Nambat II Mungkan Majan laman, Estonia mungdan kaw nna Jamani mungdan de htawt mat ai. Dai kaw ngai shangai ai. Ngai shangai nna kade n na yang, nu yan wa gaw Kaneda mungdan de htawt na matu bai hkyen lajang ai. Kaneda mungdan, Ottawa mare makau na anhte a nta kasha hta, u ni hte masha rau nga wa ai. Anhte grai yakhkak wa ai. Raitim, jahpawt manap shat hta gaw, udi sha gaw naw lu sha ai.

Lani mi hta, anu hpang Yehowa Sakse ni du wa nna, Shingran 21: 3, 4 hpe hti dan ai. Anu myit salum hkra mat nna hkrap mat ai. Anu yan awa Chyum Laika hkaja nna, aten kadun mi laman hta sha hkalup hkam ai du hkra rawt jat wa ai.

Nu yan wa gaw, Ingalik hku nau n chye ai raitim, Yehowa a magam gun ai lam hta grai myit rawt ai. Ontario mungdaw, Satberi mare na nhprang shadu ai jak rung kaw, awa shana tup bungli galaw ra ai. Raitim, Bat Kru Ya shani shagu, ngai hte nye kanau Sibiya hpe hkaw tsun bungli woi sa ai. Bat shagu, dinghku nawng Sin Langchyi hkaja ai. Karai Kasang hpe tsawra chye wa hkra nu yan wa sharin ya ai. Dai majaw, 1956, ngai asak 10 ning hta Yehowa kaw apnawng hkalup hkam na matu dawdan wa ai. Nu yan wa Yehowa hpe kade daram tsawra ai hpe myit yu shagu, Karai a magam matut gun na matu n-gun lu wa ai.

Lahta tsang jawng lung ngut ai hpang, Yehowa a magam gun na matu nau myit maju n jung lu mat sai. Ningshawng she galaw yang, mungkan shinggrup hkawm na ngu ai yaw shada lam hpe galaw na matu, gumhpraw tam lu sana n re ngu myit hkrup ai. Radio nsen shapoi dap langai kaw mahkawn hpaw ya ai bungli lu mat ai. Dai bungli hpe grai ra ai. Raitim, shana maga de galaw ra ai majaw, zuphpawng ni hpe dingyang n lu lung mat ai. Karai Kasang hpe n tsawra ai ni hte kanawn mazum wa ai. Hpang e gaw, galai shai lam ni galaw na matu Chyum Laika hte shaman da ai myit nsam gaw shadut ya wa ai.

Ontario mungdaw, Osawa mare de ngai htawt mat ai. Re Noman, shi kanau jan Lesli, kaga ningshawng ni hte hkrum wa ai. Shanhte ngai hpe grai lanu lahku ma ai. Shanhte pyaw nga ai hpe yu nna, nye a bandung ni hpe bai jep yu ai. Shanhte n-gun jaw ai majaw, 1966, September shata kaw ningshawng galaw hpang byin mat ai. Prat gaw grai pyaw hpa re. Raitim, n myit mada da ai myit kahpra hpa lam ni hpe hkrum wa sana.

Lahta tsang jawng lung nga ai shaloi, Kaneda mungdan, Toronto Behtela kaw shawk shawn laika  mara da ai. Hpang e, ningshawng galaw nga yang, Behtela kaw 4 ning magam gun na matu saw shaga hkrum ai. Raitim, ngai nauna Lesli hpe tsawra nga sai. Dai majaw, Behtela kaw magam gun na matu saw shaga ai hpe hkap la dat yang, shi hte galoi n hkrum mat na hpe hkrit ai. Karai Kasang kaw aja awa akyu hpyi ngut ai hpang, Behtela kaw magam gun na matu dawdan kau ai. Raitim, Lesli hte gaw tsan gang mat sai.

Behtela rai hkrut dap kaw bungli galaw ai. Hpang e amu madu bungli bai galaw ai. Dai aten, Lesli gaw Kwibet mungdaw, Gatinu mare kaw laksan ningshawng lit ang ai. Shi hpa ni galaw nga na kun? Nye a dawdan lam gaw jaw ai kun? ngu chyahkring hkring myit wa ai. Prat hta grai myit kahpra hpa lam pru wa ai. Lesli a kahpu Re Noman Behtela de saw shaga hkrum nna, nye a gawk manang byin wa ai. Dai majaw, Lesli hte bai matut mahkai lu na lam pru wa ai. Behtela kaw magam gun ai 4 ning hpring ai shani, 1971, February 27 kaw an lahkawng hkungran dat ai.

Kwibet mungdaw, Pyintit ga shaga ai nawku hpung kaw an lit lu ai. Shaning loi na ai hpang, nye asak 28 ning hta, hpung kawan hku nna magam gun na matu saw shaga hkrum ai majaw grai mau mat ai. Tinang hkum tinang naw kaji ai, atsam n hpring ai ngu hkamsha ai raitim, Yeremia 1: 7, 8 kaw lawm ai ga ni gaw n-gun lu shangun ai. Raitim, Lesli mawdaw 2 lang adawt da ai majaw, shana nga yang atsawm yup n pyaw ai. Dai majaw, hpung kawan bungli gaw yak wa na kun? ngu myit wa ai. “Lama ma galaw na matu Yehowa saw shaga yang, shakut galaw ga” ngu Lesli tsun ai. Dai majaw, magam bungli hpe hkap la dat ai. Hpung kawan bungli kaw 17 ning shang lawm wa ai.

Hpung kawan bungli hta bungli grai law ai majaw, Lesli hpe pyi aten atsawm n lu jaw ai. Bat Langai Ya jahpawt jau jau chyinghka dingsi ngoi wa ai. Pru yu yang kadai hpe mung n mu ai. Saboi nep, namsi, cheese, pau muk hte tsabyi jahku palen hte kawk ni bang da ai ka tawng hpe mu ai. “Tinang a madu jan hpe mung wam hkawm woi u” ngu ka da ai laika mung lawm ai. Dai shani gaw lamu marang grai pyaw ai. Raitim, mungga ni naw hkyen lajang ra ai majaw, n lu sa ai lam Lesli hpe tsun dan ai. Lesli mung chye na ya ai. Myit gaw n pyaw mat ai le. Ngai saboi dunghkum kaw dung dat ai hte myit nsam gaw jamjau jaw hpang wa ai. Ehpesu 5: 25, 28 hpe myit hkrup mat ai. Madu jan a hkamsha lam ni hpe myit shalawm na matu, dai ga ni hte Yehowa ngai hpe sadi jaw nga ai rai sam ai ngu myit hkrup ai. Akyu hpyi ngut ai hpang, “saw, sa saga” ngu Lesli hpe tsun dat ai. Lesli grai kabu mat ai. Hka kau na shara kaja langai de anhte mawdaw gau mat ai. Saboi panep ni nep nna, galoi mung matsing nga na nhtoi byin hkra galaw wa ai. Mungga ni hpe hkyen lajang na matu mung aten lu wa ai.

Hpung kawan bungli gaw bungli grai law ai zawn, pyaw mung grai pyaw ai. Britisha Kolambiya kaw nna Nyuhpaulan du hkra bu hkawm ra ai. Bu hkawm na ngu ai nye a yaw shada lam ni hpring tsup mat sai. Gilead jawng shawk shawn na matu myit hkrup ai  raitim, kaga mungdan kaw sasana gaw n kam sa galaw ai. Sasana langai byin na daram atsam n hpring ai ngu hkamsha ai majaw re. Ana zinli, hpyen majan byin taw ai Ahprika mungdan langai ngai de sa hkrum na hpe tsang ai majaw mung lawm ai. Kaneda kaw sha pyaw ai.

1992 du yang, moi na Sobiyet Munghpawm Mungdan nkau mi hta uhpung a bungli ni bai galaw na ahkang lu wa ai. Estoniya kaw sasana sa galaw mayu ai i? ngu hpunau ni san ai shaloi grai kajawng mat ai. Bai nna akyu hpyi ai. Ndai kalang mung, ‘lama ma galaw na matu Yehowa saw shaga yang, galaw chyam yu ga’ ngu myit nna hkap la dat ai. ‘Ahprika mungdan de sa ra ai mung n re maw’ ngu nna myit shalan la ai.

Du ai hte Estoniya ga sharin la ai. Shata loi mi laman hta sha hpung kawan bungli hta shang lawm na matu hpyi shawn hkrum ai. Estoniya, Latbiya, Litureniya ngu ai Botit mungdan 3 hte Rasha mungdan, Kaliningaret mare na nawku hpung, hpung kaji 46 daram hpe kawan ra na. Dai majaw, Latbiya, Litureniya, Rasha ga ni hpe sharin la ra sai. Grai nan yak ai. Raitim, anhte shakut tsun ai hpe yu nna, hpunau nauna ni grai pyaw ai, karum mung karum ya ai. 1999 hta Estoniya ginjaw garan rung hpaw ai. Tomat Edu, Lembit Raile, Tomi Kauko ni hte rau ginjaw garan rung komiti hpung shang ni hku nna magam gun na matu lit lu ai.

Saiberiya de gawt kau hkrum ai hpunau nauna law law hte hkrum ai. Htawng kaw grai zingri zingrat hkrum wa ai raitim, nta masha ni hte garan da hkrum ai raitim, prat machyi ai ngu shanhte n myit wa ma ai. Pyaw pyaw hte myit rawt let magam gun taw ma ai. Yakhkak ai lam ni hkrum tim, hkamjan lu ai atsam, ngwi pyaw lam ni lu mai ai hpe ngai chye na wa ai.

Shaning law law hkring ai aten n nga ai daram, anhte shakut shaja magam gun wa ai. Hpang e, Lesli grai pu ba wa ai. Hpaibrumayajiya (Fibromyalgia) ngu ai ana a majaw dai hku byin nga ai hpe nnan hta n chye wa ai. Dai majaw, Kaneda de wa na hku myit wa ai. Amerikan mungdan, Nyu Yawk mungdaw, Pettasin mare hta, ginjaw garan rung jawng lung na matu saw shaga ai shaloi, lu lung na kun? ngu ngai myit wa ai. Karai Kasang kaw akroi anoi akyu hpyi ngut ai hpang, hkap la dat ai. Ndai dawdan lam hpe Yehowa shaman chyeju jaw ya ai. Jawng lung nga ai aten hta, Lesli tsi tsi hkam la lu ai majaw, anhte mi na zawn bungli ni bai galaw lu wa ai.

Estoniya de bai du wa ai 2008, lani mi a shana maga daw hta, mungkan ginjaw rung kaw na phone shaga wa ai. Kun-go mungdan de htawt nna magam gun lu na i? da. Hpawt ni mahtai bai jaw rit ngu tsun ai majaw mau mahka mat ai. Lesli dai shana yup n pyaw na tsang ai majaw shi hpe n tsun dan ai. Raitim, Ahprika de sa hkrit ai lam Yehowa hpe akyu hpyi tsun dan nna, gaja wa yup n pyaw ai gaw ngai rai mat ai.

Hpang shani, Lesli hpe tsun dan ai shaloi, “Yehowa gaw Ahprika de sa shangun taw sai. Dai de n sa yu ai sha, an n lu galaw na re ngu tsun taw ai gaw  n mai na re” ngu bawngban ai. Dai hku nna, Estoniya kaw 16 ning magam gun ngut ai hpang, Kun-go mungdan, Kinshasa mare de bai du wa ai. Ginjaw garan rung gaw grai tsit tsawm taw ai. Gawk kaw Lesli shawng nnan shara jahkrat ai gaw, Kaneda mungdan kaw na pru wa ai shaloi, zing da ai kat kasha re. “Du ai shara kaw pyaw hkra nga u” ngu ka da ai. Hpunau nauna ni hte hkrum ngut ai hpang, Chyum ga sharin ni lu ngut ai hpang, dai kaw sasana galaw ai namchyim hpe chye mat ai hpang hta gaw, tsawmra mi pyaw mat ai. Ahprika mungdan 13 de, ginjaw garan rung dat kasa hku nna kawan na ahkang lu wa ai. Myit lawm hpa, shingdu labau hkum sumhpa kaw na masha ni hte hkrum zup lu wa ai. Ahprika hpe hkrit ai myit mat mat sai. Ndai kaw magam gun na matu sa dat ya ai Yehowa hpe pyi chyeju dum taw nga ai.

Kun-go kaw malu masha hkum sumhpa jaw sha ma ai. Latung shingtai ni mung lawm ai majaw n sha gwi ai. Raitim, hpunau nauna ni sharawng shara hte sha taw ai hpe mu nna, chyam yu ai shaloi ra mat ai.

Mungdan sinpraw hkran na mare ni hpe, rawt malan hpyen hpung ni wa gasat ai. Numsha ni, ma ni hpe shoihpa jaw ai. Dai kaw na hpunau nauna ni hpang sa nna n-gun jaw ai. Ra ai ni hpe la mat wa ya ai. Shanhte ni gaw grai matsan ai. Raitim, hkrung rawt ai myit mada lam, Yehowa hpe tsawra ai myit, uhpung ntsa sadi dung ai hte seng wa yang gaw grai n-gun lu hpa re. Shanhte hpe yu nna nye a makam masham hpe pyi bai jep ra ai du hkra re. Hpunau nauna nkau nga yang, nta ni, naimam ni hpe sum tawn da ai. Arung arai gaw n grin ai, Karai Kasang hte hku hkau lam sha ahkyak htum re ai lam ngai hpe shadum ya ai. Yakhkak tim, hpunau nauna ni aput angun n nga ma ai. Shanhte a myit jasat majaw, ngai hte Lesli mung manghkang ni, hkamja lam manghkang ni hpe nden marai hte hkamjan mayu wa ai.

Kahtap nna myit kahpra hpa lam ni bai hkrum wa ai. Hong Kong ginjaw garan rung kaw htawt na matu tsun ai majaw re. Asha dan kaw magam gun na ngu kalang mung n myit ga wa ai. Raitim, shawng na lit ni hta Yehowa karum ya wa ai hpe hkrum ga ai majaw, ndai lit hpe mung hkap la dat ai. 2013 hta grai tsawm ai Ahprika hte tsawra ai  manaw manang ni hpe myiprwi si hte kau da ra wa ai. Shawng kaw hpa ni hkrum wa na ngu ai hpe gaw anhte n chye ai.

Hong Kong mare gaw masha amyu baw hkum ai, masha law ai majaw an mung grai galai shai ra ai. Kantung ga mung grai sharin la yak ai. Raitim, hpunau nauna ni gaw alum ala hte hkap tau la ai. Buga malu masha ni mung grai mu ai. Ginjaw garan rung gaw bungli grai ngut ai. Raitim, lamu ga manu ni grai rawt mat ai majaw, ginjaw garan rung nta law malawng hpe dut kau na matu Uphkang Hpung gaw dawdan dat ai. Kade n na yang 2015 kaw anhte ni Dingda Korea mungdan de htawt ra ai. Amyu ga langai bai sharin la ra ai. Ya du hkra Korea ga hpe atsawm n lu shi ai. Raitim, rawt jat wa sai ngu hpunau nauna ni tsun ai majaw grai myit pyaw ai.

Manaw manang nnan lu na matu gaw ayan na n loi ai. Raitim, kaga masha ni hpe tinang hpang maga kaw na manam hkalum ai shaloi, hku hkau na matu loi ai hpe sadi hkrup wa ai. Hpunau nauna ni hte anhte n bung ai htan, bung ai lam ni grau law ai lam, salum hpe dam dam hpaw nna, jinghku law law hpe tsawra lu ai atsam hte Yehowa anhte hpe hpan da ai lam chye lu wa ai.—2 Ko 6:11.

Masha ni hpe Yehowa hkap la ai zawn hkap la chye hkra, tinang hpe Yehowa tsawra ai, lam matsun ya nga ai ngu ai hpe mu chye hkra sharin la wa ai. Myit daw ai aten shagu, anhte hpe hpunau nauna ni ra sharawng ai kun? ngu myit hkrup shagu, jinghku ni kaw na n-gun jaw ga laika ni, kat ni hpe bai hti ai. Yehowa gaw anhte a akyu hpyi ga ni hpe mahtai jaw ai. Tsawra ai ngu hkamsha shangun ai. Matut galaw lu hkra n-gun jaw ai.

Bungli kade law tim, shada da aten jaw na matu grai ahkyak ai lam hpe mung, Lesli hte ngai sharin la wa ai. Shut ai lam galaw hkrup ai shaloi mani ga ai. Laksan gaw, amyu ga nnan sharin la ai shaloi ni zawn hta re. Dai hta n-ga, Yehowa hpe chyeju dum ra ai lam ni hpe mung shana shagu myit ai.

Teng sha tsun yang, maigan mung kaw nga lu na, sasana galaw lu na ngu ngai kalang mi mung n shadu da wa ai. Raitim, Yehowa a karum ya ai lam hte nga yang, hpa hpe raitim galaw lu ai hpe chye sai. “Yehowa e, nang ngai hpe shagwi nna, ngai hkam Ia ni ai” ngu tsun wa ai myihtoi Yeremia a ga ni hpe myit hkrup ai. (Yer 20:7) Yehowa gaw nye a prat hpe myit kahpra hpa lam ni, n myit mada da ai shaman chyeju ni hte hpring shangun ai. Nbungli hte mungkan shinggrup hkawm na ngu ai nye a yaw shada lam byin hkra galaw ya ai. Hkawm mat ai gaw, kaji ai shaloi myit tawn da ai hta na grau pyi lu hkawm wa ai. Ginjaw garan rung dat kasa hku nna mungkan dan 5 hpe shinggrup hkawm lu wa ai. Hpa lit hpe mi lu lu, kabu gara let madi shadaw ya wa ai Lesli hpe mung grai chyeju dum ai.

Kade a matu, hpa a matu ndai ni hpe galaw nga ai ngu ai hpe an tinang hkum tinang galoi mung sadi jaw ai. Ya hkamsha taw ai shaman chyeju ni gaw namchyim sha naw re. “Lata hpe [Yehowa] hpaw nga nna, Hkrung mahkrung ni hpe kaja ai hte shakat da” na aten a namchyim rai nga ai.—Shk 145:16.