1-2. Kasa Pawlu a kasi ningli gaw, myitsu salang ni hpe gara hku karum ya lu ai kun?

 KASA Pawlu gaw hpunau nauna ni hpe tsawra ai. Shanhte a akyu matu, grai shakut shaja ai. (Kas 20:31) Dai majaw, hpunau nauna ni mung shi hpe grai tsawra ai. Kalang mi hta, Ehpesu kaw na myitsu salang ni gaw, kasa Pawlu hte bai n hkrum lu sana hpe chye ai shaloi, “shanhte nlang ja ja hkrap ai.” (Kas 20:37) Shakut shaja ai myitsu salang ni mung hpunau nauna ni hpe tsawra ai. (Hpl 2:16, 17) Kalang lang myitsu salang ni mung, mayak mahkak ni hkrum chye ai. Dai ni hpe tawt lai lu na matu, shanhte hpe hpa gaw karum ya lu ai kun?

² Myitsu salang ni gaw, Pawlu a kasi hpe bai maram mai ai. (1 Ko 11:1) Shi gaw yu maya masha sha re. N hkum tsup ai majaw, jaw ai hpe galaw na matu yak ai aten ni nga ai. (Rom 7:18-20) Raitim, ngwi pyaw ai lam n mat mat ai. Pawlu hpe kasi la yang, myitsu salang ni mung, manghkang ni hpe tawt lai lu nna, kabu gara let matut magam gun lu na re. Gara lam hku nna kun? ngu ai hpe hkaja yu ga.

3. Ndai sumhpa hta hpa lam bawngban na kun? Hpa ni naw chye lu na kun?

³ Ndai sumhpa hta, myitsu salang ni hkrum nga ai mayak mahkak hte seng ai lam 4 hpe bawngban mat na re: (1) hkaw tsun bungli hte kaga lit ni hpe rap ra ai hku galaw ai lam, (2) sagu kawan na matu aten la ai lam, (3) tinang a gawng kya ai lam hpe hparan ai lam, (4) kaga ni a gawng kya ai lam hpe hparan ya ai lam ni re. Dai lam ni hpe Pawlu gara hku tawt lai wa ai, shi a kasi hpe myitsu salang ni gara hku hkan sa mai ai lam hpe bawngban mat na re.

4. Hkaw tsun bungli hta kasi kaja madun na matu, myitsu salang ni hpa majaw yak chye ai kun?

⁴ Dai gaw hpa majaw yak ai kun? Myitsu salang ni hta, hkaw tsun bungli hpe woi awn ai lit sha n-ga, kaga lit ni mung nga ai. Ga shadawn, bat lapran zuphpawng lamang hte Hpung Chyum Laika Hkaja Hpawng lamang ni hpe mung kahti galai woi awn ra ai. Mungga htawn ai lit ni mung nga ai. Magam tau ni hpe shaman ya ra ai zawn, hpunau nauna ni hpe mung n-gun jaw ra ai. (1 Pe 5:2) Myitsu salang nkau gaw, Nawku Htingnu hte kaga nawku na Htingnu ni hpe gawgap ai, gram lajang ai hta shang lawm nga ai. Raitim, nawku hpung hta nga ai kaga ni zawn sha, kabu gara shiga hkaw tsun ai hpe madung tawn ai.​—Mat 28:19, 20.

5. Hkaw tsun masha langai hku nna Pawlu gara kasi ningli madun wa ai kun?

⁵ Pawlu a kasi ningli. Awng dang ai hkaw tsun masha byin na matu, “grau ahkyak ai lam hpe chye nga u” ngu shi n-gun jaw da ai. (Hpl 1:10, NWT) Shi mung dai hte maren galaw wa ai. Sasana magam gun langai hku nna lit ap hkrum ai. Hkaw tsun magam hpe prat hta ahkyak htum bungli hku nna mu mada ai. “Shawa yawng a man . . . nta shagu” de sa nna hkaw tsun ai. (Kas 20:20) Laksan aten hta (sh) bat mi hta lani mi sha hkaw tsun na matu n masat da ai. Ahkaw ahkang lu shagu hkaw tsun ai. Ga shadawn, Ahten mare hta, manang ni hpe la let, mying kaba ai masha ni lawm ai shawa hpawng langai hpe kabu gara shiga hkaw tsun ai shaloi, nkau hkap la ai. (Kas 17:16, 17, 34) Shi “bawng dung” hkrum nga ai aten hta pyi, makau kaw nga ai ni hpe hkaw tsun ai.​—Hpl 1:13, 14; Kas 28:16-24.

6. Kaga ni hpe Pawlu gara hku shaman shakyang ya wa ai kun?

⁶ Pawlu gaw aten hpe akyu nga hkra jailang ai. Kaga ni hpe mung shi hte rau magam gun na matu saw shaga ai. Ga shadawn, nambat langai lang na sasana hkrun lam hta, Marku ngu ai Yawhan hpe, lahkawng lang hta gaw Timohti hpe shaga sa ai. (Kas 12:25; 16:1-4) Nawku hpung hpawng de ai lam, sagu kawan ai lam, tang du hkra sharin ya chye ai wa byin lu ai lam ni hpe atsawm shaman ya wa na gaw teng sha re.​—1 Ko 4:17.

7. Ehpesu 6:14, 15 hta lawm ai Pawlu a ga hpe myitsu salang ni gara hku hkan sa mai ai kun?

⁷ Sharin la lu ai lam. Pawlu zawn sha, myitsu salang ni gaw nta langai hpang langai sa ai sha n-ga, aten shagu hkaw tsun na matu jin jin rai ging ai. (Ehpesu 6:14, 15 hpe hti u.) Ga shadawn, gat mari ai aten hta, bungli hta, sakse hkam mai ai. Nawku Htingnu gawgap ai hta shang lawm ai shaloi, htingbu ni, gat seng madu ni hpe kabu gara shiga hkaw tsun mai  ai. Pawlu zawn sha, hkaw tsun magam shang lawm nga ai aten hta, magam tau ni hte kaga ni hpe shaman shakyang ya mai ai.

8. Kalang lang myitsu salang ni hpa galaw ra chye ai kun?

⁸ Myitsu salang ni gaw, hkaw tsun magam hta n shang lawm lu ai du hkra, ninghtawn lit ni hta, nawku hpung lit ni hta, bungli law nga ai baw n byin ging ai. Rap ra ai lam nga na matu, lit nkau hpe nyet kau ra ai. Akyu hpyi nna atsawm myit sawn sumru yang, grau ahkyak ai lit ni re ai dinghku nawku galaw na matu, hkaw tsun bungli hta hpring tup shang lawm na matu, kasha ni hpe shaman ya na matu, lit nkau hpe nyet kau ra ai lam chye wa na re. Laksan magam lit nkau hpe nyet kau na matu yak tim, yawng hpe rap ra ai hku galaw mayu ai, na a myit hpe Yehowa chye na ya ai hpe kam u. 

9. Bungli law ai myitsu salang ni gara mayak mahkak ni hkrum nga ai kun?

⁹ Dai gaw hpa majaw yak ai kun? Yehowa a amyu masha ni gaw, yakhkak ai lam law law hkrum nga ai. Ndai hpang jahtum nhtoi hta, anhte yawng karum shingtau lam hte shalan shabran lam ra ai. Kalang lang, n kaja ai akyang nkau hpe koi lu hkra karum ya ra ai. (1 Ht 5:14) Yehowa a amyu masha ni hkrum nga ai manghkang yawng hpe myitsu salang ni n yeng seng kau ya lu ai. Raitim, Yehowa gaw shi a sagu ni hpe n-gun jaw ya na matu, makawp maga ya na matu ra sharawng ai. Ra kadawn nga ai ni hpe karum na matu, bungli law ai myitsu salang ni gara hku aten la na kun?

10. 1 Htesaloni 2:7 hku nga yang, Yehowa a amyu masha ni hpe Pawlu gara hku lanu lahku ai kun?

¹⁰ Pawlu a kasi ningli. Pawlu gaw hpunau nauna ni hpe, ahkaw ahkang tam nna shakawn ya ai, n-gun jaw ya ai. Myitsu salang ni mung, Yehowa a amyu masha ni hpe tsawra matsan dum myit hte kanawn mazum ai hku nna, Pawlu a kasi hpe hkan sa ging ai. (1 Htesaloni 2:7 hpe hti u.) Hpunau nauna ni hpe shi mung, Yehowa mung tsawra ai lam tsun dan ai. (2 Ko 2:4; Ehp 2:4, 5) Nawku hpung hta nga ai ni hpe manang ni hku nna aten jaw kanawn mazum ai. Myit tsang ai lam ni, gawng kya ai lam ni hpe tsun dan ai hku nna, shanhte hpe kam ai lam madun ai. (2 Ko 7:5; 1 Tm 1:15, 16) Shi a manghkang ni hpe myit maju jung na malai, hpunau nauna ni hpe karum ya ai hta myit maju jung ai.

11. Hpunau nauna ni hpe Pawlu hpa majaw sharin shaga ai kun?

¹¹ Kalang lang, hpunau nauna ni hpe Pawlu sharin shaga ai. Raitim, masin pawt nna n sharin shaga ai. Shanhte hpe tsawra ai majaw, shoihpa amyu myu kaw nna, makawp maga ya mayu ai majaw, sharin shaga ai re. Chye na loi ai, hkap la loi ai ladat hte tsun shaga ai. Ga shadawn, Korinhtu nawku hpung hpe Pawlu laika ka nna, laja lana sharin shaga ai. Shanhte gara hku bai htang ai hpe chye mayu ai majaw, Titu hpe dat dat ai. Sharin shaga ai lam hpe  shanhte atsawm hkap la nna, tatut hkan sa nga ai hpe na ai shaloi, Pawlu grai kabu ai.​—2 Ko 7:6, 7.

12. Kamsham shada hpe myitsu salang ni gara hku n-gun jaw mai ai kun?

¹² Sharin la lu ai lam. Kamsham shada hpe aten jaw kanawn mazum ai hku nna, Pawlu a kasi ningli hpe myitsu salang ni hkan sa mai ai. Lam langai gaw, zuphpawng jau jau sa nna, kaga ni hpe n-gun jaw ga tsun ai hku nna re. Ra kadawn nga ai hpunau nauna langai ngai hpe, tsawra myit lawm ai n-gun jaw ga tsun na matu, aten loi mi sha ra ai. (Rom 1:12; Ehp 5:16) Pawlu a kasi ningli hpe hkan sa ai myitsu salang gaw, Chyum Laika hpe akyu jashawn nna, hpunau nauna ni a makam masham ngang kang hkra karum ya ai. Shanhte hpe tinang mung, Karai Kasang mung, tsawra ai lam chye hkra karum ya ai. Shanhte hte ayan matut mahkai ai. Ahkaw ahkang tam nna mung shakawn ya ai. Sharin shaga ra ai shaloi, Chyum Laika hte maren sharin shaga ai. Tatut hkan sa shangun mayu ai majaw, tsawra myit hte tup hkrak tsun dan ai.​—Gal 6:1.

13. Gawng kya ai lam ni gaw myitsu salang langai hpe gara hku byin shangun chye ai kun?

¹³ Dai gaw hpa majaw yak ai kun? Myitsu salang ni gaw, n hkum tsup ai. Anhte ni zawn shanhte mung shut chye ai. (Rom 3:23) Tinang a gawng kya ai lam hpe rap ra ai hku n mu ai aten ni nga chye ai. Nkau gaw tinang n lu galaw ai lam ni hpe sha, myit maju jung lai ai majaw, myit daw wa ai. Nkau nga yang, tinang a gawng kya ai lam hpe ahkyak n shatai ai sha n-ga, galai shai ai lam mung n galaw ai. Tinang hkum tinang myit dik taw ai.

14. Hpilipi 4:13 hku nga yang, gawng kya ai lam ni hpe tawt lai na matu, shagrit shanem lam gaw Pawlu hpe gara hku karum ya ai kun?

¹⁴ Pawlu a kasi ningli. Gawng kya ai lam ni hpe, tinang a atsam hte n lu hparan ai lam, Pawlu shagrit shanem let hkap la ai. Karai madi shadaw lam ra ai. Nnan hta, shi gaw baw ja ai wa, Hkristan ni hpe zingri ai wa re. Hpang hta, shi a mara ni hpe chye wa nna, myit jasat hte akyang lailen ni hpe sharawng awng let galai shai ai. (1 Tm 1:12-16) Yehowa karum ya ai majaw, tsawra matsan dum myit nga ai, shagrit shanem ai sagu rem byin wa ai. Gawng kya ai lam law law nga tim, dai ni hpe sha n myit nga ai. Yehowa mara raw ya na hpe kam ai. (Rom 7:21-25) Hkum tsup na hpe n myit mada ai. De a malai, Hkristan atsam ningja ni madun ai hta, rawt jat na matu shagrit shanem let shakut ai. Hkaw tsun magam awng dang na matu, Yehowa a karum shingtau lam hpe Pawlu kamhpa ai.​—1 Ko 9:27; Hpilipi 4:13 hpe hti u.

15. Tinang a n hkum tsup ai lam hpe rap ra ai hku mu mada na matu myitsu salang ni gara hku galaw ging ai kun?

 ¹⁵ Sharin la lu ai lam. Hkum tsup ai majaw, myitsu salang hku nna lit ap hkrum ai n re. Raitim, tinang a mara ni hpe yin la na matu, Hkristan atsam ningja ni hpe shalat na matu, Yehowa myit mada ai. (Ehp 4:23, 24) Myitsu salang langai gaw, Chyum Laika hpe akyu jashawn nna tinang hkum tinang san jep ging ai. Ra ang ai hku galai shai ging ai. Rai yang, ngwi pyaw na matu, awng dang na matu, Yehowa karum ya na re.​—Yak 1:25.

16. Kaga ni a n hkum tsup ai lam hpe myitsu salang ni myit maju jung yang hpa byin chye ai kun?

¹⁶ Dai gaw hpa majaw yak ai kun? Myitsu salang ni gaw, nawku hpung hta, hpunau nauna ni hte rau jawm galaw ra ai majaw, shanhte a gawng kya ai lam ni hpe chye wa na re. Dai majaw, n sadi yang, myit htum wa chye ai. Laja lana tsun hkrup chye ai. Mara shagun wa chye ai. Satan dai zawn galaw shangun mayu ai ngu Hkristan ni hpe Pawlu sadi jaw ai.​—2 Ko 2:10, 11.

17. Hpunau nauna ni hpe Pawlu gara hku mu mada ai kun?

¹⁷ Pawlu a kasi ningli. Pawlu gaw hpunau nauna ni a kaja ai lam hpe sha yu ai. Shanhte a mara ni hpe atsawm chye ai. Kalang lang shanhte a majaw, Pawlu grai hkamsha ra ai. Raitim, n kaja ai masha hte n kaja ai lailen n bung ai hpe Pawlu chye ai. Hpunau nauna ni hpe tsawra nna, shanhte a kaja ai atsam ningja ni hpe sha myit maju jung ai. Jaw ai hpe galaw na matu, shanhte yak nga tim pyi, kaja ai myit jasat nga ai, shanhte karum shingtau lam sha ra ai ngu mu mada ai.

18. Eodia hte Suntuki a masa hpe Pawlu hparan ai lam kaw na hpa sharin la lu ai kun? (Hpilipi 4:1-3)

¹⁸ Hpilipi nawku hpung na nauna 2 hpe Pawlu gara hku karum ya wa ai hpe yu yu ga. (Hpilipi 4:1-3 hpe hti u.) Eodia hte Suntuki gaw, myit n hkrum ai lam ni a majaw, hku hkau lam htenza mat ai. Shan hpe Pawlu laja lana mara shagun na malai, kaja ai atsam ningja ni hpe myit maju jung ai. Shaning law law sadi dung let magam gun wa ai ni re ai lam, shan hpe Yehowa tsawra ai lam, shi chye ai. Pawlu hta, dai zawn kaja ai myit jasat nga ai majaw, bai hku hkau hkra galaw na matu, shan hpe n-gun jaw ai. Hpunau nauna ni a kaja ai atsam ningja ni hpe Pawlu myit maju jung ai majaw, shi mung matut kabu gara lu nna, shanhte hte mung hku hkau lam matut kaja nga ai.

19. (a) Myitsu salang ni hku nna kamsham shada hpe kaja ai ningmu gara hku matut nga lu na kun? (b) Nawku Htingnu jasan jaseng galaw nga ai myitsu salang langai a sumla kaw na hpa sharin la lu ai kun?

¹⁹ Sharin la lu ai lam. Myitsu salang ni e, hpunau nauna ni a kaja ai atsam ningja ni hpe tam u. N hkum tsup tim, yawng hta ra sharawng hpa atsam ningja ni nga ai. (Hpl 2:3) Myitsu salang ni hku nna, chyahkring hkring shading sharai ya ra ai lam ni nga chye ai. Raitim,  marai langai ngai a pawt na zawn re ai ga ni, galaw ai lam ni hpe Pawlu myit maju n jung wa ai kasi ningli hpe nanhte hkan sa u. Yehowa shanhte hpe tsawra ai, sadi dung let Karai magam gun wa ai, shanhte bai kaja wa na ngu ai hpe sha, myit maju jung ging ai. Myitsu salang ni hta, kaja ai myit jasat nga yang, hpunau nauna ni a tsawra myit hkamsha lu na re.

20. Pawlu a kasi kaw na myitsu salang ni gara hku akyu lu mai ai kun?

²⁰ Pawlu a kasi ningli hpe matut hkaja ai gaw, akyu nga ai hpe myitsu salang ni chye wa na re. Ga shadawn, ndai laika pang jahtum hta matsun da ai, Azin Ayang Sakse Hkam laika buk hte Sin Langchyi hta lawm ai lam ni hpe hkaja mai ai. Dai shaloi, ‘myitsu salang langai a lit hpe ngut kre hkra galaw let ngwi pyaw lam matut nga na matu, Pawlu a kasi gaw ngai hpe gara hku karum ya ai kun?’ ngu tinang hkum tinang san u.​—bt (Myen) lm 98-99, pang 17-19; lm 166-167, pang 6-8; w97 (Myen) 8/1 lm 17-18 pang 14-16 ni hpe yu u.

21. Myitsu salang ni hpa hpe kam ging ai kun?

²¹ Myitsu salang ni e, Yehowa gaw nanhte hkum tsup na matu n hpyi shawn ai. Sadi dung na matu sha hpyi shawn ai hpe dum u. (1 Ko 4:2) Pawlu a shakut shaja ai lam hte sadi dung ai lam hpe Yehowa manu shadan ai. Nanhte a galaw ai lam hpe mung manu shadan na hpe kam mai ai. “Nanhte chyoi pra ai ni hpe galaw daw ma nit dai hta n-ga, galaw daw ding-yang rai nga let, Karai Kasang a mying nsang a matu magam bungli gun hpai nna tsaw ra ai myit madun ai lam hpe” Yehowa malap kau ya na n re.​—Heb 6:10.