HKAJA NA SUMHPA 30
MAHKAWN 36 Anhte A Salum Hpe Makawp Maga
Israela Hkawhkam Ni Kaw Na Ahkyak Ai Lam Ni Sharin La Lu
“Ding hpring ai wa hte, tara n lang ai wa hpe, Karai Kasang hpe daw jau ai wa hte n daw n jau ai wa hpe, chye ginhka lu na ma rin dai.”—MAL 3:18.
MADUNG LAM
Israela Hkawhkam ni hpe Yehowa gara hku mu mada ai lam hpe hkaja ai gaw, dai ni aten hta anhte kaw na Yehowa hpa myit mada ai hpe chye shangun ai.
1-2. Israela Hkawhkam nkau a lam Chyum Laika hta hpa tsun da ai kun?
CHYUM Laika hta Israela Hkawhkam 40 jan a lam ka da ai. a Shanhte kaw na nkau mi a lailen ni hte seng nna, asan sha tsun dan da ai. Ga shadawn, kaja ai Hkawhkam ni pyi n kaja ai lam ni hpe galaw wa ai. Kaja ai Hkawhkam re ai Dawi a lam hpe myit yu u. “Ngai hta tsep kawp sadi dung nna nye a hkang da ai ga ni hpe madat mara let, ngai shagrin da ai amu hpe chyu sha galaw ai nye a shangun ma Dawi” ngu Yehowa tsun ai. (1 Hk 14:8, JCLB) Raitim, dinghku nga ai num langai hte hpye ai amu galaw ai. Dai num a madu wa majan hta si mat hkra mung lajang wa ai.—2 Sa 11:4, 14, 15.
2 Nhkru ai Hkawhkam ni galaw wa ai kaja ai lam nkau hpe mung Chyum Laika hta tsun da ai. Hkawhkam Rehoboam a lam myit yu u. Yehowa a man hta “n hkru ai amu galaw” wa ai. (2 Hl 12:14) Raitim, kaja ai lam nkau mi hpe mung galaw wa ai. Yehowa a ga hpe madat nna, Israela amyu lakung 10 hpe, shi a mungdan kaw nna garan mat na ahkang jaw ai. Mung masha ni hpe makawp maga na matu, bunghku kum ai mare ni hpe grau ngang hkra galaw ai.—1 Hk 12:21-24; 2 Hl 11:5-12.
3. Gara ahkyak ai ga san pru wa ai kun? Ndai sumhpa hta hpa lam hkaja na kun?
3 Ga san langai pru wa ai. Israela Hkawhkam langai gaw kaja ai hpe mung, n kaja ai hpe mung galaw ai rai yang, kaja ai Hkawhkam kun? n kaja ai Hkawhkam kun? ngu ai hpe, hpa hta madung nna Yehowa dawdan ai kun? Dai ga san a mahtai gaw, anhte kaw na Yehowa hpa myit mada ai hpe chye shangun na re. Israela Hkawhkam ni hpe dawdan ai hta, Yehowa myit shalawm ai lam 3 hpe hkaja na re. Yehowa hpe myit masin mahkra hte tsawra ai kun? Jet ai myit malai lu ai kun? Yehowa hpe jaw ai ladat hte nawku ai kun? ngu ai lam ni re.
YEHOWA HPE MYIT MASIN MAHKRA HTE TSAWRA U
4. Kaja ai Hkawhkam ni hte n kaja ai Hkawhkam ni a shai ai lam langai gaw hpa rai kun?
4 Yehowa a myiman lu ai Hkawhkam ni gaw, shi hpe myit masin mahkra hte nawku ai. b Kaja ai Hkawhkam Yehosahpat gaw, “myit masin mahkra hte Yehowa hpe hkan tam” wa ai. (2 Hl 22:9) “Myit masin mahkra hte, . . . Yehowa a hpang e, Yoshia zawn hkan nang ai hkawhkam, shi a shawng e n nga” ai ngu Chyum Laika hta tsun da ai. (2 Hk 23:25) Hpang de mara ni tawt lai wa ai Shawlumon hte seng nna gaw gara hku kun? “Shi a myit masin ding hpring nga ai n rai” ngu Chyum Laika hta tsun ai. (1 Hk 11:4) Nhkru ai Hkawhkam Abiyam hte seng nna, ndai hku tsun da ai: “Yehowa hta . . . shi a myit masin gaw hkum tsup nga lu ai n rai.”—1 Hk 15:3.
5. Yehowa hpe myit masin mahkra hte nawku ai ngu ai gaw hpa rai kun?
5 Yehowa hpe myit masin mahkra hte nawku ai ngu ai gaw hpa rai kun? Yehowa hpe nawku ra ai lit nga ai majaw sha nawku ai n re. Shi hpe tsawra ai majaw, hkungga lara ai majaw nawku ai hpe tsun mayu ai re. Myit masin mahkra hte nawku ai wa gaw, Karai hpe prat tup tsawra nna hkungga lara ai.
6. Yehowa hpe myit masin mahkra hte gara hku tsawra lu ai kun? (Ga Shagawp 4:23; Mahte 5:29, 30)
6 Yehowa hpe myit masin mahkra hte tsawra wa ai kaja ai Hkawhkam ni hpe gara hku kasi la mai ai kun? Yehowa hpe tsawra ai myit yawm wa shangun ai lam yawng hpe koi ai hku nna re. Ga shadawn, ban sa ai aten hta hpa ni yu ai, galaw ai hpe sadi ra ai. N kaja ai manang ni hte n kanawn hkrup na matu, gumhpraw n mak na matu sadi ra ai. Lama ma a majaw, Karai Kasang hpe tsawra ai myit yawm wa ai hpe sadi hkrup yang, anhte a myit ai lam hte galaw ai lam ni hpe kalang ta galai shai ra ai.—Ga Shagawp 4:23; Mahte 5:29, 30 hpe hti u.
7. Yehowa hpe tsawra ai myit yawm mat shangun ai lam ni hpe koi na matu hpa majaw ahkyak ai kun?
7 Yehowa hpe tsawra ai myit n yawm na matu sadi ra ai. N sadi yang gara hku myit wa chye ai kun? Karai a magam hta bungli law nga ai majaw, Karai hpe tsawra ai myit yawm wa shangun ai lam ni hpe n koi ra sai ngu myit wa chye ai. Jan grai ja ai shani, shinggan de hkawm nna bai wa ai ngu shingran yu u. Nta du ai shaloi nbung katsi jak hpaw ai. Raitim, chyinghka hpaw da yang katsi na kun? Kahtet ai nbung ni nta de shang wa na re. Dai zawn sha, Karai hte grau hku hkau shangun ai lam ni galaw nga ai daram hte sha n mai shi ai. Kahtet ai nbung hte bung ai mungkan a myit jasat ni, Karai hpe tsawra ai myit yawm mat shangun ai lam ni, myit de n shang wa hkra sadi ging ai.—Ehp 2:2.
MYIT MALAI LA U
8-9. Sharin shaga hkrum ai shaloi Hkawhkam Dawi hte Hezekia gara hku bai htang ai kun? (sumla hpe yu u.)
8 Shawng hta tsun wa ai hte maren, Hkawhkam Dawi mara kaba galaw wa ai. Raitim, myihtoi Nahtan sharin shaga ai shaloi, shagrit shanem let myit malai la wa ai. (2 Sa 12:13) Shi gaja wa myit malai lu wa ai hpe, shi ka da ai Shakawn 51 hpe hti yang chye lu ai. Nahtan kam hkra, yawn masu ai (sh) ari jaw n hkrum hkra, myit malai la masu ai n re.—Shk 51:3, 4, 17, ntsa na ga yan.
9 Hkawhkam Hezekia mung, mara ni galaw wa ai. “Myit kaba nga ai majaw, shi a ntsa e mung, Yuda hte Yerusalem ntsa e mung pawt sindawng ai pru nga ai” ngu, Chyum Laika hta tsun da ai. (2 Hl 32:25) Grai lusu ai majaw, Asuri ni hpe awng dang lu ai majaw, mauhpa lam hte ana ahkya shamai hkrum ai majaw, kaga ni hta grau ai ngu nna shadu mat ai re. Gumrawng ai majaw mung, Babelon kaw na sa wa ai ni hpe, shi lu ai yawng hpe shakawng wa ai mai byin ai. Dai majaw, Hezekia hpe myihtoi Esaia sharin shaga wa ai. (2 Hk 20:12-18) Raitim, Dawi zawn sha shagrit shanem let myit malai la wa ai. (2 Hl 32:26) Dai majaw, Hezekia hpe Yehowa gara hku mu ai kun? Sadi dung nna, “ding man ai amu galaw” ai Hkawhkam hku nna mu wa ai.—2 Hk 18:3.
Mara ni a matu sharin shaga hkrum ai aten hta, Hkawhkam Dawi hte Hezekia gaw sharin shaga ai lam hpe shagrit shanem let hkap la (Laika pang 8-9 hpe yu u)
10. Shading sharai hkrum ai shaloi Hkawhkam Amazia gara hku bai htang ai kun?
10 Yuda Hkawhkam Amazia gaw, “ding man ai amu galaw ti mung, hkum tsup ai myit hte n rai” ngu Chyum Laika hta tsun ai. (2 Hl 25:2) Hpa majaw rai kun? Yehowa a karum shingtau hte Edom masha ni hpe gasat awng dang ngut ai hpang, Edom hpara ni hpe Amazia nawku wa ai. c Yehowa a myihtoi sa shading sharai ai shaloi n madat ai hta n-ga, gawt shapraw kau ai.—2 Hl 25:14-16.
11. 2 Korinhtu 7:9, 11 hku nga yang, mara raw hkrum mayu yang hpa galaw ra ai kun? (Sumla ni hpe mung yu u.)
11 Hpa sharin la lu ai kun? Mara ni a matu anhte myit malai la ra ai. Mara ni kahtap nna n galaw hkrup hkra, dang lu ai made sadi ra ai. Nau n ahkyak ai zawn re ai lam ni hpe, myitsu salang ni grai ahkyak shatai sharin shaga nga ai ngu hkamsha yang gara hku kun? Yehowa (sh) myitsu salang ni gaw, tinang hpe n tsawra sai ngu nna, n hkamsha ging ai. Kaja ai Israela Hkawhkam ni pyi, sharin shaga hkrum wa ai. (Heb 12:6) Sharin shaga hkrum ai shaloi: (1) shagrit shanem let hkap la u, (2) galai shai ra ai ni hpe galai shai u, (3) Yehowa hpe myit masin mahkra hte nawku u. Mara ni a matu myit malai lu yang, Yehowa mara raw ya na re.—2 Korinhtu 7:9, 11 hpe hti u.
Sharin shaga hkrum ai shaloi (1) shagrit shanem let hkap la u, (2) galai shai ra ai ni hpe galai shai u, (3) Yehowa hpe myit masin mahkra hte nawku u (Laika pang 11 hpe yu u) f
JAW AI LADAT HTE YEHOWA HPE NAWKU U
12. Kaja ai Hkawhkam hte n kaja ai Hkawhkam hpe gara lam gaw shai shangun ai kun?
12 Kaja ai Hkawhkam ngu Yehowa mu mada ai ni gaw, shi hpe jaw ai ladat hte nawku ai. Mung masha ni hpe mung, jaw ai ladat hte nawku na matu n-gun jaw ai. Shanhte galaw shut ai lam ni nga tim, Yehowa hpe sha nawku ma ai. Mungdan hta nga ai gawng-ngu sumla ni hpe mung jahten kau ai. d
13. Ahab hpe nhkru ai Hkawhkam ngu nna Yehowa hpa majaw masat ai kun?
13 Yehowa gaw Hkawhkam nkau mi hpe, sadi n dung ai ngu nna hpa majaw masat ai kun? Galaw ai lam yawng shut ai majaw n re. Nhkru ai Hkawhkam Ahab pyi, tinang a majaw Nabot sat hkrum ai hpe na ai shaloi, shagrit shanem let yawn ai lam madun wa ai. (1 Hk 21:27-29) Mare ni hpe gawde ai, Israela ni awng dang hkra mung gasat ya ai. (1 Hk 20:21, 29; 22:39) Raitim, Ahab galaw ai lam langai gaw grai sawng ai. Hkawhkam Jan shadut ai majaw, shut shai ai nawku dawjau lam hpe n-gun jaw wa ai. Dai lam a matu, shi myit malai n la wa ai.—1 Hk 21:25, 26.
14. (a) Rehoboam hpe sadi n dung ai Hkawhkam hku nna Yehowa hpa majaw dawdan ai kun? (b) Nhkru ai Hkawhkam law malawng galaw ai mara gaw hpa rai kun?
14 Nhkru ai Hkawhkam Rehoboam a lam hpe mung myit yu u. Shawng hta tsun wa sai hte maren, shi hkaw dung ai aten ni hta kaja ai lam law law galaw wa ai. Raitim, ahkang aya ngang grin wa ai shaloi, Yehowa a Tara ni hpe nyet kau nna, shut shai ai hpara ni hpe nawku wa ai. (2 Hl 12:1) Dai hpang e, Yehowa hpe nawku dat, shut shai ai hpara ni hpe nawku dat galaw wa ai. (1 Hk 14:21-24) Yehowa hpe jaw ai ladat hte n nawku wa ai gaw, Rehoboam hte Ahab sha n re. Nhkru ai Hkawhkam law malawng gaw, shut shai ai nawku dawjau lam hpe lam langai ngai hte n-gun jaw wa ai. Tinang hpe jaw ai ladat hte nawku nga n nga, ngu ai hpe madung tawn nna, kaja ai Hkawhkam kun? n kaja ai Hkawhkam kun? ngu ai hpe Yehowa dawdan ai lam chye lu ai.
15. Yehowa gaw jaw ai ladat hte nawku ai lam hpe hpa majaw ahkyak shatai ai kun?
15 Jaw ai ladat hte nawku ai gaw, Yehowa a matu hpa majaw grai ahkyak ai kun? Yehowa hpe masha ni jaw ai ladat hte nawku lu hkra, Israela Hkawhkam ni lam matsun ya na lit nga ai. Dai hta n-ga. shut shai ai hpara ni hpe nawku ai shaloi, kaga mara kaba ni hpe tawt lai hkrup chye ai. Kaga ni hpe n tara ai hku kanawn mazum wa chye ai. (Hos 4:1, 2) Israela Hkawhkam ni mung, amyu masha yawng mung Yehowa hpe apnawng da ai ni re. Dai majaw, Yehowa hpe sadi n dung nna shut shai ai hpara ni hpe nawku ai gaw, dinghku htak ai hte bung ai. (Yer 3:8, 9) Dinghku htak ai gaw, ningrum ningtau hpe grai yawn shangun ai. Dai zawn sha, Yehowa kaw apnawng da ai marai langai ngai, shut ai nawku dawjau lam hta lawm ai gaw, Yehowa hpe grai yawn hkra galaw ai re. e—Trj 4:23, 24.
16. Yehowa a man hta ding hpring ai wa hte tara n lang ai wa gara hku shai ai kun?
16 Hpa sharin la lu ai kun? Shut shai ai nawku dawjau lam hte san san nga ra ai. Tengman ai nawku dawjau lam hta myit rawt let shang lawm ra ai. Kaja ai wa kun? n kaja ai wa kun? ngu ai hpe, Yehowa hpa hpe yu nna dawdan ai lam, myihtoi Malahki ndai hku tsun dan ai: “Ding hpring ai wa hte, tara n lang ai wa hpe, Karai Kasang hpe daw jau ai wa hte n daw n jau ai wa hpe, chye ginhka lu na ma rin dai.” (Mal 3:18) Ding hpring ai wa ngu anhte masat hkrum mayu ai. Rai yang, tinang a n hkum tsup ai lam, gawng kya ai lam hte hpawn, hpa lam a majaw mung, Yehowa hpe nawku ai lam hpe n jahkring kau ging ai. Yehowa hpe matut n nawku mat ai gaw, mara kaba re.
17. Hpa majaw ningrum ningtau hpe atsawm lata ra ai kun?
17 Nang gaw dinghku n nga ai wa rai nna, dinghku de na matu myit taw ai nga yang, ningrum ningtau lata ai shaloi, myihtoi Malahki a ga ni gaw, gara hku karum ya lu ai lam sadi hkrup ai kun? Marai langai hta kaja ai atsam ningja ni nga tim, tengman ai Karai Kasang hpe n nawku yang, Yehowa a man hta ding hpring ai wa ngu nna shi hpe Yehowa mu na kun? (2 Ko 6:14) Shi hte dinghku de yang, Yehowa hte grau hku hkau hkra shi karum ya lu na kun? Myit yu u. Hkawhkam Shawlumon a madu jan ni hta, kaja ai atsam ningja nkau mi nga na re. Raitim, Yehowa hpe nawku ai ni n re. Kaga hpara ni hpe nawku wa hkra, Shawlumon a myit galai shai mat hkra galaw wa ai.—1 Hk 11:1, 4.
18. Kashu kasha ni hpe kanu kawa ni hpa sharin ya ging ai kun?
18 Kanu kawa ni e, Yehowa hpe ma ni myit rawt let nawku mayu wa hkra, Chyum Laika kaw lawm ai Hkawhkam ni a lam ni hpe akyu jashawn nna karum ya u. Jaw ai ladat hte nawku ai, n nawku ai hta madung nna, kaja ai Hkawhkam kun? n kaja ai Hkawhkam kun? ngu ai hpe Yehowa dawdan ai lam, nanhte a kashu kasha ni chye na wa hkra karum ya u. Chyum Laika hti ai, zuphpawng lung ai, hkaw tsun bungli hta shang lawm ai lam ni gaw, kaga lam yawng hta grau ahkyak ai hpe, nanhte a tsun ai, galaw ai lam ni hte madun u. (Mat 6:33) Rai yang, kashu kasha ni gaw kanu kawa ni Sakse Hkam re ai majaw, Sakse Hkam tai wa ai baw byin sana n re. Nawku dawjau lam hpe nambat 2 shara kaw tawn kau ai, Karai Kasang hpe tsep kawp kau da ai baw byin sana n re.
19. Yehowa hpe n nawku mat ai ni a matu myit mada lam nga ai kun? (“ Yehowa Hpang De Bai Kayin Wa Lu!” lawk hpe mung yu u.)
19 Langai ngai gaw, Yehowa hpe n nawku mat ai rai yang, shi gaw Yehowa a jinghku galoi bai n mai byin mat sai ngu ai lachyum kun? N re. Myit malai la nna Yehowa hpang de bai wa mai ai. Dai zawn bai wa na matu, myit hpe shagrit shanem ra ai. Nawku hpung myitsu salang ni a karum shingtau hpe hkap la ra ai. (Yak 5:14) Yehowa a myiman bai lu na matu shakut ai gaw akyu nga ai.
20. Kaja ai Hkawhkam ni hpe kasi la yang, anhte hpe Yehowa gara hku dawdan na kun?
20 Israela Hkawhkam ni kaw na hpa ni sharin la lu wa sai kun? Kaja ai Hkawhkam ni hpe kasi la nna, Yehowa hpe myit masin mahkra hte nawku ra ai. Tinang galaw shut wa ai lam ni kaw nna sharin la ra ai. Myit malai la ra ai. Galai shai ra ai ni hpe galai shai ra ai. Langai Sha Rai Nna Tengman Ai Karai Kasang hpe jaw ai ladat hte nawku ai gaw, kade daram ahkyak ai hpe dum ra ai. Matut sadi dung nga yang, sadi dung ai wa ngu nna nang hpe Yehowa dawdan na re.
MAHKAWN 45 Nye A Myit Hta Sumru Ai Lam
a Ndai sumhpa hta “Israela Hkawhkam ni” ngu tsun ai shaloi, Yuda amyu lakung 2 mungdan, Israela amyu lakung 10 mungdan (sh) amyu lakung 12 ting hpe uphkang wa ai Hkawhkam ni hpe tsun mayu ai re.
b GA SI A LACHYUM: Masha langai a byin mayu ai lam, myit mang lam, myit jasat, atsam ningja, myit madung, bandung hte hpawn, kata na masha hpe, lakap tsun na matu “myit masin” ngu ai ga si hpe lang chye ai.
c Dai prat na Israela amyu n re ai Hkawhkam ni gaw, shanhte gasat awng dang wa ai maigan masha ni a hpara ni hpe nawku ai htung nga ai.
d Hkawhkam Asa gaw mara kaba ni tawt lai wa ai. (2 Hl 16:7, 10) Raitim, Yehowa a man hta jaw ai hpe galaw ai wa re ngu, Chyum Laika hta tsun da ai. Myihtoi sharin shaga ai hpe, kalang ta n hkap la wa ai raitim, hpang de myit malai lu wa na masa nga ai. Shi a n kaja ai lam ni hta na, kaja ai lam ni hpe Yehowa mu wa ai. Yehowa langai hpe sha Asa nawku wa ai. Mungdan kaw na gawng-ngu sumla nawku ai lam hpe yeng seng kau na matu shakut wa ai gaw dan dawng ai.—1 Hk 15:11-13; 2 Hl 14:2-5.
e Mawshe a Tara hta lawm ai shawng nnan na Jep Ai Tara 2 hta, Yehowa hta lai nna hpa hpe mung, kadai hpe mung n nawku na matu hkum pat da ai hpe yu yang, nawku dawjau lam hpe Yehowa grai ahkyak shatai ai hpe chye lu ai.—Pru 20:1-6.
f SUMLA HPE HTAI DAN AI LAM: Hpunau langai a tsa lu ai akyang hte seng nna, ramma myitsu salang myit tsang nga ai lam tsun. Hpaji jaw ai hpe hpunau shagrit shanem let hkap la nna, galai shai ra ai ni hpe galai shai ai, Yehowa hpe sadi dung let matut nawku.
