1. Sape ni hpe Yesu gara kasi madun wa ai kun? Shanhte gara hku bai htang ai kun? (Makawp sumla hpe yu u.)

YESU gaw mungkan ntsa hta magam gun ai shaloi, kaja ai ningmu matut nga hkra galaw wa ai. Shi a hpang hkan ai ni hpe mung, dai zawn galaw shangun mayu ai. (Yhn 4:35, 36) Sape ni gaw Yesu hte arau re ai shaloi, myit rawt let hkaw tsun wa ai. (Luk 10:1, 5-11, 17) Raitim, Yesu rim hkrum na si mat ai hpang, sape ni a hkaw tsun mayu ai myit chyahkring mi mat mat ai. (Yhn 16:32) Yesu hkrung rawt ngut ai hpang, hkaw tsun bungli hpe myit maju jung na matu sape ni hpe n-gun jaw wa ai. Yesu lamu de lung mat ai hpang, sape ni gaw shakut shaja let hkaw tsun wa ai majaw, hpyen ni gaw ndai hku pyi tsun ai: “Yu mu, Yerusalem mare ting nanhte a sharin shaga lam pri di manit dai.” ​—Kas 5:28.

2. Hkaw tsun bungli hpe Yehowa gara hku shaman chyeju jaw nga ai kun?

² Yesu gaw tsa ban langai na Hkristan ni a bungli hpe lam matsun ya wa ai. Yehowa mung shaman chyeju jaw ai majaw rawt jat wa ai. Ga shadawn, A.D. 33 Pentekoti nhtoi hta, marai 3,000 daram gaw hkalup hkam wa ai. (Kas 2:41) Matut nna mung sape ni manu mana law wa ai. (Kas 6:7) Hkaw tsun bungli hpe jahtum nhtoi ni hta grau nna pyi galaw lu na re ngu Yesu tau hkrau tsun wa ai. ​—Yhn 14:12; Kas 1:8.

3-4. Hkaw tsun bungli gaw nkau a matu hpa majaw yak nga ai kun? Ndai sumhpa hta hpa lam ni hkaja mat na kun?

³ Hkaw tsun bungli hta kaja ai ningmu nga na matu anhte yawng shakut ai. Mungdan nkau hta gaw dai hku galaw na matu loi ai. Hpa majaw nga yang, dai shara ni hta Chyum Laika hkaja na matu myit lawm ai ni grai law hkra nga ai. Nkau  nga yang Sakse Hkam ni rau na aten hpe la nga ra ai. Raitim, shara nkau hta hkaw tsun bungli hpe galaw na matu yak nga ma ai. Masha ni gaw nta kaw nau n nga ai, nga ai ni mung Chyum Laika hpe nau myit n lawm ai majaw re.

⁴ Hkaw tsun na matu yak ai shara hta nang nga ai nga yang, ndai sumhpa hta lawm ai hpaji jaw ga ni gaw karum ya lu na re. Hkaw tsun lawk hta masha ni hte grau nna hkrum lu na matu, nkau hpa galaw wa ai hpe hkaja lu na re. Anhte a shiga hpe masha ni madat ai raitim, n madat ai raitim, kaja ai ningmu matut nga lu ai hpe mung hkaja mat na re.

5. Sakse Hkam law law gaw gara yak ai lam ni hkrum nga ai kun?

⁵ Masha ni hpe nta hta hkrum na matu Sakse Hkam law law a matu grau nna yak wa ai. Sakse Hkam nkau gaw shimlum lam shaja da ai nta ni, shara ni hta hkaw tsun nga ra ai. Dai shara ni hta wang chyinghka sin ai ni nga chye ai. Nta masha ni n saw shaga da yang, kadai hpe mung shang na ahkang n jaw ai. Hkaw tsun masha nkau gaw nta langai hpang langai sa na matu loi tim, masha nkau hpe sha nta hta hkrum lu nga ai. Nkau bai rai yang, masha loi mi sha nga ai shara, san san rai nga ai shara hta hkaw tsun nga ra ai. Hkaw tsun masha gaw nta madu hte hkrum lu na matu, grai tsan ai shara kaw na sa tim, hkrum yang she hkrum nga ai. Dai zawn mayak mahkak ni nga tim, asum n mai jaw ai. Mayak mahkak ni hpe tawt lai lu na matu, hkaw tsun bungli hta akyu lu la na matu gara hku galaw mai na kun?

6. Hkaw tsun ai hte nga hkwi ai gaw gara hku bung ai kun?

⁶ Yesu gaw hkaw tsun bungli hpe nga hkwi ai bungli hte shing daw wa ai. (Mrk 1:17) Nga hkwi ai ni nkau gaw, nga n lu ai nhtoi ni mung nga ai. Raitim, asum n jaw ai. Ladat galai shai na galaw ai. Aten, shara mung galai shai ai. Anhte a hkaw tsun bungli hta mung, dai hte maren galai shai mai ai. Anhte galaw mai na lam nkau hpe bawng ban mat wa ga.

7. Kaga aten hta hkaw tsun na nga yang, hpa akyu ni lu na kun?

⁷ Masha ni hte hkrum na matu kaga aten hta sa u. Masha ni nta hta nga chye ai aten hta anhte hkaw tsun na nga yang, grau nna hkrum shaga lu na re. Gara hku mi tsun tim, masha ni nta de bai wa ai aten nga ai. Hpunau nauna law law gaw shana maga hte, nrim rim aten hta hkaw tsun ai shaloi, masha ni hte grau nna hkrum shaga lu ai. Dai aten ni hta, nta madu ni gaw tsun shaga na matu grau nna kam ai mung rai na re. Shing nrai, myitsu salang Debit a hpaji jaw ga hpe hkan sa mai ai. Shi hte shi manang gaw hkaw tsun bungli sa nna loi mi na ai hpang, shawng nnan hkaw tsun ai shaloi n hkrum wa ai nta ni hpang de bai sa ai. Shi ndai hku tsun ai: “Dai nta ni hpang de bai sa ai shaloi, nta madu law law hte hkrum lu ai majaw ngai grai mau ai.” *

8. Hkaw tsun bungli hta Hpaji Ningli 11:6 hpe gara hku hkan sa mai ai kun?

⁸ Anhte asum n jaw ging ai. Sumhpa a madung Chyum daw gaw anhte hta nga ra na myit jasat hpe bai shadum ya ai. (Hpaji Ningli 11:6 hpe hti u.) Hpunau Debit gaw asum n jaw wa ai. Nta grai law hkra de bai sa ngut ai hpang, hpang jahtum gaw nta madu langai hte hkrum wa ai. Dai la gaw Chyum Laika bawng ban ai hpe myit lawm nna ndai hku tsun ai: “Ngai ndai kaw nga ai 8 ning daram rai sai. Yehowa Sakse ni hte kalang mung nta kaw n hkrum ga ai.” Debit ndai hku tsun ai: “Nta hta masha ni hpe hkrum ai shaloi, anhte hkaw tsun ai shiga hpe shanhte madat mayu ma ai.”

9. Hkrum na matu yak ai ni hpe Sakse Hkam nkau gaw gara hku tam ai kun?

 ⁹ N bung ai shara hta hkaw tsun u. Nta hta hkrum na matu yak ai ni hpe hkaw tsun na matu, nkau gaw hkaw tsun ai shara hpe galai shai ma ai. Ga shadawn, nta langai hpang langai hkaw tsun na matu ahkang n jaw ai shara ni hta nga ai ni hpe hkrum lu na matu, lam ntsa hkaw tsun ai, laili laika leng ni hte hkaw tsun ai gaw tang du nga ai. Dai gaw hkrum na matu yak ai masha ni hte Sakse Hkam ni hpe, myi man chyaw shaga lu shangun ai. Ngut nna, nampan sun, gat, hpaga lawk ni hta masha ni gaw ga grau shaga mayu ai, laili laika ni hpe grau hkap la mayu ai hpe hkaw tsun masha law law sadi hkrup ai. Bolibia hta nga ai ning htawn hpung kawan Hpaloran ndai hku tsun ai: “Gat ni, hpaga lawt ni de sa ai shaloi, gat seng ni hta bungli nau n law ai aten re ai, hkying 1 kaw na hkying 3 laman hta sa ai. Anhte gaw ga atsawm shaga lu nna Chyum ga sharin ni pyi hpang lu ai.”

10. Masha ni hte hkrum lu na matu gara ladat ni hpe lang mai ai kun?

¹⁰ Ladat galai shai nna hkaw tsun u. Marai langai hte hkrum na matu law law lang nang shakut wa na sai. Kaga aten hta sa ai raitim, shanhte nta kaw n nga ai. Shanhte hte hkrum na matu gara hku galaw mai na? Nauna Katarina ndai hku tsun ai: “Nta hta n hkrum lu ai ni hpe ngai laika ka ai. Shanhte hte hkrum yang tsun na lam ni hpe ka shalawm ai.” Hpa sharin la lu ai kun? Hkaw tsun lawk hta nga ai ni yawng hte hkrum lu na matu, ladat langai hpang langai galai shai nna galaw u.

11. Masha nkau gaw anhte hkaw tsun ai shiga hpe hpa majaw myit n lawm ai kun?

¹¹ Masha nkau gaw anhte hkaw tsun ai shiga  hpe myit n lawm ma ai. Karai (sh) Chyum Laika hpe ra kadawn ai ngu shanhte n hkamsha ai. Mungkan ntsa hta tsin-yam grai law hkra byin nga ai majaw, Karai nga ai hpe shanhte n kam ai. Chyum Laika tsang madang hte maren nga ai ngu na tsun ai hpyi hpun ai nawku htung ningbaw ni a majaw, Chyum Laika hpe shanhte n hkap la ma ai. Nkau mi gaw, bungli, dinghku hte tinang a manghkang ni hpe sha myit nga ai majaw, Chyum Laika gaw shanhte hpe gara hku karum ya lu ai lam hpe n mu nga ai. Anhte a kabu gara shiga hpe manu shadan ai lam nau n nga ai ni hpe hkaw tsun ai shaloi, kabu gara lam hpe gara hku matut hkang da lu na kun?

12. Hkaw tsun bungli hta anhte hpe karum ya lu na Hpilipi 2:4 hpe gara hku hkan sa lu na kun?

¹² Kaga ni hpe myit lawm ai lam madun u. Anhte a shiga hpe shawng nnan na ai shaloi myit n lawm ai ni gaw, hkaw tsun masha ni a myit madung hte myit lawm ai lam a majaw, kabu gara shiga hpe hkap la wa ma ai. (Hpilipi 2:4 hpe hti u.) Ga shadawn, Debit ndai hku tsun ai: “Marai langai ngai gaw myit n lawm ai ngu tsun ai shaloi, Chyum Laika (sh) laili laika hpe n shaw sai sha, ‘nang hpa majaw dai hku hkamsha ai rai? Tsun dan mai na kun?’ ngu na san ai.” Masha ni gaw shanhte hpe myit lawm ai nga yang dai hpe shanhte chye ai. Anhte tsun dat ai ga hpe shanhte matsing na n raitim, gara hku hkamsha wa ai hpe gaw dum nga na re. Nta madu hte ga shaga na ahkang n lu tim, anhte a myit jasat, anhte a myi man nsam hte shanhte hpe myit lawm ai lam madun mai ai.

13. Nta madu langai hpra a ra kadawn ai lam hta hkan nna, anhte a shiga hpe gara hku galai shai mai ai kun?

¹³ Anhte a shiga hpe ra ang ai hku galai shai nna, nta madu ni hpe myit lawm ai lam madun ai. Ga shadawn, ma nga ai hpe sadi hkrum ai kun? Kanu kawa ni gaw ma ni hpe bau maka na hte seng ai lam (sh) dinghku ngwi pyaw na hte seng nna Chyum Laika hpaji jaw ga ni hpe myit lawm na re. Ayan na chyinghka zaw hkat da ai hpe mu ai kun? Rai yang, daw sa ai lam, mungkan hta hkrit tsang nga ai lam ni hpe tsun mai ai. Daw sa ai lam ni n nga na aten hpe nta madu chye lu yang kabu na re. Hpa mi raitim, Chyum Laika hta lawm ai hpaji jaw ga ni gaw, madat nga ai ni hpe karum ya lu ai lam chye hkra karum ya u. Katarina ndai hku tsun ai: “Chyum Laika gaw nye a prat hpe grau nna kaja shangun ai lam ngai bai shadum la ai.” Dai majaw, kam ai myit hte shi hkaw tsun lu ai. Masha ni mung dai hpe mu ai.

14. Ga Shagawp 27:17 hku nga yang, hkaw tsun manang shada da gara hku karum ya lu ai kun?

¹⁴ Kaga ni karum ya ai hpe hkap la u. Tsa ban langai hta, Pawlu gaw hkaw tsun ai hte sharin achyin ai ladat hpe, Timohti hpe tsun dan wa ai. Dai ladat hpe akyu jashawn nna kaga ni  hpe karum ya na matu, Timohti hpe n-gun jaw wa ai. (1 Ko 4:17) Timohti zawn anhte mung, nawku hpung hta nga ai mahkrum madup nga ai ni kaw na sharin la lu ai. (Ga Shagawp 27:17 hpe hti u.) Hpunau Shawn a kasi hpe myit yu ga. Shi gaw san san rai nga ai shara hta ningshawng hku nna magam gun wa ai. Dai shara hta nga ai ni gaw, tinang a nawku htung hte sha myit dik nga ai ni re. Kabu gara lam matut nga hkra shi gara hku galaw wa ai? Shi ndai hku tsun ai: “Byin mai shagu manang hte arau bungli galaw ai. Nta langai kaw na langai hpang de sa ai shaloi, sharin achyin ai atsam rawt jat wa na matu, shada da karum ya ai. Ga shadawn, nta madu ni gara hku bai htang ai hpe tsun hkat ai. Dai hpang, dai zawn masa hte bai hkrum yang gara hku bai htang na hpe bawng ban ai.”

15. Hkaw tsun bungli hta shang lawm ai shaloi, akyu hpyi na matu hpa majaw grai ahkyak ai kun?

¹⁵ Karum shingtau lu na matu Yehowa kaw akyu hpyi u. Hkaw tsun bungli hta shang lawm shagu, lam matsun lu na matu Yehowa kaw pyi u. Atsam kaba ai shi a chyoi pra ai wenyi she n karum ya yang, hpa hpe mung anhte ngut kre lu na n re. (Shk 127:1; Luk 11:13) Karum shingtau lu na matu Yehowa kaw akyu hpyi ai shaloi, hpyi mayu ai lam hpe lak san tsun dan u. Ga shadawn, shi a lam chye mayu ai ni, madat mayu ai ni hpang de matsun ya na matu hpyi u. Dai hpang, hkrum ai ni yawng hpe hkaw tsun ai hku nna, akyu hpyi ga hte maren hkan sa u.

16. Hkaw tsun bungli a matu tinang hkrai hkaja ai lamang gaw, hpa majaw grai ahkyak ai kun?

¹⁶ Tinang hkrai hkaja lamang a matu aten jaw u. “Karai Kasang a mai kaja ai, sharawng awng ai hte hkum tsup re ai myit mang lam hpe nanhte chye ginhka lu myit ga” ngu nna Chyum Laika hta tsun tawn da ai. (Rom 12:2) Karai hte seng ai teng man lam hpe anhte chye da ai hpe grau na kam yang, hkaw tsun bungli hta kaga ni hpe tsun dan ai shaloi, kam ai myit grau nna nga na re. Katarina ndai hku tsun ai: “Chyum Laika madung sharin ya ai lam nkau hte seng nna, kam ai myit ra nga ai hpe ngai chye dat ai. Dai majaw Hpan Madu nga ai, Chyum Laika gaw Karai a Mungga re ai, dai ni aten hta Karai a uhpung nga ai hpe kam shangun ai ahkri ahkrai lam ni hpe ngai bai hkaja ai.” Tinang hkrai hkaja ai lamang gaw makam masham hpe shangang shakang ya nna, hkaw tsun bungli hta kabu gara lam rawt jat shangun ai ngu Katarina tsun ai.

17. Yesu gaw hkaw tsun bungli hta kaja ai ningmu hpa majaw matut nga wa ai kun?

¹⁷ Yesu gaw shi hkaw tsun ai shiga hpe masha nkau n madat tim pyi, matut hkaw tsun nna kaja ai ningmu nga wa ai. Hpa majaw kun? Masha ni gaw teng man lam hpe chye na matu kade ra ahkyak nga ai hpe shi chye nna, Mungdan shiga hpe hkap la na matu dang lu ai daram ahkaw ahkang shi jaw mayu wa ai. Nkau gaw shawng nnan hta n ra ai raitim, galai shai wa na hpe shi chye ai. Shi nta masha ni hta byin wa ai lam hpe myit yu mai ai. Yesu magam gun ai masum ning chyen laman hta, shi a kanau langai mung sape n byin wa ai. (Yhn 7:5) Raitim, Yesu hkrung rawt ngut ai hpang Hkristan ni byin wa ai. ​—Kas 1:14.

18. Hpa majaw anhte matut hkaw tsun ai kun?

¹⁸ Anhte sharin ya ai Chyum Laika teng man lam hpe kadai gaw hkap la wa na hpe anhte n chye ai. Nkau hpe gaw aten loi jaw ra na re. Shiga hpe n madat mayu ai ni pyi, anhte a lailen hte kaja ai myit jasat hpe mu nna, hpang jahtum hta “Karai Kasang hpe shagrau” ai ni byin wa chye ai. ​—1 Pe 2:12.

19. 1 Korinhtu 3:6, 7 hku nga yang, hpa hpe anhte chye da ra ai kun?

 ¹⁹ Anhte gaw hkai ai, hka jaw ai. Ngam ai gaw Karai Kasang a daw re ai hpe anhte chye ra ai. (1 Korinhtu 3:6, 7 hpe hti u.) Itiyopiya hta magam gun nga ai hpunau Gatohun ndai hku tsun ai: “Shaning 20 ning jan ting, nye a buga hta Yehowa Sakse gaw ngai langai sha re. Ya gaw hkaw tsun masha 14 rai sai. Marai 13 gaw hkalup hkam ngut sai. Dai hta nye madu jan hte ma 3 mung lawm ai. Marai 32 daram gaw ayan na zuphpawng lung ai.” Myit dingman ai ni hpe Yehowa gaw shi a uhpung de laula wa na aten hpe, myit galu let hpunau la nna hkaw tsun wa ai majaw kabu gara wa ai. ​—Yhn 6:44.

20. Anhte gaw asak hkye ai ni hte gara hku bung ai kun?

²⁰ Masha yawng a asak hpe Yehowa manu shadan ai. Ndai mungkan n htum shi yang, masha amyu yawng kaw na masha ni hpe kahkyin la na matu, shi a Kasha hte arau bungli galaw na ahkaw ahkang Yehowa anhte hpe jaw da ai. (Hag 2:7) Hkaw tsun bungli gaw asak hkye ai bungli hte bung ai. Anhte gaw lup na hkyen ai li hta nga ai masha ni hpe hkye la na matu, sa dat hkrum ai hpung hta lawm ai ni hte bung ai. Asak hkrung ai loi mi hpe sha anhte mu tam ai raitim, asak hkye ai ni galaw ai bungli yawng gaw manu dan ai. Anhte galaw nga ai hkaw tsun bungli mung dai hte maren re. Satan a mungkan na marai kade hpe hkye la lu na hpe anhte n chye ai. Raitim, shanhte hpe karum ya na matu, anhte kaw na kadai hpe mung Yehowa akyu jashawn lu ai. Bolibia hta nga ai Andare ndai hku tsun ai: “Marai langai teng man lam hpe sharin la nna hkalup hkam la ai hpe mu lu ai gaw, yawng shakut shaja ai majaw re.” Hkaw tsun bungli hta dai zawn kaja ai myit jasat hpe anhte matut madun mat wa ga. Rai yang, Yehowa gaw anhte hpe shaman chyeju jaw nna, anhte mung hkaw tsun bungli kaw na jet ai kabu gara lam hpe lu la na re.