1. Chyum Laika n hkaja shi ai aten, na a prat hkrun lam gara hku nga wa ai kun?

 YEHOWA SAKSE ni hte Chyum Laika n hkaja shi yang, na a prat hkrun lam gaw gara hku kun? Dai aten na lam ni hpe, anhte law malawng bai n kam myit ai. Anhte a myit jasat hte akyang lailen ni hpe ndai mungkan a tsang madang ni shingkang ka-up da ai. “Mungkan ga hta myit mada shara mung, Karai Kasang mung, n lu ai sha pra” wa ai ni re. (Ehp 2:12) Chyum Laika hkaja ngut ai hpang, anhte a prat galai shai wa ai.

2. Chyum Laika hkaja ai shaloi hpa chye wa ai kun?

² Chyum Laika hkaja ai shaloi, anhte hpe grai tsawra ai Sumsing Kawa Yehowa nga ai hpe chye wa ai. Yehowa a myiman lu na matu, Karai a nta masha byin na matu, tinang a prat hkrun lam, myit jasat, myit mang ai lam hte seng nna galai shai ra na hpe chye wa ai. Karai a tsang madang ni hte maren asak hkrung na matu sharin la ra ai.​—Ehp 5:3-5.

3. Kolose 3:9, 10 hku nga yang, anhte hpe Yehowa hpa hpyi shawn da ai kun? Ndai sumhpa hta hpa lam bawngban na kun?

³ Hpan Madu re ai Wa Yehowa gaw, shi hpe nawku dawjau ai ni gara hku asak hkrung ging ai hpe dawdan na ahkang nga ai. Anhte hkalup n hkam shi yang, ‘gawng shing-yan dingsa hte tinang a arawn alai hpe, raw kau’ na matu hpyi shawn da ai. * (Kolose 3:9, 10 hpe hti u.) Ndai sumhpa gaw, hkalup hkam mayu ai ni ndai ga san 3 hpe chye htai hkra karum ya na re. (1) “Gawng shing-yan dingsa” ngu ai gaw hpa rai kun? (2) Gawng shing-yan dingsa hpe raw kau na matu, Yehowa hpa  majaw hpyi shawn ai kun? (3) Gara hku raw kau mai ai kun? Hkalup hkam ngut ai ni a matu mung, gawng shing-yan dingsa a akyang ni bai n pru wa hkra ndai sumhpa gaw karum ya na re.

4. “Gawng shing-yan dingsa” a shingkang ka-up hkrum ai wa gaw, gara hku galaw chye ai kun?

⁴ “Gawng shing-yan dingsa” a shingkang ka-up hkrum ai wa gaw, yubak nga ai lam hte maren myit chye, galaw chye ai. Pawt ja ai, chyeju n chye dum ai, tingkyeng akyu sha tam ai, gumrawng ai ni rai chye ai. Nse nsa sumla yu ai, hpye ai lam ni, dawsa ai lam ni lawm ai sumla yu ai hpe ra sharawng ai rai chye ai. Kaja ai atsam ningja ni nga nna, n kaja ai hku tsun hkrup, galaw hkrup ai shaloi, mara nga ai ngu hkamsha tim, tinang a myit mang ai lam ni hte akyang lailen ni hpe galai shai mayu ai myit n nga ai.​—Gal 5:19-21; 2 Tm 3:2-5.

5. Gawng shing-yan dingsa hpe tsep kawp raw kau lu na kun? Sanglang dan u. (Kasa 3: 19, 20)

⁵ Anhte n hkum tsup ai majaw, n kaja ai myit mang lam, ra marin ai lam ni hpe myit kaw na tsep kawp shaw kau na matu n loi ai. Kalang lang, myit malai lu hpa ga ni tsun hkrup, galaw hkrup chye ai. (Yer 17:9; Yak 3:2) Gawng shing-yan dingsa hpe raw kau yang, yubak nga ai myit jasat, akyang lailen ni a hkang ai npu kaw na lawt lu ai. Moi na hte tsep kawp shai ai masha byin wa lu ai.​—Esa 55:7; Kasa 3:19, 20 hpe hti u.

6. Shut shai ai myit mang lam, n kaja ai akyang lailen ni hpe tawn kau da na matu Yehowa hpa majaw n-gun jaw ai kun?

⁶ Yehowa gaw, anhte hpe tsawra ai majaw, ngwi pyaw ai asak aprat lu shangun mayu ai majaw, shut shai ai myit mang lam, n kaja ai akyang lailen ni hpe tawn kau da na matu n-gun jaw ai. (Esa 48:17, 18) Shut shai ai ra marin ai lam hpe asum jaw kau na nga yang, tinang mung, kaga ni mung hkra machyi chye ai hpe Karai chye ai. Anhte hte kaga ni hkra machyi ai hpe Karai Kasang mu ai shaloi, grai yawn ai.

7. Roma 12:1, 2 hku nga yang, anhte hpa hpe lata ra ai kun?

⁷ Anhte a prat hkrun lam galai shai ai shaloi, manang ni hte nta masha nkau gaw jahpoi asawng chye ai. (1 Pe 4:3, 4) Tinang ra ai hpe galaw na ahkang nga ai, kaga ni sa tsun na  ahkang n nga ai ngu tsun yang tsun na re. Gaja nga yang, Yehowa a tsang madang ni hpe nyet kau ai ni gaw, lawt lam lu nga ai n re. Satan mungkan a hkrang shachyaw hkrum nga ai ni re. (Roma 12:1, 2 hpe hti u.) Anhte yawng, Satan mungkan hku hkan na kun? Masha kaja langai byin wa hkra, Yehowa hkrang shachyaw ya ai hpe hkam la na kun? ngu ai hpe lata ra ai.​—Esa 64:8.

8. Shut shai ai myit jasat, n kaja ai akyang ni hpe koi na matu, nang hpe hpa gaw karum ya ai kun?

⁸ Shut shai ai myit jasat, n kaja ai akyang ni hpe koi na matu, aten hte n-gun atsam shadat ra ai hpe Yehowa chye ai. (Shk 103:13, 14) Dai majaw, Chyum Laika, chyoi pra ai wenyi hte uhpung hku nna nyan hpaji, n-gun atsam, madi shadaw ai lam ni jaw ya ai. Nang hpe mung Karai Kasang karum ya wa na re. Gawng shing-yan dingsa hpe raw kau nna, hkalup hkam na matu atsam hpring hkra, galaw lu ai lam nkau hpe bawngban yu ga.

9. Chyum Laika gaw hpa galaw na matu karum ya lu ai kun?

⁹ Tinang hkum tinang Chyum Laika hte atsawm san jep u. Chyum Laika gaw, jamna hte bung ai. Anhte a myit mang lam, tsun shaga ai lam, galaw ai lam ni hpe san jep na matu karum ya lu ai. (Yak 1:22-25) Chyum Laika sharin ya ai wa hte kunghpan ai kaga Hkristan ni mung hpaji jaw lu ai. Ga shadawn, Chyum Laika lang nna, na a kaja ai lam, gawngkya ai lam ni hpe madun ya lu ai. N kaja ai akyang ni hpe tawt lai lu na matu, tatut re ai Chyum Laika lam matsun ni gara hku tam ra na hpe sharin ya lu ai. Yehowa mung karum ya na matu, galoi mung jin jin rai nga ai. Na myit hta, hpa nga ai hpe chye ai majaw, gara hku karum ya ra na hpe chye dik htum re. (Gsh 14:10; 15:11) Dai majaw, Karai Kasang kaw shani shagu akyu hpyi ai, Chyum Laika hkaja ai akyang nga hkra shakut u. 

10. I-li a mabyin kaw na hpa sharin la lu ai kun?

¹⁰ Yehowa a tsang madang ni gaw, kaja htum re ai hpe kam u. Yehowa hpyi shawn ai lam shagu gaw, anhte akyu lu na matu re. Karai a tsang madang ni hte maren, asak hkrung ai ni gaw, tinang hkum tinang hkungga ai, lachyum nga ai prat hte jet ai ngwi pyaw lam lu la na re. (Shk 19:7-11) Yehowa a tsang madang ni hpe nyet kau ai ni gaw, mara nga ai akayng ni a n kaja ai akyu ni hkamsha ra na re. Karai a tsang madang ni hpe nyet kau ai hte seng nna I-li ngu ai la langai tsun wa ai hpe sadi yu u. I-li gaw, Yehowa hpe tsawra ai kanu kawa ni a bau maka ai npu hta nga kaba wa ai. Asak 10 ning jan ai shaloi, n kaja ai manang ni hte kanawn hkrup nna, nang hpam tsi lang wa ai. Akyang hten ai, lagu ai, masin pawt ja nna grai mazut wa ai. “Hkristan langai n galaw ging ai lam yawng galaw wa ai” ngu tsun dan ai. Raitim, kaji nga ai shaloi, sharin la wa ai lam ni hpe n malap ai. N kaja ai akyang ni hpe shakut nna tawn kau ai. 2000 ning hta hkalup hkam ai. Yehowa a tsang madang ni hte maren asak hkrung ai majaw, gara hku akyu lu ai kun? “Myit simsa lam lu la nna, myit nsam mung san seng wa ai” ngu I-li tsun ai. * Yehowa a tsang madang ni hpe nyet kau ai ni gaw, tinang hkum tinang hkra machyi shangun ai hpe ndai mabyin kaw na chye lu ai. Raitim, shanhte galai shai lu hkra Yehowa karum ya mayu ai.

11. Hpa ni hpe Yehowa nju ndawng ai kun?

¹¹ Yehowa nju ndawng ai hpe nju ndawng chye hkra sharin la u. (Shk 97:10) “Gumrawng  gumtawng re ai myi man, masu ga tsun ai shinglet, Mara n kap ai wa a sai hpe jahkaw kau ai lata” hpe Yehowa nju ndawng ai ngu Chyum Laika hta tsun da ai. (Gsh 6:16, 17) “Sai kap ai hte hkalem sha ai wa hpe, Yehowa matsat nga ai.” (Shk 5:6) Dai zawn myit jasat hte galaw ai lam ni hpe Shi grai nju ndawng ai. Dai majaw, mungkan hpe nhkru ai lam ni hte hpring shangun ai Noa prat na nhkru ai masha yawng hpe yeng seng kau ai. (Nin 6:13) Myihtoi Malahki prat hta mung, mara n nga ai ningrum ningtau hpe sadi run nna, jahka kau na matu myit ai ni hpe, Yehowa nju ndawng ai ngu tsun ai. Shanhte a nawku dawjau lam hpe Karai Kasang hkap la na n re ai zawn, shanhte galaw ai lam hpe mung ari jaw na re.​—Mal 2:13-16; Heb 13:4.

12. ‘N hkru n hkra ai hpe matsat u’ ngu ai gaw hpa hpe tsun mayu ai kun?

¹² Yehowa gaw anhte hpe, “n hkru n hkra ai hpe matsat” shangun mayu ai. (Rom 12:9) “Matsat” ai ngu ai ga si gaw, lama ma hpe nju ndawng ai, grai n ra ai, grai matsat ai ngu ai hpe tsun ai re. Ga shadawn, anhte hpe yat taw ai lusha langai ngai hpe sha shangun ai ngu saga. Myit dat ai hte pyi madawn mayu wa na re. Dai zawn sha, Karai Kasang n ra ai lam langai ngai hpe, galaw na ngu myit dat ai hte pyi matsat mat ai baw byin ging ai.

13. Myit mang lam ni hpe hpa majaw makawp maga ging ai kun?

¹³ Myit mang lam ni hpe makawp maga u. Myit ai lam gaw, galaw ai lam hpe shingkang ka-up chye ai. Dai majaw, mara kaba ni galaw hkrup chye ai myit mang lam hpe koi na matu, Yesu sharin ya ai re. (Mat 5:21, 22, 28, 29) Anhte yawng, Sumsing Kawa a myiman lu mayu ai. Dai majaw, myit de shang wa ai n kaja ai myit mang lam ni hpe kalang ta nyet kau na matu grai ahkyak ai.

14. Anhte tsun shaga ai ga gaw hpa hpe madun dan ai kun? Gara ga san ni pru wa ai kun?

¹⁴ Tsun shaga ai ga hpe hkang u. “N-gup hta na pru wa ai mahtang gaw, myit masin hta na byin pru ai” ngu Yesu tsun ai. (Mat 15:18) Tinang tsun dat ai ga gaw, tinang gaw gara zawn masha re ai hpe madun dan ai. Dai majaw, tinang hkum tinang ndai hku san u: ‘Jaw ai hku tsun ai majaw, jam jau hkrum na nga yang pyi, jaw ai hku tsun ai kun? Dinghku nga ai wa rai yang, kaga num, la ni hte n htap htuk ai baw n galaw hkrup hkra sadi ai kun? N san seng ai myit mang lam ni hpe tsep kawp koi ai kun? Masin pawt hkra marai langai ngai galaw ai  shaloi, angwi apyaw bai htang ai kun?’ Dai ga san ni hpe atsawm myit ai gaw karum ya lu na re. Palawng shakung gaw, palawng byin hkra matut ya ai zawn, n kaja ai ga ni mung gawng shing-yan dingsa hte matut taw nga ai. Dai majaw, grai zai ai, masu ai, matsat shabat re ai ga ni n tsun yang, gawng shing-yan dingsa hpe aloi sha raw kau lu na re.

15. Gawng shing-yan dingsa hpe “wudang hta” kayat da ai ngu ai gaw hpa hpe tsun mayu ai kun?

¹⁵ Ra wa yang galai shai mayu ai myit nga u. Anhte a prat hkrun lam galai shai na matu grai ahkyak ai hte seng nna, ga shadawn langai hpe kasa Pawlu tsun wa ai. Gawng shing-yan dingsa hpe “wudang hta” kayat da ging ai ngu tsun da ai. (Rom 6:7) Tsun mayu ai gaw, Hkristu a kasi hpe hkan sa ra ai. Yehowa nju ndawng ai myit jasat, akyang lailen ni hpe si shangun ra ai. Rai yang she, san seng ai myit nsam hte htani htana asak myit mada lam lu na re. (Yhn 17:3; 1 Pe 3:21) Yehowa gaw anhte ra ai hku byin na matu, shi a tsang madang ni hpe galai shai na n re. De a malai, Karai a tsang madang ni hte maren, tinang hkum tinang galai shai nna asak hkrung ra ai.​—Esa 1:16-18; 55:9.

16. Shut shai ai ra marin ai myit ni hpe hpa majaw gasat nga ra ai kun?

¹⁶ Shut shai ai ra marin ai myit ni hpe matut gasat nga u. Hkalup hkam ngut ai hpang hta pyi, shut shai ai ra marin ai myit ni hpe matut gasat nga ra ai. Marisayo a lam hpe yu yu ga. Ramma aten hta, hkrang bung shada nga sha ai prat hte asak hkrung wa ai. Hpang hta, Yehowa Sakse ni hte hkrum nna, Chyum Laika hkaja ai. Prat hpe galai shai nna, 2002 hta hkalup hkam ai. Yehowa hpe nawku wa ai shaning grai na sai raitim, “n kaja ai ra marin ai myit ni bai pru wa ai shaloi, grai ninghkap ra ai” ngu tsun ai. Raitim, myit n daw ai. “Dai ra marin ai myit ni hte maren, n galaw hkrup hkra shakut yang, Yehowa a myiman lu ai hpe chye ai majaw, ngai n-gun lu ai” * ngu tsun ai.

17. Nabiha a mahkrum madup kaw na hpa chye lu ai kun?

¹⁷ Yehowa kaw akyu hpyi u. Tinang a atsam hpe n re ai sha chyoi pra ai wenyi hpe kamhpa u. (Gal 5:22; Hpl 4:6) Gawng shing-yan dingsa hpe raw kau na matu, anhte shakut ra ai. Nabiha a lam hpe yu yu ga. Asak 6 ning hta kawa kau da mat ai majaw, “ngai myit hkra machyi mat ai” ngu tsun ai. Kaba wa ai shaloi, masin pawt ja nna, jahte tam chye ai num byin wa ai. Nang hpam tsi dut ai majaw rim hkrum nna,  htawng 4 ning hkrat ai. Htawng de sa chyai ai Sakse Hkam ni hte Chyum Laika hkaja hpang nna, galai shai wa ai. “Nye a n kaja ai akyang lailen nkau hpe gaw tawn kau na matu n yak ai. . . . Raitim, hkayawm dawm kau na matu grai yak ai” ngu tsun ai. Laning mi jan daram yak yak hkak hkak ninghkap kau ngut ai hpang, dawm kau lu wa ai. “Hkayawm dawm lu hkra karum ya ai madung lam gaw, Yehowa kaw ayan akyu hpyi ai majaw re. . . . Karai a myit ra ai hte maren byin na matu, nye prat hpe galai shai lu ai nga yang, kaga ni mung galai shai lu na hpe ngai kam ai” * ngu tsun ai.

18. 1 Korinhtu 6:9-11 hku nga yang, Karai a mayam ni hpa galaw lu wa ai kun?

¹⁸ Tsa ban langai hta, Hkristu hte rau uphkang na matu, Yehowa lata ai num, la nkau gaw, lai wa sai aten hta, n kaja ai akyang ni galaw wa ai. Ga shadawn, dinghku htak ai ni, chyahkraw ni, lagut ni re. Raitim, Karai a chyoi pra ai wenyi karum ya ai majaw, galai shai lu wa ai. (1 Korinhtu 6:9-11 hpe hti u.) Dai ni aten hta mung, Chyum Laika gaw masha wan law law hpe karum ya nga ai. * Ru jung nga ai n kaja ai akyang ni hpe tawn kau lu wa ai. Shanhte a kasi gaw, nang mung hkalup hkam na matu atsam hpring wa hkra, na a nga sat nga sa hpe galai shai lu nna, n kaja ai akyang lailen ni hpe tawt lai lu ai lam madun dan ai.

19. Hpang na sumhpa hta hpa lam bawngban na kun?

¹⁹ Hkalup hkam mayu ai ni gaw, gawng shing-yan dingsa hpe raw kau nna, gawng shing-yan ningnan hpe shakut nna hpun ra ai. Gawng shing-yan ningnan hpe gara hku hpun lu ai lam, hpun lu hkra kaga ni gara hku karum ya lu ai hpe hpang na sumhpa hta bawngban na re.