1. Tengman ai tara hte seng nna nang gara hku hkamsha ai kun?

 YEHOWA a masha ni gaw, Karai a Mungga hta lawm ai tengman lam hpe ra sharawng ai. Dai tengman lam hta madung nna, makam masham gawgap ai. (Rom 10:17) Hkristan nawku hpung hpe “teng man ai a sumsai dawnu hte npawt hkridun” hku nna Yehowa hpawng de da ai lam kam ai. (1 Tm 3:15) Lam woi ningshawng ni, Chyum Laika tengman lam hpe sanglang dan ai shaloi, Karai myit ra ai hte maren lam matsun ni jaw wa ai shaloi, sharawng awng let npu taw ai.—Heb 13:17.

2. Yaku 5:19 hku nga yang, tengman ai lam hpe hkap la ngut ai hpang hta pyi hpa byin chye ai kun?

² Tengman ai tara hpe hkap la ngut ai hpang hta pyi, uhpung a lam matsun ni hpe hkan sa ra ai lam chye ai hpang hta pyi, tengman ai lam hta na lam dam mat chye ai. (Yaku 5:19 hpe hti u.) Chyum Laika hpe, uhpung a lam matsun hpe, anhte n kam mat na hpe Satan ra sharawng ai.—Ehp 4:14.

3. Tengman ai lam hpe madat mara na matu hpa majaw ahkyak ai kun? (Ehpesu 6:13, 14)

³ Ehpesu 6:13, 14 hpe hti u. Yehowa hpe mungkan ting na masha ni ninghkap wa hkra, kade n na yang Satan gaw masu ga ni hte hkalem sana re. (Shr 16:13, 14) Karai a amyu masha ni hpe hkalem na matu nga yang, grau pyi shakut na re. (Shr 12:9) Dai majaw, tengman ai lam hte masu magaw ga hpe ginhka chye na matu, tengman ai lam hpe madat mara na matu,  shaman da ra ai. (Rom 6:17; 1 Pe 1:22) Ru tsang kaba kaw na lawt na, n lawt na gaw, dai hta madung nga ai majaw grai ahkyak ai.

4. Ndai sumhpa hta hpa lam bawngban mat na kun?

⁴ Chyum Laika tengman lam hpe atsawm ginhka chye na matu, uhpung kaw na lam matsun ni hpe madat mara chye na matu karum ya na atsam ningja 2 gaw hpa rai kun? Tengman ai tara hpe ngang ngang jum da lu na lam 3 gaw hpa rai kun? Dai ga san ni hpe ndai sumhpa hta bawngban mat na re.

TENGMAN AI LAM HPE ATSAWM CHYE SHANGUN AI ATSAM NINGJA NI

5. Tengman ai lam hpe atsawm chye na matu Yehowa hpe hkrit ai myit gaw gara hku karum ya ai kun?

⁵ Yehowa hpe hkrit hkungga ai lam. Yehowa hpe hkrit hkungga ai ngu ai gaw, shi hpe grai tsawra ai majaw, shi myit n pyaw na hpa lam hpe mung n galaw ai hpe tsun mayu ai re. Shi hpe myit pyaw shangun mayu ai majaw, jaw ai hte shut ai hpe atsawm chye mayu ai. (Gsh 2:3-6; Heb 5:14) Masha ni ra sharawng ai lam ni gaw, Karai Kasang n ra sharawng ai ni byin nga chye ai majaw, masha hpe hkrit ai myit hta na Yehowa hpe tsawra ai myit grau nga hkra galaw ra na re.

6. Israela amyu lakung ningbaw marai 10 gaw, masha hpe hkrit ai majaw hpa byin mat ai kun?

⁶ Karai Kasang hta na masha hpe grau hkrit yang, tengman ai lam kaw na shai mat chye ai. Ga Sadi Tawn Ai Mung hpe sa sagawn ai amyu lakung ni a ningbaw 12 a lam maram yu ga. Marai 10 gaw, Yehowa hpe tsawra ai myit hta na, Hkanan masha ni hpe hkrit ai myit grau law taw ai. “Dai mung masha ni hpe anhte n dang lu law; shanhte anhte hta n-gun grau ja nga ma ai” ngu Israela ni hpe tsun ai. (Bhk 13:27-31) Masha a ningmu hku yu yang, Israela ni hta, Hkanan masha ni grau n-gun ja ai gaw teng ai. Raitim, hpyen ni hpe n dang lu na re ngu tsun ai chyawm gaw, Karai Kasang hpe n myit shalawm ai lam re. Gaja nga yang, Karai  Kasang hpa galaw shangun mayu ai hpe myit maju jung ging ai. Kade n na shi ai aten hta, Karai Kasang galaw ya wa ai lam ni hpe myit ging ai. Dai zawn myit yang, Yehowa a Chyahtum Chyalai N-gun hte shingdaw dat yang, Hkanan masha ni a n-gun ja ai lam gaw, hpa n rai mat na hpe chye na wa na re. Yawshu hte Hkaleb chyawm gaw, dai zawn makam masham n nga ai ni hte n bung ai. “Yehowa anhte hpe tsaw ra yang gaw, dai nga chyu hte lagat jahku lawi ai mung de, anhte hpe woi shawn nna madu shangun na mi ai” ngu tsun ai.—Bhk 14:6-9.

7. Gara hku nna Yehowa hpe grau hkrit chye wa na kun? (Sumla hpe mung yu u.)

⁷ Dawdan lam jahkrat shagu, Karai Kasang myit pyaw hkra galaw na matu myit maju jung u. Rai yang, Karai hpe grau hkrit wa na re. (Shk 16:8) Chyum Laika labau ni hti ai shaloi, ndai zawn masa hta ngai rai yang, gara hku dawdan na kun? ngu myit u. Ga shadawn, Hkanan mung hpe dang lu na n re ngu Israela amyu lakung ningbaw marai 10 tsun ai hpe nang madat nga ai ngu saga. Shanhte tsun ai hpe kam nna, Hkanan masha ni hpe hkrit na kun? Hkrit myit hta na Karai Kasang hpe tsawra ai myit, shi myit pyaw hkra galaw mayu ai myit grau law nga na kun? Yawshu hte Hkaleb tsun ai tengman ai lam hpe Israela amyu yawng n kam ai. Dai majaw, shanhte Ga Sadi Tawn Ai Mung de n shang lu ai.—Bhk 14:10, 22, 23.

8. Gara atsam ningja nga na matu shakut ra ai kun? Hpa majaw kun?

⁸ Shagrit shanem ai lam. Yehowa gaw shagrit shanem ai ni hpe tengman lam tsun dan ai. (Mat 11:25) Tengman lam chye hkra sharin la na matu, kaga ni a karum shingtau hpe anhte shagrit shanem let hkap la wa ai. (Kas 8:30, 31) Raitim, matut shagrit shanem ra ai. Gumrawng wa yang, tinang a ningmu gaw, Chyum Laika npawt tara ni, uhpung a lam matsun ni zawn sha, ahkyak ai ngu myit wa chye ai.

9. Matut shagrit shanem na matu hpa galaw ra ai kun?

⁹ Matut shagrit shanem nga lu hkra hpa galaw ra na kun? Yehowa hte shingdaw yang, anhte hpa n re ai hpe dum u. (Shk 8:3, 4) Shagrit shanem chye hkra, sharin ya loi ai wa byin hkra karum ya na matu mung akyu hpyi u. Rai yang, tinang a ningmu hta na, Chyum Laika hte uhpung kaw na sharin la ai Karai a ningmu hpe ahkyak shatai na matu, Karai Kasang karum ya na re. Karai Kasang gaw shagrit shanem ai hpe ra sharawng ai lam, gumrawng ai, rai dum ai lam hpe nju ndawng ai lam hte seng nna, Chyum Laika hti ai shaloi tam yu u. Laksan ahkaw ahkang langai a majaw, masha ni myit maju jung wa ai shaloi, galaw lu ai ahkang grau lu wa ai shaloi, shawoi na hta shagrit shanem na matu shakut u.

TENGMAN AI LAM HPE MATUT JUM DA LU AI LAM

10. Shi a amyu masha ni hpe lam matsun na matu kadai ni hpe Yehowa akyu jashawn ai kun?

¹⁰ Uhpung a lam matsun ni hpe kam nga u. Mawshe, dai hpang, Yawshu hpe akyu jashawn nna, Israela ni hpe Yehowa lam matsun ai. (Ysh 1:16, 17) Shanhte hpe Karai a dat kasa ni hku nna Israela ni sawn la nga dingsa shaman chyeju lu la ai. Tsaban shaning ni lai mat ai hpang, Hkristan nawku hpung nnan gawde ai aten hta, lam matsun ni hpe kasa 12 hku nna jaw ai. (Kas 8:14, 15) Hpang e, lam matsun jaw ai ni hta, Yerusalem na salang ni lawm wa ai. Sadi dung ai la ni a lam matsun hpe madat ai majaw, “hpung masha ni mung dai makam masham lam hta ngang wa nna, lani hte lani law htam wa ma ai.” (Kas 16:4, 5) Dai ni aten hta mung, uhpung a lam matsun hpe anhte madat ai shaloi, shaman chyeju lu  la ai. Karai Kasang lit shatsam da ai ni hpe anhte lata npu n taw yang, shi gara hku hkamsha na kun? Mahtai hpe chye na matu, Ga Sadi Tawn Ai Mung de sa ai hkrun lam hta, Israela ni hpa byin wa ai hpe maram yu ga.

11. Mawshe hpe gumlau ai ni hpa byin mat ai kun? (Sumla hpe mung yu u.)

¹¹ Ga Sadi Tawn Ai Mung de sa ai hkrun lam hta, Mawshe hpe Israela ni kaw na ahkyak ai masha ni gumlau wa ai. Mawshe hpe Yehowa ningbaw shatai ai hpe n ra ma ai. “[Mawshe sha n-ga] shawa hpung ting na ni chyawm gaw chyoi pra ai hkrai rai nga ma ai; Yehowa mung shanhte hte rau rai nga ai” ngu tsun ai. (Bhk 16:1-3) Yehowa a man hta, “shawa hpung ting” chyoi pra ai gaw teng ai. Raitim, shi amyu masha ni hpe woi awn na matu, Mawshe hpe Yehowa nan lata da ai. (Bhk 16:28) Mawshe hpe mara shagun ai gaw, Yehowa hpe mara shagun nga ai re. Gumlau ai ni gaw, Yehowa byin shangun mayu ai lam ni hpe myit maju n jung ai. Ahkang aya hte gumhkawng na matu sha, myit maju jung ma ai. Dai majaw, gumlau na matu woi awn ai ni hpe mung, shanhte a hpang hkan ai ni hpe mung, Karai Kasang sat kau ai. (Bhk 16:30-35, 41, 49) Dai ni aten hta mung, uhpung a lam matsun ni hpe madat na matu grai ahkyak ai. N madat yang, Yehowa a sharawng awng ai lam lu na n re.

12. Yehowa a uhpung hpe anhte hpa majaw kam mai ai kun?

¹² Yehowa a uhpung hpe anhte kam mai ai. Chyum Laika chye na ai lam, uhpung a galaw ai lam langai ngai galai shai na matu ra wa ai shaloi, Yehowa myit pyaw na matu madung re ai majaw, woi awn ai ni gaw galai shai lam ni hpe kalang ta galaw ai. (Gsh 4:18) Dawdan lam ni jahkrat ai shaloi, Chyum Laika hpe madung tawn ai. Chyum Laika gaw Karai a mayam yawng a matu, ahkyak htum re.

13. “Masan maseng mungga” ngu ai gaw hpa rai kun? Dai hpe hpa galaw ra ai kun?

¹³ “Masan maseng mungga ningli hpe . . . gumnoi nga u.” (2 Tm 1:13) “Masan maseng  mungga” ngu ai gaw, Chyum Laika kaw na Hkristan sharin achyin lam ni hpe tsun ai re. (Yhn 17:17) Anhte a makam masham gaw, Chyum Laika sharin achyin lam ni hta madung ai. Dai sharin achyin lam ni hpe ahkyak shatai na matu, uhpung gaw sharin ya ai. Dai zawn, ahkyak shatai nga dingsa shaman chyeju lu na re.

14. “Masan maseng mungga ningli” hpe Hkristan nkau hpa majaw n madat mat ai kun?

¹⁴ “Masan maseng mungga ningli” hpe n madat yang hpa byin mat na kun? Tsaban langai aten na lam hpe dinglik yu ga. Yehowa a nhtoi du nga sai ngu ai, n jaw ai shiga hpe Htesaloni nawku hpung kaw na Hkristan nkau shabra nga ai. Kasa Pawlu ka ai zawn san ai laika a majaw, dai zawn shabra ai re. Teng n teng aten la nna n jep yu ai sha, n jaw ai shiga hpe shanhte kam mat ai. Kaga ni hpe pyi bai shabra ai. Shanhte hte rau Pawlu nga ai aten hta sharin ya wa ai lam ni hpe dum ai rai yang dai zawn byin na n re. (2 Ht 2:1-5) Na ai lam shagu hpe n kam na matu, hpunau ni hpe Pawlu hpaji jaw ai. “Ngai Pawlu nan nye a lata hte ka da ai shakram ai ga gaw, ngai ka shagun dat ai laika shagu hta, kumla rai nga li ai: ning rai ngai ka da nga nngai” ngu, Htesaloni ni kaw ka ai laika 2 hpe Pawlu hpungdim dat da ai. Hpang e, hkalem n hkrum hkra, shi shagun ai laika rai n rai gara hku jep ra na hpe sharin ya dat ai re.—2 Ht 3:17.

15. Jaw na zawn san ai masu magaw ga ni kaw nna, tinang hkum tinang gara hku makawp maga lu ai kun? Mahkrum madup tsun dan u. (Sumla ni hpe mung yu u.)

¹⁵ Pawlu a ga ni kaw na hpa sharin la lu ai kun? Chyum Laika sharin achyin lam ni hte nhtan shai ai lam ni, kajawng kaja byin shangun ai lam ni hpe na ai shaloi, anhte sawn ginhka chye ai atsam nga ra ai. Moi na Sobiyet Munghpawm Mungdan kaw na hpunau nauna ni gaw, mungkan ginjaw rung kaw na sa ai zawn san ai laika hpe lu wa ai. Gaja nga yang, Karai a hpyen ni kaw na sa ai laika re. Hpung garan na matu hpunau ni hpe laika hta n-gun jaw da ai. Laika hpe yu yang, uhpung kaw na sa ai hte bung ai. Raitim, sadi dung ai hpunau ni gaw hkalem n hkam wa ai. Sharin la da ai lam ni hte laika hta lawm ai lam ni shai ai  hpe sadi hkrup wa ai. Dai ni aten hta mung, anhte myit shuk mat hkra, myit garan mat hkra, internet, shawa matut mahkai midiya ni hku nna, hpyen ni galaw nga ai. “[Anhte] a kraw lawang alawan n shamu n shamawt” ging ai. Anhte hti lu ai, na lu ai lam ni gaw sharin la da ai lam ni hte bung n bung sawn ginhka chye ging ai.—2 Ht 2:1; 1 Yh 4:1.

16. Roma 16:17, 18 hku nga yang, tengman ai lam hpe nkau mi ninghkap mat yang anhte hpa galaw ging ai kun?

¹⁶ Yehowa hpe sadi dung ai ni hte kanawn mazum nga u. Yehowa gaw shi hpe nawku ai ni hpe kahkyin gumdin shangun mayu ai. Tengman ai lam hpe anhte jum da nga dingsa kahkyin gumdin nga na re. Tengman ai lam hpe ninghkap ai wa gaw, nawku hpung myit garan hkra galaw ai wa re. “Shanhte hpe koi” na matu Yehowa sadi jaw ai. N koi yang, anhte tengman ai lam hte tsan mat chye ai.—Roma 16:17, 18 hpe hti u.

17. Tengman ai lam hpe atsawm chye nna jum da yang, hpa akyu ni lu na kun?

¹⁷ Tengman ai lam hpe atsawm chye nna jum da yang, Yehowa hte matut hku hkau lu na, makam masham ngang kang na re. (Ehp 4:15, 16) Satan a masu ga ni, n jaw ai shiga ni hte hkalem ai hpe n hkrum sai. Ru tsang kaba laman, Karai a makawp maga lam npu hta shimlum nga na re. Dai majaw, tengman ai lam hpe jum da u. Rai yang, “ngwi pyaw ai a npawt Karai Kasang gaw, nanhte hte rau a nga nga na ra ai.”—Hpl 4:8, 9.