1-2. Laika ka ai sara langai gaw gara hku ka wa ai kun? Ndai sumhpa hta hpa lam hpe hkaja mat na kun?

DAI ni aten hta wan hku law ai masha ni gaw Yesu hpe kam ai ngu tsun tim, shi sharin ya ai lam ni hpe gaw n kap la ma ai. (2 Tm 4:3, 4) Laika ka sara langai ndai hku ka wa ai: “Lama na, dai ni aten she Yesu zawn tsun ai . . . , kaga Yesu langai naw nga ai nga yang, lai wa sai shaning 2000 aten hta Yesu hpe nyet kau ai zawn dai ni aten hta mung nyet kau na kun? . . . Mahtai gaw: Nyet kau na re.”

² Tsa ban langai na masha law law gaw, Yesu sharin ya ai lam hte madun wa ai mauhpa lam hpe mu ai. Raitim, Yesu hpe n kam ai. Hpa majaw kun? Shawng na sumhpa hta masha ni hpa majaw Yesu a tsun ai, galaw ai lam hpe, ahtu kataw ai hte seng ai lam 4 hpe hkaja wa sai. Kahtap na lam 4 hpe hkaja ga. Dai ni aten na masha ni gaw, Yesu a hpang hkan ai ni hpe hpa majaw nye kau ai, n ahtu kataw hkra gara hku galaw mai na lam hpe mung chye lu na re.

3. Yesu galaw ai gara lam a majaw, masha nkau ahtu kataw ai kun?

³ Mungkan ntsa hta Yesu nga ai shaloi, masha amyu myu hte kanawn mazum wa ai. Lusu ai, ahkang aya nga ai ni hte rau shat sha ai. Raitim, shi a aten law malawng hpe gaw, matsan ai ni, karum madi shadaw lam ra ai ni hpe jaw wa ai. Dai sha n-ga, “yubak kap ai ni” ngu mu mada hkrum ai ni hpe mung, matsan dum myit madun wa ai. Tinang hkum tinang dinghpring ai ngu hkam la da ai ni gaw, Yesu galaw ai lam a majaw ahtu kataw mat ai. Sape ni hpe shanhte ndai hku san wa ai: “Nanhte hpa rai kang hta ai ni hte yubak kap ai ni rau lu sha nga myit ta?” Yesu  ndai hku bai htai wa ai: “Hkam kaja ai ni tsi sara n ra ma ai, machyi ai ni sha ra ma ai: ding hpring ai ni hpe myit malai lu hkra shaga na, ngai sa du ai n rai, yubak kap ai ni hpe shaga na she, sa du nngai.”​—Luk 5:29-32.

4. Esaia a myihtoi ga hku nga yang, Meshia hte seng nna Yuda masha ni hpa hpe myit mada da ging ai kun?

⁴ Chyum Laika hta gara hku tsun da ai kun? Meshia hpe mungkan gaw hkap la na n re ngu na Esaia myihtoi htoi da ai. Ndai hku tsun da ai: “Shi gaw masha ni e shatan nhkan ai hte, n kaw n law di ai hkrum nga ai: . . . myi man kayin kau hkrum ai wa zawn shi rai nga nna, shatan nhkan hkrum nga ai; anhte mung shi hpe hpa n nawn ga ai.” (Esa 53:3) Meshia gaw “masha ni” a n kaw n law di ai hpe hkrum na re. Dai majaw Yesu gaw nyet kau hkrum na hpe, tsa ban langai na Yuda masha ni myit mada da ging ai.

5. Dai ni aten na masha law law gaw, Yesu a hpang hkan ai ni hpe gara hku mu mada ma ai kun?

⁵ Dai ni aten hta mung dai hte maren rai nga ai hpe mu lu ai kun? Mu lu ai. Hpung sara law law gaw shanhte a nawku hpung de, mying gumhkawng ai ni, sut su ai ni, mungkan a ningmu hta hpaji rawng ai ni ngu mu mada ai ni du wa na hpe ra sharawng ma ai. Dai hpung masha nnan ni a lailen hte prat hkrun lam gaw, Karai a tsang madang hku n raitim pyi, hkap la ma ai. Shakut shaja nna akyang lailen san seng ai Karai a mayang ni hpe gaw, dai hpung sara ni yu kaji ma ai. Karai a mayam ni hpe mungkan a ningmu hta n ahkyak ai ni re ngu mu mada ai majaw re. Pawlu tsun ai hte maren, Karai Kasang gaw “mungkan ga a arawng n lu ai” ni hpe, lata la ai. (1 Ko 1:26-29) Yehowa a matu gaw, shi a mayam yawng manu dan ai.

6. Mahte 11:25, 26 hta mu lu ai Yesu a myit jasat hpe anhte gara hku kasi la mai ai kun?

⁶ N ahtu kataw hkra gara hku galaw mai na? (Mahte 11:25, 26 hpe hti u.) Karai a masha ni hpe mungkan masha ni mu ai hku hkum mu. Yehowa gaw shi a myit ra ai lam hpe galaw na matu, shagrit shanem ai ni hpe sha akyu jashawn ai hpe dum u. (Shk 138:6) Mungkan a ningmu hta hpaji n rawng ai ni, machye machyang n nga ai ni ngu sawn la da ai ni hpe akyu jashawn nna, Yehowa galaw awng dang nga ai lam ni hpe myit yu u.

7. Hparishe ni hpe hpyi hpun ai ni ngu hpa majaw Yesu tsun ai kun?

⁷ Yesu gaw shi aten na hpyi hpun ai nawku htung ningbaw ni a lailen ni hpe, nden marai hte hpaw tsun dan wa ai. Ga shadawn, kanu kawa ni hpe lanu lahku na hta, lata kashin ai hpe grau ahkyak shatai wa ai Hparishe ni a hpyi hpun ai lailen hpe tsun dan wa ai. (Mat 15:1-11) Yesu tsun ai ga a majaw sape ni pyi mau mat ai. Dai majaw shanhte ndai hku san ai: “Ya tsun ai ga ndai Hparishe ni na jang, shanhte myit na machyi ma ai hpe nang chye nga n ni?” Yesu ndai hku bai htai ai: “Sumsing lamu hta nga ai nye Wa n hkai da ai hpun yawng hte gaw, ru hte nawng baw kau ai hkrum na ra ai. Shanhte gaw nga nga mu ga: myi kyaw ninglen lam madun ai ni rai nga ma ai: myi kyaw ai wa gaw, myi kyaw wa hpe lam madun a taw gaw, shan lahkawng gaw nhkun kata de hkrat na ma ra ai.” (Mat 15:12-14) Nawku htung ningbaw ni gaw masin pawt let bai htang tim pyi, Yesu gaw teng man lam hpe matut tsun ai.

8. Nawku htung yawng a makam masham hpe gaw Karai Kasang n hkap la ai lam Yesu gara hku madun dan ai kun?

⁸ Yesu gaw shut shai ai nawku htung a sharin achyin lam hpe mung hpaw tsun dan wa ai. Nawku htung yawng hpe Karai hkap la ai ngu shi n tsun wa ai. Hten bya ai de hkrang ai dam lada ai lam hta masha law law hkawm nna, asak hkrung ai de hkrang ai yak la ai lam hta gaw,  masha loi sha hkawm na ngu Yesu sanglang dan ai. (Mat 7:13, 14) Nkau gaw Karai hpe nawku ai zawn raitim, kaja wa n nawku ai ngu shi tsun wa ai. Yesu ndai hku sadi jaw ai: “Kraw lawang hta e amya sha na chyahkyawn myit rawng nna, sagu hpyi bu hpun let nanhte kaw sa du ai myihtoi masu ni hpe koi gam mu. Shanhte a asi hte shanhte hpe chye lu na rai mu ai.” ​—Mat 7:15-20.

9. Yesu hpaw tsun dan ai shut shai ai nawku htung a sharin achyin lam nkau gaw hpa ni rai kun?

⁹ Chyum Laika hta gara hku tsun da ai kun? Meshia gaw Yehowa a nta matu, nja nhpra ai myit nga na ngu myihtoi ga hta tsun da ai. (Shk 69:9; Yhn 2:14-17) Dai myit gaw, shut shai ai nawku htung a sharin achyin lam hte lailen hpe hpaw tsun dan na matu Yesu hpe shadut ya ai. Ga shadawn, wenyi gaw n si lu ai ngu na Hparishe ni kam ai. Raitim, si ai gaw yup taw ai re ngu Yesu sharin ya ai. (Yhn 11:11) Saduke ni gaw bai hkrung rawt ai lam n nga ai ngu kam ai. Raitim, Yesu gaw manang Lazaru hpe bai jahkrung sharawt ya wa ai. (Yhn 11:43, 44; Kas 23:8) Yawng mayawng gaw, Karai hte gam maga a majaw re ngu na, Hparishe ni sharin ya ai. Raitim, masha gaw Karai hpe nawku na, n nawku na hpe lata mai ai ngu Yesu sharin ya wa ai. ​—Mat 11:28.

10. Anhte a sharin achyin lam hte seng nna masha law law hpa majaw ahtu kataw nga ai kun?

¹⁰ Dai ni aten hta mung dai hte maren rai nga ai hpe mu lu ai kun? Mu lu ai. Chyum Laika hta madung da ai anhte a sharin achyin lam gaw, shut shai ai nawku htung a lailen hpe madun ya ai majaw, masha law law gaw ahtu kataw ma ai. Karai Kasang gaw n kaja ai ni hpe ngarai hta zingri ai ngu na, hpung sara ni sharin ya ma ai. Hpung masha ni hpe hkang lu na matu, dai zawn shut ai lam ni hpe shanhte sharin ya ai. Tsawra myit rawng ai Karai hpe nawku ai Yehowa a mayam ni gaw, dai sharin achyin lam gaw shut ai ngu na hpaw tsun dan ai. Wenyi gaw n si lu ai ngu na hpung sara ni sharin ya nga ai. Dai sharin achyin lam gaw Chyum Laika hta n lawm ai hpe anhte sakse madun ai. Dai she jaw ai nga yang, kadai mung bai hkrung na matu n ra sai. Yawng mayawng gaw, Karai hte gam maga a majaw re ngu na, nawku htung law law sharin ya ai. Raitim, anhte gaw Karai hpe nawku na, n nawku na hpe lata mai ai ngu na  sharin ya ai. Nawku htung ningbaw ni gara hku bai htang ai kun? Shanhte grai pawt ai.

11. Yawhan 8:45-47 hta mu lu ai Yesu a ga hku nga yang, Karai Kasang gaw shi a amyu masha ni kaw na hpa hpe hpyi shawn da ai kun?

¹¹ N ahtu kataw hkra gara hku galaw mai na? Teng man lam hpe anhte tsawra yang, Karai tsun ai hpe hkap la ra ai. (Yawhan 8:45-47 hpe hti u.) Anhte gaw Satan Nat hte n bung ai sha, teng man ai maga de tsap ai. Anhte a makam masham hpe galoi mung nyet kau na n re. (Yhn 8:44) Yesu galaw wa ai zawn sha, “n hkru n hkra ai hpe matsat nga” nna, “mai kaja ai hta manoi nga” na matu, shi a masha ni hpe Karai Kasang hpyi shawn da ai. ​—Rom 12:9; Heb 1:9.

12. Yesu wudang hta jen nna sat kau hkrum ai lam gaw, Yuda masha ni a matu ahtu kataw shara hpa majaw rai mat ai kun?

¹² Yesu aten na Yuda masha ni hpe, ahtu kataw shangun ai kaga hpa lam naw nga ai kun? Pawlu ndai hku tsun wa ai: “Anhte chyawm gaw, Wudang hta jen da hkrum ai Hkristu a lam hkaw dan ga ai; dai wa Yuda ni a man e myit kataw shara, . . . rai nga ai.” (1 Ko 1:23) Yesu si ai hte seng nna Yuda ni hpa majaw myit kataw ai kun? Yesu wudang hta jen nna sat kau hkrum ai gaw, shanhte a matu tara tawt lai nna mara kap ai wa zawn mu mada mat shangun ai. Dai majaw Meshia hku na n hkap la ai. ​—Trj 21:22, 23.

13. Yesu a majaw ahtu kataw ai ni gaw hpa hpe n chye wa ai kun?

¹³ Yesu a majaw ahtu kataw ai Yuda masha ni gaw, Yesu mara n nga ai, shut ai hku mara shagun hkrum ai, n tara ai lam hkrum ai ngu ai hpe n chye ma ai. Yesu hpe tara je yang ai ni mung, tara rap ra na matu n galaw wa ma ai. Yuda tara rung gaw Yesu hte seng nna alawan daw dan kau ai. Tara upadi ni hpe n hkan sa ai. (Luk 22:54; Yhn 18:24) Yesu hpe n tara ai hku tsun ai hpe myiman n lata ai sha madat ya na malai, ‘Yesu hpe sat kau lu hkra masu ai sakse’ shanhte tam wa ai. Sakse n mu tam ai shaloi, mara shagun lu ai ga Yesu tsun wa hkra, hkinjawng agyi wa galaw wa ai. Dai gaw tara upadi hte nhtan shai ai lam re. (Mat 26:59; Mrk 14:55-64) Yesu hkrung rawt ngut ai hpang, n teng man ai tara agyi ni gaw, lup sin ai Roma hpyen la ni hpe “gumhpraw law law wa jaw” nna, lup  hta hpa n rawng taw ai hte seng nna n teng ai shiga shabra shangun ai. ​—Mat 28:11-15.

14. Meshia si na hte seng nna myihtoi ga hta gara hku tsun da ai kun?

¹⁴ Chyum Laika hta gara hku tsun da ai kun? Yesu aten na Yuda masha law law gaw, Meshia gaw si ra na n re ngu na myit mada wa ai. Raitim, myihtoi ga hta ndai hku tsun da ai: “Shi gaw si du hkra shi a myit masin hpe ru kau nna, tara tawt lai ai ni hta hti lawm nga ai: rai ti mung shi gaw; masha law law a yubak hpe gun hpai nna, tara tawt lai ai ni a matu mara htinglu htinglai ya ai.” (Esa 53:12) Dai majaw mara kap ai wa hku na Yesu sat kau hkrum ai shaloi, Yuda masha ni ahtu kataw na lam n nga ai.

15. Yehowa Sakse ni hpe mara shagun ai gara lam ni a majaw, nkau gaw ahtu kataw nga ai kun?

¹⁵ Dai ni aten hta mung dai hte maren rai nga ai hpe mu lu ai kun? Teng sha mu lu ai. Yesu gaw shut ai hku mara shagun hkrum ai. Yehowa Sakse ni mung dai zawn sha n tara ai lam ni hkrum nga ai. Ga shadawn nkau hpe yu yu ga. Amerikan mungdan hta 1930 hte 1950 ning laman hta Karai Kasang hpe wanglu wanglang nawku daw jau na hte seng nna tara rung ni hta gasat wa ra ai. Tara agyi nkau gaw kaya n chye ai sha, myiman lata nna anhte hpe gasat ai. Kaneda mungdan, Kwibet hta hpung sara ni hte mung daw up ai ni ginrun nna anhte a bungli hpe ninghkap ai. Hkaw tsun masha law law gaw htingbu ni hpe Karai a Mungdan lam tsun dan ai majaw, htawng sharawng hkrum ai. Nazi Jamani aten hta, sadi dung ai ramma hpunau nauna ni gaw, si dam jaw hkrum ma ai. Lai wa sai shaning ni hta Rasha hta nga ai hpunau nauna ni gaw, Chyum Laika lam bawng ban ai majaw htawng jahkrat hkrum ai. “Nchyun shanang ai lailen” re ngu na pyi asuya ni tsun ai. Rasha amyu ga hku na ga gale da ai Mungkan Nnan Ga Gale Chyum Laika hta Yehowa ngu ai mying hpe lang da ai majaw, “nchyun shanang laika” re ngu masat hkrum nna hkum pat hkrum wa ai.

16. 1 Yawhan 4:1 hta tsun da ai hku nga yang, Yehowa a masha ni hte seng ai, n jaw ai shiga ni hpe hpa majaw n kam ging ai kun?

¹⁶ N ahtu kataw hkra gara hku galaw mai na? Jaw ai hpe chye hkra galaw u. Bum Ntsa Na Mungga hta madat nga ai ni hpe Yesu gaw, “masu ai hku hkan let mara amyu myu shagun” ai ni a lam hpe sadi jaw wa ai. (Mat 5:11) Masu ai a npawt gaw Satan re. Teng man lam hpe tsawra ai ni hte seng nna, n jaw ai shiga hpe shabra na matu, ninghkap ai ni hpe Satan shadut ya ai. (Shr 12:9, 10) Ninghkap ai ni a masu ga hpe anhte nyet kau ra ai. Dai masu ga ni a majaw n hkrit mat ging ai. Makam masham n yawm mat ging ai. ​—1 Yawhan 4:1 hpe htu u.

17. Yesu si na shana hta byin wa ai gara lam ni a majaw nkau gaw ahtu kataw ai kun?

¹⁷ Yesu gaw garai n si shi yang, kasa 12 kaw na 1 a sadi run ai hpe hkrum wa ai. Kaga kasa langai gaw shi hpe 3 lang nyet kau ai. Shi si na shana hta mung kasa yawng gaw shi hpe kau da ai. (Mat 26:14-16, 47, 56, 75) Yesu gaw n mau wa ai. Dai zawn byin wa na re ngu na pyi shi tsun wa ai. (Yhn 6:64; 13:21, 26, 38; 16:32) Dai zawn re ai lam a majaw nkau gaw ahtu kataw mat ai. ‘Yesu a kasa ni gaw dai zawn re nga yang, shanhte a hpung kaw ngai n kam lawm ai’ ngu na pyi myit na re.

18. Yesu si wa na mahka hta byin wa ai mabyin ni gaw, gara myihtoi ga ni hpe hpring tsup shangun ai kun?

¹⁸ Chyum Laika hta gara hku tsun da ai kun? Meshia gaw gumhpraw 30 hte sadi run hkrum na re ngu nna, Yehowa gaw shi a Mungga hta tsa ban shaning law law kaw nna tsun da ai. (Zeh 11:12, 13) Sadi run ai wa gaw Yesu a hku hkau ai manang ni kaw na langai rai na re. (Shk 41:9) Myihtoi Zehkaria mung ndai hku ka wa  ai: “Sagu rem wa hpe anu sat nna, sagu ni bra wa na ma ra ai.” (Zeh 13:7) Myit dingman ai ni gaw, dai mabyin ni a majaw n ahtu kataw ai. De a malai Yesu hta myihtoi ga ni hpring tsup wa ai hpe mu lu ai majaw, makam masham ngang kang wa ai.

19. Myit dingman ai ni gaw hpa hpe chye ai kun?

¹⁹ Dai ni aten hta mung dai hte maren rai nga ai hpe mu lu ai kun? Mu lu ai. Masha law law chye ai Sakse Hkam nkau gaw, teng man lam hpe kau da nna hpung htak mat ai. Kaga ni hpe mung shakut nna hkalem wa ai. Intanet hte midiya hta, Yehowa Sakse ni hte seng nna n jaw ai shiga ni, loi mi sha jaw ai shiga ni hpe shabra ai. Raitim, myit dingman ai ni gaw n ahtu kataw ai. De a malai, dai zawn byin wa na ngu Chyum Laika hta tau hkrau tsun da ai hpe shanhte chye ai. ​—Mat 24:24; 2 Pe 2:18-22.

20. Teng man lam hpe kau da ai ni a majaw ahtu kataw ai baw n byin hkra gara hku galaw mai na kun? (2 Timohti 4:4, 5)

²⁰ N ahtu kataw hkra gara hku galaw mai na? Chyum Laika ayan hkaja ai, nsim nsa akyu hpyi ai, Yehowa jaw da ai bungli hta shakut shaja let galaw ai hku nna anhte a makam masham hpe ngang kang hkra galaw ra ai. (2 Timohti 4:4, 5 hpe hti u.) Anhte makam masham nga ai nga yang, n kaja ai shiga hpe na ai shaloi, myit tsang nga na n re. (Esa 28:16) Yehowa, shi a Mungga hte hpunau nauna ni hpe tsawra ai myit gaw, teng man lam hpe kau da ai ni a majaw ahtu kataw ai baw n byin hkra karum ya na re.

21. Dai ni aten na masha law law gaw anhte a shiga hpe n hkap la ai raitim, hpa hpe anhte kam mai ai kun?

²¹ Tsa ban langai hta, masha law law gaw ahtu kataw nna Yesu hpe nyet kau ma ai. Raitim, Yesu hpe hkap la ai ni mung grai law hkra nga ai. Dai hta, Yuda tara rung kaw na yawm htum langai lawm ai. “Hkinjawng ni” pyi lawm ai. (Kas 6:7; Mat 27:57-60; Mrk 15:42-43) Dai ni aten hta mung wan hku law ai masha ni gaw, ahtu kataw ai lam n nga ai. Hpa majaw kun? Chyum Laika hta mu lu ai teng man lam hpe chye nna tsawra ai majaw re. Karai a Mungga hta ndai hku tsun da ai: “Na a tara hpe tsawra ai ni gaw, grai ngwi pyaw simsa ai. Shanhte ahtu kataw mat hkra hpa lam mung n lu galaw ai.” ​—Shk 119:165, NW.