Dai aten ladaw gaw nye a prat hpe galai shai kau ya ai. Hpa majaw nga yang, dai aten kaw nna Hpan Da Madu hpe tam hpang wa ai majaw re.

Ngai hpe 1937 ning, Dingdung Pyintit na mare kasha re ai Gingnam hta shangai ai. Nhprang wan n-ga htu ai awa kaw na, bungli shakut ra ai ngu ai lam hpe sharin la lu wa ai. Tara rap ra ai shi a myit jasat hpe mung sharin la lu wa ai. Nhprang wan n-ga htu ai hkawng ma ni gaw, n tara ai hku galaw hkrum nna grai shoihpa law ai masa hta bungli galaw nga ra ai hpe shi mu ai. Awa gaw shanhte hpe karum ya mayu ai. Dai majaw, hkawng ma ni tara rap ra lam lu na matu karum ya ai uhpung ni hta shi shang lawm wa ai. Mare na hpung up sara ni a lapran ni hta mung, hpyi hpun ai ni hpe mu lu taw ai majaw shi grai myit n pyaw wa ai. Shanhte law malawng gaw angwi apyaw hte nga lu ai prat hpe lu da ai. Raitim, asak hkrung na matu pyi yak nga ai hkawng ma ni kaw na malu masha hte gumhpraw ni hpe shanhte hpyi nga ma ai. Awa gaw jau ni a lailen hpe grai hkyet rung ai majaw, makam masham lam hte seng nna ngai hpe n sharin ya ai. Karai a lam hpe pyi galoi n tsun ga ai.

Ngai mung kaba wa ai hte maren, n tara ai lam  ni hpe nju hpang wa ai. Dai n tara ai lam hta, Pyintit hta nga ai maigan masha ni hpe masha nkau n ra sharawng ma ai lam mung lawm ai. Maigan kaw na wa nga ai ma ni hte ngai gawdin ginsup ai. Shanhte hte kanawn mazum ai shaloi grai pyaw ai. Ngut na anu gaw Pyintit amyu masha n re. Polan re. N bung ai amyu masha ni arau nga nna tara rap ra ai hku kanawn mazum shangun mayu ai.

1957 hta, hpyen magam gun na matu asuya kaw na hpyi shawn wa ai. Agiria bum na grai sin mak nga ai shara hta, mi tsun dan ai hte maren byin wa ai. “Karai Kasang e! O, Karai Kasang e!” ngu ngai hkrap ngut ai hpang, hpyen la hte n re ai sha, lawze hte hkrum wa ai. Grai myit hkyem sa mat ai. Raitim, dai aten hte majan nan gaw, asak hte seng nna ngai hpe grau myit wa shangun ai. Anhte hpa majaw ndai kaw du taw ai kun? Karai Kasang gaw anhte hpe lanu lahku ai kun? Htani htana simsa ai aten gaw lu wa na kun?

Ahkang la nna nta de wa chyai ai shaloi, Yehowa Sakse langai hte hkrum ai. Shi gaw ngai hpe, Pyintit Catholic ni ga gale da ai Chyum Laika re ai La Sat Chyum Laika buk langai jaw ai. Agiria kaw na bai wa ai hpang, dai laika buk hpe hti hpang ai. Ngai na myit hpe hkra shangun ai Chyum daw langai gaw Shingran 21:3, 4 re. Dai hta ndai hku tsun da ai: “Karai Kasang a sum gaw shinggyim masha ni hte . . . shi gaw shanhte a myi hta na myi prwi pru mapru katsut kau ya na ra ai: htawm hpang e si hkrung si htan n nga lu na sai; sharung shayawt ai, hkrap ngu hkrap ngoi ai, hki si ba si ai mung, n nga lu na sai.” * Dai ga si ni gaw ngai hpe grai mau mat shangun ai. ‘Dai ga ni jaw mi jaw taw na kun?’ ngu na ngai chye mayu ai. Dai aten hta, Chyum Laika hte Karai Kasang a lam ngai hpa n chye shi ai.

Hpyen magam gun ngut mat ai hpang 1959 hta, Hpan-swa ngu ai Sakse hkam langai hte hkrum ai. Shi gaw ngai hpe Chyum Laika teng man lam law law sharin ya ai. Ga shadawn, Karai Kasang hta Yehowa ngu ai amying shingteng nga ai lam Chyum Laika kaw na madun wa ai. (Shk 83:17) Yehowa gaw mungkan ntsa hta tara rap ra lam nga hkra bai galaw ya na, hparadisu byin wa hkra galaw ya na, Shingran 21:3, 4 hta lawm ai lam ni hpe jahpring shatsup ya na ngu ai lam ni hpe mung sanglang dan ai.

Dai sharin achyin lam ni gaw grai lachyum rawng nna, ngai na myit hpe grai hkra ya ai. Raitim, jau ni hpe grai masin pawt wa nna, shanhte gaw Chyum Laika hta n lawm ai lam ni hpe sharin ya nga ai lam, masha ni hpe grai tsun dan mayu ai. Dai aten hta awa myit ai zawn sha naw myit nga nna, n tara ai lam hpe gasat mayu taw ai. Ngai n hkam sharang lu nga ai. Lama ma hpe alawan galaw dat mayu ai.

Hpan-swa hte kaga Yehowa Sakse manang nnan ni gaw, masin pawt ai hpe hkang lu na matu ngai hpe karum ya ai. Hkristan ni hku nna anhte a bungli gaw, kaga ni hpe tara jeyang na matu n re ai sha, Karai Mungdan a kabu gara shiga kaw na lu la ai myit mada lam hpe hkaw tsun na matu re ai lam, shanhte sanglang dan ai. Dai gaw Yesu galaw wa ai bungli rai nna, shi a hpang hkan ai ni hpe mung dai bungli jaw da ai. (Mat 24:14; Luk 4:43) Kaga ni a makam masham hpe n hkap la tim, shanhte hte hku hku hkau hkau, atsawm agawm tsun shaga chye na matu mung, sharin la lu wa ai. “Dai Madu a shangun ma chyawm gaw, ga law ga la n mai nga ai sha, yawng mayawng a man e shingdi ai, sharin shaga  chye ai hte myit galu kaba rawng” u ngu Chyum Laika hta tsun da ai hte maren re.​—⁠2 Tm 2:24.

Ra ang ai galai shai lam ni hpe galaw nna, 1959 ninghtawn zuphpawng hta Yehowa Sakse langai hku nna ngai hkalup hkam la ai. Dai shara hta ngai myit shang sha ai ramma nauna Anje hte hkrum wa ai. Shi a nawku hpung de ngai sa chyai ai. 1960 hta anhte hkungran ai. Shi gaw kaja dik htum num, kaja dik htum madu jan rai nna Yehowa kaw na manu dan ai kumhpa re.​—⁠Gsh 19:14.

Hpaji rawng nna mahkrum madup nga ai hpunau ni kaw na, ahkyak ai lam ni hpe shaning law law sharin la lu wa ai. Madung hku nna anhte sharin la lu wa ai lam gaw, yak hkak ai lam ni hpe galaw awng dang lu hkra, shagrit shanem ra ai. Ga Shagawp 15:22 hta lawm ai hpaji jaw ga hpe hkan sa ra ai ngu ai lam re. Dai hta ndai hku tsun da ai: “Hpaji daw chye ai ni law nga yang, myit ai lam grin wa ai.”

1964 hta, Chyum Laika hta lawm ai ga ni gaw, gade daram jaw ai hpe mu wa ai. Dai shaning hta, hpung kawan magam hpe galaw hpang wa ai. Ngai na lit gaw, nawku hpung ni hpang de sa nna hpunau nauna ni hpe n-gun jaw na, shanhte a wenyi lam hpe gawgap ya na matu re. Raitim, dai aten hta ngai gaw asak 27 sha naw rai nna, mahkrum madup n nga shi ai. Dai majaw, shut ai lam ni nga wa ai. Raitim, shanhte kaw na sharin la na matu ngai shakut wa ai. Dai sha n-ga, atsam nga nna mahkrum madup nga ai “hpaji jaw ai ni” kaw na manu dan ai lam law law hpe sharin la lu wa ai.

Moi na mahkrum madup langai hpe ngai naw dum ai. Perit hta nga ai nawku hpung hpe kawan ngut ai hpang, wenyi lam hta kunghpan ai hpunau langai gaw, an ga shaga mai na kun? ngu na san ai. “Mai ai le” ngu na ngai tsun dat ai.

“Luwit, tsi sara gaw nta langai de sa chyai yang, kadai hpang de shi sa na kun?” ngu na shi san ai.

“Machyi ai wa hpang de” ngu ngai bai htai ai.

Shi ndai hku bai tsun ai: “Jaw ai. Raitim, nang gaw nawku hpung na myitsu salang zawn re ai wenyi lam kaja ai ni hte sha aten shama taw ai hpe ngai sadi hkrup ai. Anhte a nawku hpung hta, myit daw nga ai ni, masha nnan ni, kaya chye ai hpunau nauna ni grai law hkra nga ai. Shanhte hpe aten jaw ai, shat da mi a matu shanhte a nta de sa ya yang sha pyi, shanhte grai n-gun lu na re.”

Dai hpunau a hpaji jaw ga gaw, lachyum rawng nna grai manu dan ai. Yehowa a sagu ni hpe tsawra ai shi a tsawra myit gaw, ngai na myit hpe grai hkra ya ai. Dai majaw ngai na arawng hpe n myit nga ai sha, shi tsun ai hpe kalang hta hkan galaw ai. Dai  zawn re ai hpunau ni hpe lu da ai majaw, Yehowa hpe grai chyeju dum ai.

1969 hte 1973 hta, Perit, Kolambat hta galaw ai mungdan ga daga zuphpawng hta Lu Sha Garan Ya Ai Dap hpe woi awn na lit lu wa ai. 1973 hta galaw ai zuphpawng kaba hta, masha 60,000 daram hpe 5 ya ting lu sha madi shadaw ya ra ai. Gara hku galaw ra na hpe ngai n chye ai. Dai aten hta mung, awng dang lu na madung lam gaw, Ga Shakawp 15:22 hta lawm ai hpaji rawng ai ni hte bawng ban ai lam re. Dai bungli hte seng nna mahkrum madup nga ai kunghpan ai hpunau ni kaw san yu ai. Dai hpunau ni hta shan dut ai, sat ai, lu sha shadu ai, dut ai, mari ai ni lawm ai. Bum zawn kaba la ai lit ni hpe anhte arau galaw ngut kre wa ai.

1973 hta, nye madu jan hte ngai gaw Pyintit Behtela hta magam gun na matu saw shaga hkrum ai. Dai hta shawng nnan ngai lu ai lit mung grai yak ai. 1970 hte 1993 laman anhte a bungli hpe hkum pat da ai mungdan re ai, Ahparika mundan, Kemmarun hta nga ai hpunau nauna ni hpe laili laika sa ya ra ai. Ndai kalang mung, ngai grai myit tsang wa ai. Pyintit ginjaw garan rung hta nga ai woi awn ai hpunau gaw, ngai gara hku hkamsha nga ai hpe chye ai rai na re. Shi ngai hpe ndai hku n-gun jaw ai: “Kemmarun hta nga ai anhte a hpunau ni gaw, wenyi malu masha grai ra nga ma ai. Shanhte hpe jaw sha ga.” Dai hku anhte galaw wa ai.

Kemmarun na myitsu salang ni hte hkrum lu na matu, mungdan lamu ga jarit ni lai nna bu hkawm wa ai. Nden marai rawng nna htauli htaula myit nga ai dai hpunau ni gaw, Kammarun de wenyi malu masha ayan jaw lu hkra, hkyen lajang lu na matu karum ya ai. Anhte a shakut shaja ai lam hpe Yehowa shaman chyeju jaw wa ai. Dai shara hta nga ai shi masha ni gaw, hkaja na matu Sin Langchyi hte dai aten hta Anhte A Mungdan Magam ngu shaga ai bat lapran zuphpawng na matu laili laika ni hpe, shaning 20 ning daram ayan na lu la wa ai.

Sum tsaw prat kaw nna Anje a wenyi atsam ningja ni hpe ngai sadi hkrup ai. Hkungran ngut ai  hpang dai atsam ningja ni gaw, grau nna dan dawng wa ai. Ga shadawn, anhte hkungran ai shana maga hta, yan la ni hku nna Yehowa a magam hta dang lu ai daram gun hpai lu hkra akyu hpyi na matu shi tsun ai. Dai akyu hpyi ga hpe Yehowa mahtai bai jaw wa ai.

Yehowa hpe grau nna kamhpa wa hkra mung, ngai hpe Anje karum ya ai. Ga shadawn, hpung kawan bungli hpe ngai grai ra sharawng ai. Dai majaw, 1973 hta Behtela kaw magam gun na matu saw shaga hkrum ai shaloi ngai hting nut wa ai. Raitim, anhte a asak hpe Yehowa kaw ap nawng da sai lam Anje bai shadum ya ai. Uhpung shangun ai hpa hpe raitim, galaw ging ai n re i? (Heb 13:17) Shi tsun ai hpe ngai tsep kawp myit hkrum ai. Dai majaw Behtela de sa ai. An yan arau nga ai prat ting hta, nye madu jan a sadi sahka myit, htauli htaula myit hte wenyi ningmu ni gaw, an yan hpe shangang shakang ya nna kaja ai daw dan lam ni jahkrat lu hkra karum ya ai.

Anhte asak kaba wa ai aten hta mung, Anje gaw matut nna kaja dik htum galaw ai, madi shadaw ya ai madu jan re. Ga shadawn, Ingalik hku galaw ai magam jawng ni hpe lu lung na matu, Anje hte ngai gaw Ingalik ga hta rawt jat hkra galaw wa ai. Dai aten hta asak 70 jan sai raitim pyi, Ingalik ga shaga ai nawku hpung de htawt ai. Pyintit ginjaw garan rung komiti hpung shang langai hku nna lu da ai lit ni mung grai law ai majaw, kaga amyu ga langai hpe sharin la na matu grai yak ai. Raitim, Anje hte ngai gaw shada da karum ya ai. Ya asak 80 jan sai. Raitim, zuphpawng a matu hkyen lajang ai shaloi, Ingalik hte Pyintit lahkawng yan hte hkaja ai. Ingalik ga shakut nna hkaja ai hpe Yehowa shaman chyeju jaw nga ai.

2017 hta, laksan shaman chyeju langai bai lu wa ai. Anje hte ngai gaw, Nyu Yawk, Pattasan na Sin Langchyi Hpaji Jaw Dap hta galaw ai Ginjaw Garan Rung Komiti Ni Hte Madu Jan Ni A Matu Sharin Jawng hpe lung na ahkang lu wa ai.

Yehowa gaw teng sha Grau Htum Ai Sharin Achyin Ya Ai Wa re. (Esa 30:20) Dai majaw shi a amyu masha kaji kaba yawng, kaja htum hpaji ni hpe sharin la lu ai gaw mauhpa n re. (Trj 4:5-8) Yehowa hte mahkrum madup nga ai hpunau nauna ni a ga hpe madat ai ramma ni gaw, wenyi lam hta rawt jat wa nna awng dang ai ni byin lu ai hpe mung ngai chye wa ai. Ga Shagawp 9:9 gaw anhte hpe bai shadum ya ai: “Hpaji rawng ai wa hpe shadum yang shi grau nna hpaji rawng na ra ai; Ding hpring ai wa hpe sharin yang, shi grau nna chye chyang wa na ra ai.” Dai hte maren re.

Lai wa sai shaning 60 na, sin mak ai Agiria bung ntsa na hkrit hpa shana hpe ngai bai myit hkrup ai. Dai shana hta, ndai zawn ngwi pyaw ai prat hpe lu wa na ngu ai hpe ngai n chye wa ai. Kaga ni kaw na grai law hkra ngai sharin la lu wa ai. Anje hte ngwi pyaw nna myit dik ai prat hpe Yehowa jaw da ai. Dai majaw, anhte a sumsing lamu Kawa hte, hpaji rawng nna mahkrum madup nga ai shi hpe tsawra ai hpunau nauna ni kaw na sharin la ai hpe galoi mung n jahkring kau na matu anhte daw dan da ai.