1. Tinang hkum tinang gara hku myit chye ai kun?

SHUT shai ai nawku htung ni jahten hkrum ai, Magoga mung na Goga gasat ai, Hara Magedon majan byin ai zawn re ai htawm hpang mabyin ni hpe myit dat ai shaloi, kalang lang myit tsang chye ai kun? ‘Dai zawn hkrit hpa lam ni byin wa ai aten hta ngai matut sadi dung lu na kun?’ ngu nna myit ga ai kun? Rai yang, madung Chyum daw hta lawm ai Yesu a ga ni gaw karum ya na re. “Nanhte myit hkum ru myit: Karai Kasang hpe kam mu” ngu sape ni hpe Yesu tsun wa ai. (Yhn 14:1) Ngang kang ai makam masham gaw, htawm hpang hpe gwi gwi tawt lai lu hkra karum ya na re.

2. Makam masham ngang kang hkra hpa galaw mai ai kun? Ndai sumhpa hta hpa lam bawngban na kun?

² Ya hkrum nga ai chyam dinglik lam ni hpe gara hku tawt lai nga ai hpe san jep ai hku nna makam masham grau ngang kang hkra galaw mai ai. Dai shaloi, gara lam hta makam masham grau ngang kang ra na hpe chye wa na re. Chyam dinglik lam langai hpra hpe hkam jan lu ai hte maren, makam masham grau ngang kang wa na. Dai gaw, htawm hpang hta hkrum wa na chyam dinglik lam ni hpe hkam jan lu hkra karum ya na re. Makam masham grau ra ai masa lam 4 hpe Yesu a sape ni hkrum wa ai. Dai lam hpe ndai sumhpa hta bawngban na re. Ya prat hta mung, dai zawn chyam dinglik lam ni gara hku hkrum chye ai, dai lam ni gaw htawm hpang a matu gara hku hkyen lajang ya lu ai lam hpe mung bawngban mat na re.

3. Mahte 6:30, 33 hku nga yang, Yesu gaw makam masham hte seng nna gara lam hpe chye na hkra galaw ya wa ai kun?

³ Dinghku a baw hku nna, ra kadawn ai lam ni hpe atsawm madi shadaw ya mayu na re. Ndai hpang jahtum nhtoi hta, dai  zawn madi shadaw ya na matu n loi ai. Dang lu ai daram shakut nga ai lapran, bungli n lu mat ai, kaga bungli n lu tam ai baw byin chye ai. Hkristan ni n mai galaw ai bungli re ai majaw, nyet kau ra ai baw mung byin chye ai. Dai zawn masa ni hta, dinghku a ra kadawn ai lam ni hpe lam langai ngai hte Yehowa madi shadaw ya na hpe tsep kawp kam ra ai. Dai lam hpe Bum Ntsa Na Mungga hta, Yesu asan sha tsun da ai. (Mahte 6:30, 33 hpe hti u.) Anhte hpe Yehowa kau da na n re ai hpe tsep kawp kam ai nga yang, Karai mungdan hpe matut shawng tawn na re. Ra kadawn ai lam ni hpe Yehowa madi shadaw ya ai hpe chye wa ai shaloi, shi hte grau hku hkau wa na re. Makam masham mung grau ngang kang wa na re.

4-5. Ra kadawn ai lam ni a majaw dinghku langai myit tsang nga ai aten hta karum shingtau lam gara hku lu wa ai kun?

⁴ Ra kadawn ai lam ni a majaw myit tsang nga ai dinghku langai hpe Yehowa gara hku karum ya ai hpe yu yu ga. Lai wa sai aten hta, Bennizoila kaw nga ai Kat-sa-htro a dinghku gaw hkau na lu nna, atsawm nga lu ai. Hpang hta, sanat lang da ai ni sa wa nna, hkau na hpe zing kau ai. “Ya nga yang, shap da ai shara kaw sha, hkai lu hkai sha ra ai. Jahpawt rawt wa ai hte lani mi na ra kadawn ai lam ni hpe madi shadaw ya na matu Yehowa kaw akyu hpyi ai” ngu kawa Migu tsun ai. Shanhte a prat gaw yak tim, shani shagu ra kadawn ai lam ni hpe sumsing Kawa madi shadaw ya na ngu ai hpe tsep kawp kam ai majaw, zuphpawng ni ayan lung ai. Hkaw tsun bungli ayan shang lawm ai. Prat hta, Mungdan hpe shawng tawn ai majaw, shanhte ra kadawn ai lam ni hpe Yehowa madi shadaw ya ai.

⁵ Migu hte madu jan Yuri gaw, yakhkak ai aten laman, Yehowa gara hku madi shadaw ya wa ai hpe myit maju jung ai. Ra kadawn ai lam ni hpe madi shadaw ya na matu, htap htuk ai bungli tam mu na matu, kalang lang hpunau nauna ni hpe akyu jashawn nna Yehowa karum ya ai. Kalang lang hta gaw, ginjaw garan rung hkye mawai lamang hku nna madi shadaw ya ai. Shanhte hpe Yehowa galoi n kau da ai. Dai majaw, shanhte a nta masha ni makam masham grau ngang kang wa ai. Yehowa a karum shingtau lam hpe hkamsha lu ai hpang, “Yehowa a lata hpe dai zawn dan dan leng leng mu lu ai gaw grai n-gun lu ai. Karai Kasang hpe galoi mung karum ya lu ai jinghku hku nna mu wa sai. Anhte hkrum ai chyam dinglik lam ni gaw, htawm hpang hta hkrum wa na grau sawng ai chyam dinglik lam ni a matu hkyen lajang ya ai re” ngu kasha ma kaw Yosalin tsun ai.

6. Ja gumhpraw yakhkak nga ai aten hta, makam masham ngang kang hkra gara hku galaw lu ai kun?

⁶ Nang mung ja gumhpaw yakhkak nga ai kun? Rai yang, grai yak nga na re. Raitim, mayak mahkak ni a lapran, makam masham ngang kang hkra galaw lu ai. Mahte 6:25-34 hta lawm ai Yesu a ga ni hpe akyu hpyi nna hti u. Myit sawn sumru u. Wenyi lam hta amu law nga ai ni hpe Yehowa madi shadaw ya wa ai dai ni aten na mahkrum madup ni hpe myit sawn sumru u. (1 Ko 15:58) Rai yang, tinang a masa  hte bung ai ni hpe Yehowa karum ya wa ai zawn, tinang hpe mung karum ya na ngu ai hpe kam ai myit grau ngang kang wa na re. Nang hpa ra nga ai, gara hku karum ya ra ai hpe Karai chye ai. Yehowa karum ya ai hpe hkamsha lu ai shaloi, makam masham grau ngang kang wa na. Htawm hpang hta hkrum na grau sawng ai mayak mahkak ni hpe mung hkam jan lu na re.​—Hab 3:17, 18.

7. Mahte 8:23-26 hku nga yang, “laru kaba” gaw, sape ni a makam masham hpe chyam dinglik lam gara hku byin shangun ai kun?

⁷ Kalang mi hta, Yesu hte sape ni gaw, panglai hta nbung laru hkrum wa ai. Dai masa hpe akyu jashawn nna, sape ni makam masham ngang kang hkra galaw ra ai lam ni hpe Yesu sharin ya ai. (Mahte 8:23-26 hpe hti u.) Nbung laru ja wa nna, hka leng ni hta wa ai majaw, li kata de hka ni shang wa tim, Yesu gaw yup pyaw nga ai. Sape ni kajawng nna, hkye la na matu Yesu hpe sa jasu ai. Dai shaloi, Yesu gaw “ai n kam ai ni e, hpa rai hkrit nga myit ta?” ngu tsun ai. Yesu hte hpawn, shanhte hpe mung Yehowa makawp maga ya lu ai hpe shanhte chye ging ai. Hpa sharin la lu ai kun? Nbung “laru kaba” raitim, nbung laru zawn grai kaba ai manghkang ni raitim, hkam jan lu na matu ngang kang ai makam masham gaw karum ya lu ai.

8-9. Ene a makam masham gara hku chyam dinglik hkrum wa ai kun? Shi hpe hpa gaw karum ya wa ai kun?

⁸ Grai sawng ai chyam dinglik lam hpe hkam jan wa ai majaw, makam masham ngang kang wa ai Pwato Riko mungdan na, dinghku n nga ai nauna Ene a lam hpe yu yu ga. Shi gaw, “laru kaba” hkrum wa ai. 2017 hta Hariking Mariya a majaw, nta hten mat ai. Bungli mung n nga mat ai. “Dai zawn yakhkak ai aten hta myit tsang tim, akyu hpyi nna Yehowa hpe kamhpa na matu, kajawng kaja n byin na matu shakut ai” ngu tsun ai.

⁹ Chyam dinglik lam hpe hkam jan lu hkra karum ya wa ai kaga lam langai gaw, madat mara ai lam re ngu Ene tsun ai. “Uhpung a lam matsun ni hpe hkan sa ai gaw, myit simsa na matu karum ya ai. Wenyi lam hte kaga ra kadawn ai lam ni hpe hpunau nauna ni hku nna Yehowa karum ya nga ai hpe hkamsha lu ai. Ngai hpyi ai hta jan nna Yehowa grau galaw ya ai majaw, makam masham grau ngang kang wa ai” ngu tsun ai.

10. “Laru kaba” hkrum nga yang hpa galaw mai ai kun?

¹⁰ Prat hta “laru kaba” hkrum nga ai kun? Shingra tara tsin-yam byin chye ai. Hkam ja lam manghkang zawn re ai laru kaba mung byin chye ai. Dai majaw, myit daw nna hpa galaw ra na hpe n chye ai baw pyi byin chye ai. Raitim, ladu lai myit tsang nna, Yehowa hpe n kamsham mat ai baw n byin ging ai. Akroi anoi akyu hpyi nna Yehowa hte hku hkau hkra galaw u. Lai wa sai aten hta Yehowa karum ya wa ai lam ni hpe bai myit yu nna, makam masham ngang kang hkra galaw u. (Shk 77:11, 12) Ya mung, htawm hpang hta mung nang hpe Yehowa galoi n kau da ai hpe kam u.

11. Woi awn ai ni a ga madat na matu hpa majaw dawdan da ging ai kun?

 ¹¹ Mayak mahkak ni hpe hkam jan lu na matu hpa gaw naw karum ya lu ai kun? Ene tsun ai zawn madat mara ai lam re. Yehowa hte Yesu hpe kamhpa ai ni hpe kam u. Kalang lang, tinang a matu lachyum n nga ai ngu shadu da ai lam matsun ni hpe, woi awn ai ni jaw wa chye ai. Raitim, madat mara ai ni hpe Yehowa shaman chyeju jaw ai. Madat mara ai lam gaw, asak hpe pyi hkye la lu ai lam Chyum Laika kaw na kasi ningli ni, sadi dung ai mayam ni a mahkrum madup ni kaw na chye lu ai. (Pru 14:1-4; 2 Hl 20:17) Dai ni hpe myit sawn sumru u. Rai yang, ya mung, htawm hpang hta mung, uhpung a lamang hte maren galaw na ngu ai dawdan lam grau ngang kang wa na re. (Heb 13:17) Kade n na yang du wa na ru tsang kaba hpe mung hkrit sana n re.​—Gsh 3:25.

12. Luka 18:1-8 hta, makam masham hte hkam jan lu ai atsam hpe gara hku matut mahkai da ai kun?

¹² N tara ai lam gaw, sape ni a makam masham hpe chyam dinglik lam byin shangun na hpe Yesu chye ai. Hkam jan lu hkra karum ya na matu, ga shadawn langai hpe tsun dan ai. Dai hpe Luka Laika hta mu lu ai. N ding man ai tara agyi kaw, tara rap ra lam lu na matu hpyi shawn ai gaida jan a lam re. Myit n daw ai sha, matut hpyi shawn yang lu na hpe shi chye ai. Hpang jahtum hta, hpyi ai hte maren tara agyi jeyang ya ai. Hpa sharin la lu ai kun? Yehowa gaw, n tara ai wa n re. Dai majaw, “Karai Kasang gaw . . . shi hpe shani shana hpyi jahtau nga ai, shi a lata la ai ni a hpang maga de, tara n dara ya ai, nga na wu ni?” ngu Yesu tsun ai. (Luka 18:1-8 hpe hit u.) “Masha Kasha du sa ai nhtoi hta, ndai mungkan ga ntsa e makam masham nga nga ai gaw, mu lu na a kun?” ngu nna mung matut tsun ai. N tara ai lam ni hkrum ai shaloi, gaida jan zawn makam masham nga ai hpe, myit galu ai, myit n daw ai hku nna sakse madun ra ai. Dai zawn ngang kang ai makam masham nga yang, anhte hpe Yehowa alawan karum ya na hpe kam wa na re. Akyu hpyi ai atsam hpe mung kam ra ai. Kalang lang, n myit mada da ai lam hte mahtai lu ai baw mung nga chye ai.

13. Akyu hpyi ai gaw dinghku langai hpe gara hku karum ya wa ai kun?

¹³ Kon-gu mungdan hta nga ai nauna Baro a lam hpe myit yu ga. Laknak lang ai uhpung a gasat ai lam a majaw, shi gaw, n kamsham ai madu wa, asak 15 ning re ai kasha numsha hte rau mare kaw na hprawng ra ai. Lam hta laknak lang ai ni hte hkrum ai majaw, rim hkrum nna sat kau na ngu nna pyi jahkrit shama hkrum ai. Baro hkrap ai shaloi, kasha gaw kanu myit simsa na matu, Yehowa a amying gang nna nsen ja ja hte akyu hpyi ya ai. Dai hpang, laknak lang da ai ningbaw wa gaw, “akyu chye hpyi hkra nang hpe kadai sharin ya ai?” ngu nna san ai. “Mahte 6:9-13 hta lawm ai ga ni hte maren akyu chye hpyi hkra anu sharin ya ai” ngu tsun dan ai. Ningbaw wa gaw, “kanu kawa ni hte rau bai wa sanu. Nanhte a  Karai Yehowa makawp maga ya u ga” ngu nna tsun ai.

14. Gara lam gaw makam masham chyam dinglik lam byin shangun ai kun? Hkam jan lu hkra hpa gaw karum ya na kun?

¹⁴ Akyu hpyi ai atsam hpe ahpa atang n sawn la na matu dai mabyin gaw madun dan ai. Raitim, akyu hpyi ga ni kalang ta mahtai n lu yang gaw, gara hku kun? Yesu a ga shadawn kaw na gaida jan zawn, nang hpe Karai kau da na n re. Aten du ai shaloi, lam langai ngai hte mahtai jaw na hpe kam let matut akyu hpyi u. Chyoi pra ai wenyi lu na matu matut hpyi shawn u. (Hpl 4:13) Moi hkrum wa ai mayak mahkak ni hpe malap kau ai du hkra, kade n na yang, Yehowa shaman chyeju law law jaw na hpe dum u. Yehowa a karum shingtau lam hte mayak mahkak ni hpe sadi dung let hkam jan na nga yang, htawm hpang hkrum wa na lam ni a matu, makam masham ngang kang nga na re.​—1 Pe 1:6, 7.

15. Mahte 17:19, 20 hku nga yang, sape ni gara mayak mahkak hkrum wa ai kun?

¹⁵ Mayak mahkak ni hpe tawt lai lu hkra, makam masham gaw karum ya na ngu sape ni hpe Yesu sharin ya ai. (Mahte 17:19, 20 hpe hti u.) Kalang mi hta, sape ni gaw nat hpe n lu shaden kau ai. Moi gaw shaden kau lu ai. Ya gaw, hpa majaw kun? Makam masham grau ra nga ai majaw re ngu Yesu tsun ai. Makam masham nga yang, bum zawn kaba ai mayak mahkak ni hpe pyi tawt lai lu na ngu tsun ai. Dai ni aten hta mung, dai zawn mayak mahkak ni hkrum chye ai.

16. Yawn hpa mabyin hpe hkam jan lu na matu Gedi hpe makam masham gaw gara hku karum ya ai kun?

¹⁶ Gwatimala mung na nauna Gedi a lam yu yu ga. Lani mi hta, zuphpawng ngut nna nta wa ai shaloi, madu wa Edi sat hkrum ai. Dai zawn yawn hkyen ai lam hpe hkam jan lu na matu, makam masham gaw Gedi hpe gara hku karum ya ai kun? “Yehowa kaw akyu hpyi nna lit hpe ap da ai. Dai majaw, myit simsa lam lu ai. Nta masha ni hte hpunau nauna ni hku nna Yehowa karum ya ai. Hkaw tsun magam hta amu law nga ai gaw, yawn hkyen ai lam hpe hkyem sa shangun ai. Hpang shani a matu ladu lai myit n tsang na matu, lani mi a matu sha myit na matu karum ya ai. Ndai yawn hpa mabyin hkrum ngut ai hpang, htawm hpang hta gara chyam dinglik lam hkrum wa tim, Yehowa, Yesu, uhpung a karum shingtau lam hte hkam jan lu na ngu ai hpe kam wa ai” ngu tsun ai.

17. Bum zawn kaba ai mayak mahkak ni hkrum ai shaloi hpa galaw mai ai kun?

¹⁷ Tsawra ai marai langai si mat ai majaw yawn hkyen nga ai kun? Chyum Laika hta lawm ai hkrung rawt ai hte seng ai lam ni hpe hkaja ai hku nna myit mada lam grau ngang kang hkra galaw u. Nta masha langai shapraw hkrum ai majaw yawn nga ai kun? Karai sharin shaga ai gaw, kaja htum re ai hpe grau kam wa hkra, sawk sagawn ai lam ni galaw u. Gara manghkang mi hkrum tim, makam masham ngang kang hkra galaw lu ai ahkaw ahkang hku  nna akyu jashawn u. Yehowa kaw myit masin mahkra hte akyu hpyi u. Tinang hkrai sha hkum nga. Hpunau nauna ni hte hku hku hkau hkau nga u. (Gsh 18:1) Myit hta yawn hkyen nga tim, hkam jan lu ai atsam rawt jat hkra karum ya na lam ni hta shang lawm u. (Shk 126:5, 6) Zuphpawng lung ai, hkaw tsun magam hta shang lawm ai lam ni hpe ayan galaw u. Chyum Laika ayan hti u. Yehowa jaw na shaman chyeju ni hpe myit maju jung u. Yehowa karum ya ai hpe hkamsha lu ai shaloi, makam masham grau ngang kang wa na re.

18. Tinang a makam masham gawngkya nga ai hpe sadi hkrup yang, hpa galaw mai ai kun?

¹⁸ Moi aten (sh) ya aten hkrum nga ai manghkang ni a majaw, makam masham gawngkya nga ai hpe sadi hkrup yang, myit hkum daw. Makam masham ngang kang hkra galaw lu ai ahkaw ahkang hku nna mu mada u. “Anhte a kam sham ai myit shalaw ya mi” ngu Yesu a kasa ni zawn akyu hpyi u. (Luk 17:5) Ndai sumhpa hta bawngban wa sai mahkrum madup ni hpe myit sawn sumru u. Migu yan Yuri zawn, Yehowa karum ya wa ai lam ni hpe galoi mung dum nga u. Baro a kasha Ene zawn, grai yak ai masa ni hkrum wa yang, Yehowa kaw akroi anoi akyu hpyi u. Gedi zawn, nta masha ni hte hpunau nauna ni hku nna Yehowa karum ya na hpe kam u. Ya hkrum nga ai mayak mahkak ni hpe hkam jan lu na matu, Yehowa hpe karum na ahkang jaw u. Rai yang, htawm hpang hta hkrum wa na mayak mahkak ni hpe hkam jan lu hkra Yehowa karum ya na hpe grau kam wa na re.

19. Yesu hpa hpe kam ai kun? Nang hpa hpe kam mai ai kun?

¹⁹ Sape ni a makam masham gawngkya nga ai hpe Yesu madun dan tim, Yehowa a karum shingtau lam hte chyam dinglik lam ni hpe, shanhte awng dang lu na hpe kam ai. (Yhn 14:1; 16:33) Ngang kang ai makam masham nga yang, du wa na ru tsang kaba hpe masha wunawng wuwa tawt lai na ngu ai hpe mung Yesu kam ai. (Shr 7:9, 14) Nang mung wunawng wuwa kaba hta lawm na kun? Ya kaw nna, makam masham ngang kang hkra dang lu ai daram shakut nga yang, Yehowa a karum shingtau lam hte lawm lu na re.​—Heb 10:39.