1. Yaku a kun dinghku a lam hpe tsun dan u?

YESU a kanau Yaku gaw, Yehowa hpe sadi dung ai dinghku hta nga kaba wa ai. * Kanu kawa ni re ai Mari hte Yosep gaw Yehowa hpe grai tsawra nna, dang lu ai daram magam gun wa ai. Yaku shaman chyeju langai naw lu ai. Kahpu gaw Meshia byin wa ai. Dai zawn kun dinghku hta nga kaba wa ai gaw laksan ahkaw ahkang re.

2. Yaku hta, kahpu hpe yu kaba shara gara lam ni nga ai kun?

² Yaku hta, kahpu hpe yu kaba na lam law law nga ai. (Mat 13:55) Ga shadawn, Yesu asak 12 ning hta Chyum Laika hpe atsawm chye chyang nga sai. Yerusalem na sara ni pyi grai mau ai du hkra re. (Luk 2:46, 47) Yaku gaw, Yesu hte rau lasama bungli ni jawm galaw wa ai nga yang, grai hku hkau na re. “Masha langai hte rau bungli galaw yang, shi a lam grai chye wa ai” ngu Netan Naw chyahkring hkring tsun ai. * “Yesu gaw hpaji byeng-ya kung hpan wa ai hte, gawng shing-yan kaba wa nna, Karai Kasang a man e mung, masha a man e mung, myi man pa wa” ai hpe Yaku sadi hkrup na re. (Luk 2:52) Dai majaw, Yesu a shawng nnan na sape ni hta, Yaku lawm na re ngu anhte myit hkrup chye ai. Raitim, dai zawn n byin wa ai.

3. Yesu magam gun hpang ai aten hta Yaku gara hku bai htang wa ai kun?

³ Ginding aga hta, Yesu magam gun ai aten laman, Yaku sape n byin wa ai. (Yhn 7:3-5) Gaja nga yang, Yesu “myit n  gring nga ai” ngu shadu ma ai jinghku ni hta Yaku mung lawm na masa nga ai. (Mrk 3:21) Hpun shadaw hta, Yesu sat hkrum ai shaloi, kanu Mari hte rau Yaku nga nga ai ngu n tsun da ai.​—Yhn 19:25-27.

4. Gara lam ni hpe bawngban na kun?

⁴ Hpang de, Yesu hpe Yaku kamsham wa nna hkungga hkrum ai Hkristan langai byin wa ai. Yaku kaw na sharin la mai ai lam 2 hpe ndai sumhpa hta bawngban na re. (1) Hpa majaw shagrit shanem ra ai kun? (2) Tang du hkra sharin ya ai ni gara hku byin mai na kun?

5. Yesu hkrung rawt ngut ai hpang hkum shadan dan ai aten hta Yaku gara hku bai htang wa ai kun?

⁵ Yaku gaw gara aten hta, Yesu a sadi dung ai sape byin wa ai kun? Yesu hkrung rawt ngut ai hpang, “Yaku kaw, dai hpang kasa ni yawng hte kaw” hkum shadan dan wa ai. (1 Ko 15:7) Dai kalang Yesu hte hkrum ngut ai hpang, Yaku sape byin wa ai. Chyoi pra ai wenyi lu na matu, Yerusalem ntsa htap kaw kasa ni la nga ai aten, Yaku mung nga nga ai. (Kas 1:13, 14) Hpang de, tsa ban langai na uphkang hpung shang masha byin na ahkang lu wa ai. (Kas 15:6, 13-22; Gal 2:9) A.D. 62 garai n du shi yang, nammam chya hkam ai Hkristan ni hpang de, laika ka na matu chyoi pra ai wenyi hte lam matsun hkrum ai. Dai laika kaw na, dai ni aten sumsing lamu myit mada lam nga ai ni, ginding aga myit mada lam nga ai ni akyu lu mai ai. (Yak 1:1) Tsa ban langai na labau hpaji du Josihpat tsun ai hku nga yang, Yaku gaw Yuda Hkinjawng Agyi Anat a kasha Anani a aming hte sat hkrum wa ai. Ginding aga prat jahtum du hkra Yehowa hpe sadi dung wa ai.

6. Yaku hte makam masham ningbaw ni gara hku shai ai kun?

⁶ Yaku gaw shagrit shanem ai. Hpa majaw dai hku lu tsun ai kun? Hpang hta, Yesu hpe Yaku mu mada ai lam hte makam masham ningbaw ni a mu mada ai lam gara hku shai ai hpe myit yu u. Yesu gaw Karai a Kasha re ai hpe tup hkrak madi madun lam ni Yaku mu lu ai shaloi, shagrit shanem let hkap la wa ai. Yerusalem na hkinjawng agyi ni gaw dai hku n re. Ga shadawn, Lazaru hpe Yesu jahkrung ya ai hpe shanhte n lu nyet ai. Dai pyi, Yesu hpe Yehowa a dat kasa hku nna hkap la na malai, Yesu hpe mung, Lazaru hpe mung sat na matu gyam ai. (Yhn 11:53; 12:9-11) Yesu hkrung rawt ai aten hta mung, tengman lam hpe masha ni n chye hkra makoi magap da na matu shakut ai. (Mat 28: 11-15) Dai makam masham ningbaw ni gaw, gumrawng ai majaw, Meshia hpe nyet kau wa ai.

7. Gumrawng ai hpe hpa majaw koi ra ai kun?

⁷ Sharin la lu ai lam: Gumrawng ai hpe koi u. Sharin hkam la mayu ai myit nga u. Masha langai a salum n-gun shan ni gaw, yawga a majaw bungli atsawm n lu galaw ai zawn, anhte a ga shadawn salum mung, gumrawng ai myit a majaw, Yehowa a lam matsun ni hpe n hkan sa ai baw byin chye ai. Hparishe ni gaw, gumrawng ai majaw, Yesu hta Karai a chyoi pra ai wenyi nga ai madi madun lam hpe n hkap la ma ai. (Yhn 12:37-40) Dai majaw, htani htana asak sum mat ai. (Mat 23:13-14, 33) Anhte mung tinang a lailen, myit mang ai lam, dawdan ai lam ni a ntsa Chyum Laika hte chyoi pra ai wenyi hkrang shachyaw ai lam, shingkang ka-up ai lam hpe matut hkam la na matu grai ahkyak ai. (Yak 3:17) Yaku gaw shagrit shanem ai majaw, Yehowa sharin ya ai hpe sharawng awng let hkam la wa ai. Shagrit shanem ai majaw, tang du ai sharin achyin ai wa byin wa ai. Dai lam hpe bawngban mat ga.

8. Tang du ai sharin achyin ai wa byin na matu hpa gaw karum ya lu ai kun?

⁸ Yaku gaw laika nau n chye ai. Makam masham ningbaw ni gaw kasa Petru hte Yawhan hpe “laika n chye ai, yu maya masha” ni hku nna, mu ai zawn, Yaku hpe mung mu wa na re. (Kas 4:13) Raitim, Yaku gaw tang du ai sharin achyin ya ai wa byin wa ai. Yaku laika hpe hti ai shaloi, dai hpe chye lu ai. Yaku zawn, anhte mung laika nau n chye ai rai na re. Raitim, Yehowa a chyoi pra ai wenyi karum ya ai lam, uhpung a shaman shakyang ya ai lam ni a majaw, tang du hkra sharin chye ai ni byin mai ai. Yaku a sharin achyin ai kasi ningli hte anhte sharin la mai ai lam ni hpe bawngban yu ga.

9. Yaku gara hku sharin ai kun?

⁹ Yaku gaw madang tsaw ai ga ni, chye na yak ai ga ni n tsun wa ai. Dai majaw, hpa galaw ra ai, gara hku galaw ra ai hpe laika hti ai ni atsawm chye na lu ai. Ga shadawn, n tara ai lam ni hkrum ai shaloi, masin n si hkraw ai baw n byin ging ai lam Yaku sharin ya ai. “Hkam sharang ai ni hpe ngwi pyaw ai ni ngu anhte sawn la ai. Nanhte gaw Yoba a hkam  sharang ai lam hpe na ga ai zawn, shi hpe Yehowa shaman chyeju jaw ai hpe mung chye da ai. Yehowa gaw n-gaw nwai ai myit hte tsawra nna matsan dum myit kaba ai” ngu tsun da ai. (Yak 5:11, NWT) Chyum Laika hpe madung da nna sharin ya ai hpe sadi yu u. Yoba zawn, sadi dung ai ni hpe Yehowa kumhpa jaw ai hpe chye na hkra Chyum Laika hte sharin ya ai. Chye na loi ai ga, chye na loi ai sawn dinglik lam hpe lang ai. Dai lam hku nna, shi hpe n re ai sha, Yehowa hpe sha myit maju jung shangun ai.

10. Sharin ya ai shaloi Yaku hpe kasi la mai ai lam langai gaw hpa rai kun?

¹⁰ Sharin la lu ai lam: Chyum Laika hpe madung tawn nna asan sha sharin ya u. Anhte a bandung gaw, tinang kade daram chye ai hpe kaga ni hpe shakawng na matu n re. De a malai, shanhte hpe Yehowa kade daram chye ai, kade daram lanu lahku ai hpe chye wa na matu karum ya ging ai. (Rom 11:33) Chyum Laika hpe madung tawn yang she, dai bandung de du na re. Ga shadawn, Chyum ga sharin ni hpe shanhte a shara hta tinang nga yang, hpa galaw na ngu tsun na malai, Chyum Laika kasi ningli ni hpe sawn dinglik chye hkra, Yehowa myit mang ai lam hte hkamsha lam ni hpe chye na hkra, shanhte hpe karum ya ging ai. Rai yang, shanhte gaw, Chyum Laika sharin ya ai wa myit dik na matu n re ai sha, Yehowa myit dik na matu galaw mayu wa na re.

11. Yaku aten hta Hkristan nkau gara manghkang ni hkrum nga ai kun? Yaku gara hku hpaji jaw ai kun? (Yaku 5:13-15)

¹¹ Yaku gaw tatut re ai. Hpunau nauna ni hkrum nga ai mayak mahkak ni hpe Yaku chye ai lam, hparan lu ai lam matsun ni jaw wa ai lam shi a laika kaw na chye lu ai. Ga shadawn, Hkristan nkau gaw Chyum Laika hpe tatut n hkan sa ma ai. (Yak 1:22) Nkau chyawm gaw, lusu ai ni hpe myi man jaw ai. (Yak 2:1-3) Nkau gaw shinglet hpe n hkang lu ai. (Yak 3:8-10) Shanhte hpe Yaku asum n jaw ai. Tsawra myit hte ding tawk hpaji jaw ai. Galai shai lu hkra, myitsu salang ni hpe karum hpyi na matu n-gun jaw ai.​—Yaku 5:13-15 hpe hti u.

12. Chyum ga sharin ni hpe karum ya ai shaloi, kaja ai ningmu gara hku matut nga lu na kun?

¹² Sharin la lu ai lam: Tatut byin u. Kaga ni hpe kaja ai ningmu matut nga u. Chyum Laika hkaja nga ai ni gaw, chye wa ai hpe tatut hkan sa na matu yak chye ai. (Yak 4:1-4) N kaja ai akyang hpe hkring kau na matu, Hkristan atsam ningja ni shalat na matu aten ra chye ai. Yaku hpe kasi la nna, Chyum ga sharin ni rawt jat ra ai daw hpe marai rawng let tsun dan ra ai. Shagrit shanem ai ni hpe Yehowa lau la ai, prat hpe galai shai lu hkra n-gun jaw ya lu ai hpe anhte kam yang, kaja ai ningmu matut nga na re.​—Yak 4:10.

13. Yaku 3:2 hta tsun da ai hte maren, Yaku hpa hpe hkap la ai kun?

¹³ Tinang hkum tinang rap ra ai hku Yaku mu mada ai. Shingdu labau, lu da ai ahkaw ahkang ni a majaw, shi gaw kaga ni hta grau ahkyak ai ngu n sawn la ai. Hkristan shada da hpe “nye a tsaw ra ai hpu nau ni” ngu shaga ai. (Yak 1:16, 19; 2:5) Shi hkum shi grai hkum tsup ai wa zawn n galaw dan ai. “Anhte nga manga hte hta, malaw maga gaw kataw ai hkrai rai nga ga ai” ngu ai ga hta, shi mung lawm ai ngu tsun nga ai.​—Yaku 3:2 hpe hti u.

14. Tinang shut ai lam ni hpe yin la mayu ai myit hpa majaw nga ra ai kun?

¹⁴ Sharin la lu ai lam: Anhte yawng, yubak masha ni re ai hpe dum u. Tinang sharin ya ai ni hta na, tinang gaw lam langai ngai hta grau ai ngu hkum shadu. Hpa majaw kun?  Tinang gaw grai hkum tsup ai wa zawn galaw taw yang, Chyum ga sharin gaw, Karai hpyi shawn da ai lam ni hpe galoi mung tup hkrak hkan sa lu na n re ngu hkamsha chye ai. Chyum Laika npawt tara ni hpe hkan sa na matu n loi ai lam, yin la nna, dai mayak mahkak ni hpe tawt lai lu na matu, Yehowa gara hku karum ya lu ai lam tsun dan na nga yang, Chyum ga sharin shakut mayu wa na re.

15. Gara zawn ga shadawn ni hpe Yaku lang ai kun? (Yaku 3:2-6, 10-12)

¹⁵ Myit hpe shadut ya ai ga shadawn ni hpe Yaku lang ai. Chyoi pra ai wenyi karum ya tim, kahpu Yesu ga shadawn ni lang nna sharin ya wa ai zawn, shi mung sharin chye hkra Yaku shakut ra na re. Yaku lang ai ga shadawn ni gaw, asan sha rai nna, chye na loi ai.​—Yaku 3:2-6, 10-12 hpe hti u.

16. Tang du ai ga shadawn ni hpa majaw lang ging ai kun?

¹⁶ Sharin la lu ai lam: Tang du ai ga shadawn ni lang u. Htap htuk ai ga shadawn ni lang ai gaw, tsun nga ai lam hpe na lu ai daram sha n-ga, shingran mu hkra karum ya ai. Myi hta pra pra mu wa shangun ai. Dai gaw Chyum Laika a madung tengman lam ni hpe bai dum hkra karum ya ai. Tang du ai ga shadawn ni lang ai hta Yesu gaw grai ram ai. Kanau Yaku mung dai kasi ningli hpe hkan sa ai. Yaku a ga shadawn langai hpe dinglik yu nna, hpa majaw tang du ai hpe yu yu ga.

17. Yaku 1:22-25 hta lawm ai ga shadawn gaw hpa majaw tang du ai kun?

¹⁷ Yaku 1:22-25 hpe hti u. Yaku a jamna ga shadawn gaw grai tang du ai. Chyum Laika kaw na akyu lu mayu yang, hti ai daram hte sha n-ga, tatut hkan sa ra ai hpe sharin ya mayu ai re. Jamna yu ai wa a ga shadawn hpe masha ni aloi sha chye na lu ai. Jamna yu nna sharai ra ai lam hpe mu nga ninglen, n sharai ai wa gaw hpaji n rawng ai wa re. Chyum Laika hti nna, galai shai ra ai akyang lailen ni hpe mu tim, n galai shai ai nga yang mung dai hte maren sha re.

18. Ga shadawn lang ai shaloi gara lam 3 hpe hkan sa ra ai kun?

¹⁸ Ga shadawn lang ai shaloi, lam 3 hpe galaw ai hku nna Yaku hpe kasi la mai ai. (1) Tinang lang ai ga shadawn gaw, bawngban nga ai madung lam hte seng ra ai. (2) Ga shadawn hpe masha ni aloi sha chye na ra ai. (3) Tsun mayu ai lam hpe kalang ta chye ra ai. Gara ga shadawn lang ra na hpe n chye yang, Sin Langchyi Laili Laika Matsun-E hta yu  u. “Ga shadawn ni” ngu ai npu hta, ga shadawn law law hpe mu lu ai. Ga shadawn ni gaw maik (microphone) hte bung ai. Maik gaw nsen hpe grau shangoi ya ai zawn, ga shadawn ni gaw tinang tsun mayu ai lam hpe pra pra mu shangun ai. Dai majaw, sharin ya mayu ai madung lam ni a matu sha, ga shadawn lang u. Sharin ya ai atsam rawt jat mayu ai madung lam gaw, tinang yu kaba hkrum na matu n re ai sha, masha law law hpe Yehowa a ngwi pyaw ai kun dinghku hta lawm wa hkra karum ya na matu re.

19. Hpunau nauna ni hpe tsawra ai lam gara hku madun mai ai kun?

¹⁹ Yaku gaw hkum tsup ai kahpu ba hte rau, nga kaba wa na ahkang lu wa ai. Dai ahkaw ahkang anhte n lu tim, Hkristan nta masha ni hte rau, Yehowa hpe nawku na ahkang lu da ai. Shanhte hte kanawn ai, sharin la ai, hkaw tsun ai hte sharin achyin ai lam hta sadi dung let rau galaw ai hku nna shanhte hpe tsawra ai lam madun mai ai. Tinang a myit jasat, galaw ai lam, sharin ya ai lam ni hta Yaku hpe kasi la yang, Yehowa hpe shagrau ai hte bung nna, myit dingman ai ni hpe tsawra myit nga ai sumsing kawa hpang de du wa hkra karum ya lu na re.