1. Chyum Laika hkaja hpang ai shaloi gara tengman lam ni hpe chye wa sai kun?

 CHYUM Laika hkaja hpang ai aten hpe ngang naw dum ai kun? Karai Kasang hta amying nga ai hpe chye ai shaloi, nang grai mau mat na re. Karai Kasang gaw masha ni hpe ngarai hta n zingri ai lam chye ai shaloi hta mung, myit simsa lam lu wa na re. Si mat ai nang tsawra ai ni hte bai hkrum lu na, shanhte hte rau mungkan ga hparadisu hta rau nga lu na ngu ai myit mada lam hpe na lu ai shaloi, nang grai pyaw wa na re.

2. Chyum Laika hpe grau hkaja yang, gara lam ni hta grau rawt jat wa na kun? (Ehpesu 5:1, 2)

² Karai a Mungga hpe nang grau hkaja magang, Yehowa hpe tsawra ai myit grau law wa magang re. Dai tsawra myit gaw chye wa ai lam ni hpe tatut hkan sa na matu shadut ya na re. Chyum Laika npawt tara ni hta madung tawn ai kaja ai dawdan lam ni jahkrat lu na re. Karai Kasang hpe kabu shangun mayu ai majaw, na a myit jasat hte lailen ni hpe rawt jat hkra galaw na re. Tsawra myit hpring ai kanu kawa ni hpe kasi la ai ma langai zawn, nang mung sumsing Kawa hpe kasi la na re.—Ehpesu 5:1, 2 hpe hti u.

3. Tinang hkum tinang gara ga san ni san mai ai kun?

³ Tinang hkum tinang ndai hku san mai ai: ‘Ngai Hkristan byin hpang ai aten hta na, ya Yehowa hpe grau tsawra wa ai kun? Ngai hkalup hkam ai aten kaw nna, nye a myit ai lam ni, galaw ai lam ni gaw Yehowa hte grau bung nga ai kun? Laksan hku nna hpunau nauna ni hpe tsawra myit madun nga ai kun?’ Anhte hta nga wa ai “shawng na tsaw ra” myit kawp wa sai hpe sadi hkrup yang pyi, myit hkum daw. Tsa ban langai na Hkristan ni dai zawn byin wa ai. Yesu gaw shanhte hpe n nyet kau wa ai zawn, anhte hpe mung nyet kau na n re. (Shr 2:4, 7) Tengman lam nnan sharin  la wa ai aten hta nga wa ai tsawra myit bai nga wa lu ai hpe shi chye ai.

4. Ndai sumhpa hta hpa lam bawngban lu na kun?

⁴ Ndai sumhpa hta Yehowa hte kaga ni hpe tsawra ai myit matut rawt jat hkra, gara hku galaw lu ai hpe bawngban lu na re. Dai hta n-ga, Yehowa hte hpunau nauna ni hpe tsawra myit grau madun yang, lu wa na akyu ni hpe mung bawngban lu na re.

5-6. Kasa Pawlu gaw shi a magam gun ai aten hta hpa mayak mahkak ni hkrum wa ai kun? Raitim, dai magam hpe matut gun hpai lu hkra hpa gaw shadut ya wa ai kun?

⁵ Kasa Pawlu gaw Yehowa a magam gun ai hta grai pyaw ai. Raitim, mayak mahkak law law hpe mung tawt lai ra wa ai. Shi gaw grai tsan ai shara de chyahkring hkring bu hkawm ra ai. Dai aten hta dai hku hkawm na matu n loi ai. Shi a hkrun lam hta kalang lang “hka e rap ai tsin-yam, damya hkrum ai tsin-yam” ni hkrum ai. Ninghkap ai ni kayat ai hpe pyi hkrum wa ai. (2 Ko 11:23-27) Dai sha n-ga, shi a Hkristan hpunau nauna ni mung, shanhte hpe myit majing hte karum ya ai lam ni hpe ayan na chyeju dum ai n re.—2 Ko 10:10; Hpl 4:15.

⁶ Yehowa a magam hpe matut gun hpai lu hkra, Pawlu hpe hpa gaw karum ya wa ai kun? Chyum Laika hte shi a mahkrum madup ni kaw na Yehowa a atsam ningja hte seng ai lam sharin la wa ai. Yehowa Karai Kasang gaw shi hpe tsawra ai lam kam wa ai. (Rom 8:38, 39; Ehp 2:4, 5) Shi mung Yehowa hpe grai tsawra wa ai. Shi gaw “chyoi pra ai ni hpe galaw daw ma nit dai hta n-ga, galaw daw ding-yang rai nga” ai hku nna, Yehowa hpe tsawra ai lam madun wa ai.—Heb 6:10.

7. Yehowa hpe grau tsawra wa lu ai lam langai gaw hpa rai kun?

⁷ Anhte mung Chyum Laika hpe shakut shaja hkaja ai hku nna, Karai Kasang hpe grau tsawra hkra galaw lu ai. Chyum Laika hti yang, chyum daw shagu gaw Yehowa a lam hpa tsun nga ai hpe chye hkra shakut u. Tinang hkum tinang ndai hku san u: ‘Ndai labau gaw Yehowa ngai hpe tsawra ai lam gara hku madun ai kun? Yehowa hpe hpa majaw tsawra ging ai lam ndai chyum daw gaw gara hku madun dan ai kun?’

8. Akyu hpyi ai gaw Karai Kasang hpe grau tsawra wa hkra gara hku karum ya ai kun?

⁸ Yehowa hpe grau tsawra wa lu ai kaga lam langai gaw, Shi kaw myit masin mahkra hte ayan akyu hpyi ai hku nna re. (Shk 25:4, 5) Yehowa gaw anhte a akyu hpyi ga ni hpe htai ya na re. (1 Yh 3:21, 22) Asha Dan kaw na nauna Hkan ndai hku tsun ai: “Nnan hta Yehowa hpe ngai tsawra ai gaw, Shi a lam sharin la ai majaw re. Raitim, nye a akyu hpyi ga ni hpe Shi mahtai jaw ai lam chye wa ai shaloi, shi hpe grau tsawra wa ai. Shi ra sharawng ai hpe galaw mayu wa hkra mung hpe shadut ya ai.” b

9. Timohti gaw hpunau nauna ni hpe grau tsawra hkra galaw ai lam gara hku madun wa ai kun?

⁹ Pawlu Hkristan byin nna shaning loi mi na ai hpang, mying kaja lu da ai ramma Timohti hte hkrum wa ai. Timohti gaw Yehowa hte kaga masha ni hpe tsawra ai. Hpilipi hpung masha ni hpe Pawlu ndai hku tsun ai: “Ngai hte myit hkrum nna, [Timohti] zawn nanhte a lam hpe htep lahti tsang ai masha kaga, langai mi mung ngai n lu nngai.” (Hpl 2:20) Dai chyum daw hta Pawlu gaw, Timohti a bungli atsawm chye galaw ai atsam, mungga htawn ai atsam ni hpe n re ai sha, hpunau nauna ni hpe tsawra ai shi a tsawra myit hpe shakawn nga ai re. Nawku hpung ni gaw Timohti sa kawan na hpe myit mada nga na re.—1 Ko 4:17.

10. Anna hte shi madu wa gaw hpunau nauna ni hpe tsawra ai lam gara hku madun wa ai kun?

¹⁰ Anhte mung hpunau nauna ni hpe karum  ya lu ai lam ni tam ra ai. (Heb 13:16) Shawng na sumhpa hta lawm ai nauna Anna a lam bai myit yu ga. Laru kaba ru ngut ai hpang shi hte shi madu wa gaw, Sakse Hkam nta langai de sa chyai ai. Dai nta kaw galup da ai ni yawng hten mat ai hpe sadi hkrup ai. Dai majaw bu hpun palawng yawng hkrut ra mat ai. Anna ndai hku tsun ai: “An gaw shanhte a bu hpun palawng ni hpe la mat nna hkrut ya ai. Atsawm kahtap nna bai sa sa ya ai. An galaw ya wa ai lam ni gaw kaji kajaw sha raitim, ndai gaw anhte hpe ya du hkra grai kaja ai manang ni byin nga shangun ai.” Anna hte shi madu wa a hpunau nauna ni hpe tsawra ai myit gaw, tatut karum ya na matu shadut ya wa ai.—1 Yh 3:17, 18.

11. (a) Tsawra myit madun na matu anhte shakut ai hpe kaga ni mu ai shaloi gara hku hkamsha ai kun? (b) Ga Shagawp 19:17 hku nga yang, anhte madun ai tsawra myit hpe Yehowa gara hku bai htang ai kun?

¹¹ Kaga ni hpe tsawra matsan dum myit hte kanawn mazum ai nga yang, Yehowa a myit ai, galaw ai lam ni hpe anhte kasi la nga ai lam kaga ni sadi hkrup ai. Anhte madun ai tsawra myit hpe shanhte manu shadan na re. Shawng hta tsun wa ai nauna Hkan gaw shi hpe karum ya wa ai ni hpe grai dum ai. Shi ndai hku tsun ai: “Ngai hpe hkaw tsun bungli woi sa ai nauna yawng hpe grai chyeju dum ai. Shanhte gaw nta kaw wa shaga la ai. Muk rau sha ai, shani shat rau sha ai. Shim lum let bai wa sa ya ai. Shanhte bungli grai law wa na re. Raitim, tsawra myit hte shanhte galaw wa ai.” Masha yawng gaw tinang galaw ya ai lam hpe chyeju dum yang she dum na. Hkan gaw karum ya wa ai ni hte seng nna ndai hku tsun ai: “Shanhte madun ai tsawra myit hpe chyeju bai htang mayu tim, shanhte yawng gara kaw nga ai hpe n chye ai. Raitim, Yehowa chye ai majaw, nye a malai chyeju htang ya na akyu hpyi ai.” Hkan galaw ai gaw jaw ai. Kaga masha ni a matu galaw ya ai kaji kajaw lam ni hpe pyi Yehowa sadi hkrup ai. Dai sak jaw ai lam hpe Shi  manu shadan nna, Shi bai wa ra na hka langai zawn mu mada ai.—Ga Shagawp 19:17 hpe hti u.

12. Hpunau ni gaw nawku hpung hpe tsawra myit gara hku madun lu ai kun? (Sumla ni hpe mung yu u.)

¹² Nang gaw hpunau rai yang, kaga ni hpe gara hku tsawra myit madun lu na, gara lam ni hte karum ya lu na kun? Ramma Jodan gaw nawku hpung hta shi gara hku naw karum ya lu na lam myitsu salang langai hpe san ai. Myitsu salang gaw, shi rawt jat nga sai lam ni hpe shakawn ya nna, naw rawt jat lu na lam nkau hpe mung hpaji jaw ai. Ga shadawn, Jodan hpe Nawku Htingnu de jau jau sa nna kaga ni hpe shakram na matu, mahtai jaw na matu, shi a magam hpung hte rau ayan hkaw tsun na matu, kaga ni hpe tatut karum ya lu na lam ni hpe tam na matu hpaji jaw ai. Dai hpaji jaw ga hpe Jodan hkan sa ai shaloi, atsam ningja nnan ni nga wa ai sha n-ga, hpunau nauna ni hpe grau tsawra wa ai. Hpunau langai gaw magam tau byin yang she kaga ni hpe karum hpang ai n re ai sha, karum ya nga ai hpe matut karum ya mat ai ngu ai hpe Jodan chye wa ai.—1 Tm 3:8-10, 13.

13. Myitsu salang atsam bai hpring wa hkra, hpunau Hkritshan hpe tsawra myit gaw gara hku karum ya ai kun?

¹³ Nang gaw magam tau (sh) myitsu salang galaw ga wa ai rai yang gaw gara hku kun? Lai wa sai aten hta nang galaw wa ai bungli, dai hku galaw na matu shadut ya ai na a tsawra myit hpe Yehowa n malap ai. (1 Ko 15:58) Matut nna nang madun nga ai tsawra myit hpe mung shi sadi hkrup ai. Hpunau Hkritshan gaw myitsu salang lit dawm kau hkrum ai shaloi myit daw wa ai. Raitim, shi ndai hku tsun ai: “Ngai laksan ahkaw ahkang ni n lu mat tim, Yehowa hpe sak jaw lu ai lam yawng hpe tsawra myit hte galaw na matu ngai dawdan da ai.” Hpang de myitsu salang lit bai lu wa ai. Shi ndai hku tsun ai: “Dai lit hpe bai gun na matu myit tsang wa ai. Raitim,  Yehowa gaw myitsu salang hku nna magam bai gun shangun mayu ai nga yang, Shi hte hpunau nauna ni hpe tsawra ai myit hte bai gun hpai na ngu dawdan wa ai.”

14. Jawjiya mungdan kaw na nauna langai tsun ai lam kaw na hpa sharin la lu ai kun?

¹⁴ Yehowa a mayam ni gaw shanhte a htingbu ni hpe mung tsawra myit madun ai. (Mat 22:37-39) Ga shadawn, Jawjiya mungdan kaw na nauna Elenna ndai hku tsun ai: “Nnan hta Yehowa hpe tsawra ai myit a majaw sha hkaw tsun magam hta shang lawm wa ai. Raitim, sumsing Kawa hpe grau tsawra wa ai hte maren, masha ni hpe mung grau tsawra wa ai. Shanhte hkrum nga ai manghkang ni, shanhte myit lawm na zawn re ai lam ni hpe ngai myit ai. Shanhte a lam ni hpe grau myit magang, grau karum ya mayu magang re.”—Rom 10:13-15.

15-16. Sumla hta madun da ai hte maren, kaga ni hpe tsawra myit madun ai kaw na hpa shaman chyeju ni lu ai kun?

¹⁵ Hpunau nauna ni hpe tsawra myit madun ai shaloi, shanhte sha akyu lu ai n re. Kobit-19 kap bra ana byin hpang ai shaloi, hpunau Paulo hte madu jan gaw asak kaba ai nauna ni hkaw tsun bungli hta shang lawm ai shaloi, shanhte a jak rai ni hpe gara hku lang na hte seng nna sharin ya wa ai. Nnan hta jak rai n chye lang ai nauna langai gaw chye lang mat ai. Shi a jinghku ni hpe Myit Dum Poi saw shaga ai shaloi, dai hpe akyu jashawn lu wa ai. Marai 60 gaw video matut mahkai nna lung ai. Nauna hte shi a jinghku ni gaw Paulo yanla a shakut shaja ai lam kaw na akyu lu wa ai re. Hpang hta nauna  gaw Paulo hpe ndai hku ka ai: “Anhte asak kaba ai ni hpe sharin ya ai majaw chyeju dum ai. Yehowa a lanu lahku ai lam hte nan a shakut shaja ai lam ni hpe ngai galoi malap na n re.”

¹⁶ Dai zawn mahkrum madup ni kaw na Paulo gaw ahkyak ai lam langai hpe sharin la lu wa ai. Tsawra myit gaw machye machyang, atsam ningja ni hta grau ahkyak ai hpe shi chye mat ai. Shi ndai hku tsun ai: “Ngai gaw hpung kawan hku nna magam gun wa ai. Hpunau nauna ni gaw nye a mungga hpe malap yang malap mat na. Raitim, shanhte hpe ngai tatut karum ya wa ai lam ni hpe naw dum nga ai lam ngai chye mat ai.”

17. Anhte tsawra myit madun ai shaloi kadai ni mung akyu lu na kun?

¹⁷ Kaga ni hpe tsawra myit madun yang, anhte mung n myit mada ai lam ni hte akyu lu ai. Nyu Zilan kaw na hpunau Jawnatan gaw dai zawn hkamsha lu wa ai. Grai kahtet ai Kru Ya shani hta, ningshawng hpunau langai gaw lam ntsa sakse hkam nga ai hpe shi mu wa ai. Jawnatan gaw Kru Ya shani shagu dai ningshawng hpunau hte hkaw tsun sa na matu dawdan kau ai. Dai zawn tsawra myit madun ai kaw na, shi nan kade daram akyu lu na hpe dai aten hta n chye wa ai. Jawnatan ndai hku tsun ai: “Moi gaw hkaw tsun bungli hta nau n pyaw ai. Raitim, dai ningshawng hpunau a sharin achyin ai lam ni hpe madat ai, shi a hkaw tsun bungli kade daram awng dang nga ai hpe mu ai shaloi, hkaw tsun bungli hpe grau manu shadan wa ai. Shi hte grai hkau ai manang byin wa ai. Shi gaw hkaw tsun bungli hta pyaw na matu, Yehowa hte grau ni htep na matu ngai hpe karum ya wa ai.”

18. Anhte hpe Yehowa hpa galaw shangun mayu ai kun?

¹⁸ Yehowa gaw shi hte kaga ni hpe grau tsawra wa shangun mayu ai. Anhte chye wa sai hte maren, Chyum Laika hti ai, myit sawn sumru ai, ayan akyu hpyi ai hku nna Yehowa hpe tsawra ai myit grau law wa lu ai. Hpunau nauna ni hpe tatut karum ya ai hku nna, shanhte hpe grau tsawra wa lu ai. Anhte grau tsawra wa ai hte maren Yehowa, hpunau nauna ni hte grau hku hkau wa na re. Dai hku hkau lam gaw htani htana grin mat na re.