MOI aten kaw nna Israela masha ni gaw, tengman ai nawku daw jau lam hpe madi shadaw na matu, alu bang ai akyang nga ai. Raitim, Yesu aten hta Yuda masha ni gaw hkanse law law bang ra wa nna lit li wa ai.

Karai a chyoi pra ai htingnu hpe madi shadaw na matu, asak ram sai Yuda masha yawng gaw, shekela chyen mi jaw ra ai. Tsa ban langai hta dai hkanse hpe Herod gap da ai nawku htingnu hta hkungga nawng na matu hte gram lajang na matu akyu jashawn wa ai. Dai hkanse hte seng nna Yuda masha nkau Yesu hpe san ai. Yesu gaw dai hkanse hte seng nna n ninghkap ai. De a malai, hkanse bang na matu shekela pa mi wa la na matu Petru hpe tsun ai.​—Mat 17:24-27.

Karai a masha ni gaw, shanhte a nsi naisi (sh) shang gumhpraw kaw na htam shi alu hpe mung jaw ra ai. (Jaw 27:30-32; Bhk 18:26-28) Dai htam shi alu hpe namlaw namlap shagu, “shingtawn pan, pansoi; hpakkyi tum” ni du hkra pyi jaw matu nawku htung ni baw ni atik anang hpyi shawn ma ai. Htam shi alu hta ai hte seng nna Yesu mara n shagun ai. Raitim, hpyi hpun ai laika ka ai sara ni hte Hparishe ni a myit jasat hpe Yesu hpaw tsun wa ai.​—Mat 23:23.

Dai aten hta Roma ni uphkang nga nna, shanhte hpe hkanse ni grai law hkra jaw ra ai. Ga shadawn, lamu ga madu ai ni gaw, de a matu gumhpraw (sh) dai kaw na shapraw ai gunrai ni hpe hkanse jaw ra ai. Dai hkanse gaw tsa lam shadang 20 kaw nna 25 daram nga ai. Yuda masha shagu jaw ra ai hkanse mung nga ai. Hkanse hte seng nna Yesu hpe Hparishe ni san ai ga san gaw dai hkanse hte seng nna re. Dai ga san hpe bai htai ai shaloi, hkanse hte seng nna anhte gara hku mu mada ging ai lam Yesu madun wa ai. Shi ndai hku tsun ai: “Kehta hte seng ai hpe gaw, Kehta hpe ya mu; Karai Kasang hte seng ai hpe mung, Karai Kasang hpe ya mu.”​—Mat 22:15-22.

Masat da ai ginwang kaw shang wa ai (sh) pru mat ai gunrai ni a matu mung, hkanse jaw ra ai. Dai hkanse ni hpe sanghpaw daru, mahkrai, lam mazup (sh) mare chyinghka, gat chyinghka ni hta hta ai.

Roma ni uphkang ai npu hta nga ai masha ni a matu law la ai dai hkanse ni gaw grai lit li wa ai. Roma labau ka sara re ai Tasi-tat tsun ai hku nga yang, Yesu mungkan hta naw nga ai aten re ai Hkawhkam Tiberu hkaw dung ai aten hta, “Suri hte Yuda masha ni gaw hkanse a matu grai pu ba wa ai majaw, hkanse hta ai hpe shayawm ya na matu hpyi shawn ai.”

Dai zawn kang hta ai lam ni a majaw, masha ni grau nna lit li wa ai. Gumhpraw law law jaw lu ai wa hpe sha, kang hta shangun ai. Dai wa gaw, kaga ni hpe bungli bai jaw ai. Yawng gaw gumhpraw law law lu na matu galaw ma ai. Zake a npu hta dai zawn kang hta ai masha ni nga na masa nga ai. (Luk 19:1, 2) Dai zawn hkang hta ai hpe masha ni masin pawt nna, yu kaji ma ai.