1. Anhte langai hpra hte seng nna Yehowa hpa galaw ai kun?

YEHOWA gaw anhte langai hpra hpe shi hpang de lau la wa ai. (Yhn 6:44) De a lachyum hpe myit yu u. Ndai mungkan hta nga ai wan hku law ai masha ni hpe Yehowa yu dat ai shaloi, nang gaw myit dingman nna shi hpe tsawra ai hpe mu ai. Dai gaw shi a matu manu dan ai. (1 Hl 28:9) Yehowa nang hpe chye ai, chye na ya ai, tsawra ai. Dai gaw grai n-gun lu hpa re.

2. Yehowa gaw sagu langai hpra hpe myit lawm ai lam Yesu gara hku ga shadawn tsun dan wa ai kun?

² Yehowa gaw nang hpe grai lanu lahku ai zawn, Hkristan hpunau nauna yawng hpe mung lanu lahku ai. Ndai lam hpe chye na na matu, Yehowa hpe sagu rem langai hte Yesu shingdaw wa ai. Sagu 100 hta na sagu 1 mat mat yang, sagu rem ai wa hpa galaw ai kun? “Langai mi dam mat yang, dai jahku shi jahku hpe bum lang hkan e shi tawn da nhtawm, dam mat ai hpe sa tam” ai. Sagu rem ai wa gaw sagu hpe mu tam ai shaloi, dam mat ai majaw n pawt ai. De a malai shi grai kabu ai. Hpa sharin la lu ai kun? Sagu langai hpra gaw Yehowa a matu manu dan ai. Yesu ndai hku tsun ai: “Ndai ma kaji langai mi hpe pyi jahten kau ai hkrum na gaw, sumsing lamu hta nga ai nye Wa gaw, n hkraw nga ai.”​—Mat 18:12-14.

3. Ndai sumhpa hta hpa lam hkaja mat na kun?

³ Anhte kadai mung hpunau nauna ni hpe myit daw hkra n galaw mayu ga ai. Kaga ni hpe ahtu kataw shangun ai lam ni hpe gara hku koi lu na kun? Kaga ni tinang hpe hkra machyi hkra galaw yang hpa galaw lu na kun? Dai ga san ni a mahtai hpe ndai sumhpa hta hkaja mat na re. Raitim, Mahte daw kaba 18 hta lawm ai “dai ma kaji langai” gaw kadai hpe tsun ai hpe shawng hkaja mat wa ga.

4. “Dai ma kaji langai” gaw kadai ni kun?

⁴ “Dai ma kaji langai” hta Yesu a sape yawng lawm ai. Shanhte a asak gaw kade mi rai sai raitim, ma kaji zawn Yesu a sharin achyin ya ai lam hpe kabu gara hte hkap la ai. (Mat 18:3) Shingdu labau, htunghking n bung ai, mu mada lam, akyang lailen n bung ai raitim, yawng gaw Hkristu hpe kam ai lam madun ma ai. Yesu mung shanhte hpe grai tsawra ai.​—Mat 18:6; Yhn 1:12.

5. Marai langai ngai gaw Yehowa a masha ni hpe hkra machyi hkra (sh) ahtu kataw hkra galaw ai shaloi Yehowa gara hku hkamsha ai kun?

⁵ “Dai ma kaji langai” hta lawm ai ni yawng gaw Yehowa a matu manu dan ai. Yehowa a hkamsha lam hpe chye na matu, ma kaji ni hte seng nna anhte gara hku hkamsha ai hpe myit yu ga. Ma ni gaw anhte a matu manu dan ai. Shanhte hta n-gun atsam, mahkrum madup hte asak ram sai ni hta nga ai machye machyang n nga ai majaw, shanhte hpe makawp maga ya mayu ai. Marai langai ngai hpe hkra machyi hkra galaw ai hpe anhte n ra ai. Grau nna gaw ma ni hpe hkra machyi hkra galaw ai nga yang, masin pyi pawt wa ai. Dai hte maren Yehowa mung anhte hpe makawp maga ya mayu ai. Marai langai ngai gaw shi a masha hpe hkra machyi hkra galaw ai (sh) ahtu kataw shangun ai nga yang, shi myit n pyaw ai, masin pyi pawt wa ai.​—Esa 63:9; Mrk 9:42.

6. 1 Korinhtu 1:26-29 hku nga yang, mungkan gaw Yesu a sape ni hpe gara hku mu mada ai kun?

⁶ Gara lam hku nna mung Yesu a sape ni gaw “ma kaji langai” hte bung ai kun? Mungkan gaw kadai ni hpe ahkyak ai ngu nna mu mada ai kun? Sut su ai ni, mying gumhkawng ai ni, atsam kaba ai ni hpe re. Raitim, Yesu a sape ni gaw n ahkyak ai ni, hpa n re ai ma kaji ni hte bung taw nga ai. (1 Korinhtu 1:26-29 hpe hti u.) Raitim, Yehowa gaw dai hku n mu mada ai.

7. Hpunau nauna ni hte seng nna Yehowa anhte hpe gara hku hkamsha shangun mayu ai kun?

⁷ Yehowa hpe shaning na na nawku wa sai ni hpe raitim (sh) tengman lam de ya she du wa ai ni hpe raitim Yehowa tsawra ai. Hpunau nauna yawng gaw Yehowa a matu ahkyak ai ni re majaw, anhte mung ahkyak ai ni hku nna mu mada ra ai. Shanhte kaw na nkau hpe sha n re ai sha, hpunau nauna yawng hpe anhte tsawra ra ai. (1 Pe 2:17) Shanhte hpe makawp maga ya na matu, lanu lahku ya na matu galaw lu ai lam yawng hpe galaw ging ai. Anhte gaw marai langai hpe hkra machyi hkra (sh) myit n pyaw hkra galaw hkrup dat ai hpe chye ai nga yang, ahpa atang n mai myit ai. Hpa n re ai hpe shajan shalai galaw nga ai ngu myit nna, malap kau ai baw n mai galaw ai. Nkau gaw hpa majaw hkra machyi loi ai kun? Shanhte a shingdu labau a majaw kaga ni hta grau grit nem ai ngu hkamsha nga ai majaw re. Nkau gaw tengman ai lam de ya she du wa nna, masha ni a n hkum tsup ai lam hte seng nna gara hku mara raw ya ra na hpe n chye shi ai. Hpa mi raitim, kaga ni hte simsa lam nga na matu anhte shakut ging ai. Maga mi hta, kaga ni a majaw chyahkring hkring hkra machyi ai ngu hkamsha chye ai wa mung, hkamsha loi ai myit yawm hkra shakut ging ai. Dai zawn galaw ai gaw, tinang nan mung simsa lam lu nna kaga ni hte mung hku hkau lam kaja shangun ai.

8. Yesu a sape ni hta gara myit jasat shingkang ka-up hkrum da ai kun?

⁸ “Dai ma kaji langai” a lam hpe Yesu hpa majaw tsun wa ai kun? Shi a sape ni gaw shi hpe ndai hku san ai: “Sumsing lamu a mungdan hta kadai wa mahtang grau kaba nga a ta?” (Mat 18:1) Dai aten na Yuda ni law malawng gaw, ahkang aya hte arawng aya hpe grai ahkyak shatai ai. Hpaji du langai ndai hku tsun ai: “Masha langai a prat hta kaga ni a shagrau  hkrum nna mying kaba wa na matu gaw ahkyak htum re.”

9. Yesu a sape ni gaw gara lam hpe galaw ra na kun?

⁹ Kaga masha ni hta na tinang gaw grau ai ngu Yuda masha ni hkam la da ai. Dai myit jasat hpe sape ni galai shai na matu grai shakut ra na hpe Yesu chye ai. Shanhte hpe shi ndai hku tsun ai: “Nanhte hta, grau kaba ai wa gaw, aprat kaji ai wa zawn rai u ga; uphkang ai wa mung, shangun ma zawn rai u ga.” (Luk 22:26) Kaga ni hpe tinang hta grau ai ngu mu mada yang, anhte gaw kaji ai wa zawn galaw na re. (Hpl 2:3) Dai myit jasat hpe grau shalat la na nga yang, kaga ni hpe ahtu kataw shangun ai hpe shayawm lu na re.

10. Pawlu a gara hpaji jaw ga hpe anhte matsing da ging ai kun?

¹⁰ Hpunau nauna yawng hte gaw, tinang hta na, shara mi nrai yang shara mi hta gaw grau ai. Shanhte hta nga ai kaja ai atsam ningja ni hpe myit maju jung na nga yang, dai hpe aloi hte sha mu lu ai. Korinhtu ni hpe kasa Pawlu jaw wa ai ndai hpaji jaw ga hpe anhte matsing da ging ai: “Kadai wa mi nang hpe ginhka shangun nga a ta? Hkam la ai sha n rai yang gaw, nang hpa lu nga a ta? Hkam la n yang gaw, n hkam la ai zawn, hpa majaw gumrawng nga n ta?” (1 Ko 4:7) Tinang hkum tinang myit maju jung wa shangun ai (sh) kaga ni hta tinang grau ai ngu myit wa shangun chye ai mahkam ni hpe anhte sadi ging ai. Hpunau langai gaw n-gun lu shangun ai mungga ni hpe htawn ai (sh) nauna langai gaw Chyum ga sharin nnan ni hpe hpang lu wa ai shaloi, Yehowa hpe shagrau ging ai.

11. Yesu tsun dan wa ai madu hte shi a mayam ga shadawn gaw hpa hpe sharin ya ai kun?

¹¹ Kaga ni hpe ahtu kataw shangun ai lam hpe koi na matu, shi a hpang hkan ai ni hpe Yesu sadi jaw ngut ai hpang, madu langai hte shi a mayam ga shadawn hpe Yesu tsun dan wa ai. Mayam wa jaw lu na n re ai hka hpe madu gaw shaprai kau ya ai. Hpang hta dai mayam wa gaw, mayam manang wa a hka hpe n shaprai ya mayu ai. Hpang jahtum matsan dum myit n rawng ai dai mayam hpe, madu gaw htawng jahkrat kau ai. Hpa sharin la lu ai kun? Yesu ndai hku tsun ai: “Tinang a hpu nau wa mara hpe myit masin yawng hte n raw kau ya myit yang gaw, sumsing lamu na nye Wa mung, nanhte hpe tai na ma rin dai.”​—Mat 18:21-35.

12. Anhte mara n raw ya ai nga yang kaga ni hpe gara hku hkra machyi shangun ai kun?

¹² Mayam wa a lailen gaw shi hpe mung, kaga ni hpe mung hkra machyi shangun ai. Shawng nnan, hka wa kau ai aten du hkra mayam manang wa hpe htawng kaw bang da ai hku nna hkra machyi shangun wa ai. Ngut na shi galaw ai hpe mu ai kaga mayam manang ni hpe mung hkra machyi shangun ai. “Shi a mayam manang ni dai hpe mu hkrup mu yang, shanhte nachying myit yu machyi ya mu ai.” Dai zawn sha anhte a galaw ai lam gaw kaga ni hpe hkra machyi shangun ai. Marai langai ngai gaw anhte a ntsa shut ai ngu saga. Anhte mara n raw ya ai nga yang hpa byin wa na kun? Shawng nnan, shi hpe mara n raw ya ai, shi hpe n hkap la ai, tsawra myit n madun ai hku nna shi hpe hkra machyi shangun ai. Ngut nna, dai wa hte anhte simsa lam n nga ai hpe nawku hpang kaw na ni mu nna nga yak na re.

13. Ningshawng langai a mahkrum madup kaw na nang hpa sharin la lu ai kun?

¹³ Hpunau nauna ni hpe anhte mara raw ya ai nga yang, tinang nan mung kaga ni mung akyu lu la ai. Ningshawng nauna Hkriste gaw dai zawn hkrum wa ai. Nawku hpung hta na nauna langai a majaw shi hkra machyi mat ai. Hkriste ndai hku tsun ai: “Shi tsun ai ga ni wa kalang lang nhkyi hte galun ai zawn re. Hkaw tsun bungli sa na matu shi hte arau mawdaw n kam jawn ai. Nye a myit rawt ai lam hte kabu gara ai lam ni mat wa ai.” Nauna Hkriste gaw shi myit n pyaw ai lam gaw byin ging ai lam re  ngu hkamsha wa ai. Raitim, hkra machyi ai lam ni (sh) hkamsha lam ni a majaw shi asum n jaw wa ai. De a malai 1999, October 15, Sin Langchyi-BU hta lawm ai “Myit Masin Kata Kaw Na Mara Raw Ya U” ngu ai sumhpa hta tsun da ai hpaji jaw ga hpe shagrit shanem let hkan sa ai. Nauna hpe shi mara raw kau ya ai. Hkriste ndai hku tsun ai: “Anhte yawng gaw gawng shingyan ningnan hpe dagraw na matu shakut nga ai. Yehowa mung shani shagu mara raw ya nga ai hpe, ya ngai chye sai. Grai myit tsang mat ai. Kabu gara lam ngai bai lu wa ai.”

14. Mahte 18:21, 22 hku nga yang, kasa Petru gaw hpa galaw na matu yak nga ai kun? Yesu bai tsun ai lam kaw na anhte hpa sharin la lu ai kun?

¹⁴ Mara raw ya ging ai hpe anhte chye ai. Dai gaw galaw ra ai lam re. Raitim, galaw na matu yak nga chye ai. Kasa Petru dai zawn hkamsha ga ai. (Mahte 18:21, 22 hpe hti u.) Hpa gaw karum ya lu ai kun? Shawng nnan, Yehowa nang hpe kade daram mara raw ya ai hpe myit sawn sumru u. (Mat 18:32, 33) Mara raw hkrum na matu anhte n ging dan ai. Raitim, Yehowa mara raw ya ai. (Shk 103:8-10) “Anhte yawng hta shada da tsawra ra na lit nga ai.” Dai majaw mara raw nan raw ya ra ai. Hpunau nauna ni hpe mara raw ya ai nga yang, shanhte hpe bai lu la ai re. (1 Yh 4:11, NW) Lahkawng, mara raw ya yang hpa byin wa na hpe myit sawn sumru u. Anhte hpe shut hpyit ai wa hpe karum ya ai, nawku hpung hpe kahkyin gumdin shangun ai, Yehowa hte anhte a hku hkau lam hpe makawp maga ai rai nna, li nga ai lit hpe jahkrat kau ai re. (2 Ko 2:7; Kol 3:14) Hpang jahtum, mara raw ya na matu anhte hpe hpyi shawn da ai wa hpang de akyu hpyi u. Hpunau nauna ni hte ngwi pyaw simsa nga ai hpe jahten na ahkang Satan hpe hkum jaw. (Ehp 4:26, 27) Satan a mahkam ni hpe koi lu na matu Yehowa a karum madi shadaw lam ra ai.

15. Kolose 3:13 hku nga yang, hpunau nauna langai a galaw ai lailen a majaw anhte myit n pyaw ai nga yang hpa galaw ging ai kun?

¹⁵ Hpunau nauna langai ngai gaw nang hpe myit n pyaw hkra galaw ai nga yang, nang hpa  galaw ging ai kun? Simsa lam matut nga hkra shakut u. Yehowa hpang akroi anoi akyu hpyi u. Nang hpe myit n pyaw hkra galaw ai wa hpe shaman chyeju jaw na matu, shi hta nga ai kaja ai atsam ningja ni hpe Yehowa mu ai zawn mu wa na matu akyu hpyi u. (Luk 6:28) Shi a mara ni hpe n lu malap taw ai nga yang, shi hte gara hku tsun shaga yang kaja na hpe myit u. Hpunau ni gaw hkra machyi hkra dingsang galaw na n re ai hpe myit dum da ging ai. (Mat 5:23, 24; 1 Ko 13:7) Shi hte ga shaga ai shaloi, kaja ai yaw shada lam hte sa shaga ai re ai hpe chye hkra galaw u. Shi gaw simsa hkra n kam galaw ai nga yang gara hku? “Hkam mana ai” myit hte matut shakut u. Asum hkum jaw. (Kolose 3:13 hpe hti u.) Ahkyak htum gaw, masin n si hkraw ai baw hkum galaw. Dai gaw Yehowa hte na a hku hkau lam hpe pyi, hkra machyi shangun chye ai. Hpa lam a majaw mung ahtu kataw na ahkang hkum jaw. Dai hku galaw ai gaw, yawng mayawng hta na Yehowa hpe grau tsawra ai lam nang sakse madun ai re.​—Shk 119:165.

16. Anhte langai hpra hta gara lit nga ai kun?

¹⁶ “Sagu rem wa langai” a npu hta na “sagu hpung langai sha” zawn, Yehowa hpe kahkyin gumdin let nawku lu ai hpe anhte manu shadan ai. (Yhn 10:16) Yehowa A Magam Gun Na Matu Hpawng De Da Ai Lam-BU ngu ai laika buk a laika man 165 hta ndai hku tsun da ai: “Kahkyin gumdin lam a majaw nang akyu lu nga ai. Matut kahkyin gumdin hkra galaw na matu nang hta lit nga ai.” Dai majaw anhte ni gaw “hpunau nauna ni hpe Yehowa mu ai zawn mu hkra shaman da ra ai.” Anhte yawng gaw Yehowa a matu manu dan ai “ma kaji” ni re. Hpunau nauna ni hpe dai hku nang mu mada ai kun? Shanhte hpe nang lanu lahku nna karum ya ai lam yawng hpe, Yehowa gaw sadi hkrup nna manu shadan ya ai.​—Mat 10:42.

17. Hpa galaw na matu anhte dawdan da ai kun?

¹⁷ Hpunau nauna ni hpe anhte tsawra ai. Dai majaw, “hpu nau a matu ahtu kadawng shara hte myit kataw shara n tawn da na” matu anhte dawdan da ga. (Rom 14:13) Hpunau nauna ni gaw tinang hta grau ai ngu anhte myit la ai. Myit masin yawng hte shanhte hpe mara raw ya mayu ai. Kaga ni a majaw ahtu kataw mat na ahkang anhte jaw na n re. De a malai, “simsa lam nga shangun ai lam ni, n-gun jaw ya ai lam ni hpe galaw na matu” shakut mat wa ga.​—Rom 14:19, NW.