1-2. Hkristan langai gaw grai tsaw ai htingnu langai hte gara hku bung lu ai kun? (1 Korinhtu 15:58)

 LAI wa sai shaning 1978 hta Japan mungdan Tokyo kaw grai tsaw ai htingnu langai gap wa ai. Dai mare hta nnang nawn chyahkring hkring byin ai majaw, dai htingnu gaw ngang na kun? ngu masha ni myit ai. Gara hku gap da ai kun? Ngang mung ngang nna shamu shamawt mai na hku Injiniya ni gap da ai. Hkristan ni gaw dai htingnu hte bung ai. Gara lam hku nna kun?

² Hkristan langai gaw ngang ngang kang kang tsap ra ai zawn, ra ang ai hku mung galai shai ra ai. Raitim, rap ra ai lam nga ra ai. Yehowa a tara ni, tsang madang ni hte seng wa yang, ngang kang na matu, galoi mung hkan sa na matu dawdan da ra ai. (1 Korinhtu 15:58 hpe hti u.) “Madat na matu jin jin” rai nga ra ai. Asum n mai jaw ai. Raitim, masa nkau mi hta ra ang yang galai shai ra ai. Raitim, “rap ra” ra ai. (Yak 3:17, NWT) Rap ra ai ningmu nga ai Hkristan langai gaw, ladu lai tara ja ai (sh) ladu lai shayawm ai baw hpe koi ra ai. Ndai sumhpa hta, gara hku ngang ngang tsap lu ai ngu ai hpe bawngban mat na re. Matut nna ngang ngang tsap na matu yak shangun ai Satan a akyu jashawn ai lam 5 hte dai ni hpe gara hku ninghkap lu ai lam hpe mung chye lu na re.

3. Kasa 15:28, 29 hta lawm ai Tsaw Htum Ai Tara Jaw Ai Wa a tara ni gaw hpa ni rai kun?

³ Tsaw Htum Ai Tara Jaw Ai Yehowa gaw, shi a masha ni hpe galoi mung asan sha re ai tara ni jaw ai. (Esa 33:22) Ga shadawn,  Hkristan ni ngang ngang tsap ra na lam 3 hpe tsa ban 1 na uphkang hpung ni tsun dan ai: (1) gawngngu sumla hpe nyet kau nna Yehowa hpe sha nawku na matu, (2) sai a chyoi pra ai lam hpe hkungga na matu, (3) hpye ai amu hte seng nna Chyum Laika hta tsun da ai hpe hkan sa na matu re. (Kasa 15:28, 29 hpe hti u.) Dai ni aten na Hkristan ni gaw, dai lam 3 hta Yehowa hpe gara hku madat mara lu na kun?

4. Yehowa hpe sha nawku ai lam anhte gara hku madun ai kun? (Shingran 4:11)

⁴ Anhte gaw gawngngu sumla ni hpe nyet kau nna Yehowa hpe sha nawku ai. Shi hpe sha nawku na matu Israela ni hpe htet da ai. (Trj 5:6-10) Nhkru ai nat hkalem ai shaloi, Yehowa hpe sha nawku ra ai ngu Yesu asan sha tsun wa ai. (Mat 4:8-10) Dai majaw gawngngu sumla ni hpe anhte n nawku ai. Masha shada da hpe mung anhte n nawku ai. Ga shadawn, nawku htung ningbaw, mung masa galaw ai wa, mying gumhkawng ai ginsup ninghkrin, sumla hkrung ninghkrin, yu-ngwi ninghkrin ni hpe hpara langai zawn n galaw ai. ‘Nga yawng nga pra hte hpe hpan tawn da’ ai Yehowa hpe sha nawku ai. Shi a maga sha ngang ngang tsap ai.—Shingran 4:11 hpe hti u.

5. Asak hte sai a chyoi pra ai hte seng ai Yehowa a tara hpe anhte hpa majaw madat mara ai kun?

⁵ Asak hte sai a chyoi pra ai lam hte seng ai Yehowa a tara hpe hkan sa ai. Hpa majaw kun? Yehowa jaw da ai asak kumhpa gaw sai hta madung ai majaw re. (Jaw 17:14) Shinggyim masha ni hpe shan sha na matu Yehowa shawng nnan ahkang jaw ai shaloi, sai n sha na matu lam matsun wa ai. (Nin 9:4) Israela ni hpe Mawshe A Jep Ai Tara jaw ai shaloi hta mung, kahtap nna bai matsun wa ai. (Jaw 17:10) Hkristan yawng, “sai . . . koi gam nga” na matu, tsaban 1 na uphkang hpung hku nna Yehowa lam matsun wa ai. (Kas 15:28, 29) Tsi tsi ai lam hta mung, ndai tara hpe hkan sa na matu anhte dawdan da ai. b

6. Yehowa a grau htum ai akyang lailen tsang madang ni hpe anhte gara hku hkan sa lu ai kun?

⁶ Yehowa a grau htum ai akyang lailen tsang madang ni hpe anhte tup hkrak hkan sa ai. (Heb 13:4) Hkum hkrang a adaw achyen ni hpe “sat kau” na matu, kasa Pawlu hpaji jaw ai. Shut shai ai hkum shan ra marin ai lam yawng hpe shakut shaja let nyet kau na matu tsun mayu ai re. Ngang akyang hten ai lam byin shangun chye ai lam ni hpe yu ai, galaw ai ni hpe anhte koi ai. (Kol 3:5; Yob 31:1) Gunglau hkrum ai shaloi, Karai Kasang hte hku hkau lam hten mat shangun chye ai myit mang ai lam, galaw ai lam ni hpe anhte kalang ta nyet kau ai.

7. Hpa galaw na matu dawdan da ging ai kun? Hpa majaw kun?

⁷ “Sharawng ai myit hte madat mara” na matu, Yehowa myit mada ai. (Rom 6:17) Shi galaw shangun ai lam ni gaw anhte a matu galoi mung kaja htum rai nna, Shi a tara ni hpe anhte n mai galai shai ai. (Esa 48:17, 18; 1 Ko 6:9, 10) Yehowa myit pyaw hkra anhte kaja htum galaw ai. “Na a ga madat htani htana a galaw nga na, Nye a myit masin hpe ngai saw da we ai” ngu tsun wa ai shakawn kungdawn sara a myit jasat hpe madun ai. (Shk 119:112) Raitim, anhte ngang ngang tsap na matu yak hkra Satan shakut ai. Gara lam ni hte kun?

8. Ngang ngang tsap yak hkra zingri zingrat ai lam hpe Satan gara hku lang ai kun?

⁸ Zingri zingrat lam. Nhkru ai nat gaw, anhte ngang ngang tsap yak hkra, hkum hkrang hte myit masin hpe gasat ai. Shi a yaw shada lam gaw anhte hpe “mayu kau lu na” matu, Yehowa  hte hku hkau lam hten za mat na matu re. (1 Pe 5:8) Tsa ban 1 na Hkristan ni ngang ngang tsap na ngu ai dawdan lam a majaw, jahkrit shama ai, kayat ai, sat ai lam ni hkrum wa ai. (Kas 5:27, 28, 40; 7:54-60) Dai ni aten hta mung Satan gaw zingri zingrat ai lam hpe matut lang nga ai. Rasha hte kaga mungdan ni hta nga ai hpunau nauna ni gaw grai mazut ai hku zingri hkrum ai, langai hpra hku nna mung ninghkap ai ni a gasat ai hpe hkrum nga ai hpe yu yang, dai lam hpe asan sha chye lu ai.

9. N dan dawng ai dip n-gun ni hpe sadi ra ai lam ga shadawn tsun dan u.

⁹ N dan dawng ai dip n-gun ni. Satan gaw zingri zingrat ai lam hpe sha n-ga “hkalem hkalau ai lam” hpe mung lang ai. (Ehp 6:11) Ga tsi na matu tsi rung lung nga ai hpunau Bak a lam hpe myit yu ga. Gara masa hta raitim, sai n bang na matu sarawun ni hpe tsun da ai. Ga tsi sarawun gaw shi a dawdan lam hpe myit hkrum ai. Raitim, garai n ga shi ai shana hta nta masha ni wa mat ai hpang, malap tsi sarawun sa kawan ai. Sarawun ni gaw sai hpe byin mai made n lang ai. Raitim, ra ahkyak wa yang lang na matu shajin da na ngu Bak hpe tsun ai. Nta masha ni n nga yang, Bak a dawdan lam galai shai na kun ngu sarawun sawn la ai rai na re. Hpa mi byin wa tim, sai hpe hkap la na n re ai lam tsun nna, shi ngang ngang tsap wa ai.

10. Shinggyim masha a myit mang lam gaw hpa majaw shoihpa nga ai kun? (1 Korinhtu 3:19, 20)

¹⁰ Shinggyim masha a myit mang lam. Masa lam ni hpe shinggyim masha ningmu hte yu yang, Yehowa hte shi a tsang madang ni hpe kau da hkrup chye ai. (1 Korinhtu 3:19, 20 hpe hti u.) “Mungkan ga na hpaji byeng-ya” gaw hkum shan ra marin ai myit nga hkra shadut ya ai. Pergamu hte Htuatira mare na Hkristan nkau mi gaw, shanhte a makau grupyin na ngang akyang hten ai, gawngngu sumla nawku ai ni a shingkang ka-up hkrum nga ai. Hpye ai amu hte seng nna ahkang jaw da ai majaw, dai nawku hpung lahkawng yan hpe Yesu daru sharin wa ai. (Shr 2:14, 20) Dai ni aten hta mung, shut ai ningmu ni hpe hkap la na matu anhte shadut hkrum ai. Nta masha ni hte manaw manang ni gaw, anhte tara grai ja ai ngu myit la shangun mayu ai, Yehowa a tara hpe tawt lai na matu shadut wa chye ai. Ga shadawn, akyang lailen san seng na matu n ahkyak ai. Akyang lailen hte seng ai Chyum Laika kaw na tsang madang ni gaw, prat n dep mat sai ngu tsun chye ai.

11. Anhte ngang ngang tsap ai raitim, hpa hpe mung koi ra ai kun?

¹¹ Yehowa jaw ai lam matsun ni gaw, chye na yak ai ngu kalang lang myit wa chye ai. ‘Ka da nga ai hta lai’ nna galaw na matu pyi gunglau hkrum chye ai. (1 Ko 4:6) Yesu aten na nawku htung ningbaw ni gaw, dai mara hpe galaw wa ai. Jep Ai Tara hta shanhte a tara ni hpe kahtap bang nna, yu maya masha ni hpe lit shali ya wa ai. (Mat 23:4) Yehowa gaw Shi a Mungga hte uhpung hku nna, asan sha re ai lam matsun jaw ai. Anhte kahtap bang na lam n nga ai. (Gsh 3:5-7) Dai majaw, Chyum Laika hta ka da ai hta lai nna anhte n galaw ai. Chyum Laika hta n hpyi shawn da ai lam ni hte seng nna hpunau nauna ni hpe tara n jahkrat ai.

12. “Lila rai nga ai hkalem hkalau ga” hpe Satan gara hku lang ai kun?

¹² Hkalem ai lam ni. “Lila rai nga ai hkalem hkalau ga” hte “mungkan ga a hkang ai tara” ni hpe Satan akyu jashawn nna, masha ni hpe lam shai shangun ai, garan ginhka shangun ai. (Kol 2:8) “Lila rai nga ai hkalem hkalau ga” hte “mungkan ga a hkang ai tara” ni ngu tsun ai shaloi, tsa ban langai hta nga yang, shinggyim masha myit mang lam hpe madung tawn ai sawn hpan hpaji, Chyum Laika hte nhtan shai ai Yuda sharin achyin lam ni hte, Hkristan ni Mawshe A Jep Ai Tara hpe hkan ra ai ngu ai sharin achyin lam ni lawm ai. Tengman ai nyan hpaji a Npawt Yehowa kaw nna masha ni  hpe tsan mat shangun ai majaw, dai lam ni gaw hkalem ai sharin achyin lam re. Dai ni aten hta mung, lama ma byin yang, mung masa ningbaw ni gaw kade a majaw re ngu nna npawt nhpang n nga ai shiga ni, shut ai shiga ni hpe shabra ai. Dai shiga ni hpe intanet hte midiya ni hku nna chyam bra hkra Satan galaw ai. Kobit-19 kap bra ana laman hta dai zawn shiga ni grai law hkra pru wa ai. c Uhpung a lam matsun hpe madat ai Yehowa sakse ni gaw, shut ai shiga hpe madat ai ni zawn, ladu lai myit tsang ai lam n nga wa ai.—Mat 24:45.

13. Myit n bra hkra hpa majaw sadi ra ai kun?

¹³ Myit bra hpa lam ni. “Grau ahkyak ai lam hpe” anhte myit maju jung nga ra ai. (Hpl 1:9, 10, NWT) Anhte myit bra yang, aten hte n-gun atsam law law majoi byin mat ai. Anhte a prat hta lu ai, sha ai, ban sa ai, kan bau bungli ni hpe sha grau ahkyak shatai wa sai nga yang, myit bra ai lam ni byin wa chye ai. (Luk 21:34, 35) Dai hta n-ga, mung masa dang rang hkat ai lam ni, shawa n-gun madun ai lam ni hpe anhte shani shagu na lu, hti lu nga ai. Dai zawn lam ni a majaw anhte myit n bra na matu sadi ra ai. N rai yang, maga mi de anhte a myit lawm mat chye ai. Satan gaw ya tsun wa ai ladat ni yawng hpe lang nna, jaw ai hpe galaw na ngu ai anhte a dawdan lam hpe, gawngkya mat hkra galaw nga ai. Satan a dai ladat ni hpe gara hku ninghkap na, ngang ngang tsap lu hkra gara hku galaw na ngu ai lam ni hpe hkaja yu ga.

14. Yehowa a maga matut tsap nga lu hkra karum ya lu ai lam langai gaw hpa rai kun?

¹⁴ Na a apnawng ai hte hkalup hkam ai lam hpe bai myit yu u. Yehowa maga tsap mayu ai majaw nang dai hku galaw wa ai re. Nang tengman lam mu sai hpe kam wa na matu hpa gaw karum ya wa ai lam bai myit yu u. Yehowa hte seng ai tup hkrak re ai machye machyang hpe nang lu la wa nna, Shi hpe sumsing Kawa zawn tsawra hkungga wa ai. Makam masham rawt jat wa nna, mara ni a matu myit malai lu wa ai. Yehowa nju ndawng ai lam ni hpe kau da nna, Shi myit ra ai lam ni hpe galaw mayu wa ai. Karai Kasang mara raw ya ai lam hpe nang chye ai shaloi, myit pyaw wa ai. (Shk 32:1, 2) Hkristan  zuphpawng ni lung wa nna, nang chye wa ai mauhpa lam ni kaga ni hpe tsun dan hpang wa ai. Apnawng hkalup hkam da sai Hkristan langai hku nna, ya nang asak lam hta hkawm nga ai. Matut hkawm mat na matu mung nang dawdan da ai.—Mat 7:13, 14.

15. Hkaja ai hte myit sawn sumru ai gaw gara hku akyu lu shangun ai kun?

¹⁵ Karai a Mungga hpe hkaja nna myit sawn sumru u. Sung sung ru jung nga ai hpun langai gaw, ngang ngang tu nga lu ai zawn, anhte a makam masham mung Karai a Mungga hta sung sung ru jung da yang, ngang ngang tsap nga lu na re. Hpun langai kaba wa ai hte maren, ru ni mung sung sung jung nna dam lada wa na re. Anhte hkaja nna myit sawn sumru ai shaloi, makam masham rawt jat wa nna Karai a lam matsun ni gaw kaja htum re ai hpe grau kam wa ai. (Kol 2:6, 7) Yehowa gaw, lai wa sai aten hta shi a mayam ni hpe gara hku lam matsun ya ai, hpaji jaw ai, makawp maga ya wa ai hpe myit yu u. Ga shadawn, shingran hta mu wa ai nawku htingnu hpe lamu kasa langai atsawm shadawn nga ai hpe Ezekela myit maju jung let yu wa ai. Dai shingran gaw Ezekela hpe shangang shakang ya wa nna, chyoi pra ai nawku daw jau lam hte seng ai Yehowa a tsang madang ni hpe anhte gara hku ngang ngang jum da lu ai lam hte seng nna tatut re ai lam ni hpe mung sharin ya ai. d (Eze 40:1-4; 43:10-12) Karai Mungga a sung htum ai lam ni hpe aten la nna hkaja na, myit sawn sumru na nga yang grau akyu lu na re.

16. Ngang kang ai myit nga ai gaw Bak hpe gara hku makawp maga ya wa ai kun? (Shakawn 112:7)

¹⁶ Ngang kang ai myit nga u. “Karai Kasang e, nye a myit ngang kang nga ai” ngu Hkawhkam Dawi mahkawn shakawn wa ai. Yehowa hpe tsawra ai myit galoi n yawm mat ai ngu tsun nga ai re. (Shk 57:7) Anhte mung Yehowa hpe tsep kawp kam nna ngang kang ai myit nga lu ai. (Shakawn 112:7 hpe hti u.) Shawng hta tsun wa ai hpunau Bak hpe ngang kang ai myit gaw gara hku karum ya wa ai kun? Hkyak hkyak ra wa yang lang na matu sai la da na ngu shi hpe tsun ai shaloi, lama na sai bang na matu hkyen wa yang pyi, kalang ta tsi rung yu  mat na ngu bai tsun dat ai. “Ngai hpa galaw ra na hpe n myit taw ai, hpa byin wa na hpe mung myit n tsang ai” ngu Bak bai tsun dan ai.

17. Bak a mahkrum madup kaw na hpa sharin la lu ai kun? (Sumla hpe mung yu u.)

¹⁷ Bak gaw tsi rung garai n lung shi ai aten kaw nna ngang ngang tsap na matu dawdan da ai majaw, dai hte maren galaw lu wa ai. Langai, shi gaw Yehowa hpe myit pyaw hkra galaw mayu ai. Lahkawng, asak hte sai a chyoi pra ai hte seng nna tsun da ai lam ni hpe, Chyum Laika hte uhpung shapraw ai laili laika ni kaw na atsawm hkaja ai. Masum, Karai a tara hpe hkan sa na matu dawdan da yang, Yehowa kumhpa jaw na hpe shi kam ai. Hpa mayak mahkak mi hkrum tim, anhte mung ngang kang ai myit nga lu ai.

18. Barak a kasi ningli gaw Yehowa hpe kam na matu gara hku sharin ya ai kun? (Makawp sumla hpe yu u.)

¹⁸ Yehowa hpe kam u. Barak gaw Yehowa a lam matsun hpe kam ai majaw, awng dang lam gara hku lu wa ai hpe myit yu u. Mung ting hta n-gang hte ri nhtu langai mi pyi n nga tim, laknak hkum ai Hkanan hpyen du Sisera a hpyen dap hpe wa gasat na matu shi hpe Yehowa lam matsun ai. (Trg 5:8) Sisera hte shi a hpyen gumra leng 900 hpe sa gasat na matu, bum ntsa na yu wa u ngu Barak hpe myihtoi num Debora tsun ai. Pa layang hta hpyen gumra leng ni hpe gasat na matu n loi ai hpe chye tim, Barak madat wa ai. Hpyen la ni Tabora bum kaw na yu wa ai hte Yehowa gaw marang kaba jahtu dat ai. Sisera a hpyen gumra leng ni gaw hkum pup hta chyat rawng mat nna, Yehowa gaw Barak hpe awng dang shangun dat ai. (Trg 4:1-7, 10, 13-16) Dai hte maren anhte mung, Yehowa hte uhpung kaw na jaw ai lam matsun ni hpe kam na nga yang, awng dang lam lu na re.—Trj 31:6.

19. Hpa majaw ngang ngang tsap mayu ai kun?

¹⁹ Nhkru ai ndai mungkan hta asak hkrung nga dingsa, ngang ngang tsap nga lu na matu matut gasat nga ra na re. (1 Tm 6:11, 12; 2 Pe 3:17) Zingri zingrat lam, n dan dawng ai dip n-gun ni, shinggyim masha myit mang lam, hkalem hkalau lam ni hte myit bra hpa lam ni a majaw, n kataw mat na matu dawdan da ga. (Ehp 4:14) De a malai, Yehowa hpe matut tsawra nna, Shi a lam matsun ni hpe madat mara let ngang ngang tsap nga ga. Raitim, anhte rap ra lam nga ra ai. Rap ra ai lam hte seng nna Yehowa hte Yesu gaw kaja htum kasi ningli re ai lam hpang na sumhpa hta hkaja lu na re.