1-2. Asum n jaw na matu, Esaia 65:16, 17 hta lawm ai Yehowa a ga ni gaw gara hku n-gun jaw ya lu ai kun?

“ASUM HKUM JAW!” ngu ai gaw, 2017 ginwang zuphpawng a madung gabaw re. Dai lamang hta, manghkang ni hpe gara hku hkamjan ra ai lam hpe madun dan wa ai. Dai zuphpawng ngut ai 4 ning rai sai. Raitim, ndai nhkru ai mungkan hta, asak hkrung nga ding yang matut nna hkam sharang nga ra ai.

² Ya aten hta, hpa mayak mahkak ni hkrum nga ai kun? Nta masha langai (sh) grai hkau ai manang langai n nga mat ai kun? Asak shoihpa hkrum na daram machyi sawng nga ai kun? Asak kaba wa ai majaw yakhkak nga ai kun? Shingra tara tsin-yam, dawsa ai lam, zingri zingrat ai lam hte hkrum nga ai kun? Kobit-19 kap bra ana zawn re ai ana zinli ni a majaw, hkra machyi nga ai kun? Dai manghkang ni yawng, lai mat wa na aten, malap kau lu na aten, galoi mung bai byin sana n re ai aten hpe anhte myit mada nga ai.​—Esaia 65:16, 17 hpe hti u.

3. Anhte ya, hpa galaw ra ai kun? Hpa majaw kun?

³ Ya aten hta prat gaw grai yakhkak ai. Raitim, htawm hpang hta grau nna pyi yakhkak hkrum wa chye ai. (Mat 24:21) Matut hkam sharang lu hkra shakut ra ai. Hpa majaw kun? “Nanhte gaw hkam sharang ai hte asak wenyi jahkrung la lu na ma rin dai” ngu Yesu tsun da ai majaw re. (Luk 21:19) Manghkang ni hkrum nga tim, matut hkam sharang lu nga ai ni a lam hpe myit ai gaw, hkam sharang lu ai atsam grau nga hkra karum ya lu ai.

4. Yehowa gaw hkam sharang ai hta kaja htum kasi ningli re ai ngu hpa majaw lu tsun ai kun?

⁴ Hkam sharang ai hta, kadai gaw kaja htum kasi ningli madun wa ai kun? Yehowa Karai Kasang re. Dai hku tsun ai majaw nang mau mat ai kun? Mau na re. Ndai mungkan hpe nhkru ai wa uphkang nga ai majaw, manghkang ni hte hpring nga ai. Dai lam ni hpe kalang ta jahtum kau lu ai atsam Yehowa hta nga ai. Raitim, dai hku galaw na nhtoi hpe la nga ai. (Rom 9:22) Dai aten du  hkra matut hkam sharang nga ai. Yehowa hkam sharang nga ai lam ni kaw na lam 9 hpe hkaja yu ga.

5. Karai Kasang a mying gara hku jahpoi asawng hkrum nga ai kun? Dai hte seng nna nang gara hku hkamsha ai kun?

⁵ Shi a mying jahpoi asawng hkrum nga. Yehowa gaw shi a mying hpe tsawra nna, masha yawng hkungga na hpe ra sharawng ai. (Esa 42:8) Shaning hkying 6 daram na hkra, shi a mying jahpoi asawng hkrum nga ai. (Shk 74:10, 18, 23) Adam yan Ewa ngwi pyaw lu na matu, ra ai lam lama ma hpe Karai Kasang hkum pat da ai ngu, Nat (“Sari Jahpoi Ai Wa” ngu lachyum nga) gaw Edin sun hta, Karai Kasang hpe mara shangun wa ai aten kaw nna dai lam byin hpang wa ai. (Nin 3:1-5) Dai aten kaw na Yehowa gaw, shinggyim masha ni ra nga ai lam ni hpe n jaw ai ngu mara shagun hkrum wa ai. Yesu gaw, Kawa a mying sari jahpoi hkrum nga ai hpe myit n pyaw ai. Dai majaw, sape ni hpe “sumsing lamu na anhte a Wa e, Na a amying nsang chyoi pra nga lit ga” ngu akyu hpyi na matu sharin ya ai.​—Mat 6:9.

6. Awmdawm ahkang hte seng ai lam hpe garai n hparan shi yang, Yehowa gaw hpa majaw aten law law jaw da ai kun?

⁶ Shi a awmdawm ahkang ninghkap hkrum nga. Yehowa chyu sha sumsing lamu hte ginding aga hpe uphkang na ahkang nga nna, shi a uphkang ai lam gaw kaja htum re. (Shr 4:11) Nat gaw, Karai Kasang hta uphkang na ahkang n nga ai ngu myit wa hkra, lamu kasa ni hte shinggyim masha ni hpe hkalem nga ai. Yehowa a awmdawm ahkang hte seng ai tengman lam hpe lana mi hte sha n lu hparan ai. Hpan Madu n lawm ai sha, shinggyim masha ni uphkang yang, awng dang lam n nga ai hpe masha ni mu hkra, aten law law Karai Kasang jaw da ai gaw hpaji rawng ai lam re. (Yer 10:23) Shi myit galu ai majaw, ndai manghkang hpe kalang ta hparan lu wa na re. Karai Kasang gaw shi a Mungdan chyu sha, mungkan ga hta ngwi pyaw lam hte shimlum lam hpe galaw ya lu ai hpe sakse madun ai hku nna, shi a mying chyoi pra hkra galaw na re.

7. Yehowa hpe kadai ni gumlau wa ai kun? Shanhte hpe shi hpa galaw na kun?

⁷ Shi a kasha nkau mi a ninghkap hkrum nga. Yehowa gaw lamu kasa ni hte shinggyim masha ni hpe, hkum tsup hkra hpan da ai. Raitim, gumlau mat ai lamu kasa re ai Satan (“Ninghkap Ai Wa” ngu lachyum nga) gaw, Adam yan Ewa hpe mung, Yehowa hpe gumlau na matu gunglau wa ai. Dai gumlau ai lam hta, kaga lamu kasa ni hte shinggyim masha ni lawm mat wa ai. (Yud 6) Karai Kasang lata da ai Israela masha ni kaw na nkau mi mung, shi hpe nyet kau nna, shut shai ai hpara ni hpe nawku mat ai. (Esa 63:8, 10) Sadi run hkrum ai ngu Yehowa hkamsha na re. Raitim, hkam sharang wa ai. Gumlau ai ni yawng hpe jahten kau ai aten n du dingsa, matut nna naw hkam sharang na re. De a majaw, nhkru ai lam ni hpe shi hte rau hkam sharang nga ai sadi dung ai masha ni gaw, ngwi pyaw ai shaman chyeju lu la na re.

8-9. Yehowa hte seng nna gara hku masu nga ai kun? Dai masu ga ni hpe anhte gara hku bai htang mai ai kun?

⁸ Satan a masu ga ni hpe matut hkrum nga. Satan gaw, Yoba hte sadi dung ai kaga mayam yawng hpe tingkyeng akyu a matu sha, Karai Kasang hpe nawku nga ai ngu tsun nga ai. (Yob 1:8-11; 2:3-5) Satan gaw dai ni aten du hkra matut tsun nga ai. (Shr 12:10) Anhte gaw, manghkang ni hpe matut hkam sharang ai, Yehowa hpe tsawra nna matut sadi dung ai hku nna, Satan a masu ga ni gaw n jaw ai ngu ai hpe sakse madun lu ai. Anhte mung Yoba zawn, hkam sharang ai majaw shaman chyeju lu la na re.​—Yak 5:11.

⁹ Yehowa gaw nhkru ai, masha ni a yakhkak ai lam gaw shi hta lit nga ai ngu shadu hkra, shut shai ai nawku htung ningbaw ni hpe Satan lang nga ai. Nkau mi nga yang, ma ni si mat ai shaloi sumsing lamu kaw lamu kasa ni ra ai majaw,  Karai Kasang woi la mat ai ngu nna pyi tsun ma ai. Karai Kasang hpe sari jahpoi nga ai re. Yehowa gaw, tsawra myit nga ai Kawa re ai hpe anhte chye ai. Anhte grai machyi sawng ai shaloi, tsawra ai marai langai ngai si mat ai shaloi, Karai Kasang hpe mara n shagun ai. Lani mi hta, dai lam ni yawng hpe shi bai galaw ya na hpe kam ai. Yehowa gaw, tsawra myit nga ai Karai Kasang re ai hpe, madat mayu ai masha yawng hpe tsun dan ai. Dai gaw, Karai Kasang hpe sari jahpoi ai wa hpe, bai htang lu ai lam re.​—Gsh 27:11.

10. Shakawn 22: 23, 24 hta Yehowa hte seng nna hpa tsun da ai kun?

¹⁰ Shi tsawra ai mayam ni yakhkak jamjau hkrum nga. Yehowa gaw matsan dum chye ai Karai re. Anhte zingri zingrat hkrum ai, machyi sawng ai, n hkum tsup ai lam ni a majaw, yakhkak hkrum ai hpe mu ai shaloi, shi grai yawn ai. (Shakawn 22:23, 24 hpe hti u.) Anhte a hkamsha lam ni hpe chye na ya ai, dai hpe shi jahtum kau ya mayu nna, jahtum mung jahtum kau ya na re. (Pru Mat 3:7, 8; Esaia 63:9 hte shingdaw yu u.) Dai nhtoi du wa ai shaloi, “shi gaw [anhte] a myi hta na myi prwi pru mapru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai.”​—Shr 21:4.

11. Si mat ai shi a sadi dung ai mayam ni hte seng nna Yehowa gara hku hkamsha ai kun?

¹¹ Si mat ai manang ni hte hka ra nga. Si mat sai sadi dung ai num la ni hte seng nna, Yehowa gara hku hkamsha ai kun? Shanhte hpe bai hkrum na matu grai myit mada nga ai. (Yob 14:15) Jinghku Abraham hpe Yehowa kade daram dum nga na hpe shingran yu u. (Yak 2:23) “Myi man hkrum” ga shaga wa ai Mawshe hpe gaw gara hku kun? (Pru 33:11) Dawi hte kaga shakawn kungdawn sara ni a shakawn mahkawn ni hpe, na lu na aten hpe mung, grai myit mada nga na re. (Shk 104:33) Dai jinghku ni si mat wa tim, shanhte hpe galoi n malap ai. (Esa 49:15)  Shanhte a atsam ningja ni hpe, ahkri ahkrai naw dum nga ai. “Yawng mayawng hte gaw, shi a man e hkrung nga ma ai” ngu Chyum Laika hta tsun da ai. (Luk 20:38) Lani mi hta, shanhte hpe shi asak bai jahkrung ya na re. Dai shaloi, shi hpe nawku dawjau ai, akyu hpyi ai nsen ni hpe bai na lu na re. Tsawra ai marai langai ngai si mat ai shaloi, ndai myit mada lam ni gaw, nang hpe shalan shabran ya lu na re.

12. Ndai nhkru ai hpang jahtum nhtoi ni hta Yehowa hpe hpa gaw yawn hkyen shangun ai kun?

¹² Nhkru ai masha ni a majaw, shinggyim masha ni adip arip hkrum nga. Edin sun hta, gumlau ai lam byin hpang wa ai shaloi, masa lam ni grau kaja wa na aten garai n du shi yang, grau sawng wa na hpe Yehowa chye ai. Dai ni mungkan hta byin nga ai nhkru ai lam ni, n tara ai lam ni, dawsa ai lam ni hpe Yehowa n ju n dawng ai. Laksan hku nna gawngkya ai ni, makawp maga lam n nga ai ni, jahkrai ma ni hte gaida ni hpe galoi shagu matsan dum myit madun ai. (Zeh 7:9, 10) Shi a sadi dung ai mayam ni adip arip hkrum ai, htawng jahkrat hkrum ai hpe mu ai shaloi grai yawn ai. Shi hte rau hkam sharang nga ai ni yawng hpe tsawra ai ngu ai hpe kam u.

13. Shinggyim masha ni hta, gara zawn n kaja ai akyang lailen ni hpe Karai Kasang mu nga ai kun? Dai ni hpe shi hpa galaw na kun?

¹³ Shinggyim masha ni akyang htenza nga. Karai a hkrang bung sumla hte maren hpan da hkrum ai shinggyim masha ni akyang htenza nga yang, Satan ra sharawng ai. Yehowa gaw Noa prat hta, “shinggyim masha ni a n hkru n hkra ai lam” ni hpe mu ai shaloi, ‘shinggyim masha ni hpe hpan tawn da ai hpe myit malai lu nna, shi a kraw lawang e yawn nga ai.’ (Nin 6:5, 6, 11) Mungkan a masa lam ni grau kaja wa ai kun? N kaja ai. Dai ni aten hta, ngang akyang htenza ai lam yawng gaw, yu maya sha byin nga ai hpe Satan mu ai shaloi grai pyaw ai. Dai hta, hpye ai amu galaw ai, hkrang bung shada nga sha ai lam ni lawm ai. (Ehp 4:18, 19) Laksan hku nna, Yehowa hpe nawku dawjau ai ni, mara kaba ni galaw ai hpe mu ai shaloi, Satan grai pyaw ai. Yehowa a myit galu ai lam htum mat ai shaloi, galai shai mayu ai myit n nga ai akyang htenza ai masha yawng hpe yeng seng kau ai hku nna, dai lam ni hpe shi n ra sharawng ai lam madun na re.

14. Mungkan ga na Karai a hpan da ai lam ni hpe masha ni hpa galaw nga ai kun?

¹⁴ Shi a hpan da ai lam ni jahten shaza hkrum nga. Shinggyim masha ni gaw, shada da adip arip di ai sha n-ga, ap da ai mungkan ga hte dusat ni hpe mung lanu lahku ai lam n nga ai. (Hpj 8:9; Nin 1:28) Du na ra ai shaning loi mi hta, dusat ni hte hpun ni a amyu hpan * wan mi jan mat mat na ngu hpungtang hpaji du nkau mi tsun ma ai. Shingra tara hte seng nna, masha ni hpa majaw myit tsang nga ai hpe aloi sha chye na lu ai. Yehowa gaw, “lamu ga jahten shabyak kau ai ni hpe bai jahten shabyak kau” nna, mungkan ga hpe hparadisu byin hkra galaw ya na ngu, ga sadi jaw da ai hpe chye lu ai gaw chyeju dum hpa re.​—Shr 11:18; Esa 35:1.

15-16. Yehowa hte rau hkam sharang na matu anhte hpe hpa gaw shadut ya ai kun? Ga shadawn tsun dan u.

¹⁵ Sumsing Kawa a shaning hkying hku na hkra hkam sharang wa ai myit n pyaw hpa manghkang ni hpe myit yu u. (“ Yehowa Hkam Sharang Nga” ngu ai lawk hpe yu u.) Yehowa gaw, ya byin nga ai nhkru ai lam yawng hpe gara aten hta raitim, jahtum kau lu ai. Shi myit galu ai majaw, anhte shaman chyeju lu na re. Ndai ga shadawn hpe myit yu ga. N shangai shi ai ma hte seng nna, yan la langai ndai hku tsun hkrum ai ngu saga. Nan a ma gaw hkam kaja lam grai sawng ai, shangai wa tim, asak hkrung na matu n loi ai. Ma prat ten hta sha, si mat na re. Shan hta sak jaw ra ai lam ni grai nga tim pyi, ma hpe shangai na matu dawdan ai. Ma hpe tsawra ai myit gaw, ma na prat hpe kaja htum byin hkra,  madi shadaw ya na matu, gara mayak mahkak mi nga tim, hkam sharang na matu shan hpe shadut ya ai.

¹⁶ Dai hte maren, Adam yan Ewa a aru arat yawng mung, shangai ai aten kaw nna, n hkum tsup ai ni re. Yehowa gaw shanhte hpe tsawra nna, lanu lahku nga dingyang re. (1 Yh 4:19) Ga shadawn hta lawm ai kanu yan kawa hte n bung ai sha, Yehowa gaw shi a ma ni hkrum nga ai yakhkak jamjau ai lam yawng hpe, jahtum kau ya lu ai. Shinggyim masha ni a yakhkak jamjau ai lam yawng hpe, jahtum kau na aten hpe shi masat da ngut sai. (Mat 24:36) Ra ang yang aten kade daram na ai raitim, Yehowa hte rau hkam sharang na matu, shi a tsawra myit gaw anhte hpe shadut ya ai.

17. Hebre 12:2, 3 hta lawm ai Yesu a lam ni gaw matut hkam sharang na matu anhte hpe gara hku n-gun jaw ai kun?

¹⁷ Yehowa gaw hkam sharang ai hta, kaja htum kasi ningli madun wa ai. Yesu mung Kawa a hkam sharang ai atsam hpe hpring tup kasi la wa ai. Yesu mungkan ga kaw nga ai shaloi, jahpoi asawng hkrum ai, kaya hkrum ai, anhte a matu hpun shadaw hta jen da hkrum ai lam ni hpe hkam sharang wa ai. (Hebre 12:2, 3 hpe hti u.) Yehowa a hkam sharang lu ai kasi ningli gaw, Yesu hpe dai atsam nga hkra shadut ya ai. Anhte hpe mung shadut ya lu ai.

18. Yehowa myit galu ai majaw, awng dang lam lu la ai ngu ai hpe chye na na matu, 2 Petru 3:9 gaw gara hku karum ya ai kun?

¹⁸ 2 Petru 3:9 hpe hti u. Yehowa gaw ndai nhkru ai lam yawng hpe, jahtum kau na kaja htum aten hpe chye ai. Shi myit galu ai majaw, masha law law shi a lam chye wa nna, ya nga yang, wan hku law ai masha ni gaw, shi hpe nawku nga sai. Shanhte yawng gaw, shanhte shangai wa na matu, shi hpe tsawra na matu, tinang hkum tinang shi kaw apnawng na matu, Yehowa aten jaw ai majaw grai chyeju dum ma ai. Jahtum du hkra hkam sharang wa ai wan hku law ai masha ni shaman chyeju lu la ai shaloi, hkam sharang na matu, Yehowa dawdan ai gaw jaw ai hpe asan sha mu wa na re.

19. Hpa galaw na matu dawdan da ging ai kun? Hpa shaman chyeju ni lu la na kun?

¹⁹ Yehowa gaw, kabu gara let hkam sharang wa ai hpe chye wa sai. Satan a majaw yawn hpa lam ni, yakhkak ai lam ni nga tim, Yehowa gaw “ngwi pyaw ai Karai Kasang” matut byin nga ai. (1 Tm 1:11, NW) Shi a mying san seng na matu, awmdawm ahkang hpe sakse madun na matu, nhkru ai lam yawng hpe jahtum kau na matu, ya hkrum nga ai manghkang yawng hpe yeng seng kau na matu, myit galu let la nga ai laman, anhte mung matut ngwi pyaw lu ai. Sumsing Kawa mung, hkam sharang nga ai hpe chye ai majaw, shalan shabran lam lu ai. Anhte mung matut hkam sharang na matu dawdan da ga. Rai yang, ndai ga ni gaw anhte langai hpra hta hpring tsup wa na re: ‘Agung alau hkrum yang shakut sharang ai wa gaw, a nga lu ai: dinglik yu ai hkrum ngut jang, Karai Kasang shi e tsaw ra ai ni hpe ndat da ai asak janmau gaw, shi lu la na ru ai.’​—Yak 1:12.