Ndai labau hpe ntsa lam sha hti yu na nga yang, dai zawn myit chye ai. Raitim, Mehpiboshet ngu ai la lahkawng nga ai. Ndai labau hpe san jep yu na nga yang atsawm chye wa na re.

Israela Hkawhkam Shawlu hta shadang sha 7, shayi sha 2 nga ai. Kasha alat gaw Yonahtan re. Shawlu a lashi num Rizpa shangai ai shadang sha hpe Mehpiboshet ngu shamying ai. Myit lawm hpa gaw, Yonahtan hta mung Mehpiboshet ngu ai shadang sha langai nga ai. Dai majaw, Hkawhkam Shawlu hta, Mehpiboshet ngu mying nga ai kasha hte kashu nga ai.

Kalang mi hta, Hkawhkam Shawlu gaw, Israela ni hte rau nga ai Gibeon masha ni hpe nju ndawng wa nna, yawng hpe sat shamyit kau na matu shakut ai. Law malawng sat hkrum wa na masa nga ai. Dai gaw shut ai. Hpa majaw nga yang, Yawshu prat hta, Israela ningbaw ni gaw, Gibeon masha ni hte simsa na matu, ga shaka tawn da ai majaw re.​—Ysh 9:3-27.

Hkawhkam Shawlu prat du hkra dai ga shaka gaw n prai shi ai. Raitim, Shawlu gaw dai hpe shaprai kau nna, Gibeon masha ni hpe sat kau na matu shakut ai. Dai majaw, “Shawlu hte . . . shi a amyu” hta sai hka kap mat ai. (2 Sa 21:1) Hpang hta, Dawi hkawhkam byin wa ai shaloi, ngam nga ai Gibeon masha ni gaw, Shawlu galaw wa ai grai nhkru ai lam ni hpe tsun dan ai. Shanhte myit dik hkra, mungdan hpe Yehowa shaman chyeju bai jaw hkra hpa galaw ya ra na kun? ngu Dawi san dat ai. Shanhte gaw gumhpraw hpyi na malai, shanhte hpe “shamyit kau na maw ai wa” a shadang sha marai 7 hpe ap ya na matu hpyi shawn ai. (Bhk 35:30, 31) Shanhte hpyi ai hte maren Dawi ap ya ai.​—2 Sa 21:2-6.

Dai aten hta, Shawlu hte Yonahtan gaw majan hta si mat sai. Yonahtan a kasha Mehpiboshet gaw asak naw hkrung ai. Ma prat hta, n myit mada ai lam a majaw, lagaw hten mat ai. Dai majaw, Gibeon masha ni hpe kaji dwi sa gasat ai shaloi Mehpiboshet n lawm ai. Dawi gaw, Yonahtan hte jinghku hku nna ga shaka tawn da ai. Dai majaw, Yonahtan a kasha Mehpiboshet hte hpawn, Yonahtan a amyu ting akyu hkamsha lu na re. (1 Sa 18:1; 20:42) Dawi gaw Yonahtan hte “Yehowa amying hte dagam da ai ga shaka nga ma lu ai majaw, hkawhkam wa [Dawi] gaw Shawlu a kasha Yonahtan shaprat ai Mehpiboshet hpe lahpawt nna di da wu ai” ngu Chyum Laika hta tsun da ai.​—2 Sa 21:7.

Gibeon masha ni a hpyi shawn ai lam hpe Dawi hkap la nna, Shawlu a shadang sha 2 hte kashu 5 hpe ap ya dat ai. Dai kasha 2 kaw na langai gaw Mehpiboshet re. (2 Sa 21:8, 9) Dawi dai hku ap ya dat ai majaw, mungdan hta sai hka kap ai lam hkoi mat ai.

Dai mabyin gaw labau langai daram sha n re. Karai a tara hta, “Kawa a majaw kasha si ai hkrum lu na n rai” ngu asan sha tsun da ai. (Trj 24:16) Shawlu a shadang sha 2 hte kashu 5 gaw mara n nga ai nga yang, dai mabyin hpe Yehowa ra sharawng na n re. “Kadai mung tinang a mara hte sha si ai hkrum lu na rai nga ai” ngu nna mung matut tsun da ai. Shawlu a si mat ai kashu kasha marai 7 gaw, Gibeon masha ni hpe sat ai shaloi, lam langai ngai hte lawm wa na masa nga ai. Dai gaw, tinang galaw ai lam a majaw bai sak jaw ra ai re.

Masha langai gaw, lahta kaw na matsun ai majaw, shut ai hku tsun hkrup, galaw hkrup ai re ngu lawt ga n mai tsun ai lam ndai mabyin gaw madun dan ai. Hpaji rawng ai ga shagawp langai hta ndai hku tsun da ai: “Nang galaw ai amu hpe sadi sahka hte hpajang lajang u; shing rai, nang galaw ai amu hpa hta rai tim, jaw ai hku byin pru wa na ra ai.”​—Gsh 4:24-27, JCLB; Ehp 5:15.