1-2. Sakse Hkam law law gaw gara mayak mahkak ni hte hkrum nga ai kun?

HKRISTAN yawng hpe ap da ai hkaw tsun bungli hpe, kaja htum galaw na matu Timohti hpe Pawlu n-gun jaw wa ai. (2 Tm 4:5) Pawlu a hpaji jaw ga hpe anhte yawng htep lahti hkan sa ga ai. Raitim, yak ai lam gaw nga ai. Hpunau nauna law law gaw hkaw tsun bungli hta shang lawm na matu, nden marai ra ai. (2 Tm 4:2) Ga shadawn, anhte a bungli hpe hkum pat da ai, pat shingdang da ai shara ni hta nga ai hpunau nauna ni a lam hpe myit yu mai ai. Shoihpa nga tim, hkaw tsun bungli hta matut shang lawm nga ai.

² Myit daw shangun na zawn re ai manghkang law law hpe Yehowa a masha ni hparan ra nga ai. Ga shadawn, hpunau nauna law law gaw, dinghku a ra kadawn ai lam ni hpe madi shadaw na matu, aten law law jaw na bungli galaw ra nga ai. Hkaw tsun bungli hta grau shang lawm mayu tim, kru ya, laban ni hta nga yang bu ba nga sai. Nkau gaw asak kaba wa ai (sh) machyi jung nga ai majaw shadawn sharam sha galaw lu nga ai. Nta kaw na n lu pru ai pyi rai na re. Nkau gaw tinang hkum tinang manu n dan ai wa ngu hkamsha nga ma ai. Nauna Meri * ndai hku tsun ai: “Nye a n kaja ai hkamsha lam hpe gasat na matu grai shakut ra ai. Grai myit ba ai. Hkaw tsun bungli hta n shang lawm lu wa ai majaw mung, mara nga ai ngu hkamsha ai.”

3. Ndai sumhpa hta hpa lam hkaja mat na kun?

³ Anhte a masa gara hku mi raitim, hkrum nga ai mayak manghkang ni hpe hparan nna, dang lu ai daram matut magam gun lu hkra Yehowa n-gun atsam jaw ya lu ai. Anhte hpe Yehowa gara hku karum ya ai hpe n hkaja shi yang, Pawlu hte Timohti hta mayak manghkang ni nga ai raitim, matut magam gun lu hkra Yehowa gara hku karum ya ai hpe hkaja yu ga.

4. Gara mayak manghkang ni Pawlu hkrum wa ai kun?

⁴ Pawlu hta mayak mahkak amyu myu nga ai. Grau nna gaw kayat hkrum ai, nlung hte kabai hkrum ai, htawng jahkrat hkrum ai shaloi, karum madi shadaw lam ra na re. (2 Ko 11:23-25) N kaja ai hkamsha lam ni hpe gasat ra wa ai ngu na mung Pawlu yin la ai. (Rom 7:18, 19, 24) “Hkum shan hta ju ai aju” hte bung ai lam ni hpe mung, shi hkam jan ra wa ai. Dai hpe yen seng kau ya na matu pyi Karai Kasang kaw karum hpyi wa ai. ​—2 Ko 12:7, 8.

5. Mayak manghkang ni nga ai rai ti mung, gara lam ni hpe Pawlu ngut kre awng dang wa ai kun?

⁵ Pawlu hta mayak manghkang ni nga ai raitim matut magam gun lu hkra, Yehowa n-gun atsam jaw wa ai. Pawlu ngut kre awng dang wa ai lam ni hpe myit yu mai ai. Ga shadawn, Roma kaw nta hta sharawng da hkrum ai shaloi, shakut shaja let matut nna kabu gara shiga hpe hkaw tsun wa ai. Dai hta uphkang du ni pyi lawm na re. (Kas 28:17; Hpl 4:21,22) Hkawhkam htingnu hpe sin ai hpyen dap hte shi hpang sa chyai ai ni hpe mung hkaw tsun wa ai. (Kas 28:30, 31; Hpl 1:13) Dai aten laman hta, dai ni aten na Hkristan ni du hkra akyu hkam la lu nga ai laika ni hpe ka wa ai. Kasa Pawlu a kasi gaw, Roma hta nga ai nawku hpung ni hpe n-gun lu shangun ai. Dai majaw hpunau ni gaw ‘Karai Kasang a mungga hpe n hkrit n tsang ai sha tsun dan na, grau nna gwi wa ai.’ (Hpl 1:14) Dai aten hta Pawlu gaw shadawn sharam sha galaw lu ai rai ti mung, shi galaw lu ai lam hpe kaja htum galaw wa ai. De a majaw, “kabu gara shiga chyam bra na matu karum shing tau lam byin wa ai.” ​—Hpl 1:12, NW.

6. 2 Korinhtu 12:9, 10 hku nga yang, hkaw tsun magam hpe ngut kre lu na matu Pawlu hpe hpa gaw karum ya wa ai kun?

⁶ Yehowa a magam hta ngut kre awng dang wa ai lam ni yawng gaw, shi a n-gun atsam hte n re ai sha, Karai a n-gun atsam hte re ai hpe Pawlu chye ai. Karai a atsam gaw, “gawng kya nga yang, n-gun atsam rawng” shangun ai hpe shi chye ai. (2 Korinhtu 12:9, 10 hpe hti u.) Zingri zingrat hkrum ai, htawng jahkrat hkrum ai hte kaga chyam dinglik lam ni hkrum ai raitim, magam bungli hpe ngut kre lu na matu, chyoi pra ai wenyi hku nna Pawlu hpe Yehowa n-gun atsam jaw ai.

7. Magam bungli hpe ngut kre lu na matu, Timohti gaw gara mayak mahkak ni hpe tawt lai wa ra ai kun?

⁷ Pawlu a asak kaji ai manang Timohti mung, magam bungli hpe gun hpai lu na matu, Karai a n-gun atsam hpe kamhpa wa ai.  Timohti gaw Pawlu hte rau sasana hkrun lam galu hpe hkawm wa ai. Dai sha n-ga, nawku hpung ni hpang de kawan nna n-gun jaw na lit hpe Pawlu kahtap jaw wa ai. (1 Ko 4:17) Atsam n hpring ai ngu na Timohti hkamsha na re. Dai majaw Pawlu ndai hku tsun wa ai rai na re: “Nang asak naw kaji ai majaw, kadai mung nang hpe n yu kaji kau u ga.” (1 Tm 4:12, NW) Dai aten hta Timohti gaw chyahkring hkring sha machyi wa ai. (1 Tm 5:23) Raitim, hpunau ni hpe karum ya na matu, kabu gara shiga hkaw tsun lu na matu, Yehowa a atsam kaba ai chyoi pra ai wenyi gaw karum ya na hpe Timohti chye ai. ​—2 Tm 1:7.

8. Dai ni aten na shi a masha ni hpe Yehowa gara hku shangang shakang ya ai kun?

⁸ Dai ni aten hta Yehowa gaw shi a masha ni hpe, “chyahtum chyalai re ai n-gun atsam” jaw ya ai. Dai majaw, shi hpe sadi dung let matut nawku lu ai. (2 Ko 4:7) Anhte matut sadi dung lu na matu, anhte hpe shangang shakang ya na matu, Yehowa lajang da ya ai lam 4 hpe hkaja yu ga. Dai ni gaw: akyu hpyi ai, Chyum Laika, Hkristan kanawn mazum lam hte hkaw tsun magam re.

9. Akyu hpyi ai gaw anhte hpe gara hku karum ya lu ai kun?

⁹ Akyu hpyi ai gaw anhte hpe shangang shakang ya ai. Ehpesu 6:18 hta nga yang, “ahkying ladaw shagu” akyu hpyi na matu Pawlu anhte hpe n-gun jaw da ai. Rai yang, Yehowa anhte hpe shangang shakang ya na re. Bolibia hta nga ai Jani gaw, mayak mahkak amyu myu hkrum ai shaloi, madi shadaw lam lu wa ai. Kanu yan kawa hte madu jan gaw, kalang ta grai machyi sawng wa ai. Shanhte masum hpe yu lajang na matu shi grai yak wa ai. Kanu gaw si mat ai. Madu jan hte kawa mung grai na yang she bai hkam kaja wa ai. Dai aten hte seng nna shi ndai hku tsun ai: “Manghkang ni hte hpring nga ai shaloi ngai hpe ayan na karum ya ai gaw, akyu hpyi ai re.” Jani hkam jan lu na matu n-gun atsam hpe Yehowa jaw wa ai. Bolibia hta nga ai myitsu salang Rone gaw, shi kanu mawng ana byin nga sai hpe chye dat ai. Shata mi na ai hpang kanu n nga mat ai. Hkam jan lu hkra shi hpe hpa gaw karum ya wa ai kun? Shi ndai hku tsun ai: “Yehowa kaw salum hpaw akyu hpyi nna hkamsha ai lam yawng hpe tsun dan ai. Yawng hta na shi ngai hpe chye na ya ai. Nye hkum ngai chye ai hta na pyi grau chye ai.” Kalang lang myit tsang lam ni hpring nga ai (sh) hpa a matu akyu hpyi ra na hpe pyi n chye ai baw byin chye ai. Anhte a myit mang lam ni hte hkamsha lam ni hpe tsun dan na matu yak tim pyi, shi kaw akyu hpyi na matu Yehowa saw shaga da ai. ​—Rom 8:26, 27.

10. Hebre 4:12 hku nga yang, Chyum Laika hpe hti nna myit sawn sumru na matu hpa majaw grai ahkyak ai kun?

¹⁰ Chyum Laika hku nna shangang shakang ya ai. Pawlu gaw shalan shabran lam hte n-gun atsam lu na matu Chyum Laika hpe kamhpa wa ai zawn, anhte mung kamhpa mai ai. (Rom 15:4) Karai a Mungga hpe hti nna myit sawn sumru na nga yang, anhte a masa lam hta gara hku hkan sa mai na hte seng nna, atsawm chye na na matu Yehowa a chyoi pra ai wenyi gaw karum ya na re. (Hebre 4:12 hpe hti u.) Rone ndai hku tsun ai: “Shana shagu Chyum Laika hti ai akyang nga hkra ngai galaw wa ai majaw grai kabu ai. Yehowa a atsam ningja ni, shi a mayam ni hpe tsawra myit hte gara hku kanawn mazum wa ai lam ni hpe ngai myit sawn sumru ai. Dai gaw ngai hpe n-gun bai lu wa hkra karum ya ai.”

11. Yawn hkyen nga ai nauna langai hpe Chyum Laika gaw gara hku shangang shakang ya wa ai kun?

¹¹ Karai a Mungga hpe myit sawn sumru ai hku nna, anhte a masa lam ntsa kaja ai ningmu nga wa hkra galaw mai ai. Yawn hkyen  hkrum nga ai gaida jan langai gaw, Chyum Laika kaw na gara hku akyu lu wa ai hpe myit yu ga. Yoba laika hpe hti yang, kaja ai akyu ni lu la na re ngu myitsu salang langai gaw shi hpe hpaji jaw ai. Shi nnan hti ai shaloi, Yoba hta nga ai shut ai ningmu hpe mara shagun mayu wa ai. Shi a myit hta Yoba hpe ndai hku tsun ai: “Yoba! N kaja ai hku sha hkum myit!” Dai hpang shi chye mat ai gaw, shi a myit jasat gaw Yoba hte grai bung taw nga ai hpe re. Dai gaw shi a mu mada lam hpe galai shai na matu, madu wa n nga mat ai majaw hkamsha nga ai hpe hkam jan lu na matu, karum ya wa ai.

12. Hpunau nauna ni hku nna Yehowa anhte hpe gara hku shangang shakang ya ai kun?

¹² Hkristan kanawn mazum lam hku nna shangang shakang ya ai. Hkristan ni hpe Yehowa shangang shakang ya ai kaga lam langai gaw, hpunau nauna ni hku na re. Hpunau nauna ni hte hkrum zup nna shada da n-gun jaw hkat lu na matu, grai hkrum mayu sai ngu Pawlu ka wa ai. (Rom 1:11, 12) Meri gaw dai zawn kanawn mazum lam hpe grai manu shadan ai. Shi ndai hku tsun ai: “Nye a manghkang hpe pyi n chye ai hpunau nauna ni hpe Yehowa akyu jashawn ai. Shanhte tsun ai n-gun jaw ga (sh) sa ya ai laika ni gaw, ngai gaja wa ra taw nga ai lam ni re. Ngai zawn manghkang ni hte hkrum nga ai nauna ni hte ga shaga ai mung, karum madi shadaw lam lu ai. Shanhte kaw na grai sharin la lu ai. Nawku hpung hta ngai gaw manu dan ai ngu na hkamsha lu hkra, myitsu salang ni gaw galaw ya ai.”

13. Nawku zuphpawng ni hta shada da gara hku n-gun jaw mai ai kun?

¹³ Shada da n-gun jaw hkat lu na kaja htum shara langai gaw, nawku zuphpawng hta re. Nang zuphpawng sa ai shaloi, myit madung hte tsawra ai lam, chyeju dum ai lam tsun nna, kaga ni hpe shangang shakang ya lu ai. Ga shadawn, kalang mi hta myitsu salang Pita gaw zuphpawng n hpang shi yang, makam masham n bung ai madu wa nga ai nauna hpe ndai hku tsun ai: “Nang hpe ndai kaw hkrum lu ai majaw grai n-gun lu la ai. Ma 6 hte hpe hkyen lajang ya nna shang lawm lu hkra nang karum ya ai.” Nauna gaw myi pri si ni ing wa nna ndai hku bai tsun ai: “Dai ni dai ga hpe na na matu ngai grai ra nga ai.”

14. Hkaw tsun magam hta shang lawm ai gaw anhte hpe gara hku akyu shabyin ya ai kun?

¹⁴ Hkaw tsun magam hku nna shangang shakang ya ai. Kaga ni hpe Chyum Laika teng man lam tsun dan ai shaloi, madat ai raitim, n madat ai raitim, anhte gaw ngwi pyaw lam hkamsha ai. (Gsh 11:25) Hkaw tsun bungli gaw kade daram n-gun lu shangun ai hpe nauna Satesi chye wa ai. Nta masha langai shapraw hkrum ai shaloi shi grai myit n pyaw nna ndai hku sha myit taw ai: “Shi hpe ngai grau karum ya wa ging ai wa.” Dai zawn myit daw hpa lam hpe hparan lu hkra hpa gaw shi hpe karum ya ai kun? Hkaw tsun bungli re. Hkaw tsun magam hta shi shang lawm ai shaloi, hkaw tsun lawk hta shi hpe grau nna ra kadawn nga ai ni hpe sha myit maju jung wa ai. Shi ndai hku tsun ai: “Dai aten hta grai rawt jat ai Chyum ga sharin langai Yehowa ngai hpe jaw ai. Dai gaw ngai hpe grai n-gun lu shangun ai. Nye a prat hta ngai hpe karum ya dik htum gaw hkaw tsun magam re.”

15. Meri tsun ai ga kaw na hpa sharin la lu ai kun?

¹⁵ Nkau gaw tinang a masa lam a majaw, hkaw tsun magam hta law law n shang lawm lu ai ngu hkamsha nga ai. Nang dai hku hkamsha ai nga yang, nang kaja htum galaw nga ai hpe Yehowa ra sharawng ai hpe dum u. Meri a kasi hpe kalang bai myit yu ga. Kaga amyu ga shaga ai hkaw tsun lawk de shi htawt ai shaloi, shi gaw hpa n galaw ya lu ai ngu hkamsha wa ai. Shi ndai hku tsun ai: “Mahtai kadun jaw ai, Chyum daw hti ai, hkaw tsun bungli hta garan  laika jaw ai daram sha ngai galaw lu wa ai.” Dai lam gaw atsawm tsun shaga chye ai ni hte shing daw dat yang, shi gaw hpa n re ai ngu na hkamsha mat shangun ai. Raitim, shi a ningmu hpe galai shai kau ai. Shadawn sharam sha galaw lu ai raitim, Yehowa akyu jashawn lu ai ngu ai hpe chye wa ai. Shi ndai hku tsun ai: “Asak ni hpe hkye ya ai teng man lam gaw asan sha re. Dai teng man lam gaw masha ni a prat hpe galai shai ya ai.”

16. Nta hta sha nga ra ai ni hpe n-gun lu hkra hpa gaw karum ya lu ai kun?

¹⁶ Anhte gaw nta hta sha nga ra yang pyi, anhte a hkaw tsun mayu ai myit hpe Yehowa mu nna manu shadan ya ai. Tinang hpe lanu lahku ya ai ni, tsi tsi ya ai ni hpe sakse hkam lu na ahkang shi lajang ya lu ai. Moi galaw lu ai hte, ya galaw lu ai hpe shing daw na nga yang gaw myit daw wa na re. De a malai, ya Yehowa kade daram karum ya nga ai hpe chye na nga yang, n-gun lu la nna mayak mahkak ni a lapran hta kabu gara let hkam jan lu na re.

17. Kalang ta akyu lu la na zawn masa n nga tim pyi, Hpaji Ningli 11:6 hku nga yang, hkaw tsun bungli hta hpa majaw matut shakut ging ai kun?

¹⁷ Anhte gat ai teng man lam nli tum kaw na, gara mahtang ru jung nna kaba wa na hpe n chye lu ai. (Hpaji Ningli 11:6 hpe hti u.) Ga shadawn, asak 80 jan sai nauna Babara gaw, laika hte, phone hte ayan na sakse hkam ai. Shi a laika langai hta “Na A Matu Karai Kasang Galaw Ya Ai Lam Ni” ngu ai sumhpa lawm ai, 2014 March 1 Sin Langchyi hpe bang dat ya ai. Shi sa dat ai laika gaw, wenyi lam hta katsi mat ai grai na sai yan la langai hpang de du mat ai. Shan la gaw dai Sin Langchyi hpe bai kahtap kahtap na hti ai. Yehowa gaw shi hpe ding tawk ga shaga nga ai ngu madu wa hkamsha wa ai. Dai yan la gaw zuphpawng ni lung hpang wa nna, hpang jahtum, 27 ning na ai hpang Sakse Hkam ni hku nna wenyi lam hta bai shamu shamawt wa ai. Babara gaw shi ka ai laika langai a majaw, dai zawn akyu lu wa ai hpe chye lu ai shaloi, kade daram n-gun lu na hpe myit yu u.

18. Karai a n-gun atsam kaw na akyu lu la na matu anhte hpa galaw mai ai kun?

¹⁸ Yehowa gaw shi a n-gun atsam hpe anhte lu la na matu lam amyu myu hku nna lajang da ya ai. Yehowa lajang da ya ai lam ni re ai akyu hpyi ai, Chyum Laika, Hkristan kanawn mazum lam hte hkaw tsun bungli ni hpe akyu jashawn ai nga yang, anhte hpe karum ya mayu ai Yehowa a myit hte atsam ningja hpe kam ai lam madun nga ai re. “Ding hpring ai ni a matu, ngang ai shingbyi shara tai na nga, shi a myi mungkan ting hproi hkra mada yu nga ai” anhte a sumsing Kawa hpe matut nna kamhpa mat wa ga. ​—2 Hl 16:9.