1. Kaga ni hpe Chyum Laika shiga shawng nnan lang tsun dan ai shaloi hpa lam gaw nang hpe mau shangun ai kun?

TENG man lam hpe mu sai ngu nna nang chye dat ai aten hpe naw dum ai kun? Chyum Laika sharin ya ai lam ni gaw asan sha re. Nang kam wa ai lam ni hpe, masha yawng mung hkap la na ngu shadu na re. Chyum Laika hta lawm ai shiga gaw, ya aten hta lachyum nga ai prat hpe lu shangun nna, htawm hpang myit mada lam mung nga shangun ai hpe nang kam wa ai. (Shk 119:105) Dai majaw, nang tam mu wa ai teng man ai tara hpe manang ni, jinghku ni hpe myit rawt let tsun dan ai. Raitim, hpa byin wa ai? Nang tsun ai hpe shanhte law malawng n hkap la ai majaw, mau mat na re.

2-3. Yesu aten hta masha law malawng gaw Yesu hte seng nna gara hku bai htang ai kun?

² Anhte hkaw tsun ai shiga hpe, kaga ni n hkap la ai shaloi n mau ging ai. Yesu gaw mauhpa lam ni hpe madun nna, Karai a karum shingtau lu nga ai hpe mu lu tim pyi, masha law malawng gaw n hkap la ai. Ga shadawn, Yesu gaw Lazaru hpe bai jahkrung sharawt ya ai. Dai mauhpa lam hpe, ninghkap ai ni atsawm chye ai. Raitim, Yuda nawku htung ningbaw ni gaw Yesu hpe Meshia hku nna n hkap la ai. Yesu yan Lazaru hpe pyi sat kau mayu ai.​—Yhn 11:47, 48, 53; 12:9-11.

³ Masha law malawng gaw Meshia hku nna shi hpe n hkap la na lam Yesu chye ai. (Yhn 5:39-44) Hkalup sara Yawhan a sape ni hpe shi ndai hku tsun ai: “Ngai hta myit kataw ai lam n mu ai wa kadai mung, a lu nga ai.” (Mat 11:2, 3, 6) Masha law malawng gaw Yesu hpe hpa majaw n hkap la ai kun?

4. Ndai sumhpa hta hpa lam hkaja lu na kun?

⁴ Tsa ban langai na masha law malawng gaw, Yesu hpe hpa majaw  n kam ai hte seng nna, ndai sumhpa hte hpang na sumhpa hta hkaja lu na re. Dai ni aten hta mung, masha ni gaw hpa majaw ahtu kataw nga ai hpe chye lu na re. Anhte n ahtu kataw na matu, Yesu hpe grau nna kam hkra hpa majaw galaw ra ai hpe mung chye wa na re.

5. Yesu gaw myihtoi htoi da ai Meshia n re ai ngu nkau gaw hpa majaw sawn la ai kun?

⁵ Masha law malawng gaw Yesu a shingdu labau a majaw ahtu kataw ma ai. Yesu gaw grau htum ai sara rai nna, mauhpa lam ni madun ai hpe shanhte chye ai. Raitim, shanhte gaw matsan ai laksama sara langai a kasha hku na mu ai. Yesu gaw mare kaji re ai Nazaret kaw na re. Yesu a sape byin wa ai Nahtanela pyi shawng nnan hta ndai hku tsun ai: “Nazaret mare na arai kaja lama mi pru lu a ni?” (Yhn 1:46) Yesu nga kaba wa ai Nazaret mare hpe htang n kaba ai rai na re. Shing nrai, Meshia gaw Nazaret hta n re ai sha, Betlehem hta shangai na ngu nna Mihka 5:2 hta tsun da ai myihtoi ga hpe chye da ai majaw mung rai na re.

6. Yesu gaw Meshia re ai hpe chye shangun na gara lam ni nga ai kun?

⁶ Chyum Laika hta gara hku tsun da ai kun? Yesu a hpyen ni gaw Meshia a rusai hte seng nna myit lawm ai lam n nga na re ngu, myihtoi Esaia tau hkrau tsun da ai. (Esa 53:8) Meshia hte seng nna myihtoi htoi da ai lam ni law law nga ai. Dai masha ni she aten la nna atsawm myit sawn sumru na nga yang, Yesu gaw Betlehem hta shangai nna Hkawhkam Dawi a aru arat re ai hpe chye na re. (Luk 2:4-7) Mihka 5:2 hta myihtoi da ai shara kaw Yesu shangai wa ai. Rai yang, manghkang gaw hpa rai kun? Masha ni gaw daw dan lam hpe alawan jahkrat kau ai. Ahkri ahkrai lam ni hpe n tam ai. Dai majaw, shanhte ahtu kataw mat ai.

7. Dai ni aten hta masha law malawng gaw Yehowa a masha ni hpe hpa majaw n hkap la ai kun?

⁷ Dai ni aten hta mung dai hte maren rai nga ai hpe mu lu ai kun? Mu lu ai. Yehowa Sakse law malawng gaw n lusu ai. Dai majaw, “laika n chye ai, yu maya masha” ni re ngu masha ni mu mada ai. (Kas 4:13) Karai a masha ni gaw, mying kaba ai Chyum jawng ni n lung ai majaw, Chyum Laika hpe sharin ya lu na n re ngu nkau shadu ma ai. Nkau gaw Yehowa Sakse ni hpe “Amerikan nawku htung” ngu nna tsun ma ai. Raitim, teng nga yang Yehowa Sakse marai 7 rai yang 1 daram sha Amerikan hta nga ai. Nkau bai rai yang, Yehowa Sakse ni gaw Yesu hpe n hkap la ai ngu tsun ai. Lai wa sai shaning ni hta Yehowa a masha ni hpe “Kumyunit,” “Amerikan kyin-yu,” “nchyun shanang ai ni” ngu nna shaga wa ma ai. Dai zawn n jaw ai lam ni hpe na nna kam ai ni ahtu kataw mat ai.

8. Kasa 17:11 hku nga yang, dai ni aten hta Karai a mayam ni hpe garan ginhka chye na matu, hpa galaw ging ai kun?

⁸ N ahtu kataw hkra gara hku galaw mai na? Gara gaw jaw ai hpe masha ni sawn maram ra ai. Kabu Gara Shiga laika hpe ka ai Luka gaw dai hku galaw na matu shakut wa ai. Shi gaw “yawng mayawng hpe npawt ndung hkren azin ayang tam san la” wa ai. Yesu hte seng nna na da ai lam ni gaw jaw ai hpe, laika hti ai ni hpe shi chye shangun mayu ai. (Luk 1:1-4) Beria mare hta nga ai Yuda masha ni mung Luka zawn sha re. Yesu hte seng ai kabu gara shiga hpe shanhte shawng nnan na ai shaloi, jaw ai n jaw ai hpe chye na matu Hebre Chyum Laika ni hte shingdaw yu wa ai. (Kasa 17:11 hpe hti u.) Dai hte maren dai ni aten na masha ni mung, jaw ai lam hpe chye na matu sawn maram yu ra ai. Karai a masha ni sharin achyin ya ai lam hte Chyum Laika hta tsun da ai lam hpe shingdaw yu ra ai. Dai ni aten na Yehowa a masha ni galaw wa ai lam ni hpe  mung hkaja ra ai. Shingdu labau hpe chye hkra galaw na nga yang, myiman lata ai lam ni, na yawng yawng ai lam ni nga sana n re.

9. Lamu kaw na namik kumla madun dan na matu hpyi shawn ai hpe Yesu nyet kau ai shaloi, masha ni hpa byin mat ai kun?

⁹ Yesu aten na masha ni gaw, Yesu a laklai ai sharin achyin lam hte sha myit n dik ma ai. Kaga lam ni hpe mu mayu ai. “Lamu de na lamik kumla madun dan” nna, Meshia re ai hpe sakse madun na matu hpyi shawn ai. (Mat 16:1) Daniela 7:13, 14 hta tsun da ai lam hpe chye na shut ai majaw rai na re. Rai ti mung, dai myihtoi ga hpe jahpring shatsup ya na Yehowa a aten n rai shi ai. Yesu a sharin achyin ya ai lam hte sha pyi, shi gaw Meshia re ai hpe kam mai sai. Masha ni hpyi shawn ai namik kumla hpe Yesu n madun ai shaloi, shanhte ahtu kataw mat ai.​—Mat 16:4.

10. Meshia hte seng ai Esaia a myihtoi ga hpe Yesu gara hku jahpring shatsup wa ai kun?

¹⁰ Chyum Laika hta gara hku tsun da ai kun? Meshia hte seng nna myihtoi Esaia ndai hku ka da ai: “Shi jahtau na n rai, shi a nsen hpe sharawt na n rai, mare lam hta e na shangun na, n rai.” (Esa 42:1, 2) Yesu gaw hkaw tsun magam hpe, shagrit shanem let azim hte sha galaw wa ai. Hkik hkam ai nawku htingnu ni hpe shi n gap ai, laklai ai hpun palawng ni hpe n hpun ai, laklai ai mying ni hpe n hkam la ai. Shi a prat hta shoihpa ni hkrum ai shaloi mung, mauhpa lam ni galaw dan nna Hkawhkam Herod a yu kaba ai hpe lu la na matu n galaw wa ai. (Luk 23:8-11) Mauhpa lam nkau hpe gaw Yesu galaw wa ai raitim, shi madung myit maju jung ai gaw hkaw tsun magam hpe re. “Dai lam majaw ngai sa du nngai” ngu nna sape ni hpe tsun wa ai.​—Mrk 1:38.

11. Dai ni aten na masha nkau mung gara zawn shut ai ningmu ni nga nga ai kun?

¹¹ Dai ni aten hta mung dai hte maren rai nga ai hpe mu lu ai kun? Mu lu ai. Masha law law gaw hkik hkam hkra gawgap da ai nawku jawng ni, arawng sadang tsaw ai amying hpe lu da ai hpung sara ni, ru npawt hpe pyi n chye sai poi lamang ni galaw ai hpe, yu kaba nga ai. Raitim, dai nawku jawng ni hta lung nga ai ni gaw, Karai Kasang hte shi a yaw shada lam hpe  law law n sharin la lu ai. Anhte a Hkristan zuphpawng hpe lung ai ni gaw, Yehowa hpyi shawn da ai lam, shi a myit ra ai lam hpe gara hku galaw na hte seng nna sharin la lu ai. Anhte a Nawku Htingnu ni gaw grai hkik hkam ai lam n nga ai sha, san seng nna htuk manu ai. Woi awn nga ai ni mung laklai ai hpun palawng ni n hpun ai. Grau ahkyak ai ni re ngu shadu shangun ai mying hpe n hkam la da ai. Anhte a sharin achyin ai lam hte makam masham hpe Karai a Mungga hta madung tawn da ai. Dai pyi naw, dai ni aten na masha law law gaw anhte a nawku daw jau ai lam gaw asan sha rai nna, sharin achyin ya ai lam ni mung, shanhte na mayu nga ai lam ni n re ai majaw ahtu kataw nga ma ai.

12. Hebre 11:1, 6 hta tsun da ai hku nga yang, anhte a makam masham hpe gara ntsa madung nna gawgap ging ai kun?

¹² N ahtu kataw hkra gara hku galaw mai na? Roma hta nga ai Hkristan ni hpe kasa Pawlu ndai hku tsun wa ai: “Kam sham ai gaw na la lu ai kaw nna, na la lu ai mahtang gaw Hkristu a mungga a majaw pru wa ai.” (Rom 10:17) Poi lamang ni gaw ra sharawng na zawn raitim pyi, Chyum Laika hte n htan shai ai nga yang anhte n shang lawm ai. De a malai, Chyum Laika hpe hkaja ai hku na anhte a makam masham hpe ngang kang hkra galaw ai. “Makam masham n rawng yang gaw, shi a man e sharawng awng ai lu la na n rai” ngu tsun da ai majaw, tup hkrak teng man ai machye machyang hta madung da ai makam masham hpe anhte gawgap ra ai. (Hebre 11:1, 6 hpe hti u.) Teng man lam hpe anhte mu da sai ngu sakse madun na matu, lamu kaw na kumla ni anhte n ra ai. Chyum Laika hta na makam masham hpe shangang shakang ya ai sharin achyin lam hpe atsawm hkaja ai hte sha pyi, teng man lam hpe mu sai lam anhte tsep kawp kam mai ai.

13. Masha law law gaw Yesu hpe hpa majaw mara shagun ai kun?

¹³ Yesu a sape ni lu sha n gam ai majaw, Yawhan a sape ni mau ma ai. Shi naw asak hkrung nga ai laman hta gaw sape ni lu sha gam ra na n re ngu Yesu sanglang dan wa ai. (Mat 9:14-17) Yesu gaw htung tara ni hpe n hkan sa ai majaw, Hparishe ni hte ninghkap ai  ni gaw mara shagun wa ai. Laban n htoi hta machyi ai masha hpe shamai ya ai majaw pyi, masin pawt wa ai. (Mrk 3:1-6; Yhn 9:16) Laban nhtoi hpe shanhte hkungga ai zawn gaw galaw tim, maga mi hta gaw nawku htingnu kata hta hpaga galaw na ahkang jaw da ai. Dai hte seng nna Yesu tsun ai shaloi shanhte masin pawt wa ai. (Mat 21:12, 13, 15) Nazaret mare na tara jawng hta Yesu hkaw tsun ai shaloi, shanhte a tingkyeng akyu tam ai lam hte makam masham n nga ai lam hpe tsun dan na matu, Israela ni a labau hpe hkai dan wa ai. Dai shaloi shanhte grai pawt wa ai. (Luk 4:16, 25-30) Shanhte n myit mada da ai Yesu a lailen a majaw masha law law gaw ahtu kataw mat ai.​—Mat 11:16-19.

14. Chyum Laika hte nhtan shai ai htung tara ni hpe Yesu hpa majaw mara shagun wa ai kun?

¹⁴ Chyum Laika hta gara hku tsun da ai kun? Yehowa gaw myihtoi Esaia hku nna ndai hku tsun ai: “Ndai amyu gaw tinang a n-gup hte ngai hpang de sit sa nna, nten hte ngai hpe hkungga lara ma ti mung, myit masin gaw ngai hte tsan gang nna, ngai hpe hkrit hkungga ai lam, masha sharin ya ai hkang da ai ga sha rai nga ai.” (Esa 29:13) Chyum Laika hte nhtan shai ai htung lai hpe Yesu mara shagun wa ai gaw jaw ai lam re. Chyum Laika hta grau nna masha a htung tara hpe ahkyak shatai ai ni gaw, Yehowa hte shi shangun dat ai Meshia hpe nyet kau ai.

15. Dai ni aten na masha law law gaw Yehowa Sakse ni hpe hpa majaw n ra ai kun?

¹⁵ Dai ni aten hta mung dai hte maren rai nga ai hpe mu lu ai kun? Mu lu ai. Hkrismat hte shangai poi zawn re ai Chyum Laika hta n tsun da ai poi ni hta Yehowa Sakse ni n lawm ai majaw, masha ni myit n pyaw ma ai. Chyum Laika hte nhtan shai ai makoi mayang htung lai ni (sh) myu sha poi ni hta Yehowa Sakse ni n shang lawm ai majaw, nkau gaw masin pawt ma ai. Shanhte a nawku dawjau lam hpe Karai Kasang hkap la ai ngu shadu ai majaw rai na re. Raitim, Chyum Laika hta mu lu ai sharin achyin lam hta na, masha a htung lai hpe hkan sa na nga yang Karai hpe myit shapyaw ya lu na n re.​—Mrk 7:7-9.

16. Shakawn Kungdawn 119:97, 113, 163-165 hku nga yang, anhte hpa galaw ra ai kun? Hpa hpe koi ra ai kun?

¹⁶ N ahtu kataw hkra gara hku galaw mai na? Yehowa a tara hte matsun maroi ga ni hpe tsawra ai myit rawt jat hkra galaw ra ai. (Shakawn Kungdawn 119:97, 113, 163-165 hpe hti u.) Yehowa hpe anhte tsawra ai nga yang, shi n ra ai htung lai yawng hpe nyet kau na re. Yehowa hpe tsawra ai myit hpe hkra machyi shangun ai hpa hpe mung ahkaw ahkang jaw na n re.

17. Yesu a aten hta gara myit mada lam a majaw masha ni ahtu kataw ai kun?

¹⁷ Yesu a ban prat hta masha nkau gaw mung masa lam hpe galai shai mayu nga ai. Meshia gaw Roma ni a uphkang ai npu kaw na shanhte hpe shalawt ya na re ngu myit mada da ai. Raitim, Yesu hpe hkawhkam shatai na matu shakut ai shaloi, shi nyet kau ai. (Yhn 6:14, 15) Hkinjawng ni hte kaga ni bai rai yang, mung masa lam hpe Yesu galai shai kau ya na hpe tsang nga ai. Hpa majaw nga yang, Roma ni gaw masin pawt nna shanhte jaw da ai ahkang aya hpe bai dawm la kau na hpe tsang ai majaw re. Dai zawn mung masa lam ni a majaw, Yuda masha law law gaw Yesu hte seng nna ahtu kataw ma ai.

18. Meshia hte seng nna gara myihtoi ga ni hpe, masha ni ahkyak n shatai wa ai kun?

¹⁸ Chyum Laika hta gara hku tsun da ai kun? Myihtoi ga law law hta, Meshia gaw hpang jahtum hta awng dang na ngu tsun da tim, myihtoi ga nkau hta anhte a yubak a matu shawng si ra na re ngu tsun da ai. (Esa 53:9, 12) Rai  yang, shanhte hta hpa majaw shut ai myit mada lam nga ai kun? Yesu a aten na masha law law gaw, shanhte a manghkang ni hpe hparan ya na ga sadi ni hpe sha myit maju jung nna, kaga myihtoi ga ni hpe gaw ahkyak n shatai wa ai majaw re.​—Yhn 6:26, 27.

19. Dai ni aten hta mung, gara myit mada lam a majaw masha ni ahtu kataw nga ai kun?

¹⁹ Dai ni aten hta mung dai hte maren rai nga ai hpe mu lu ai kun? Mu lu ai. Anhte gaw mung masa lam hta n lawm ai majaw, masha ni ahtu kataw ma ai. Ra lata poi ni hta anhte hpe sin dan pa bang shangun mayu ai. Raitim, anhte gaw masha ningbaw hpe lata ai nga yang, Yehowa hpe nyet kau ai hte bung na re. (1 Sa 8:4-7) Masha ni gaw anhte hpe jawng ni, tsi rung ni gap shangun mayu ai. Shawa hpe madi shadaw ya lu ai kaga bungli ni hpe mung galaw shangun mayu ai. Raitim, anhte gaw mungkan a manghkang hpe hparan na matu n re ai sha, hkaw tsun magam hpe myit maju jung ai majaw, masha ni ahtu kataw ma ai.

20. Mahte 7:21-23 hta mu lu ai Yesu a ga hku nga yang, gara lam hpe anhte myit maju jung ging ai kun?

²⁰ N ahtu kataw hkra gara hku galaw mai na? (Mahte 7:21-23 hpe hti u.) Madung hku nna anhte myit maju jung galaw ging ai bungli gaw, Yesu matsun da ai bungli hpe re. (Mat 28:19, 20) Mungkan hta byin nga ai manghkang ni, mung masa lam ni a majaw myit n bra mat ging ai. Masha ni hpe anhte tsawra ai, lanu lahku ya ga ai. Raitim, htingbu ni hpe karum ya lu ai kaja htum lam gaw, Karai a Mungdan lam hpe sharin ya nna, Karai hte hku hkau lam rawt jat wa hkra karum ya ai lam re ai hpe anhte chye ai.

21. Hpa hpe anhte daw dan da ging ai kun?

²¹ Ndai sumhpa hta, tsa ban langai na masha ni gaw Yesu hpe hpa majaw nyet kau ai, dai ni aten hta mung Yesu a a hpang hkan ai ni hpe hpa majaw nyet kau ai hte seng ai lam 4 hpe hkaja wa sai. Anhte koi ra na lam ni gaw dai daram sha rai kun? N re. Hpang na sumhpa hta kaga lam 4 hpe hkaja lu na re. Makam masham ngang kang hkra galaw nna, n nhtu kataw mat na matu daw dan da ga.