1-2. Zadok gaw kadai rai kun? (1 Hkawhkam Labau 12:22, 26-28)

 MASHA 340,000 jan lawm ai shawa hpawng langai hpe shingran yu u. Dawi hpe Israela Hkawhkam shatai na matu sa hpawng ai re. Shanhte grai pyaw let ga shaga ai, Yehowa hpe shakawn mahkawn ni hkawn ai. (1 Hl 12:39) Dai masha hpawng hta, ramma Zadok mung lawm ai. Masha law law gaw shi hpe n sadi hkrup ai. Raitim, Yehowa sadi hkrup ai. Anhte hpe mung Zadok a lam chye shangun mayu ai. (1 Hkawhkam Labau 12:22, 26-28 hpe hti u.) Zadok gaw kadai rai kun?

² Zadok gaw, Hkinjawng Agyi Abiahta hte rau magam gun wa ai hkinjawng re. Myihtoi langai mung re. Myihtoi ngu ai gaw, nyan hpaji rawng nna, Karai a myit ra ai lam hpe chye na lu ai atsam nga ai wa hpe tsun ai re. (2 Sa 15:27) Masha ni gaw nyan hpaji ra ai shaloi, Zadok kaw sa ai. Shi gaw nden marai nga ai wa mung re. Nden marai nga ai lam shi gara hku madun ai ngu ai hpe, ndai sumhpa hta bawngban mat na re.

3. (a) Yehowa hpe nawku ai ni hpa majaw nden marai nga ra ai kun? (b) Ndai sumhpa hta hpa lam bawngban na kun?

³ Ndai hpang jahtum na nhtoi ni hta, Satan gaw Karai a amyu masha ni hpe grau gasat nga ai. (1 Pe 5:8) Dai majaw, Satan hte shi a nhkru ai mungkan hpe, Yehowa jahtum kau na aten hpe la nga ai laman, anhte nden marai nga ra ai. (Shk 31:24) Zadok a nden marai hpe kasi la mai ai lam 3 hpe bawngban mat ga.

KARAI A MUNGDAN HPE MADI SHADAW U

4. Karai a Mungdan hpe madi shadaw na matu, Karai a amyu masha ni hpa majaw nden marai nga ra ai kun? (Sumla hpe mung yu u.)

⁴ Karai a amyu masha re ai anhte gaw, Karai a Mungdan hpe myit masin mahkra hte madi shadaw ai. Raitim, dai zawn galaw  na matu nden marai ra ai. (Mat 6:33) Ga shadawn, nhkru ai ndai mungkan hta Karai a tsang madang ni hte maren asak hkrung na matu, Mungdan kabu gara shiga hkaw tsun na matu nden marai ra ai. (1 Ht 2:2) Mung masa lam ni a majaw, kahkyin gumdin lam n nga ai mungkan hta lapran tsap na matu nden marai ra ai. (Yhn 18:36) Mung masa lam hta n lawm ai majaw, hpyen dap de n shang ai majaw, Yehowa a mayam law law gaw, ja gumhpraw mayak mahkak hkrum ai, zingri zingrat hkrum ai, htawng jahkrat hkrum ai.

5. Dawi hpe madi shadaw na matu Zadok hpa majaw nden marai nga ra ai kun?

⁵ Dawi hpe hkawhkam shatai ai poi kaw lawm na matu sha, Hebron mare de Zadok sa ai n re. Hpyen laknak hkum hkum hte majan gasat na matu sa ai re. (1 Hl 12:38) Dawi hte rau majan gasat na matu, Israela mung hpe hpyen ni a lata kaw na makawp maga na matu Zadok jin jin re. Majan gasat ai mahkrum madup nau n nga tim, nden marai gaw hpring tup re.

6. Dawi a nden marai gaw gara lam hku nna Zadok a matu kasi kaja rai kun? (Shakawn 138:3)

⁶ Hkinjawng re ai Zadok gaw gara hku nden marai nga wa ai kun? Shi makau hta nden marai nga ai masha law law nga ai majaw re. Shanhte a kasi ningli hpe Zadok kasi la wa na re. Ga shadawn, Israela yawng myit hkrum mang rum let hkawhkam shatai mayu ai Dawi a lam hpe myit yu u. Dawi gaw, nden marai hte “lsraela amyu hpe woi awn nna, hpyen gasat” wa ai. (1 Hl 11:1, 2, NWT) Hpyen ni hpe gasat awng dang lu na matu, Yehowa hpe galoi mung kamhpa ai. (Shk 28:7; Shakawn 138:3 hpe hti u.) Yehoiada, Yehoiada a kasha share ninghkrin Benaia hte nden marai rawng let Dawi hpe madi shadaw wa ai hpyen bu 22 hpe mung Zadok kasi la ai. (1 Hl 11:22-25; 12:26-28) Dawi hpe hkawhkam shatai na matu, shanhte yawng ngang ngang kang kang dawdan da ai.

7. (a) Nden marai hte seng nna dai ni aten na kadai ni kaw na sharin la mai ai kun? (b) Video hta lawm ai hpunau Nasilu kaw na hpa sharin la lu ai kun?

 ⁷ Yehowa hte shi a Mungdan hpe nden marai hte madi shadaw ai ni a lam myit dat ai shaloi, anhte mung nden marai nga wa ai. Ga shadawn, Hkawhkam Hkristu Yesu a lam myit yu u. Yesu gaw Satan mungkan a mung masa lam hta n lawm ai. (Mat 4:8-11; Yhn 6:14, 15) Nden marai nga na matu Yehowa hpe galoi mung kamhpa ai. Dai ni aten hta mung, mung masa lam hte majan hta n lawm na matu, nden marai hte nyet kau wa ai kasi kaja ai ramma hpunau law law nga ai. Shanhte a mahkrum madup hpe jw.org hta yu mai ai. a

HPUNAU NAUNA NI HPE KARUM YA U

8. Hpunau nauna ni hpe karum ya na matu myitsu salang ni gara aten hta nden marai ra chye ai kun?

⁸ Yehowa a mayam ni gaw shada da karum ya mayu ai. (2 Ko 8:4) Raitim, dai zawn karum na matu nden marai ra ai aten ni nga ai. Ga shadawn, majan byin sai nga yang, hpunau nauna ni gaw n-gun jaw lam, madi shadaw lam, Chyum Laika, Chyum Laika hte seng ai laili laika, malu masha, bu hpun palawng, nga shara ni ra ai lam hpe buga na myitsu salang ni chye ai. Hpunau nauna ni hpe tsawra ai majaw, asak shoihpa nga tim, ra kadawn ai lam ni hpe madi shadaw ya ai. (Yhn 15:12, 13) Zadok a nden marai hpe kasi la ai ni re.

9. 2 Samuela 15:27-29 hku nga yang, Zadok hpe Dawi hpa galaw shangun ai kun? (Sumla hpe mung yu u.)

⁹ Shoihpa law ai aten hta hpunau ni hpe Zadok gara hku karum ya wa ai kun? Dawi hpe sat nna hkawhkam tingnyang kashun na matu, kasha Absalom maw nga ai. (2 Sa 15:12, 13) Yerusalem mare de Dawi kalang ta hprawng ra mat ai. “Rawt mu, anhte hprawng ga: shing n rai yang, kadai mung Absalom hpe lawt lu na n rai” ngu nna hkaw htingnu na ali ama ni hpe aming jaw ai. (2 Sa 15:14) Dai majaw, shanhte gaw Dawi hte rau hprawng mat  ai. Raitim, Absalom hpa ni maw nga ai hpe chye hkra, Yerusalem mare hta marai langai ngai hpe tawn da na matu myit hkrup ai. Dai majaw, Zadok hte kaga hkinjawng ni hpe mare de bai shang shangun ai. (2 Samuela 15:27-29 hpe hti u.) Shoihpa nga ai lit jaw dat ai re. Shanhte grai sadi ra na re. Dawi hpe makawp maga na matu, sa sagawn nga ai hpe, grai nhkru ai Absalom chye mat yang, shanhte hpa byin mat na hpe myit yu u.

10. Zadok hte shi a hkinjawng hpung gaw Dawi hpe gara hku makawp maga ya wa ai kun?

¹⁰ Dawi masing langai jahkrat ai. Zadok hte sadi dung ai manang Hushai hpe dai masing hte maren galaw shangun ai. (2 Sa 15:32-37) Dawi a masing hte maren Absalom hpe Hushai madi shadaw masu ai. Dawi hpe gara hku gasat ging ai ngu ai hpe hpaji jaw ai. Gaja nga yang, Dawi hprawng na aten lu mat hkra, Absalom hpe hpaji jaw dat ai re. Dai hpe Absalom hkap la dat ai hte kalang ta, Zadok hte Abiahta hpe Hushai shiga shana ai. (2 Sa 17:8-16) Zadok hte Abiahta mung, Dawi hpang de masha shangun nna shiga sa ai. (2 Sa 17:17) Yehowa a karum shingtau a majaw, Zadok hte shi a hkinjawng hpung gaw, Dawi hpe makawp maga ya lu wa ai.—2 Sa 17:21, 22.

11. Hpunau nauna ni hpe karum ya ai shaloi, Zadok a nden marai hpe gara hku kasi la mai ai kun?

¹¹ Anhte mung shoihpa law ai aten hta, hpunau nauna ni hpe karum ra wa ai shaloi, Zadok a nden marai hpe gara hku kasi la mai ai kun? (1) Lam matsun hpe hkan sa u. Shoihpa law ai aten hta, anhte kahkyin gumdin nga na matu, madat mara lam gaw grai ahkyak ai. Dai majaw, ginjaw garan rung a lam matsun hpe hkan sa u. (Heb 13:17) Myitsu salang ni mung shoihpa n hkrum shi yang, gara hku hkyen lajang da ra na, shoihpa hkrum sai nga yang hpa galaw ra na ngu ai hte seng ai uhpung a lam matsun ni hpe ayan bai maram yu ging ai. (1 Ko 14:33, 40) (2) Nden marai  nga u, sadi maja u. (Gsh 22:3) Hpa hpe raitim, myit yu sawn yu nna galaw u. Dang lu ai made shimlum hkra galaw u. (3) Yehowa hpe kamhpa u. Nang hpe mung, hpunau nauna ni hpe mung, Yehowa shimlum shangun mayu ai hpe dum u. Hpunau nauna ni hpe shimlum let madi shadaw ya lu na matu, nang hpe Yehowa karum ya lu ai.

12-13. Hpunau Bitta hte hpunau Bittali ni kaw na hpa sharin la lu ai kun? (Sumla hpe mung yu u.)

¹² Yukaring kaw na hpunau nauna ni hpe malu masha sa ya ai hta lawm wa ai hpunau Bitta hte hpunau Bittali a lam myit yu u. Bitta ndai hku tsun ai: “Sanat pala ni a lapran, malu masha lu na matu shara shagu hkan tam ai. Hpunau langai gaw, shi a seng kaw na malu masha ni hpe alu jaw ai. Dai majaw, aten ladaw mi daram du hkra, hpunau nauna ni a matu lusha law mat ai. Kalang mi hta, mawdaw ntsa de rai ni mara nga ai shaloi, anhte hte pe 66 (20 m) daram sha tsan ai shara hta bawm sa hkrat ai. Hpunau nauna ni hpe matut karum ya lu na matu, nden marai jaw rit ngu shani tup Yehowa kaw akyu hpyi ai.”

¹³ Bittali ndai hku tsun ai: “Anhte nden marai gaja wa nan ra wa ai. Shawng nnan sa ai shaloi, lam kaw hkying hkum 12 na mat ai. Lam dingyang akyu hpyi ai.” Bittali gaw nden marai nga ai, sadi maja ai lam mung nga ai. Shi ndai hku matut tsun ai: “Nyan hpaji, npu taw ai lam nga na matu, Yehowa kaw dingyang akyu hpyi ai. Ahkang aya nga ai ni sa shangun ai lam kaw nna sha sa ai. Hpunau nauna ni mung, lam pat na zawn re ai arai ni hpe seng ya ai. Madi shadaw arung arai ni hpe mawdaw ntsa mara ya ai. Lam kaw anhte sha na matu, hkring na matu lajang ya ai. Ya na zawn, shada da matut mahkai nna rau jawm galaw nga ai hpe mu lu ai majaw, grai n-gun lu ai.

YEHOWA HPE MATUT SADI DUNG U

14. Tsawra ai marai langai Yehowa hpe kau da mat ai shaloi, nang gara hku hkamsha chye ai kun?

¹⁴ Nta masha (sh) grai hkau ai manang langai Yehowa hpe kau da mat ai gaw, anhte a matu yak dik htum chyam dinglik lam re. (Shk 78:40; Gsh 24:10) Grau hkau magang, grau yak magang re. Nang hta mung dai zawn yawn hpa mahkrum madup nga yang, Zadok a kasi ningli gaw sadi dung lu hkra nang hpe n-gun jaw lu ai.

15. Yehowa hpe matut sadi dung na matu Zadok hpa majaw nden marai ra ai kun? (1 Hkawhkam 1:5-8)

¹⁵ Manang majing re ai Abiahta sadi run mat ai aten hta, Yehowa hpe Zadok matut sadi dung ai. Dawi hkaw dung ai hpang jahtum aten, hkam n kaja nga ai shaloi, hkawhkam tingnyang kashun na matu, kasha Adoniya shakut ai. Gaja nga yang, Shawlumon hpe Dawi a tingnyang hta dung shangun na ngu Yehowa ga sadi jaw da ai. (1 Hl 22:9, 10) Adoniya maga de Abiahta lawm mat ai. (1 Hkawhkam 1:5-8 hpe hti u.) Dawi hpe sha n-ga, Yehowa hpe mung sadi run mat ai re. Zadok grai myit daw mat na re. Abiahta hte shaning 40 jan, hkinjawng magam rau gun wa ai. (2 Sa 8:17) “Karai Kasang a sumpu” hpe rau hpai wa ai. (2 Sa 15:29) Dawi hpe rau madi shadaw wa ai. Yehowa a magam hta rau galaw wa ai lam law law nga ai.—2 Sa 19:11-14.

16. Zadok hpa majaw matut sadi dung lu ai kun?

¹⁶ Abiahta sadi run mat tim, Yehowa hpe Zadok matut sadi dung ai. Dawi gaw Zadok a sadi dung ai lam hpe, ntsen ai myit kalang mung n nga ai. Adoniya maw ai lam hpe chye mat ai shaloi, Shawlumon hpe hkawhkam hku nna namman chya ya na matu, Zadok, Nahtan hte Benaia hpe aming jaw ai. (1 Hk 1:32-34) Hkawhkam Dawi hpe madi shadaw ai Nahtan zawn re ai Yehowa hpe sadi dung ai kaga mayam ni nga ai majaw, Zadok grai n-gun lu wa  na re. (1 Hk 1:38, 39) Shawlumon hkawhkam byin wa ai shaloi, “Ablahta a malai hkinjawng Zadok hpe san tawn da” ai.—1 Hk 2:35.

17. Tsawra ai marai langai Yehowa hpe sadi run mat yang, Zadok hpe nang gara hku kasi la mai ai kun?

¹⁷ Zadok hpe gara hku kasi la mai ai kun? Tsawra ai marai langai Yehowa hpe sadi run mat tim pyi, tinang gaw Yehowa hpe matut sadi dung na ngu ai hpe ngang ngang kang kang madun dan u. (Ysh 24:15) Jaw ai hpe galaw na matu, ra nga ai n-gun atsam, nden marai hpe Yehowa jaw na re. Akyi hpyi u. Sadi dung ai hpunau nauna ni hte hku hku hkau hkau kanawn mazum u. Na a sadi dung ai lam hpe Yehowa manu shadan ai. Sadi dung ai majaw nang hpe Yehowa kumhpa jaw na re.—2 Sa 22:26.

18. Hpunau Mako hte nauna Sise yan kaw na hpa sharin la lu ai kun?

¹⁸ Hpunau Mako hte madu jan Sise ni a lam hpe myit yu u. Asak ram sai kasha numsha lahkawng gaw, Yehowa hpe kau da mat ai. Mako ndai hku tsun ai: “Shangai ai aten kaw nna shanhte hpe grai tsawra ai, grai makawp maga ya wa ai. Dai majaw, Yehowa hpe shanhte kau da mat ai shaloi, ngai grai yawn ai. Raitim, hkamjan lu na matu Yehowa karum ya ai. Ngai n-gun yawm ai aten hta, nye madu jan hpe n-gun shaja ya ai. Shi n-gun yawm ai aten hta, ngai hpe n-gun shaja ya ai.” Sise ndai hku tsun ai: “Yehowa sha, anhte ra nga ai n-gun atsam n jaw yang, gara hku mung hkamjan lu na n re. Kasha ni dai zawn byin mat ai gaw, nye mara re ngu hkamsha ai. Dai majaw, hkamsha lam hpe Yehowa hpe tsun dan ai. Kade n na yang, n hkrum ai shaning hku na sai nauna langai, ngai kaw du wa ai. Nye lahpa hpe jum let ‘Sise, na a mara n re’ ngu tsun ai. Yehowa a karum shingtau hte shi a magam hpe ngwi pyaw let matut gun hpai lu wa ai.

19. Nang hpa dawdan da ai kun?

¹⁹ Yehowa gaw, shi hpe nawku ai ni yawng hpe, Zadok zawn nden marai nga shangun mayu ai. (2 Tm 1:7) Raitim, tinang hkum tinang n kamhpa ai sha, shi hpe kamhpa shangun mayu ai. Dai majaw, nden marai ra ai masa hkrum wa ai shaloi, Yehowa hpe kamhpa u. Nang hpe Zadok zawn nden marai nga shangun na re.—1 Pe 5:10.