Yehowa gaw hkungran da ai yan la ni hpe, ngwi pyaw nna prat tup kabu gara shangun mayu ai. Prat tup shada da kaja ai hku hkau lam nga shangun mayu ai. (Mat 19:4-6) Nang hkungran mayu ai nga yang, kaja ai ningrum ningtau hpe gara hku tam lu na kun? Yehowa gaw anhte a Hpan Madu re ai majaw, awng dang ai dinghku hpe gara hku lu la mai ai lam shi chye ai. Yehowa jaw ai tara ni hpe hkan sa yang, kaja ai akyu ni hpe lu la na re. Dai tara nkau mi hpe hkaja yu u.

Langai, “Myit masin gaw, rai yawng mayawng hta magaw htum nna, grai n hkru” ai hpe anhte chye na da ra ai. (Yer 17:9) Hkungran mayu ai ni gaw, sumtsaw byin hpang sai nga yang, shada da ntsa tawn ai hkamsha lam grai rawt jat wa na re. Hkamsha lam hpe sha madung tawn nna, hkungran na matu daw dan na nga yang, law malawng hku nna, dai dinghku gaw hten run mat ai. (Gsh 28:26) Dai majaw, shada da a lam hpe atsawm n chye shi yang, tinang a hkamsha lam ni hpe ladu lai tsun dan ai, ga sadi ni jaw ai baw galaw ai gaw hpaji n raw ai lam re.

Ga Shagawp 22:3 hta ndai hku tsun da ai: “Hpaji rawng ai wa gaw, n kaja ai hpe tau chye nna, koi kau nga ai; Nyan tang ai wa chyawm gaw, dingyang sa wa nna, yubak hkrum nga ai.” Ningrum ningtau tam ai website hpe akyu jashawn yang gara shoihpa ni nga ai kun? Nkau gaw online hta hkrum ai tsasam masha ni a hkalem ai hpe, hkrum wa ai gaw yawn hpa re. Dai sha n-ga, masu sha ai ni gaw, mahkrum madup n nga ai masha ni kaw na gumhpraw masu sha na matu, n jaw ai account ni hpe lang ma ai. Kalang lang, Sakse Hkam re ngu na pyi tsun chye ai.

Kaga shoihpa langai hpe mung myit yu ga. Ningrum ningtau tam ai website nkau gaw, kadai hte hkrum yang kaja na hpe chye lu na matu, sawn maram ai lam ni galaw da ai. Raitim, dai ladat ni gaw teng sha akyu rawng ai ngu ai madi madun lam n nga ai. Kadai wa gaw, kaja ai ningrum ningtau rai na hte seng ai zawn re ai lam ni hte seng nna daw dan lam jahkrat na matu, masha galaw da ai dai kumpyuta ladat ni hpe kam ai gaw hpaji n rawng ai. Kumpyuta ladat ni hpe, kamhpa mai ai Chyum Laika tara ni hte shingdaw n mai ai. ​—Gsh 1:7; 3:5-7.

Ga Shagawp 14:15 hta ndai npawt tara hpe mu lu ai: “Nyan tang ai wa gaw na mana kam nga ai; Myit su ai wa chyawm gaw tinang sa wa ai lam gawn yu nga ai.” Marai langai hpe hkungran la na matu garai n myit shi yang, dai wa a lam hpe nang atsawm chye mayu na re. Raitim, online hte hkrum na nga yang dai hku galaw na matu yak ai. Online hta shada da a lam ni hpe tsun dan nna, aten law  law jaw nna tsun shaga wa ai raitim, dai wa a lam hpe atsawm chye ai ngu nang teng sha lu tsun ai kun? Jet ai tsawra myit hpe lu sai ngu shadu da ai masha nkau gaw, masha shada da hkrum ai shaloi she, chye wa ai lam ni a majaw grai kajawng mat ma ai.

Shakawn Kungdawn sara langai ndai hku tsun ai: “Matu nhpang n hten ai ni hte rau ngai n dung nngai, Hpyi hpun ai ni kaw, ngai n shang nngai.” (Shk 26:4) Online hta hkrum hkat ai shaloi, grau nna ra sharawng hpa byin hkra, tinang a lam hpe masu ai gaw yu maya sha re ngu masha nkau myit la ma ai. Online hku ga shaga ai shaloi, shanhte a lai nsam ajet hpe n madun ai (sh) ndan dawng ai rai chye ai. Masha nkau gaw, shanhte hkum shanhte Yehowa Sakse ngu tsun ma ai. Raitim, teng sha hkalup hkam da sai kun? Wenyi lam hta kunghpan ai kun? Yehowa hte kaja ai hku hkau lam nga ai kun? Nawku hpung hta hkungga ai lam hpe lu da ai kun? Kasi n kaja ai ni kun? (sh) “N kaja ai kanawn manang ni” pyi rai taw ai kun? (1 Ko 15:33; 2 Tm 2:20, 21) Chyum Laika npawt tara ni hte maren hkungran la mai ai ni kun? Dai lam ni hpe nang chye ra ai. Raitim, shi hpe chye ai kaga Sakse Hkam kaw na n san la yang, dai lam ni hpe chye na matu yak ai. (Gsh 15:22) Yehowa a sadi dung ai mayam ni gaw, makam masham n bung ai ni hte “nhtan shai ai kandang hpe” hpai na matu myit hpyi myit na n re. ​—2 Ko 6:14; 1 Ko 7:39.

Ningrum ningtau tam ai website hpe shoihpa nga ai matut mahkai lam hku nna mu mada ai nga yang, ningrum ningtau tam na matu grau kaja ai ladat hpe tam nna, hkungran la mayu ai wa a lam hpe grau chye hkra galaw na re. Ningrum ningtau byin wa na masa nga ai wa hte hkrum lu na ahkaw ahkang hpe gara hku tam lu na kun? Anhte arau hkrum zup lu ai aten ni re ai, nawku zuphpawng ni lung ai aten, ninghtawn zuphpawng ni, ginwang zuphpawng ni hte kaga kanawn mazum lam ni galaw ai aten ni hta kaga wa a lam hpe chye lu ai.

Kobit-19 byin nga ai ndai laman hta shinggan hta arau kanawn mazum lam galaw na matu gaw n mai byin tim, n hkungran da shi ai Yehowa Sakse ni hpe chye lu ai shara re ai nawku zuphpawng ni hpe electronic jak rai ni hpe akyu jashawn nna lung nga ai. Zuphpawng ni hta shanhte kade daram shang lawm ai, makam masham kade daram nga ai ngu ai hpe nang mu lu na re. (1 Tm 6:11, 12) Zuphpawng ngut ai hpang, shada da ga shaga mai ai. Sakse hpung ni a kanawn mazum lam hku nna, nang myit shang sha nga ai wa gaw kaga ni a ntsa, myit lawm ai lam kade daram nga ai hpe chye lu nna, shi a akyang hpe mung chye lu na re. (1 Pe 3:4) Grau chye wa sai nga yang, bandung ni, ahkyak shatai ai lam ni bung n bung, nan lahkawng gaw htap htuk ai n htap htuk ai hpe dawdan lu ai.

Chyum Laika npawt tara ni hte maren ningrum ningtau tam ai shaloi, ndai ga shagawp laika gaw grai jaw ai hpe chye wa na re. Dai hta ndai hku tsun da ai: “Madu jan [shing nrai, madu wa] lu ai wa gaw mai kaja ai hpe lu nu ai rai nna, Yehowa a chyeju hpe hkam Ia nu ai.” ​—Gsh 18:22.