe myit maju jung na matu yak ai. Raitim, myit maju jung na matu ahkyak ai. Dai majaw, myit masin hpe sha n-ga, “myit mang ai” lam hpe makawp maga ya ai simsa lam nga na matu, akyu hpyi ra ai.​—Hpilipi 4:6, 7 hpe hti u.

15. Yehowa hte aten jaw kanawn mazum yang hpa akyu ni lu wa na kun?

¹⁵ Yehowa hte ga shaga na matu, Shi a ga madat na matu, Shi a lam myit sawn sumru na matu, aten jaw yang akyu hkamsha lu na re. Gara hku nna kun? Langai, kaja ai dawdan lam ni jahkrat lu wa na. Chyum Laika hta, “hpaji rawng ai ni hte kanawn ai wa hpaji rawng na ra ai” ngu tsun da ai. (Gsh 13:20) Dai majaw, nyan hpaji a Npawt re ai Yehowa hte aten jaw nna kanawn mazum yang, nang mung hpaji rawng wa na re. Karai myit pyaw hkra hpa galaw ra ai, gara lam gaw shi hpe yawn shangun ai hpe chye wa na re.

16. Yehowa hte aten jaw nna kanawn mazum ai gaw sharin achyin ya ai atsam hpe gara hku rawt jat shangun ai kun?

¹⁶ Lahkawng, tang du hkra sharin ya lu ai wa byin wa na. Marai langai ngai hpe Chyum Laika sharin ya ai shaloi, madung yaw shada lam gaw, Yehowa hte hku hkau wa hkra karum ya na matu re. Tinang mung sumsing Kawa hte matut mahkai lam law wa yang, Shi hpe grau tsawra wa na re. Rai yang, Chyum ga sharin hpe mung, Karai hpe tsawra wa hkra sharin ya lu wa na re. Yesu a kasi ningli hpe myit yu u. Shi gaw Yehowa a lam hpe tsawra myit hte tsun dan ai majaw, sape ni mung Yehowa hpe tsawra wa ai.​—Yhn 17:25, 26.

17. Akyu hpyi ai hte hkaja ai lam gaw makam masham ngangkang na matu gara hku karum ya ai kun?

¹⁷ Masum, makam masham ngangkang wa na. Yehowa a lam matsun, shalan shabran lam, madi shadaw lam ni hpe hpyi ai shaloi, hpa byin wa ai hpe myit yu u. Yehowa mahtai jaw ai hpe mu shagu makam masham grau ngangkang wa ai. (1 Yh 5:15) Makam masham ngangkang wa hkra hpa gaw karum ya lu ai kun? Tinang hkrai hkaja ai lam re. “Kam sham ai gaw na la lu ai kaw nna,” byin wa ai hpe dum u. (Rom 10:17) Raitim, makam masham ngangkang na matu, machye machyang nga ai hte n hkum tsup ai. Hpa naw galaw ra ai kun?

18. Hpa majaw myit sawn sumru ra ai hpe sanglang dan u.

¹⁸ Chye wa ai lam ni hpe myit sawn sumru ra ai. Shakawn 77 hpe ka ai wa a lam hpe myit yu ga. Israela amyu ni Yehowa a myi man n lu sai ngu shadu ai majaw shi grai myit daw nga ai. Dai majaw, shana mung n lu yup ai. (Daw kaji 2-8) Shi hpa galaw ai kun? “Nang galaw ai lam nlang hte hpe ngai myit nga nna, Na a magam amu hpe myit aru yu na” ngu Yehowa hpe tsun ai. (Daw kaji 12) Lai wa sai aten hta, Israela ni hpe Yehowa galaw ya wa ai lam ni hpe shakawn kungdawn sara chye ai. Raitim, “Karai Wa gaw matsan dum na malap kau a ni? Masin pawt let shi a  sumnung ai myit hpe, Dawm la kau na nu ni?” ngu myit wa ai. (Daw kaji 9) Dai majaw, moi aten hta, Yehowa galaw ya ai lam, matsan dum myit madum wa ai lam ni hpe bai sumru ai. (Daw kaji 11) Dai shaloi, Yehowa gaw shi a amyu hpe galoi n kau da ai hpe kam wa ai. (Daw kaji 15) Dai zawn sha, Shi amyu hpe Yehowa galaw ya wa ai lam ni, na matu laksan galaw ya wa ai lam ni hpe myit sawn sumru yang, makam masham ngangkang wa na re.

19. Yehowa hte aten jaw nna kanawn mazum yang kaga hpa akyu naw lu na kun?

¹⁹ Mali, ahkyak htum gaw Yehowa hpe tsawra ai myit law htam wa na. Yehowa a ga madat na matu, sak jaw na matu, mayak mahkak ni hpe hkamjan na matu, tsawra myit gaw shadut ya ai. (Mat 22:37-39; 1 Ko 13:4, 7; 1 Yh 5:3) Yehowa hte hku hkau ai jinghku byin lu ai gaw manu dan dik htum re.​—Shk 63:1-8.

20. Yehowa a matu na aten hpe akyu jashawn lu hkra gara hku lajang da ai kun?

²⁰ Akyu hpyi ai, Chyum Laika hkaja ai, myit sawn sumru ai gaw, nawku dawjau ai lam hta lawm ai hpe dum u. Yesu zawn sha, Yehowa hpe aten jaw na matu, simsa ai shara hpe tam u. Dingbai dingna n byin hkra galaw u. Nawku dawjau ai lam ni hpe galaw ai shaloi, myit maju jung lu hkra Yehowa kaw karum hpyi u. Ya aten hta, aten hpe kaja htum akyu jashawn yang, Yehowa shaman chyeju jaw na re. Mungkan nnan hta mung, htani htana asak jaw na re.​—Mrk 4:24.