Hkaw tsun masha law law gaw, zuphpawng a matu hkyen lajang ai shaloi JW Library hpe lang ai. “Zuphpawng Ni” ngu ai daw hta, Sin Langchyi hkaja na sumhpa ni kaw na sumhpa langai kalang ta pru wa ai majaw ra sharawng ai. Raitim, Sin Langchyi hkaja laika ni hta, kaga sumhpa ni mung lawm chye ai. Dai ni mung, makam masham hpe shangang shakang ya ai. JW Library lang nna dai sumhpa ni hpe gara hku tam mai na kun? Gara akyu lu mai ai kun?

• Sin Langchyi hkaja na sumhpa langai hpra a npu hta “Kahtap Hti Mai Ai Lam” ngu ai ga baw kaji nga ai. Dai ga baw kaji npu hta “Ndai laika buk kaw na ngam ai sumhpa ni” ngu ai link hpe dip u. Malawm ni hta, hkaja na sumhpa ni hpe nambat shakap da ai majaw, gara gaw hkaja na sumhpa re ai hpe asan sha chye lu ai. Nambat n shakap da ai gaw, kaga sumhpa re. Tinang hti mayu ai kaga sumhpa ga baw hpe dip u.

• JW Library a Home hta “Hpa Lam Nnan Nga Ai Kun” daw hta, Sin Langchyi laika nnan pru shagu download galaw da u. Sumhpa shagu kaw na akyu lu na matu, download galaw da ai magazin hpaw nna malawm hpe jep u.