1-2. Shakawn 25:14 hku nga yang, Yehowa hte hku hkau mayu yang anhte hpa galaw ra na kun?

 LANGAI ngai hte matut hku hkau mayu yang, gara atsam ningja ni nga na matu ahkyak ai kun? Shada da tsawra ra ai, karum shingtau ra ai ngu htai yang htai na re. Hkrit hkungga ai myit gaw ahkyak ai ngu nang htai na n re. Raitim, ndai sumhpa a madung chyum daw hta tsun da ai hte maren, Yehowa hte hku hkau mayu ai ni gaw, shi hpe “hkrit hkungga” ra ai.—Shakawn 25:14 hpe hti u. b

² Yehowa hpe nawku wa ai kade na sai raitim, Shi hpe hkrit hkungga ai myit matut nga hkra galaw ra ai. Karai Kasang hpe hkrit hkungga ai ngu ai gaw hpa lachyum kun? Yehowa hpe hkrit hkungga hkra gara hku sharin la lu ai kun? Karai Kasang hpe hkrit hkungga ai hte seng nna kunhting Obedia, Hkinjawng Agyi Yehoiada hte Hkawhkam Yosha kaw na hpa sharin la lu ai kun?

3. Hkrit hkungga ai myit gaw gara hku nna makawp maga ya lu ai kun? Sanglang dan u.

³ Shoihpa nga ai hpe chye yang, anhte hkrit chye ai. Dai zawn hkrit hkungga ai myit gaw hpaji rawng ai hku galaw na matu shadut ya lu ai. Ga shadawn, tsaw ai kaw na hkrat na hpe hkrit ai myit gaw, matu hkan n hkawm na matu karum ya ai. Ningma kap na hpe hkrit ai myit gaw, shoihpa nga ai masa ni hpe koi na matu shadut ya ai. Tsawra ai langai ngai hte hku hkau lam hten na hpe hkrit ai myit gaw, tsawra myit n lawm ai  hku tsun hkrup, galaw hkrup ai baw n byin hkra karum ya ai.

4. Yehowa hpe masha ni gara hku hkrit ai hpe Satan ra sharawng ai kun?

⁴ Masha ni Yehowa hpe ladu lai hkrit na hpe Satan ra sharawng ai. Yehowa gaw matai htang ai, masin pawt ja ai Karai re ai majaw shi pyaw hkra n lu galaw ai ngu, Elihpa tsun ai ga hpe Satan kam shangun mayu ai. (Yob 4:18, 19) Yehowa hpe n nawku mat ai du hkra hkrit shangun mayu ai. Dai zawn mahkam hpe koi na matu Karai Kasang hpe tsawra hkrit hkungga chye hkra sharin la ra ai.

5. Karai Kasang hpe hkrit hkungga ai ngu ai lachyum gaw hpa rai kun?

⁵ Karai Kasang hpe hkrit hkungga ai wa gaw Shi hpe tsawra ai, Shi hte hku hkau lam hten mat na hpa hpe mung n galaw ai. Yesu hta dai zawn “Karai Kasang hpe hkrit hkungga ai myit” nga ai. (Heb 5:7, NWT) Yehowa hpe ladu lai hkra hkrit ai n re. (Esa 11:2, 3) Shi hpe grai tsawra nna madat mara mayu ai re. (Yhn 14:21, 31) Yehowa gaw tsawra myit nga ai, nyan hpaji, tara rap ra ai lam hte hpung atsam nga ai majaw Yesu zawn, anhte Shi hpe hkrit hkungga ai. Yehowa gaw anhte hpe grai tsawra ai, Shi a lam matsun hpe anhte gara hku bai htang ai lam hpe Shi myit lawm ai hpe mung anhte chye ai. Yehowa hpe pyaw hkra galaw lu ai zawn, yawn hkra mung galaw lu ai.—Shk 78:41; Gsh 27:11.

6. Karai Kasang hpe hkrit hkungga chye hkra sharin la lu ai lam langai gaw hpa rai kun? (Shakawn 34:11)

⁶ Yehowa hpe hkrit hkungga ai myit hte n shangai wa ai majaw dai hpe shalat la ra ai. (Shakawn 34:11 hpe hti u.) Langai gaw, hpan da ai lam ni hpe hkaja ai hku nna re. “Shabyin da ai arai ni” hta Karai Kasang a nyan hpaji, hpung atsam hte anhte hpe tsawra ai myit hpe mu magang, Shi hpe grau tsawra hkrit hkungga magang rai na re. (Rom 1:20) Nauna Edrin ndai hku tsun ai: “Hpan da ai lam ni hta, Yehowa a nyan hpaji hpe mu lu ai shaloi, ngai grai mau ai. Nye a matu kaja htum hpe Shi chye ai lam ngai chye wa ai.” Shi dai hku ayan myit ai majaw ndai hku tsun wa ai: “Ngai hpe asak jaw da ai Yehowa hte hku hkau lam hten za shangun na gara lam hpe mung ngai n kam galaw ai.” Yehowa hpan da ai lam nkau hpe myit na matu ndai bat hta aten jaw lu na kun? Rai yang, Yehowa hpe grau tsawra hkungga wa na re.—Shk 111:2, 3.

7. Akyu hpyi ai gaw Yehowa hpe hkrit hkungga na matu gara hku karum ya ai kun?

⁷ Karai Kasang hpe hkrit hkungga ai myit nga hkra galaw mai ai kaga lam langai gaw, ayan akyu hpyi ai re. Grau akyu hpyi magang, Yehowa a lam grau chye wa magang re. Mayak mahkak ni hpe hkamjan lu ai atsam hpyi shagu, Shi a mauhpa atsam hpe bai dum wa ai. Gawng malai jahpu kumhpa hpe chyeju dum ai lam tsun shagu, anhte hpe Yehowa grai tsawra ai lam bai dum wa ai. Manghkang ni a matu karum hpyi shagu, Yehowa gaw kade daram hpaji rawng ai hpe bai dum wa ai. Dai zawn akyu hpyi ga ni gaw, Yehowa hpe grau hkungga na matu karum ya ai. Dai gaw, Shi hte anhte a hku hkau lam hpe hten za shangun ai lam yawng hpe koi na ngu ai dawdan lam hpe shangang shakang ya ai.

8. Karai Kasang hpe hkrit hkungga ai myit galoi mung nga hkra galaw lu ai kun?

⁸ Chyum Laika hta lawm ai kaja ai hte n kaja ai kasi ningli ni kaw na sharin la na ngu yaw shada let hkaja ai hku nna, Karai Kasang hpe hkrit hkungga ai myit galoi mung nga hkra galaw lu ai. Yehowa hpe sadi dung ai mayam lahkawng re ai Hkawhkam Ahab a nta na kunhting Obedia hte Hkinjawng Agyi Yehoiada a lam hpe bawngban yu ga. Yehowa  hpe nawku wa tim, hpang de n nawku mat ai Yuda Hkawhkam Yosha a lam kaw na sharin la lu ai lam ni hpe mung bawngban lu na re.

9. Yehowa hpe hkrit hkungga ai myit gaw Obedia hpe gara hku karum ya ai kun? (1 Hkawhkam 18:3, 12)

⁹ “Obedia gaw, Yehowa hpe grai hkrit hkungga ai” ngu Chyum Laika hta tsun da ai. (1 Hkawhkam 18:3, 12 hpe hti u.) Hkrit hkungga ai myit gaw Obedia c hpe gara hku karum ya ai kun? Dai zawn hkrit hkungga ai myit gaw dingman ai, kamhpa mai ai wa byin shangun ai. Dai majaw hkawhkam gaw hkawhkam htingnu a kunhting shatai ai. (Nehemia 7:2 hte shingdaw yu u.) Obedia a Karai hpe hkrit hkungga ai myit gaw, shi ra nga ai atsam ningja re ai laklai ai nden marai hpe mung jaw ai. “Shawng na ni [hkawhkam ni] mahkra hta Yehowa man e nhkru ai amu grau nna galaw” ai nhkru ai Hkawhkam Ahab uphkang ai aten laman shi asak hkrung wa ai. (1 Hk 16:30) Bala hpe nawku ai madu jan Yezebela mung Yehowa hpe grai nju ndawng ai. Dai majaw, dingdung mungdan na tengman ai nawku dawjau lam hpe shamyit kau na matu shakut ai. Karai a myihtoi law law hpe pyi sat kau ai. (1 Hk 18:4) Obedia gaw yakhkak aten hta Yehowa hpe nawku wa ai re.

10. Obedia gaw laklai ai nden marai hpe gara hku madun wa ai kun?

¹⁰ Obedia gaw laklai ai nden marai hpe gara hku madun wa ai kun? Karai a myihtoi ni hpe sat na matu Yezebela hkan tam ai shaloi, Obedia gaw myihtoi 100 hpe “manga shi shi di karan nhtawm, lungpu hta makoi da ai hte, shanhte hpe muk mung ntsin mung jaw nna bau da ai.” (1 Hk 18:13, 14) Dai hpe Yezebela chye yang, nden marai rawng ai Obedia sat hkrum na re. Obedia gaw masha sha re ai majaw si mayu na n re. Raitim, shi a asak hta na Yehowa hte Yehowa hpe nawku ai ni hpe grau tsawra ai.

11. Dai ni aten na Yehowa a mayam ni gaw Obedia hpe gara hku kasi la ai kun? (Sumla hpe mung yu u.)

¹¹ Dai ni aten na Yehowa a mayam law law gaw, anhte a bungli hpe hkum pat da ai mungdan ni hta nga nga ai. Shanhte gaw mungdan  asuya ni hpe hkungga ai lam madun ai raitim, Obedia zawn Yehowa sha lu ging ai nawku daw jau lam hpe Yehowa hpe jaw nga ai. (Mat 22:21) Shanhte gaw masha a ga hta Karai Kasang a ga hpe grau madat nna, Karai hpe hkrit hkungga ai lam madun nga ai. (Kas 5:29) Kabu gara shiga hkaw tsun ai, mayun nna zuphpawng ni galaw ai. (Mat 10:16, 28) Hpunau nauna ni ra ai wenyi malu masha hpe lajang ya ai. Ahparika mungdan na hpunau Hennari a lam hpe myit yu ga. Aten ladaw mi daram anhte a bungli hkum pat da hkrum ai shaloi, hpunau nauna ni hpang de wenyi malu masha sa ya ai. Shi ndai hku tsun ai: “Ngai gaw hkrit chye ai wa re. Karai Kasang hpe hkrit ai myit a majaw ya na zawn nden marai nga taw ai re.” Nang mung Hennari zawn nden marai nga lu na kun? Karai Kasang hpe hkrit hkungga ai myit nga hkra galaw yang nden marai nga lu ai.

12. Hkinjawng Agyi Yehoiada hte shi a madu jan gaw Yehowa hpe sadi dung ai lam gara hku madun wa ai kun?

¹² Hkinjawng Agyi Yehoiada gaw Yehowa hpe hkrit hkungga ai. Dai gaw sadi dung na matu, kaga ni Yehowa hpe nawku wa hkra n-gun jaw na matu shadut ya ai. Yezebela a shayi sha Ahtalia Yuda mung kaw hkawhkam tingnyang kashun la ai aten hta, Yehoiada sadi dung ai lam grau dan dawng wa ai. Mung masha ni gaw Ahtalia hpe grai hkrit ai. Shi gaw ahkang aya mak nna hkawhkam aru arat re ai shi kashu ni yawng hpe sat kau ai du hkra grai nhkru ai majaw re. (2 Hl 22:10, 11) Kashu langai re ai Yosha hpe Yehoiada a madu jan Yehosheba hkye la da ai majaw asak lawt mat ai. Shi hte shi madu wa gaw ma hpe makoi nna bau maka da ai. Dai hku nna Yehoiada hte Yehosheba gaw Dawi hkawhkam rusai ngang grin hkra karum ya wa ai. Yehoiada gaw Yehowa ntsa sadi dung ai majaw Ahtalia hpe n hkrit ai.—Gsh 29:25.

13. Yosha asak 7 ning hta Yehoiada gaw sadi dung ai lam gara hku bai madun wa ai kun?

¹³ Yosha asak 7 ning hta Yehoiada gaw Yehowa hpe sadi dung ai lam bai madun wa ai. Shi masing jahkrat wa ai. Dai masing awng dang yang, Yosha gaw Dawi a tingnyang hkringhtawng dagraw ai hkawhkam tai wa na re. Raitim, n awng dang yang shi asak pyi sum mat chye ai. Yehowa karum ya ai majaw shi a masing awng dang wa ai. Ahtalia hpe sat kau lu hkra hte Yosha hpe hkawhkam shatai lu hkra, Lewi ni hte agyi salang ni Yehoiada hpe madi shadaw ya wa ai. (2 Hl 23:1-5, 11, 12, 15; 24:1) Dai hpang, Yehoiada gaw “hkawhkam wa hte mung masha ni gaw, Yehowa a masha tai mu ga nga, Yehowa hte ga shaka tawn da shagun mu ai.” (2 Hk 11:17) ‘Htung hte maren n san n seng ai kadai hpe mung sin yu na matu Yehowa a Nawku Htingnu chyinghka ni hta lit la ya na sin langa ni hpe mung Yehoiada san tawn da wu ai.’—2 Hl 23:19, JCLB.

14. Yehoiada gaw Yehowa hpe shagrau ai majaw gara hku bai shagrau hkrum wa ai kun?

¹⁴ “Ngai e shagrau ai ni hpe sha ngai shagrau na we ai” ngu Yehowa tsun ai. Gaja nan mung Yehoiada hpe Shi shagrau wa ai. (1 Sa 2:30) Ga shadawn, anhte sharin la lu na matu shi a lam hpe Chyum Laika hta shalawm da ya ai. (Rom 15:4) Yehoiada si ai shaloi, “Israela amyu hta mung, Karai Kasang hte shi a nta matu mung kaja ai hku galaw nu ai majaw, Dawi mare hta hkawhkam ni hte rau, shi hpe makoi mayang di mu ai.”—2 Hl 24:15, 16.

15. Yehoiada a lam kaw na hpa sharin la lu ai kun? (Sumla hpe mung yu u.)

¹⁵ Yehoiada a lam gaw Karai Kasang hpe hkrit hkungga ai myit nga hkra galaw na matu  karum ya lu ai. Yehoiada zawn sha myitsu salang ni mung, Karai a sagu hpung hpe makawp maga na matu sadi maja ra ai, sadi dung ra ai. (Kas 20:28) Asak kaba ai ni mung Yehoiada kaw na sharin la lu ai. Yehowa hpe hkrit hkungga na, matut sadi dung na nga yang, Shi a yaw shada lam ngut kre hkra galaw ai lam hta akyu jashawn na re. Shanhte hpe n kabai da ai. Yehoiada hpe Yehowa kanawn mazum ai lam kaw na ramma ni sharin la mai ai. Laksan hku nna, shaning law law Yehowa hpe sadi dung let nawku wa ai asak kaba ai hpunau nauna ni hpe hkungga lara let kanawn ging ai. (Gsh 16:31) Yehoiada hpe madi shadaw ya wa ai Lewi ni hte agyi salang ni kaw na mung anhte yawng sharin la lu ai. “Lam woi ningshawng ni a ga madat mara” nna sadi dung let madi shadaw ya ga.—Heb 13:17.

16. Hkawhkam Yosha myit kya ai lam hpa gaw madun dan ai kun?

¹⁶ Yehoiada gaw Hkawhkam Yosha hpe kaja ai masha byin hkra karum ya wa ai. (2 Hk 12:2) Akyu hku nna asak kaji ai hkawhkam gaw Yehowa myit ra ai hku galaw mayu wa ai. Raitim, Yosha gaw Yehoiada si ai hpang, makam masham htak ai du salang ni a ga madat wa ai. Matut hpa byin wa ai kun? Shi hte shi a mung masha ni “sumla ni hte, kaga hpara ni hpe daw jau” wa ai. (2 Hl 24:4, 17, 18) Yehowa grai yawn wa ai. “Myihtoi ni hpe shi shangun dat nna, shanhte gaw sakse hkam ma ti mung, shanhte madat ma ai n rai.” Shanhte gaw Yehowa a myihtoi hte hkinjawng re ai Yehoiada a kasha Zehkaria a ga hpe pyi n madat ai. Zehkaria gaw Yosha hte mung kahpu kanau daw  ai. Hkawhkam Yosha gaw shi asak hpe hkye wa ai Zehkaria a nta masha ni a myiman hpe pyi n tau ai sha, Zehkaria hpe sat kau ai.—2 Hl 22:11; 24:19-22.

17. Yosha hpa matut byin ai kun?

¹⁷ Yosha gaw Yehowa hpe hkrit hkungga ai myit matut nga hkra n galaw wa ai majaw, n kaja ai lam ni hkrum wa ai. Yehowa ndai hku tsun ai: “Ngai hpe n gawn n sawn re ai ni gaw arawng hpoi mat na ma ra ai.” (1 Sa 2:30) N-gun nau n ja ai Suri hpyen hpung gaw, Yosha a hpyen “luksuk laba” hpe gasat awng dang la nna Yosha mung “grai machyi hkrum” wa ai. Suri ni htingnut mat ai hpang, Yosha a mayam ni gaw shi hpe sat kau ai. Hpa majaw nga yang, Zehkaria hpe sat kau ai mara a majaw re. Grai nhkru ai Hkawhkam re ai majaw, “hkawhkam ni a lup hta makoi” mayang n hkrum wa ai.—2 Hl 24:23-25.

18. Yeremia 17:7, 8 hku nga yang, Yosha zawn n byin hkra hpa galaw lu ai kun? Yosha kaw na hpa sharin la lu ai kun?

¹⁸ Shi gaw ru n ngang ai majaw, madi da ai shadaw hpe sha shamyet ra ai hpun langai hte bung ai. Madi da ai shadaw hte bung ai Yehoiada si mat ai hpang, makam masham htak ai nbung ni bung wa ai shaloi, Yosha galau mat ai. Anhte a Karai Kasang hpe hkrit hkungga ai myit gaw, nta masha ni hte hpunau nauna ni a majaw n byin ging ai lam ndai tang du ai ga shadawn gaw sharin ya ai. Yehowa hte kaja ai hku hkau lam nga ai majaw hkrit hkungga ai rai ging ai. Ayan Chyum Laika hkaja ai, myit sawn sumru ai, akyu hpyi ai hku nna kaja ai hku hkau lam nga hkra galaw ra ai.—Yeremia 17:7, 8 hpe hti u; Kol 2:6, 7.

19. Anhte kaw na Yehowa hpa hpyi shawn da ai kun?

¹⁹ Yehowa gaw anhte kaw na grai law hkra n hpyi shawn ai. Shi hpyi shawn ai lam hpe Hpaji 12:13 hta kadun dawk ndai hku tsun da ai: “Karai Kasang hpe hkrit hkungga nna, shi hkang da ai ga hpe madat mara nga u; dai gaw shinggyim masha ni a lam madung rai nga ai.” Karai Kasang hpe hkrit hkungga ai rai yang, htawm hpang hta hpa ni hkrum wa tim, Obedia hte Yehoiada zawn sadi dung lu na re. Yehowa hte anhte a hku hkau lam hpe hpa lam mung jahten lu na n re.