1-3. Yehowa a mayam ni hpa majaw myi prwi hkrat ai kun?

NANG galoi hpang jahtum hkrap wa ai kun? Anhte chyahkring hkring hkrap ra ai. Kabu ai majaw hkrap ai zawn, law malawng gaw grai yawn nna hkrap ai. Ga shadawn, tsawra ai marai langai si ai majaw hkrap ai rai na re. Amerikan kaw na nauna Lawrali ndai hku tsun ai: “Nye kasha ma roi n nga mat ai majaw, grai yawn nna, myit n lu shalan ai du hkra byin ai aten ni nga ai. N dang hkam na daram re.” *

² Kaga lam ni a majaw mung anhte myi prwi hkrat ai. Japan kaw na ningshawng nauna Hiromi ndai hku tsun ai: “Hkaw tsun magam hta nyet kau hkrum ai majaw, kalang lang myit daw wa ai. Kalang lang nga yang hkrap ai du hkra re. Tengman ai lam tam nga ai marai langai ngai hpe tam mu hkra karum ya rit ngu nna Yehowa kaw akyu hpyi ai.”

³ Kalang lang nang mung dai zawn hkamsha ai kun? Anhte law malawng dai zawn hkamsha na re. (1 Pe 5:9) “Yehowa hpe kabu gara ai hte daw jau” mayu tim, yawn hkyen ai lam, myit daw ai lam, sadi dung ai hpe chyam dinglik hkrum ai lam ni a majaw, myit prwi hte nawku dawjau nga ra ai rai na re. (Shk 6:6; 100:2) Dai zawn hkamsha nga yang hpa galaw mai ai kun?

4. Ndai sumhpa hta hpa lam bawngban na kun?

⁴ Yesu a kasi ningli kaw na sharin la lu ai. ‘Yesu myi prwi pru’ ai du hkra myit n pyaw ai aten ni nga ai. (Yhn 11:35; Luk 19:41; 22:44; Heb 5:7) Dai mabyin ni, sharin la mai ai lam ni hpe bawngban yu ga. Myi prwi hkrat shangun ai mayak mahkak ni hpe hparan mai ai tatut re ai lam ni hpe mung bawngban lu na re.

5. Yawhan 11:32-36 hta lawm ai labau kaw na Yesu a lam hpa chye lu ai kun?

⁵ A. D. 32, nshung ta hta, Yesu a manang Lazaru hkum n pyaw nna si mat ai. (Yhn 11:3, 14) Lazaru hta kana Mari yan Marhta nga ai. Shanhte hpe Yesu grai tsawra ai. Tsawra ai kanau si mat ai majaw, kana ni grai yawn nga ai. Lazaru si mat ai hpang, Mari yan Marhta nga ai Behtani kahtawng de Yesu sa ai. Yesu sa wa ai hpe na ai shaloi, Marhta gat nna sa tau la ai. “Madu e, nang nang e nga ndai rai taw gaw, ngai yung n si na re ai” ngu tsun ai aten hta, kade daram yawn nga na hpe shingran yu u. (Yhn 11:21) Mari hte kaga ni hkrap ai hpe mu ai shaloi, “Yesu mung myi prwi pru ai.”​—Yawhan 11:32-36 hpe hti u.

6. Yesu hpa majaw hkrap ai kun?

⁶ Yesu hpa majaw hkrap ai kun? Chyum Laika Hpe Dinghkren Mu ngu ai laika buk hta ndai hku tsun da ai: “Manang Lazaru si mat nna, kana ni yawn hkyen nga ai majaw, ‘Yesu mung grai yawn nna myi prwi hkrat wa ai.’” * Hkum n pyaw ai shaloi, Lazaru kade daram hkamsha na, si ra sana ngu ai myit hte kade daram hkamsha na ngu ai hpe Yesu myit hkrup ai rai na re. Kanau si ai majaw, Mari yan Marhta yawn nga ai hpe mu ai majaw mung, Yesu myi prwi hkrat ai re. Manang ni, nta masha ni si mat yang, nang mung dai zawn hkamsha na re. Dai mabyin kaw na sharin la mai ai lam 3 hpe bawngban yu ga.

7. Manang ni a matu Yesu myi prwi hkrat ai kaw na Yehowa a lam hpa chye lu ai kun?

⁷ Na a hkamsha lam hpe Yehowa chye na ai. Yesu gaw kawa hte grai bung ai. (Heb 1:3) Yesu hkrap ai gaw, Kawa a hkamsha lam hpe madun dan ai re. (Yhn 14:9) Tsawra ai marai langai si mat ai nga yang, na a yawn hkyen ai lam hpe Yehowa chye ai sha n-ga, nang hte maren yawn hkyen nga ai ngu ai hpe kam mai ai. Yawn hkyen nga ai myit masin hpe Karai Kasang shamai ya mayu ai.​—Shk 34:18; 147:3.

8. Tsawra ai ni hpe Yesu jahkrung ya na hpe hpa majaw kam mai ai kun?

 ⁸ Nang tsawra ai ni hpe Yesu jahkrung ya mayu ai. Yesu garai n hkrap shi yang, Marhta hpe “ning yung wa gaw bai rawt na ra ai” ngu tsun ai. Yesu hpe Marhta kam ai. (Yhn 11:23-27) Moi prat na myihtoi Elia hte Elisha jahkrung ya ai labau ni hpe Yehowa a sadi dung ai mayam Marhta chye da na gaw teng sha re. (1 Hk 17:17-24; 2 Hk 4:32-37) Yesu jahkrung ya wa ai lam ni hpe mung na ga na re. (Luk 7:11-15; 8:41, 42, 49-56) Nang mung, si mat ai tsawra ai ni hte bai hkrum lu na hpe kam mai ai. Si mat ai ni hpe Yesu bai jahkrung ya mayu ai myit grai sharawng nga ai hpe shi a myi prwi ni gaw sakse madun nga ai.

9. Yawn hkyen nga ai ni hpe Yesu gara hku karum ya ai kun? Ga shadawn jaw u.

⁹ Yawn hkyen nga ai ni hpe nang karum ya lu ai. Yesu gaw Mari yan Marhta hte rau hkrap ai sha n-ga, shanhte tsun ai hpe madat ya nna, shalan shabran ya ai. Anhte mung dai zawn galaw mai ai. Awstralia kaw na myitsu salang Dan ndai hku tsun ai: “Nye madu jan n nga mat ai majaw, karum shingtau ra nga ai aten hta, yan la law law gaw, ngai tsun ai hpe madat ya na matu galoi mung jin jin rai nga ai. Ngai yawn hkyen nga ai, myi prwi hkrat ai hpe chye na ya ma ai. Mawdaw kashin ai, gat mari ai, shadu sha ai zawn re ai lam ni n lu galaw ai aten ni hta, shanhte sa galaw ya ai. Dai lam ni hte tatut karum ya ai. Ngai hte rau chyahkring hkring akyu hpyi ai. ‘Ru yak hkrum ai nhtoi a matu’ manang ni, hpunau nauna ni re.”​—Gsh 17:17.

10. Luka 19:36-40 hta gara mabyin a lam tsun da ai kun?

¹⁰ A. D. 33, Nisan 9 hta, Yerusalem de Yesu du wa ai. Mare kata de shang na mahka hta, masha hpawng chyawm wa nna, Yesu hpe hkawhkam hku nna hkap tau la na matu, lam ntsa hta bu hpun palawng ni nyep da ya ai. Grai ngwi pyaw ai aten re. (Luka 19:36-40 hpe hti u.) Dai majaw, matut byin wa na lam hpe sape ni myit mada da na n re. “Ya dai de ni wa nna mare hpe mu wu yang, de a matu [Yesu] hkrap” ai. Yerusalem masha ni hkrum wa na hkrit hpa lam ni hpe Yesu myi prwi hkrat let tau hkrau tsun wa ai.​—Luk 19:41-44.

11. Yerusalem mare masha ni a matu Yesu hpa majaw hkrap wa ai kun?

¹¹ Masha ni gaw, tinang hpe alum ala hkap tau la tim, law malawng gaw, mungdan shiga hpe nyet kau na lam Yesu chye ai majaw grai hkamsha ai. Yerusalem jahten hkrum nna, asak lawt wa ai Yuda ni mung, bawng masha hku nna rim hkrum na re. (Luk 21:20-24) Yesu tsun wa ai hte maren, Yuda law malawng gaw Yesu hpe nyet kau ai. Nang nga ai shara hta mung, mungdan shiga hpe masha ni gara hku bai htang nga ai kun? Hkap la ai masha nau n nga yang, Yesu hkrat ai myi prwi kaw na hpa sharin la mai ai kun? Sharin la mai ai kaga lam 3 hpe yu yu ga.

12. Masha ni a matu Yesu hkrat ai myi prwi kaw na Yehowa a lam hpa chye lu ai kun?

¹² Masha ni hpe Yehowa lanu lahku ai. Masha ni hpe Yehowa kade daram lanu lahku ai lam Yesu a myi prwi gaw bai shadum ya ai. “Yawng mayawng myit kayin wa nna, kadai rai ti mung, hten bya ai n hkrum mu ga, shi ra nga ai.” (2 Pe 3:9) Dai ni aten hta mung, kabu gara shiga na lu hkra, masha ni hpe sak jaw let karum ya ai hku nna tsawra ai lam madun mai ai.​—Mat 22:39. *

13-14. Masha ni hpe Yesu matsan dum myit gara hku madun ai kun? Dai atsam ningja ni hpe gara hku shalat mai ai kun?

 ¹³ Hkaw tsun bungli hpe Yesu shakut shaja galaw ai. Masha ni hpe sharin ya ai hku nna tsawra myit madun lu na matu, ahkaw ahkang yawng hpe Yesu akyu jashawn ai. (Luk 19:47, 48) Hpa gaw shadut ya ai kun? Masha ni hpe matsan dum ai majaw re. Yesu a ga hpe madat mayu ai ni grai law ai majaw, Yesu hte sape ni “shat” sha na aten pyi n nga ai. (Mrk 3:20) Madat ai ni a matu htap htuk ai nga yang, shana aten hta pyi sharawng awng let aten jaw ai. (Yhn 3:1, 2) Law malawng gaw, shawng nnan hta Yesu a ga hpe madat tim, sape n byin wa ai. Raitim, Yesu gaw masha yawng na lu hkra hkaw tsun wa ai. Dai ni aten hta, anhte mung kabu gara shiga hpe masha yawng na lu hkra, ahkaw ahkang jaw mayu ai. (Kas 10:42) Dai hku byin lu hkra, hkaw tsun ladat hpe galai shai ra chye ai.

¹⁴ Sharawng awng let ra ang ai hku galai shai u. Hkaw tsun bungli hta aten n galai shai yang, kabu gara shiga hkap la mayu ai ni hte n hkrum mat na. Ningshawng nauna Matida ndai hku tsun ai: “Ngai hte nye madu wa gaw, masha ni hpe hkrum na matu aten galai shai nna sa ai. Jahpawt jau jau hta, hpaga lawk kaw sakse hkam ai. Shani ka-ang hta gaw, masha law ai lam ntsa kaw shawa man sakse hkam ai. Shana maga hta nga yang, masha ni hpe nta kaw grau mu lu ai.” Tinang manu ai aten hta sha hkaw tsun na malai, masha ni hpe grau mu lu na aten hta hkaw tsun na matu, aten hpe galai shai mayu ai myit nga ra ai. Rai yang, Yehowa ra sharawng na re.

15. Luka 22:39-44 hku nga yang, Yesu a ginding aga prat hpang jahtum shana hta hpa byin wa ai kun?

¹⁵ A. D. 33, Nisan 14 ya shana hta, Getsemane sun de Yesu sa ai. Yehowa kaw myit masin mahkra hte akyu hpyi ai. (Luka 22:39-44 hpe hti u.) Dai aten hta sha, “akyu hpyi ai ga hte tawng ban ai ga hpe, hkrap ngu hkrap ngoi nna myi prwi law law hte” hpyi wa ai. (Heb 5:7) Garai n si shi ai hpang jahtum shana hta, Yesu hpa a matu akyu hpyi wa ai kun? Yehowa ntsa sadi dung lu  hkra, Kawa myit ra ai lam hpe galaw lu hkra, n-gun jaw na matu hpyi shawn ai. Sharawng awng let hpyi shawn ai hpe Yehowa na nna, n-gun jaw na matu lamu kasa langai hpe shangun dat ai.

16. Getsemane sun hta akyu hpyi let Yesu hpa a majaw myit tsang nga ai kun?

¹⁶ Karai hpe n hkungga ai wa hku nna, sawn la hkrum na hpe tsang ai majaw, Getsemane sun hta Yesu akyu hpyi let hkrap ai. Kawa a mying san seng chyoi pra na matu, shi sadi dung na matu kade daram ahkyak ai hpe mung chye ai. Yehowa hpe sadi dung ai lam hte seng nna chyam dinglik hkrum ai shaloi, Yesu hkrat ai myi prwi kaw na hpa sharin la lu ai kun? Lam 3 hpe naw bawngban yu ga.

17. Yesu a akyu hpyi ga kaw na Yehowa a lam hpa chye lu ai kun?

¹⁷ Na a akyu hpyi ga hpe Yehowa madat ya ai. Yesu akroi anoi akyu hpyi ai hpe Yehowa madat ya ai. Hpa majaw kun? Yesu a matu ahkyak htum gaw, Kawa hpe sadi dung na matu, Kawa a mying san seng chyoi pra na matu hpyi ai majaw re. Anhte mung dai hpe ahkyak shatai nna hpyi na nga yang, Yehowa mahtai jaw na re.​—Shk 145:18, 19.

18. Yesu gaw chye na ya lu ai manang hte gara hku bung ai kun?

¹⁸ Na a hkamsha lam hpe Yesu chye na ya ai. Myit kaji nga ai aten hta, tinang zawn mayak mahkak hkrum ga ai manang kaw na shalan shabran lam lu ai shaloi, myit hkyam sa mat ai. Yesu gaw, dai zawn manang re. Gawngkya nga ai, karum shingtau lam ra nga ai hpe Yesu chye ai. Anhte a gawngkya ai lam hpe mung atsawm chye ai. Dai majaw, “kyin dut ai aten” hta, hkrak madi shadaw ya na re. (Heb 4:15, 16) Getsemane sun hta, lamu kasa a karum shingtau lam hpe Yesu hkap la wa ai zawn, anhte mung Yehowa a karum shingtau lam hpe hkap la mayu ai myit nga ra ai. Dai karum shingtau lam ni gaw, laili laika, video, mungga, myitsu salang (sh) kung hpan ai manang a n-gun jaw ai lam zawn re ai lam amyu myu hku nna sa chye ai.

19. Karai Kasang a ntsa sadi dung na hte seng nna chyam dinglik hkrum taw ai nga yang, gara hku n-gun lu mai ai kun? Ga shadawn jaw u.

¹⁹ Yehowa gaw nang hpe “Karai Kasang a ngwi pyaw ai” lam jaw na. Gara hku nna kun? Anhte akyu hpyi ai shaloi, “chye chyang ai nyan yawng hta grau lai ai Karai Kasang a  ngwi pyaw ai” lam lu na re. (Hpl 4:6, 7) Yehowa jaw ai ngwi pyaw lam gaw, myit masin hte myit mang lam hpe simsa shangun ai. Nauna Luk a lam hpe yu yu ga. Shi ndai hku tsun ai: “Garen ai myit hpe ninghkap nga ra ai. Dai majaw, kalang lang ngai hpe Yehowa n tsawra ai ngu hkamsha ai. Dai shaloi, Yehowa hpe kalang ta tsun dan ai. Akyu hpyi ai gaw, hkamsha lam ni hpe hkang lu na matu karum ya ai.” Akyu hpyi ai gaw, myit simsa lam lu shangun ai hpe shi a mabyin gaw madun dan ai.

20. Yesu hkrat wa ai myi prwi kaw na hpa sharin la lu ai kun?

²⁰ Yesu hkrat wa ai myi prwi kaw na, shalan shabran lam hte tatut re ai lam ni hpe sharin la lu ai. Yawn hkyen nga ai manang ni hpe madi shadaw na matu, tsawra ai marai langai si mat ai shaloi, Yehowa hte Yesu karum ya na hpe kam na matu shadum ya ai. Yehowa hte Yesu a matsan dum myit gaw, hkaw tsun bungli hta myit tau ya na matu shadut ya ai. Anhte a hkamsha lam ni hpe Yehowa hte kasha chye na ya ai, gawngkya ai lam ni hpe myit tau ya ai, hkamjan lu hkra karum ya mayu ai lam ni hpe chye lu ai majaw, shalan shabran lam lu ai. “Myi prwi pru mapru” hpe Yehowa “katsut kau ya na” nhtoi du hkra, chye wa ai lam ni hpe matut hkan sa mat wa ga.​—Shr 21:4.