1. 1 Petru 5:2 hku nga yang, ahkyak ai gara lit hpe myitsu salang ni gun nga ra ai kun?

 YEHOWA a manu dan ai sagu hpung hpe lanu lahku na matu, Hkristan myitsu salang ni lit ap hkrum ai. Dai lit hpe shanhte manu shadan ai. Hpunau nauna ni hpe “bau na sagu rem ni” byin na matu shanhte shakut ai. (Yer 23:4; 1 Petru 5:2 hpe hti u.) Nawku hpung ni hta dai zawn myitsu salang ni nga ai gaw chyeju dum hpa re!

2. Myitsu salang nkau hpa mayak mahkak ni hkrum chye ai kun?

² Myitsu salang lit ni gun hpai ai shaloi, myak mahkak law law hkrum ai. Langai gaw, nawku hpung hpe lanu lahku na matu bungli grai shakut ra ai. Amerikan kaw na myitsu salang Toni gaw, lit kade daram hkap la na hpe dawdan ai shaloi, grau npu taw chye na matu sharin la wa ai. Shi ndai hku tsun ai: “Kobit-19 nnan byin hpang wa ai shaloi zuphpawng ni, hkaw tsun bungli ni a matu atsawm hkyen lajang lu hkra, lit law law ngai bai hkap la ai. Raitim, galaw ra ai bungli grau law wa ai. Dai majaw, Chyum Laika hti na matu, tinang hkrai hkaja ai lam galaw na matu, akyu hpyi na matu aten n lu mat ai.” Kosobo mungdan kaw na myitsu salang Ela mung kaga mayak mahkak langai hkrum ai. Majan byin ai ginra hta uhpung a lam matsun ni hpe madat na matu yak wa ai. Shi ndai hku tsun ai: “Shoihpa law ai ginra kaw na hpunau nauna ni hpe karum na matu, ginjaw garan rung lit jaw wa ai aten hta nden marai madun na matu yak wa ai. Lam matsun ni gaw tatut n re ai zawn byin taw ai majaw ngai hkrit wa ai.” Asha kaw nga ai sasana magam gun hpunau Tim gaw, shani shagu na bungli yawng ngut na matu grai shakut ra ai. Shi ndai hku tsun ai: “Kalang lang, grai pu ba ai ngu hkamsha ai.” Dai zawn mayak mahkak ni hkrum nga ai myitsu salang ni hpe hpa gaw karum ya lu ai kun?

3. Tara Agyi Gidon a kasi hpe hkaja ai kaw nna anhte yawng gara hku akyu lu mai ai kun?

 ³ Tara Agyi Gidon kaw na Myitsu salang ni sharin la mai ai. (Heb 6:11; 11:32) Shi gaw Karai a masha ni hpe rem nna makawp maga ya wa ai. (Trg 2:16; 1 Hl 17:6) Gidon zawn sha, dai ni aten na myitsu salang ni mung, grai yakhkak ai aten hta Karai a masha ni hpe lanu lahku na lit lu da ai. (Kas 20:28; 2 Tm 3:1) Gidon a npu taw ai lam, shagrit shanem ai lam, madat mara ai lam ni kaw na anhte sharin la lu ai. Lit gun hpai ai shaloi shi a hkamjan lu ai atsam chyam dinglik hkrum ai. Anhte gaw myitsu salang raitim, n raitim, anhte a myitsu salang ni hpe manu shadan ai myit law htam hkra galaw lu ai. Anhte a matu bungli shakut ya nga ai shanhte hpe madi shadaw ya lu ai.—Heb 13:17.

4. Gidon gaw npu taw ai lam hte shagrit shanem ai lam hpe gara hku madun wa ai kun?

⁴ Gidon gaw npu taw ai lam hte shagrit shanem ai lam madun ai. b Atsam kaba ai Midian masha ni a lata na Israela ni hpe hkye la na matu lata hkrum sai lam, Gidon hpe Yehowa a lamu kasa sa tsun ai shaloi, shi ndai hku tsun ai: “Nye a amyu lakung gaw, Manashe amyu hta matsan grau ai lakung rai nga ai; ngai hkum mung, anhte dap hta n tai htum ai wa rai nga ai.” (Trg 6:15) Atsam n hpring ai ngu hkamsha ai raitim, shi galaw lu na lam hpe Yehowa chye ai. Yehowa a karum shingtau lam hte shi a lit awng dang hkra galaw lu wa ai.

5. Gara masa hta myitsu salang ni npu taw ai lam hte shagrit shanem ai lam madun na matu yak chye ai kun?

⁵ Lam shagu hta npu taw ai lam hte shagrit shanem ai lam madun na matu, myitsu salang ni dang lu ai made shakut ma ai. (Mik 6:8; Kas 20:18, 19) Shanhte galaw lu ai (sh) galaw ngut kre wa ai lam ni a matu gumrawng ai lam n nga ai. Galaw shut ai aten ni hta mung, shanhte hkum shanhte akyu n rawng ai ngu nna n myit la ai. Raitim, kalang lang npu taw nna shagrit shanem na matu yak chye ai. Ga shadawn, lit law law hkap la hkrup ai majaw n dang n la byin nga chye ai. Shing nrai, lit langai gun hpai ai shaloi mara shagun hkrum chye ai (sh) kaga lit gun hpai ai shaloi shakawn hkrum chye ai. Dai zawn masa ni hta, Gidon kaw nna myitsu salang ni hpa sharin la lu ai kun?

6. Gidon a npu taw ai lam kaw nna myitsu salang ni hpa sharin la lu ai kun? (Sumla hpe mung yu u.)

 ⁶ Karum hpyi u. Npu taw ai wa gaw shadawn sharam sha galaw lu ai hpe yin la ai. Kaga ni kaw karum hpyi ai hku nna, npu taw ai lam hpe Gidon madun ai. (Trg 6:27, 35; 7:24) Myitsu salang ni mung dai zawn sha re. Shawng hta lawm ai hpunau Toni ndai hku tsun ai: “Ngai nga kaba wa ai shingdu labau a majaw, lit ni hpe tinang galaw lu ai hta jan nna hkap la hkrup chye ai. Dai majaw, dinghku nawku hta npu taw ai lam hpe bawngban na matu, madu jan a ningmu hpe san yu na matu dawdan da ai. jw.org hta mara da ai Yesu Zawn Kaga Masha Ni Hpe Shaman Ya U, Kam Ya U, Lit Ap Ya U ngu ai video hpe bai yu ai.” Dai hpang, shi a lit ni hpe karum ya na matu kaga ni hpe lit garan ya ai. Hpa akyu lu ai kun? Shi ndai hku tsun ai: “Nawku hpung lit ni atsawm galaw shangut lu ai, tinang a wenyi lam kaja na matu aten grau jaw lu wa ai.”

7. Mara shagun hkrum ai shaloi, Gidon hpe myitsu salang ni gara hku kasi la lu ai kun? (Yaku 3:13)

⁷ Mara shagun hkrum ai shaloi hkum pawt. Myitsu salang ni hpe chyam dinglik ai kaga lam langai gaw, mara shagun hkrum ai lam re. Dai masa hta mung Gidon a kasi gaw karum ya lu ai. Shi hta mung n hkum tsup ai lam ni nga ai hpe chye ai majaw, Ehprim masha ni mara shagun ai shaloi, masin n pawt ai sha bai htang lu wa ai. (Trg 8:1-3) Shanhte tsun ai hpe madat ya ai, myit simsa shangun ai ga ni tsun ai hku nna shagrit shanem ai lam madun wa ai. Myitsu salang ni mung mara shagun hkrum ai shaloi, atsawm madat ya ai, simsa ai hku bai htang ai hku nna, Gidon hpe kasi la ai. (Yaku 3:13 hpe hti u.) Dai gaw nawku hpung hta simsa lam nga shangun ai.

8. Shakawn hkrum ai shaloi myitsu salang ni gara hku bai htang ging ai kun? Ga shadawn jaw u.

⁸ Yehowa hpe shagrau u. Midian ni hpe awng dang lu ai majaw, masha ni shakawn ai shaloi, Yehowa hpe sha shagrau wa ai. (Trg 8:22, 23) Gidon hpe gara hku kasi la lu ai kun? Tinang ngut kre awng dang wa ai lam ni a matu Yehowa hpe shagrau ai hku nna re. (1 Ko 4:6, 7) Ga shadawn, myitsu salang langai gaw shi a sharin achyin ai atsam hte seng nna shakawn hkrum ai shaloi ‘Chyum Laika hta lawm ai hpe sha tsun ai re, Yehowa a uhpung shaman shakyang ya ai majaw rai nga ai’ ngu nna tsun dan mai ai. Dai hta n-ga, ‘Yehowa hpe n re ai sha, ngai hpe masha ni yu kaba na matu sharin achyin ya nga ai kun?’ ngu myit yu mai ai. Myitsu salang Timati a lam myit yu ga. Myitsu salang nnan byin ai aten hta mungga htawn ai hpe grai ra ai. Shi ndai hku tsun ai: “Mungga hpe shawa masha yu kaba na hku shachyen ai, ga shadawn ni tsun nna hpang ai. Dai majaw chyahkring hkring shakawn hkrum ai. Raitim, shanhte gaw Chyum Laika, Yehowa hta grau nna ngai hpe myit maju jung wa ai.” Tinang hpe dai zawn myit maju jung wa hkra n galaw hkrup na matu, sharin achyin ai ladat hpe galai shai ra ai lam Timati chye wa ai. (Gsh 27:21) Hpa akyu lu ai kun? Shi ndai hku tsun ai: “Nye a mungga a majaw mayak mahkak ni tawt lai lu ai, hkamjan lu ai, Yehowa hte grau hku hkau wa ai ngu hpunau nauna ni sa tsun ai. Moi de tinang hpe sa shakawn ai shaloi kabu ai hkamsha lam hta na ya grau kabu nga sai.”

9. Madat mara lam hte nden marai madun na matu Gidon hpe hpa gaw yak shangun ai kun? (Makawp sumla hpe yu u.)

⁹ Gidon gaw tara agyi lit lu ai hpang, madat mara lam hte nden marai madun na matu yak wa ai. Kawa a Bala tawn hkungri hpe jahten kau na matu lit lu ai. Dai gaw shoihpa nga ai lit re. (Trg 6:25, 26) Ngut nna, shi a hpyen hpung hpe masha shayawm na matu lahkawng lang matsun hkrum ai. (Trg 7:2-7) Hpang jahtum,  hpyen ni a dabang hpe shana yup tung sa gasat ai.—Trg 7:9-11.

10. Madat mara ai lam hte nden marai madun na matu myitsu salang ni hpe hpa gaw yak shangun ai kun?

¹⁰ Myitsu salang ni gaw “madat mara na matu jin jin rai nga” ging ai. (Yak 3:17, NWT) Madat mara lam nga ai myitsu salang gaw, Chyum Laika hte uhpung a lam matsun ni hpe kalang ta madat ai. Dai hku nna kaga ni hpe kasi ningli madun ai. Raitim, madat mara ai lam madun na matu yak chye ai. Ga shadawn, lam matsun grai law ai majaw, grai galai shai ra ai majaw hkan galaw na matu yak chye ai. Lam matsun ni gaw tatut re ai kun? Hpaji rawng ai lam rai na kun? ngu myit hkrup chye ai. Shing nrai, rim hkrum wa chye ai lit lu ai mung rai chye ai. Dai zawn masa ni hta, Gidon a madat mara lam hpe myitsu salang ni gara hku kasi la mai ai kun?

11. Madat mara na matu myitsu salang ni hpe hpa gaw karum ya na kun?

¹¹ Lam matsun ni hpe atsawm madat nna hkan sa u. Kawa a tawn hkungri hpe jahten kau ra na, Yehowa a matu tawn hkungri nnan gara shara hta galaw na, gara dusat ni shagu hkungga nawng ra na lam, Gidon hpe Yehowa tsun ai. Gidon gaw lam matsun hpe kalang ta hkan sa ai. Ya aten hta mung, hpunau nauna ni shimlum hkra, makam masham ngangkang nga hkra karum ya na matu laika ni, ndau shana lam ni, lam matsun ni hku nna myitsu salang ni hpe, Yehowa a uhpung gaw lam matsun ya nga ai. Lam matsun ni hpe shanhte sadi dung let hkan sa ai majaw anhte grai chyeju dum ai. Nawku hpung mung akyu lu nga ai.—Shk 119:112.

12. Galai shai ra ai lam lama ma hpe galaw na matu uhpung lam matsun wa yang, Hebre 13:17 hpe myitsu salang ni gara hku hkan sa mai ai kun?

¹² Sharawng awng let galai shai u. Hpyen ma yawng ngu na daram hpe nta wa shangun na matu Gidon hpe Yehowa tsun ai. (Trg 7:8) Shi ndai hku myit hkrup chye ai: ‘Ndai galai shai lam gaw gaja wa ra ai kun? Bungli gaw byin na kun?’ Hpa mi raitim, Gidon madat mara wa ai. Dai ni aten hta mung, galai shai lam lama ma galaw na matu, uhpung kaw nna lam matsun wa yang madat mara ai lam madun let Gidon hpe myitsu salang ni kasi la ai. (Hebre 13:17 hpe hti u.) Ga shadawn, 2014 hta, Uphkang Hpung gaw Nawku Htingnu, Zuphpawng Kaba Htingnu gawgap ai masing ni a matu, alu gumhpraw jailang ai ladat hpe galai shai kau ai. (2 Ko 8:12-14) Moi gaw, Nawku Htingnu gap na matu, nawku hpung ni gaw uhpung kaw gumhpraw hkoi ra ai. Hpang de, dai hpe bai wa ra ai. Raitim, ya gaw buga nawku hpung hta alu gumhpraw loi sha nga yang pyi, ra kadawn ai shara hta Nawku Htingnu ni gap na matu mungkan grup alu kaw na jailang na ahkang lu sai. Ndai galai shai lam hpe na ai shaloi, hpunau Hose ndai hku myit ai: ‘Nawku Htingnu langai pyi lu gap na n re. Ya aten hta, ndai zawn galaw ai gaw akyu nga na n re.’ Lam matsun hpe hkan sa na matu hpunau hpe hpa gaw karum ya ai kun? Shi ndai hku tsun ai: “Yehowa  hpe kamhpa u ngu ai Ga Shagawp 3:5, 6 gaw ngai hpe karum ya ai. Lu wa ai akyu gaw mauhpa re. Nawku Htingnu grai law hkra gap lu wa ai. Maren mara byin lu na matu, ladat amyu myu hte alu shang lawm mai ai lam hpe ngai chye dat ai.”

13. (a) Gidon hpa hpe kam ai kun? (b) Myitsu salang ni Gidon hpe gara hku kasi la lu ai kun? (Sumla hpe mung yu u.)

¹³ Yehowa a myit ra ai lam hpe nden marai hte galaw u. Gidon gaw hkrit tim, shoihpa nga na raitim, Yehowa hpe madat mara wa ai. (Trg 9:17) Yehowa kaw na amahkam ai lam lu ai hpang, Karai a masha ni hpe makawp maga lu hkra Shi karum ya na hpe Gidon tsep kawp kam ai. Hkum pat da ai ginra ni kaw na myitsu salang ni gaw Gidon hpe kasi la nga ai. Rim hkrum ai, san jep hkrum ai, jahkrit shama ai lam, bungli sum mat ai lam ni hkrum chye ai raitim, zuphpawng ni hta, hkaw tsun bungli ni hta nden marai rawng let woi awn nga ai. c Ru tsang kaba laman kaw mung shoihpa nga tim, lu wa ai lam matsun ni hpe madat mara na matu, myitsu salang ni nden marai ra ai. Ga shadawn, tara jeyang na shiga hpe gara hku hkaw tsun ra na, Magoga mung na Goga gasat ai shaloi lawt hkra hpa ni galaw ra na hte seng nna lam matsun ni lu wa chye ai.—Eze 38:18; Shr 16:21.

14. Gidon a hkamjan lu ai atsam gara hku chyam dinglik hkrum ai kun?

¹⁴ Tara agyi hku nna galaw na matu Gidon grai n-gun shadat ra na re. Shana aten gasat ai majan pa kaw na Midian masha ni hprawng mat ai shaloi, Gidon gaw Zerera kadit kaw nna, ju sumwum ni law ai Yawdan Hkanu ding yang hkan shachyut ai. (Trg 7:22) Yawdan Hkanu du ai shaloi, Gidon hkring mat ai kun? N hkring ai. Pu ba nga ai raitim, shi a masha 300 hte rau Hkanu hpe matut rap ai. Hpang jahtum Midian masha ni hpe dep nna shamyit kau ai.—Trg 8:4-12.

15. Myitsu salang ni a hkamjan lu ai atsam gara aten hta chyam dinglik hkrum chye ai kun?

¹⁵ Nawku hpung hte dinghku hpe lanu lahku  ra ai majaw, myitsu salang ni myit hte hkum hkrang grai pu ba na re. Dai zawn masa ni hta myitsu salang ni gaw Gidon hpe gara hku kasi la mai ai kun?

16-17. Hkamjan lu na matu Gidon hpe hpa gaw karum ya ai kun? Myitsu salang ni hpa hpe kam mai ai kun? (Esaia 40:28-31) (Sumla hpe mung yu u.)

¹⁶ Yehowa n-gun jaw na hpe kam u. Yehowa n-gun jaw na hpe Gidon kam ai. Yehowa mung gaja wa jaw ai. (Trg 6:14, 34) Kalang mi hta gawla-uk jawn nna hprawng mat ai Midian hkawhkam lahkawng hpe, Gidon hte shi a masha ni lagaw lam hkan shachyut ai. (Trg 8:12, 21) Yehowa karum ya ai majaw, hpyen ni hpe shachyut dep nna awng dang lu ai. Yehowa gaw “n-gun yawm ai n rai; hki ba mung hkrum ai n rai.” Dai majaw myitsu salang ni mung Yehowa hpe kamhpa mai ai. Rai yang, ra nga ai aten hta shi n-gun atsam jaw na re.—Esaia 40:28-31 hpe hti u.

¹⁷ Tsi Rung Matut Mahkai Komiti hpung shang hpunau Metru a lam myit yu u. Nden marai nga hkra shi hpe hpa gaw karum ya ai kun? Shi ndai hku tsun ai: “Hpilipi 4:13 hta tsun da ai hte maren, ngai hpe Yehowa n-gun jaw ai. Kalang lang grai pu ba ai. Dai aten ni hta hpunau nauna ni hpe madi shadaw ya lu na matu, ra nga ai n-gun atsam jaw rit ngu Yehowa kaw akroi anoi akyu hpyi ai. Akyu hpyi ngut ai hpang, Yehowa a chyoi pra ai wenyi a majaw, ngai n-gun lu wa ai, hkamjan lu wa ai.” Gidon zawn sha myitsu salang ni mung, mayak mahkak ni a lapran tingkyeng akyu n tam ai myit hte sagu hpung hpe lanu lahku ya nga ai. Galaw mayu ai yawng hpe ayan na galaw lu na n re ai lam yin la ra ai. Raitim, karum ya na matu akyu hpyi ai shaloi, Yehowa madat ya nna hkamjan lu ai atsam jaw na hpe kam mai ai.—Shk 116:1; Hpl 2:13.

18. Myitsu salang ni gaw Gidon hpe gara hku kasi la mai ai kun? Kadun dawk tsun dan u.

¹⁸ Myitsu salang ni gaw Gidon kaw na sharin la lu ai lam law law nga ai. Bungli kade daram hkap la na hpe dawdan ai shaloi, shakawn hkrum ai shaloi, mara shagun hkrum ai shaloi, npu taw ai lam, shagrit shanem lam madun ra ai. Nhkru ai ndai mungkan a jahtum ni wa ai hte maren, madat mara ai lam hte nden marai madun ra ai. Gara zawn mayak mahkak ni hkrum ai raitim, Yehowa n-gun jaw na hpe kam ra ai. Dai zawn bungli shakut ai sagu rem ni hpe anhte “hkungga lara” ai.—Hpl 2:29.