1-2. Lawt zawn dai ni aten na Hkristan ni gara mayak mahkak hkrum nga ai kun?

 NDAI mungkan hta n-gun jaw nga ai akyang lailen hte seng ai tsang madang ni hpe yu nna ding hpring ai Lawt zawn anhte hkamsha nga ai. N kaja ai arawn alai hpe Sumsing Kawa nju ndawng ai lam chye da ai majaw, “n se ai masha ni a n san n seng ai arawn alai majaw, myit tsang [myit ru, NWT]” wa ai re. (2 Pe 2:7, 8) Karai Kasang hpe tsawra hkungga ai myit gaw makau grup-yin na masha ni a madang nem ai akyang lailen tsang madang ni hpe nyet kau na matu Lawt hpe shadut ya ai. Anhte mung akyang lailen hte seng ai Yehowa a tsang madang ni hpe nau n hkungga ai (sh) tsep kawp n hkungga ai ni a lapran hta nga nga ai. Raitim, Yehowa hpe tsawra hkrit hkungga nga na nga yang, akyang lailen matut san seng nga lu na re.—Gsh 14:2.

² Akyang lailen san seng nga na matu, Ga Shagawp Laika hta Yehowa n-gun jaw da ai. Dai hta lawm ai hpaji jaw ga ni hpe sawn sumru ai gaw, asak kaji kaba, num la, Hkristan yawng hpe akyu lu shangun ai.

3. Ga Shagawp 17:3 hku nga yang, anhte a myit masin hpe makawp maga ra ai lam langai gaw hpa rai kun? (Sumla hpe mung yu u.)

³ Anhte a myit masin hpe makawp maga ra ai lam langai gaw, Yehowa jep yu nga ai majaw re. Masha ni mu ai hta grau nna shi mu ai. Anhte gara zawn masha re ai hpe shi atsawm chye ai. (Ga Shagawp 17:3 hpe hti u.) Anhte a myit masin hta asak lu shangun ai Shi a hpaji jaw ga ni hpe jahpring da yang, Shi anhte hpe tsawra na re. (Yhn 4:14) Myit masin hta Yehowa a hpaji jaw ga  ni jahpring da yang, Satan hte ndai mungkan a shut shai ai tsang madang ni shang na shara n nga sai. (1 Yh 5:18, 19) Yehowa hte grau hku hkau wa yang, Shi hpe grau tsawra hkungga wa na re. Karai Kasang hpe n yawn shangun mayu ai majaw, mara galaw na matu myit pyi myit na n re. Shut ai lam galaw na matu chyam dinglik hkrum ai shaloi, ‘Ngai hpe grai tsawra ai Wa hpe yawn hkra hpa majaw galaw na?’ ngu myit na re.—1 Yh 4:9, 10.

4. Yehowa hpe hkrit hkungga ai myit gaw shut ai lam hpe n galaw hkrup hkra nauna langai hpe gara hku makawp maga ya wa ai kun?

⁴ Hkroesha mungdan kaw na nauna Mata gaw, ngang akyang hten na matu gunglau hkrum ai. “Asan sha myit na matu, shut ai lam galaw mayu ai myit hpe gasat na matu grai yak ai. Raitim, Yehowa hpe hkrit hkungga ai myit gaw ngai hpe makawp maga ya ai.” b Karai Kasang hpe hkrit hkungga ai myit gaw gara hku makawp maga ya ai kun? N kaja ai dawdan lam ni a majaw hkra machyi na lam ni hpe myit sawn sumru ai ngu Mata tsun dan ai. Anhte mung dai zawn galaw lu ai. Sawng htum hkra machyi lam gaw Yehowa hpe yawn shangun ai, shi hpe htani htana nawku lu ai ahkang sum mat shangun ai.—Nin 6:5, 6.

5. Liyo a mahkrum madup kaw na hpa sharin la lu ai kun?

⁵ Yehowa hpe hkrit hkungga yang n kaja ai manaw manang ni hpe koi na re. Kun-go mungdan hta nga ai hpunau Liyo gaw, hkalup hkam nna 4 ning na ai hpang, n kaja ai manaw manang ni hte kanawn wa ai. Shanhte hte kanawn sha kanawn na, shanhte zawn n galaw ai nga yang, Yehowa hpe mara galaw hkrup na n re ngu shi myit ai. Raitim, kade n na yang n kaja ai manang ni a majaw, tsa ladu lai lu wa ai, ngang akyang hten wa ai. Hpang de, shi a Hkristan kanu kawa ni sharin ya ai lam ni, sum  mat ai ngwi pyaw lam ni hpe bai dum wa ai. Hpa akyu lu ai kun? Jaw ai hpe bai galaw hpang wa ai. Myitsu salang ni a karum shingtau a majaw Yehowa hpang de bai wa ai. Ya nga yang, myitsu salang hte laksan ningshawng hku nna ngwi pyaw let magam gun nga sai.

6. Hpa lam hkaja na kun?

⁶ Ya, Ga Shagawp daw kaba 9 hpe hkaja yu ga. Dai hta hpaji byeng-ya hpe malai tsun ai num hte myit n su ai lam hpe malai tsun ai num a lam hpe lu hti ai. (Roma 5:14; Galati 4:24 ni hte shingdaw yu u.) Ngang hte seng ai lam, nse nsa sumla yu ai lam ni hpe, Satan a mungkan gaw grai myit lawm nga ai. (Ehp 4:19) Dai majaw, Karai Kasang hpe matut hkrit hkungga na matu, n kaja ai lam hpe koi na matu grai ahkyak ai. (Gsh 16:6) Num rai rai, la rai rai, dai daw kaba kaw na anhte akyu lu mai ai. Num lahkawng yan gaw, nta de sa nna lusha na matu “nyan tang ai,” mahkrum madup n nga ai ni hpe saw shaga ai. (Gsh 9:1, 5, 6, 13, 16, 17) Raitim, saw shaga ai lam hpe hkap la yang lu na akyu gaw grai shai ai.

7. Ga Shagawp 9:13-18 hku nga yang, myit n su ai num shaga ai hpe hkap la ai ni hpa byin mat ai kun? (Sumla hpe mung yu u.)

⁷ “Myit n su ai num shaga ai” lam hte seng nna hkaja yu ga. (Ga Shagawp 9:13-18 hpe hti u.) Shi gaw nyan tang ai ni hpe “nang de shang” nna lusha u, ngu kaya n chye hkan shaga hkawm ai. Shanhte hpa byin mat ai kun? “Tsu ni [atsam n rawng ai masha chyasi ni, NWT] hpawng nga ai shara” hta nga nga ai. Shawng kaw na daw kaba ni hta mung, dai zawn ga shadawn ni lawm ai. “Tinang a amyu hte daw hka wa ai shawa num,” “liknga num” ni hte seng nna anhte hpe sadi jaw da ai. “Dai num a nta gaw, si ai . . . de shang ai ni hte mung, seng nga ai” ngu nna mung tsun da ai. (Gsh 2:11-19) Ga Shagawp 5:3-10 hta kaga “shawa num” langai a lam mung lawm ai. “Shi a lagaw si hkrung si htan de yu wa” ai ngu nna mung sadi jaw da ai.

8. Anhte hpa hpe lata ra na kun?

⁸ “Myit n su ai num” shaga ai nsen hpe na ai ni gaw, hkap la na kun, nyet kau na kun ngu ai hpe lata ra ai. Anhte mung dai zawn lata ra na masa hte hkrum chye ai. Ngang akyang hten na matu gunglau hkrum yang (sh) shawa matut mahkai ai midiya hte internet hta nse nsa sumla ni pru wa yang, hpa galaw na ngu ai hpe lata ra ai.

9-10. Ngang akyang hten ai hpe koi ging ai lam nkau gaw hpa ni kun?

⁹ Ngang akyang hten ai hpe koi ging ai lam law law nga ai. “Lagu ai ntsin dawi nga ai” ngu “myit n su ai num” tsun ai. “Lagu ai ntsin” ngu  ai gaw hpa rai kun? Chyum Laika hta, madu jan hte madu wa lapran na ngang hte seng ai lam hpe shalan ya ai hka hte shingdaw da ai. (Gsh 5:15-18) Ngang hte seng ai lam gaw tara shang hkungran da ai num yan la a matu sha re. “Lagu ai ntsin” gaw dai hku n re. Tara n shang, mayun mayoi ngang akyang hten ai hpe tsun ai re. Tinang galaw ai kadai n mu ai ngu shadu nga dingsa, “lagu ai ntsin” gaw dawi nga ai zawn re. Dai gaw tinang hkum tinang hkalem nga ai re. Yehowa gaw yawng hpe mu ai. Yehowa a myi man sum nna, hka ai lam htan sawng ai lam n nga sai. Dai majaw, gara hku mung dawi na n re. (1 Ko 6:9, 10) Ngang akyang hten ai hpe koi ging ai kaga lam naw nga ai.

¹⁰ Ngang akyang hten ai gaw, kaya hkrum shangun ai, manu n dan ai ngu hkamsha shangun ai, n ra ai ma hkum lu shangun ai, dinghku hka bra shangun ai. Dai majaw, myit n su ai num a nta de sa nna n lu sha ai gaw hpaji rawng ai lam re. Ngang akyang hten ai gaw, Karai Kasang hte hku hkau lam hpe hkra machyi shangun ai zawn, asak shoihpa nga ai ana zinli lu shangun ai. (Gsh 7:23, 26) Ga Shagawp 9: 18 hta ndai hku tsun da ai: “Dai num a manam ni gaw, katsan ga a hkaraw e de nga ai.” Dai daram hkra machyi shangun ai lam de shaga ai hpe masha law law hpa majaw hkap la ai kun?—Gsh 9:13-18.

11. Nse nsa sumla yu ai gaw hpa majaw grai hkra machyi shangun ai kun?

¹¹ Anhte koi ra na mahkam langai gaw, nse nsa sumla ni re. Nse nsa sumla yu ai gaw shoihpa n nga ai ngu nkau mi shadu ma tim, gaja nga yang grai shoihpa nga ai. Sari n rawng ai lam re. N yu ai sha n nga lu ai baw byin chye ai. Yu ngut yang, loi loi hte bai n mat sai. Nse nsa sumla ni yu dat ai shaloi, shut shai ai ra marin lam ni zim mat na malai, grau nga wa nna ngang akyang hten ai lam ni galaw hkrup chye ai.—Kol 3:5; Yak 1:14, 15.

12. Ngang myit hpe grau nga wa shangun ai sumla ni hpe koi ai lam gara hku madun ai kun?

¹² Nse nsa sumla ni hpe akajawng sha mu dat ai shaloi, Hkristan ni hpa galaw ging ai kun? Kalang ta nyet kau ging ai. Yehowa hte hku hkau ai lam gaw, manu dan htum re ai hpe dum yang, dai hku galaw na matu loi na re. Sumla nkau gaw nse nsa sumla n raitim pyi, ngang myit grau nga wa shangun ai. Dai ni hpe mung hpa majaw koi ra ai kun? Ngang akyang hten shangun na kaji kajaw lam hpe pyi n galaw mayu ai majaw re. (Mat 5:28, 29) Htai mungdan kaw na myitsu salang Debit ndai hku tsun ai: “Nse nsa sumla n raitim pyi, dai hpe ngai matut yu nga yang, Yehowa ra na kun? ngu ngai myit ai. Dai hku myit ai gaw, hpaji rawng ai hku galaw lu hkra karum ya ai.”

13. Hpaji rawng ai hku galaw lu hkra hpa gaw karum ya ai kun?

¹³ Yehowa n ra ai hpe galaw hkrup na hkrit ai myit gaw, hpaji rawng ai hku galaw lu hkra karum ya ai. “Yehowa hpe hkrit hkungga ai myit gaw, hpaji byeng-ya a npawt rai nga ai.” (Gsh 9:10) Dai lam hpe Ga Shagawp daw kaba 9 nnan hpang ai kaw mu lu ai. Dai hta, “hpaji byeng-ya” hpe kaga num langai hte shingdaw da ai.

14. Ga Shagawp 9:1-6 hta, hpa saw shaga lam hpe naw mu lu ai kun?

¹⁴ Ga Shagawp 9: 1-6 hpe hti u. Dai hta hpaji byeng-ya a Npawt, Hpan Madu Yehowa a saw shaga ai lam hpe lu hti ai. (Gsh 2:6; Rom 16:27) Shadaw 7 nga ai nta kaba de saw shaga nga ai re. Yehowa gaw gam jaw gam ya kam ai, Shi a hpaji byeng-ya hpe hkan sa mayu ai ni yawng hpe saw shaga nga ai hpe hkrang shapraw da ai re.

15. Hpa galaw na matu Karai Kasang saw shaga ai kun?

¹⁵ Yehowa gaw gam jaw gam ya kam nna,  n hpaw n ya Madi Shadaw Ya Ai Wa re. Ga Shagawp daw kaba 9 hta lawm ai “hpaji byeng-ya” hpe malai tsun ai num ga shadawn kaw na dai lam hpe chye lu ai. Dai num gaw, shan hpe atsawm lajang, tsabyi jahku hpe kayau nna, sha ku hta hkyen da ai. (Gsh 9:2) Daw kaji 4 hte 5 hku nga yang, “sa rit: nye a muk hpe sha mu” ngu nna hpaji n rawng ai ni hpe saw shaga ai. Hpaji byeng-ya rawng ai nta de sa nna, anhte hpa majaw lu sha ging ai kun? Yehowa gaw Shi a kasha ni hpe hpaji rawng shangun mayu ai, shim lum shangun mayu ai. Shut ai lam ni galaw nna, hkra machyi yang she sharin la ai baw n byin shangun mayu ai. Dai majaw, “Shi gaw teng man ai ni a matu hpaji madung mahkawng da nga ai.” (Gsh 2:8) Yehowa hpe hkrit hkungga ai myit nga yang, Shi ra sharawng ai hpe galaw mayu na re. Shi a hpaji jaw ga hpe madat nna, kabu gara hte hkan sa na re.—Yak 1:25.

16. Karai hpe hkrit hkungga ai myit gaw, hpaji rawng ai hku dawdan na matu Alan hpe gara hku karum ya ai kun? Hpa akyu lu ai kun?

¹⁶ Karai Kasang hpe hkrit hkungga ai myit gaw, hpaji rawng ai dawdan lam jahkrat lu hkra, hpunau Alan hpe gara hku karum ya ai lam yu yu ga. Shi gaw jawng sara rai nna, Hkristan myitsu salang mung re. Shi ndai hku tsun ai: “Manang law law gaw, nse nsa sumla hkrung ni hpe ngang hte seng ai hpaji jaw ai lam re ngu mu mada ma ai.” Raitim, dai gaw n jaw ai hpe shi chye ai. “Yehowa hpe tsawra hkrit hkungga ai majaw, ngai dai ni hpe n yu ai. Hpa majaw n yu ai lam manang ni hpe sanglang dan ai.” “Zai byeng-ya lam hta hkan hkawm” na matu “hpaji byeng-ya” lam matsun ai hte maren shi hkan sa nga ai re. (Gsh 9:6) Alan ngang ngang tsap ai majaw, ya nga yang jawng sara manang nkau mi gaw Chyum Laika hkaja ai, Hkristan zuphpawng ni lung nga sai.

17-18. “Hpaji byeng-ya” saw shaga ai hpe hkap la ai ni hpa shaman chyeju ni hkamsha nga ai kun? Hpa shaman chyeju ni naw lu la na kun? (Sumla hpe mung yu u.)

¹⁷ Ngwi pyaw ai htawm hpang prat lu la na matu, num lahkawng hpe ga shadawn lang nna Yehowa sharin ya ai. Nsen ja ja hte hkan shaga ai “myit n su ai num” a shaga ai hpe hkap la ai ni gaw, mayun mayoi akyang hten nna pyaw na hpe sha myit ma ai. Shanhte gaw ndai laman pyaw na hpe sha myit ai. Htawm hpang a matu n myit ai. Dai majaw, “katsan ga a hkaraw” de du mat ai.—Gsh 9:13, 17, 18.

¹⁸ “Hpaji byeng-ya” saw shaga ai hpe hkap la ai ni a masa gaw, dai hte grai shai ai. Ya nga yang shanhte gaw, atsawm hkyen lajang da ai lusha poi kaba hta, n-gun lu shangun ai wenyi lusha ni hpe lu sha nga sai. (Esa 65:13) Myihtoi Esaia hku nna Yehowa ndai hku tsun ai: “Nye a ga atsawm sha madat mara let, mai kaja ai hpe  sha nna, nanhte a myit masin sau hpum ai hta awng sharawng nga mu ga.” (Esa 55:1, 2) Yehowa tsawra ai hpe tsawra chye na matu, Shi nju ndawng ai hpe nju ndawng chye na matu anhte sharin la nga ai. (Shk 97:10) Kaga masha ni “hpaji byeng-ya” kaw na akyu lu na matu saw shaga ai lam hta mung anhte pyaw nga ai. “Mare na tsaw htum ai shara ni hte e, Hpaji tang ai wa kadai mung, shang rit” ngu shaga ai mayam ni hte anhte bung ai. Anhte mung, saw shaga ai hpe hkap la ai ni mung, lu na akyu gaw ya aten a matu sha n re, htani htana akyu jaw lu ai. “Zai byeng-ya lam hta hkan hkawm” na nga yang, htani htana asak “hkrung nga” lu na re.—Gsh 9:3, 4, 6.

19. Hpaji 12:13, 14 hku nga yang, hpa galaw na matu dawdan da ging ai kun? (“ Karai Kasang Hpe Hkrit Hkungga Ai A Akyu Ni” ngu ai lawk hpe mung yu u.)

¹⁹ Hpaji 12:13, 14 hpe hti u. Karai Kasang hpe hkrit hkungga ai myit matut nga hkra dawdan da ga. Rai yang, nhkru ai ndai mungkan a jahtum nhtoi ni hta, tinang a myit masin hpe makawp maga lu na, akyang lailen san seng nga na, Karai Kasang hte hku hkau nga lu na re. Masha law law “hpaji byeng-ya” hpe mu tam nna hkan sa lu hkra matut saw shaga lu na re.