1-2. (a) Tinang tsawra ai si mat ai wa hpe gara aten hta grau dum chye ai kun? (b) Yesu garai n si shi ai shana hta gara poi hpe Yesu nnan hpang galaw wa ai kun?

TSAWRA ai marai langai si mat nna, kade daram na sai raitim, anhte dum nga dingyang re. Si ai nhtoi du yang grau dum ai.

² Anhte tsawra ai Yesu Hkristu a ladu hkrum nhtoi hpe, mungkan ting na wan hku law ai masha ni hte rau shaning shagu lung ai. (1 Pe 1:8) Yubak hte si ai kaw na lawt na matu, anhte hpe gawng malai hkungga jaw wa ai wa hpe, dum ai hku nna lung ai re. (Mat 20:28) Yesu gaw, shi a si ai lam hpe sape ni hpe dum shangun mayu ai. Dai majaw, garai n si shi yang, shana shat sha poi hpe laksan galaw hpang nna, “ngai hpe adum nga na matu, ndai galaw mu” ngu htet da ai.​—Luk 22:19.

3. Ndai sumhpa hta hpa lam bawngban na kun?

³ Hkristu a Si Ai Myit Dum Poi hpe lung ai ni hta, sumsing lamu myit mada lam nga ai ni gaw loi mi sha re. Law malawng gaw, ginding aga myit mada lam nga ai ni re. Ndai sumhpa hta, hpung lahkawng yan, dai poi hpe shaning shagu hpa majaw lung ai lam, gara hku akyu lu ai lam hpe bawngban mat na re. Shawng nnan, dai poi hpe namman chya hkam ai ni, hpa majaw lung ai hpe bawngban na re.

4. Myit Dum Poi hta namman chya hkam ai ni muk hte tsabyi hpa majaw sha ai kun?

⁴ Myit Dum Poi lung ai namman chya hkam ai ni gaw, muk hte tsabyi sha ma ai. Hpa majaw kun? Mahtai lu na matu, Yesu a ginding aga hpang jahtum shana hta, hpa byin wa ai hpe bawngban yu ga. Shalai Wa Ai Poi ngut ai hpang, Madu A Shana Shat Sha Poi ngu chye ma ai poi hpe Yesu galaw hpang wa ai. Sadi dung ai kasa 11 hpe muk hte tsabyi garan ya nna sha na matu tsun ai. Ngut ai hpang, ga shaka nnan hte Mungdan ga shaka tawn wa ai. * (Luk 22:19, 20, 28-30) Dai ga shaka ni gaw, kasa ni hte lata la hkrum ai ni hpe sumsing lamu hta, hkawhkam hte hkinjawng byin na ahkang lu shangun ai. (Shr 5:10; 14:1) Ga shaka lahkawng yan hta lawm ai ngam nga ai namman chya hkam ai ni * sha, Myit Dum Poi hta muk hte tsabyi sha ai.

5. Namman chya hkam ai ni gaw, shanhte lu da ai ahkaw ahkang hte seng nna hpa hpe chye ai kun?

⁵ Myit Dum Poi hpe namman chya hkam ai ni lung mayu ai kaga lam langai naw nga ai. Tinang a myit mada lam hpe myit sawn sumru na ahkang lu ai majaw re. Sumsing lamu hta n si lu ai, n htenza lu ai asak lu na. Yesu Hkristu hte hkrung rawt ngut sai 144,000 hte rau magam gun lu na. Ahkyak htum gaw, Yehowa a man hta magam gun lu na re. Dai ahkaw ahkang ni gaw, Yehowa jaw da ai mauhpa myit mada lam ni re. (1 Ko 15:51-53; 1 Yh 3:2) Dai zawn sumsing chyeju lu na matu, saw shaga hkrum ai hpe shanhte chye ai. Si ai du hkra sadi dung ra na hpe mung chye ai. (2 Ti 4:7, 8) Sumsing lamu myit mada lam gaw, shanhte hpe grai ngwi pyaw shangun ai. (Tit 2:11) “Sagu kaga” ni gaw, Myit Dum Poi hpa majaw lung ai kun?​—Yhn 10:16.

6. Sagu kaga ni gaw Myit Dum Poi hpe hpa majaw shaning shagu lung ai kun?

⁶ Myit Dum Poi lung ai sagu kaga ni gaw, muk hte tsabyi n sha tim, shang lawm ai ni hku nna lung ma ai. Ginding aga myit mada lam nga ai ni hpe, Myit Dum Poi lung na matu, 1938 hta shawng nnan hku nna laksan saw shaga wa ai. 1938, March shata hta shapraw ai Sin Langchyi-E hta, “[Sagu kaga] ni, Myit Dum Poi hpe shang lawm ai ni hku nna lung ai gaw htap htuk ai. . . . Dai aten gaw, shanhte a matu mung ngwi pyaw ai aten re” ngu tsun da ai. Hkungran poi lung na matu, saw shaga hkrum ai manam ni zawn, sagu kaga ni gaw, Myit Dum Poi lu lung ai majaw grai pyaw ai.

7. Myit Dum Poi mungga hpe sagu kaga ni hpa majaw la nga ai kun?

⁷ Sagu kaga ni mung, tinang a myit mada lam hpe myit sawn sumru ai. Myit Dum Poi mungga hpe la nga ai. Mungga hta, Shaning Hkying Mi Uphkang ai laman, sadi dung ai ni a matu, Hkristu hte shi hte rau uphkang na 144,000 galaw ya na lam ni hpe madung tsun dan ai majaw re. Hkawhkam Yesu Hkristu a woi awn ai npu hta rau uphkang na ni gaw, mungkan ga hpe hparadisu byin hkra galaw ya nna, madat mara ai shinggyim masha ni hpe hkum tsup wa hkra karum ya na re. Esaia 35:5, 6; 65:21-23 hte Shingran 21:3, 4 hta lawm ai hpring tsup wa na myihtoi ga  ni hpe shingran yu lu ai gaw, Myit Dum Poi lung ai ni a matu myit kahpra hpa re. Mungkan nnan hta, tsawra ai ni hte rau nga nga ai ngu shingran yu dat yang, makam masham grau ngang kang wa na re. Yehowa a magam hta, galoi mung shang lawm na ngu ai dawdan lam mung grau ngang kang wa na re.​—Mat 24:13; Gal 6:9.

8. Sagu kaga ni Myit Dum Poi lung ai kaga lam gaw hpa rai kun?

⁸ Sagu kaga ni Myit Dum Poi lung ai kaga lam hpe naw myit yu ga. Namman chya hkam ai ni hpe tsawra nna, madi shadaw ai lam madun mayu ai majaw re. Namman chya hkam ai ni hte ginding aga myit mada lam nga ai ni gaw, grai hku hkau na ngu Chyum Laika hta tau hkrau tsun da ai. Ga shadawn nkau hpe bawngban yu ga.

9. Zehkaria 8:23 hta lawm ai myihtoi ga gaw, namman chya hkam ai hpunau nauna ni a ntsa tawn ai sagu kaga ni a hkamsha lam hpe gara hku madun dan ai kun?

⁹ Zehkaria 8:23 hpe hti u. Dai myihtoi ga gaw, namman chya hkam ai hpunau nauna ni a ntsa tawn ai sagu kaga ni a hkamsha lam hpe madun dan ai. “Yuda masha wa” hte “nanhte” ngu ai gaw, ngam nga ai namman chya hkam ai ni hpe tsun ai re. (Rom 2:28, 29) “Ga amyu baw kaga ga tsun ai marai shi” gaw, sagu kaga ni hpe tsun ai re. Namman chya hkam ai ni hte rau, chyoi pra ai nawku dawjau lam hta shang lawm ai hku nna, shanhte a palawng hpe ngang ngang “jum” da ai. Lam mi htu tsun yang, shanhte hpe sadi dung let madi shadaw ya ai. Dai lam hpe Myit Dum Poi lung ai hku nna madun ma ai.

10. Ezekela 37:15-19, 24, 25 hta lawm ai myihtoi ga hpe Yehowa gara hku hpring tsup ya ai kun?

¹⁰ Ezekela 37:15-19, 24, 25 hpe hti u. Namman chya hkam ai ni hte sagu kaga ni kahkyin gumdin let galaw lu hkra, Yehowa karum ya ai. Dai majaw, dai myihtoi ga hpring tsup wa ai. Myihtoi ga hta hpun chyen lahkawng a lam tsun da ai. Sumsing lamu myit mada lam nga ai ni gaw, “Yuda” a hpun chyen rai nna, ginding aga myit mada lam nga ai ni gaw, “Ehprim” a hpun chyen hte bung ai. * Yehowa gaw, dai hpung lahkawng yan hpe, kahkyin gumdin shangun ai majaw, “langai sha tai” wa ai. Hkawhkam Yesu Hkristu a npu hta, kahkyin gumdin let magam gun ai hpe tsun mayu ai re. Namman chya hkam ai ni hte sagu kaga ni gaw, hpung lahkawng hku n re ai sha, “sagu rem wa langai” a npu hta nga ai “sagu hpung langai” hku nna, shaning shagu Myit Dum Poi lung nga ai.​—Yhn 10:16.

11. Mahte 25:31-36, 40 hta tsun da ai “sagu ni” gaw, Hkristu a kanau ni hpe gara hku madi shadaw ya nga ai kun?

¹¹ Mahte 25:31-36, 40 hpe hti u. Yesu tsun ai ga shadawn kaw na “sagu” ngu ai gaw, hpang jahtum aten laman, dinghpring ai, ginding aga myit mada lam nga ai sagu kaga ni re. Shanhte gaw, mungkan grup hkaw tsun bungli hte sape shatai ai bungli hpe ngut kre hkra karum ya ai hku nna, Hkristu a ngam nga ai namman chya hkam ai kanau ni hpe sadi dung let madi shadaw ya nga ai.​—Mat 24:14; 28:19, 20.

12-13. Sagu kaga ni gaw Hkristu a hpunau ni hpe madi shadaw ya ai hpe gara lam ni hku nna naw madun nga ai kun?

¹² Sagu kaga ni gaw, shaning shagu Myit Dum Poi saw shaga ai mungkan grup kemping hta shang lawm ai hku nna, Hkristu a kanau ni hpe myit rawt let madi shadaw ya  nga ai. (“ Myit Dum Poi A Matu Tau Hkrau Hkyen Lajang Da Sai Kun?” ngu ai lawk hpe yu u.) Nawku hpung hta, muk hte tsabyi sha ai masha n nga yang pyi, Myit Dum Poi galaw na matu, ra ang ai hku karum ya ai. Namman chya hkam ai ni hpe dai zawn karum ya ai gaw, Yesu hpe karum ya nga ai re ai hpe shanhte chye ai.​—Mat 25:37-40.

¹³ Gara myit mada lam nga ai raitim, anhte yawng Myit Dum Poi lung ai kaga lam gaw hpa ni rai kun?

14. Yehowa hte Yesu gaw anhte hpe grai tsawra ai lam gara hku madun wa ai kun?

¹⁴ Yehowa hte Yesu madun ai tsawra myit hpe chyeju dum ai majaw re. Anhte hpe tsawra ai lam, Yehowa lam amyu myu hku nna madun ai. Laklai dik htum gaw, tsawra dik ai Kasha hpe anhte a matu si hkam shangun ai lam re. (Yhn 3:16) Yesu mung anhte a matu shi a asak hpe sharawng awng let sak jaw ai hku nna tsawra myit madun wa ai. (Yhn 15:13) Shan yan madun wa ai tsawra myit hpe anhte dang wa lu na gaw n re. Raitim, anhte a asak hkrung ai lam hku nna chyeju dum ai lam madun mai ai. (Kol 3:15) Myit Dum Poi lung yang, shanhte galaw ya wa ai lam ni hpe bai dum wa ai sha n-ga, chyeju dum ai lam mung madun lu ai.

15. Gawng malai hkunnga hpe namman chya hkam ai ni hte sagu kaga ni hpa majaw manu shadan ai kun?

¹⁵ Gawng malai jahpu hpe grai manu shadan ai majaw re. (Mat 20:28) Namman chya hkam ai ni gaw, gawng malai jahpu a majaw mauhpa myit mada lam nga wa ai. Yesu a shagu hkungga a majaw, shanhte hpe dinghpring ai ni hku nna Yehowa mu mada ai sha n-ga, kasha ni hku nna mung bau la ai. (Rom 5:1; 8:15-17, 23) Sagu kaga ni mung, Hkristu a gawng malai hkungga hpe grai chyeju dum ma ai. Dai hpe kam ai majaw, Karai Kasang a man hta, san seng lu nna, shi a magam hta shang lawm lu ai. “Ru tsang kaba kata na hkrang pru” lu na myit mada lam nga wa ai. (Shr 7:13-15) Namman chya hkam ai ni hte sagu kaga ni, gawng malai jahpu hpe chyeju dum ai lam madun lu ai lam langai gaw, Myit Dum Poi hpe shaning shagu lung ai hku nna re.

16. Myit Dum Poi lung ra ai kaga lam gaw hpa rai kun?

¹⁶ Myit Dum poi lung ra ai kaga lam langai gaw, Yesu a ga madat mayu ai majaw re. Anhte gaw, gara myit mada lam nga ai raitim, Myit Dum Poi nnan hpang ai shana hta, “ngai hpe adum nga na matu ndai galaw mu” ngu tsun wa ai Yesu a ga hpe madat ai.​—1 Ko 11:23, 24.

17. Myit Dum Poi lung ai gaw Yehowa hte gara hku nna grau hku hkau shangun ai kun?

¹⁷ Yehowa hte grau hku hkau shangun ai. (Yak 4:8) Myit Dum Poi lung ai gaw, Yehowa jaw ai ga sadi ni a lam, Karai madun wa ai tsawra myit a lam hpe bai sumru na ahkang lu shangun ai. (Yer 29:11; 1 Yh 4:8-10) Htawm hpang myit mada lam, agrin nga ai Yehowa a tsawra myit a lam hpe myit sawn sumru ai shaloi, Karai hpe grau tsawra wa nna, grau hku hkau wa na re.​—Rom 8:38, 39.

18. Yesu a kasi ningli hpe myit sawn sumru ai gaw hpa galaw na matu shadut ya ai kun?

¹⁸ Yesu a kasi ningli hpe hkan sa na matu shadut ya ai. (1 Pe 2:21) Myit Dum Poi garai n hpang shi ai nhtoi ni hta, Yesu a ginding aga prat hpang jahtum nhtoi ni a lam, shi si ai hte hkrung rawt ai labau ni a lam hpe anhte myit sawn sumru ai. Myit Dum Poi  mungga gaw, Yesu madun wa ai tsawra myit hpe bai dum shangun ai. (Ehp 5:2; 1 Yh 3:16) Yesu a tingkyeng akyu n tam ai tsawra myit a lam hpe hti nna sumru ai shaloi, Yesu “hkawm sa wa ai prat hkrun lam hte maren galoi mung hkawm” na matu shadut hkrum ai.​—1 Yh 2:6, NWT.

19. Karai a tsawra myit galoi mung hkamsha lu hkra hpa galaw mai ai kun?

¹⁹ Karai a tsawra myit hta matut nga nga na ngu ai dawdan lam grau ngangkang wa ai. (Yud 20, 21) Dang lu ai daram Karai Kasang a ga madat na, Shi a mying chyoi pra hkra galaw na, shi a myit hpe shapyaw ya na nga yang, Karai a tsawra myit hpe matut hkamsha lu na re. (Gsh 27:11; Mat 6:9; 1 Yh 5:3) ‘Karai a tsawra myit hpe galoi mung hkamsha mayu ai’ myit hte shani shagu asak hkrung lu hkra, Myit Dum Poi gaw shadut ya na re.

20. Myit Dum Poi lung na matu gara lam ni nga ai kun?

²⁰ Anhte gaw, sumsing lamu myit mada lam nga ai raitim, ginding aga myit maga lam nga ai raitim, Myit Dum Poi lung na matu kaja ai lam ni nga ai. Shaning shagu, anhte tsawra ai Yesu Hkristu a si ai lam hpe myit dum na matu, dai shani hta rau zuphpawng na re. Ahkyak htum gaw, Kasha hpe gawng malai hkungga jaw wa ai Yehowa a tsawra myit hpe myit dum na matu re. Dai ning na Myit Dum Poi hpe 2022, April 15, Bat Manga Ya hta galaw na re. Yehowa hte Kasha hpe anhte grai tsawra ai majaw, Myit Dum Poi lung na matu shakut ai. Dai hta grau ahkyak ai lam n nga ai.