Nang Chye Ai Kun?
Chyum Laika prat hta, li shachyaw na matu tinggaw hpun hpe lang wa ai kun?
Tinggaw hpun
MOI aten na Egutu masha ni gaw laika ka na matu, tinggaw lap hpe madung hku nna lang wa ai lam masha law law chye da ma ai. Grik hte Roma ni mung, tinggaw lap laika pa hta laika ka wa ai. * Tinggaw lap hpe, laika ka ai hta sha n-ga, li shachyaw ai hta mung lang wa ai hpe gaw, masha nau n chye ma ai.
Egutu lup kata kaw na tam mu wa ai tinggaw li hkrang kasha lahkawng
Lai wa sai shaning 2,500 jan hta, myihtoi Esaia gaw “Hkusha hka wora hkran” hta nga ai ni hpang de “malaw [tinggaw] li hte nammukdara hka hku kasa shangun dat” ai. Dai hpang, myihtoi Yeremia mung, Babelon hpe Medi hte Persi masha ni shang gasat ai shaloi, mare masha ni n hprawng lu hkra, shanhte a “tinggaw hpung li ni hpe wan nat” kau hkrum na ngu tau hkrau tsun wa ai.—Esa 18:1, 2; Yer 51:32, NW.
Chyum Laika gaw Karai Kasang shung ya ai laika buk re. Dai majaw, Chyum Laika prat hta li shachyaw na matu, tinggaw hpun ni hpe teng sha lang wa ai ngu ai, sawk sagawn ai ni mu tam wa ai lam hpe Chyum jawng ma ni n mau ma ai. (2 Tm 3:16) Hpa ni hpe tam mu wa ai kun? Egutu hta tinggaw hpun li shachyaw ai hte seng ai madi madun lam ahkri ahkrai hpe, sawk sagawn ai ni tam mu wa ai.
Tinggaw Hpun Li Hpe Gara Hku Shachyaw Ai Kun?
Egutu lup ni hta soi da ai sumla ni hta, tinggaw hpun dan la ai hte li shachyaw ai bungli ni hte seng nna madun da ai. Tinggaw hpun ni hpe dan la nna, dai ni hpe majaw nna ngang ngang gyit ai. Majaw nna gyit da ai ni hpe pawng nna ngang ngang bai gyit ai. Tinggaw hpun hta jut masum lawm ai. Dai zawn majaw ni hpe grai ngang hkra gyit kau ai shaloi, grai htat nna grai ngang mat ai. Laika buk langai (A Companion to Ancient Egypt) hku nga yang, tinggaw li gaw pe 55 (17m) jan galu nna, maga mi hta li shap 10 (sh) 12 lawm ai.
Egutu masha ni a shakum hta galaw da ai sumla ni gaw, tinggaw li hpe gara hku galaw ai lam madun dan
Li Shachyaw Ai Shaloi Tinggaw Hpun Hpe Hpa Majaw Lang Ai Kun?
Tinggaw hpun ni hpe Nila hka nu kaw na aloi sha lu la ai. Grau nna, tinggaw li gaw galaw loi ai. Sanghpaw kaba ni shachyaw ai shaloi, hpun ni hpe madung hku nna lang wa sai raitim pyi, nga hkwi sha ai ni hte jau gawng ni gaw, tinggaw hpun hte galaw da ai wawn hte li hpe matut lang nga ai masa nga ai.
Masha ni gaw tinggaw li hpe shaning law law matut lang wa ma ai. Tsa ban langai hte lahkawng lapran hta asak hkrung wa ai Grik laika ka sara Pluhta tsun ai hku nga yang, shi aten na laika hti ai ni gaw, tinggaw wawn hpe atsawm naw chye ma ai.
^ စာပိုဒ်၊ 3 Tinggaw hpung gaw, angwi ngwi sha lwi ai hka nu ni hta tu ai. Hpun langai gaw, pe 16 (5 m) daram galu nna, hpun npawt ni gaw let ma 6 (15 cm) daram kaba ai.
