1-2. Shada da hpe n-gaw nwai ai tsawra myit hpa majaw madun ging ai kun?

SHADA da n-gaw nwai ai tsawra myit madun ging ai lam ni nga ai. Nkau mi gaw hpa ni rai kun? “Chyeju myit hte kangka re ai myit hkum kau da et; . . . Karai Kasang a man e mung, masha a man e mung, Nang myi man pa nna, kajai gumhkawng ai hkrum na ndai.” “Matsan dum chye ai [n-gaw nwai ai tsawra myit madun ai, NWT] wa gaw, shi hkum hpe lanu lahku nga ai.” “Ding hpring ai hte chyeju lam hkan tam ai wa gaw, Asak hkrung ai” ngu Ga Shagawp Laika hta mahtai jaw da ai.​—Gsh 3:3, 4; 11:17; 21:21.

² Dai Chyum daw ni hta, n-gaw nwai ai tsawra myit madun ging ai lam 3 hpe tsun da ai. Langai, dai tsawra myit madun ai gaw Karai a man hta anhte hpe manu dan ai ni byin shangun ai. Lahkawng, dai tsawra myit madun ai gaw tinang nan akyu lu ai. Ga shadawn, kaga ni hte hku hkau lam ngangkang na. Masum, dai tsawra myit madun yang, htani htana asak hte hpawn, kaga shaman chyeju ni lu na. Dai majaw, “langai hte langai . . . n-gaw nwai ai hte matsan dum ai myit madun mu” ngu ai sadi jaw ga hpe hkan sa ging ai.​—Zeh 7:9.

3. Ndai sumhpa hta gara ga san ni hpe bawngban na kun?

³ Ndai sumhpa hta, ga san 4 a mahtai hpe bawngban lu na re. Kadai ni hpe n-gaw nwai ai tsawra myit madun ging ai kun? Ruhta Laika kaw na n-gaw nwai ai tsawra myit a lam hpa sharin la lu ai kun? Dai ni aten n-gaw nwai ai tsawra  myit gara hku madun mai ai kun? N-gaw nwai ai tsawra myit madun ai ni gara akyu lu na kun?

4. N-gaw nwai ai tsawra myit madun ai hta Yehowa hpe gara hku kasi la mai ai kun? (Marku 10:29, 30)

⁴ Shawng na sumhpa hta chye wa sai hte maren, Yehowa gaw shi hpe tsawra nna nawku ai ni hpe n-gaw nwai ai tsawra myit madun ai. (Dan 9:4) Karai Kasang “tsaw ra nga ai kashu kasha” ni re ai majaw, Shi hpe kasi la mayu ai. (Ehp 5:1) Dai majaw, hpunau nauna ni hpe dai tsawra myit madun ra ai.​—Marku 10:29, 30 hpe hti u.

5-6. “Sadi dung ai” ngu ai gaw law malawng hku nna hpa hpe tsun ai kun?

⁵ N-gaw nwai ai tsawra myit a lachyum hpe grau chye na magang, hpunau nauna ni hpe tsawra myit grau madun lu magam re. Dai zawn grau chye na na matu, n-gaw nwai ai tsawra myit hte sadi dung ai lam hpe shingdaw yu ga. Ga shadawn langai hpe hkaja yu ga.

 ⁶ Kungpani langai hta, shaning law law bungli galaw ai wa hpe sadi dung ai bungli masha ngu shaga mai ai. Bungli galaw wa ai shaning ni laman, bungli madu hpe mu yang she mu ga na re. Kungpani a rit kawp tara ni hpe mung ra yang she ra na re. Kungpani hpe n ra tim, shabrai ayan lu ai majaw myit dik nga ai. Dai hta grau kaja ai bungli n lu ai nga yang, pinsin (hkring sa) la ai aten du hkra, dai kaw sha matut galaw nga na re.

7-8. (a) N-gaw nwai ai tsawra myit hpa majaw madun ai kun? (b) Ruhta Laika hpe hpa majaw bawngban na kun?

⁷  Laika pang 6 hta bawngban wa ai sadi dung ai lam hte n-gaw nwai ai tsawra myit a shai ai lam gaw myit majing hte galaw ai lam re. Chyum Laika prat kaw na Karai a mayam ni hpa majaw n-gaw nwai ai tsawra myit madun wa ai kun? Lit nga ai majaw n re ai sha, myit majing hte madun wa ai. Dawi a lam hpe myit yu u. Dawi hpe manang Yonahtan a kawa sat mayu nga tim pyi, Yonahtan hpe Dawi myit majing hte n-gaw nwai ai tsawra myit madun ai. Yonahtan si mat nna shaning law law na ai hpang hta pyi, Yonahtan a kasha Mehpiboshet hpe dai tsawra myit matut madun ai.​—1 Sa 20:9, 14, 15; 2 Sa 4:4; 8:15; 9:1, 6, 7.

⁸ Ruhta Laika kaw na, dai tsawra myit a lam law law sharin la lu ai. Ruhta Laika hta lawm ai masha ni kaw na dai tsawra myit a lam hpa sharin la lu ai kun? Nawku hpung hta gara hku tatut hkan sa mai ai kun? *

9. Yehowa ari jaw ai ngu Naomi hpa majaw hkamsha ai kun?

⁹ Ruhta Laika hta, Naomi, kanam Ruhta, Bua ni a lam lu hti ai. Bua gaw Naomi a madu wa hte jinghku daw nna, Karai hpe hkrit hkungga ai wa re. Israela mung hta hku hku ai majaw, Naomi, madu wa hte kasha yan gaw Moba mung de htawt mat wa ai. Dai hta, madu wa si mat ai. Kasha yan gaw, dinghku de mat ai. Hpang hta, kasha yan si mat ai. (Rut 1:3-5; 2:1) Dai lam ni a majaw, Naomi grai myit daw ai. Yehowa ari jaw ai ngu nna pyi hkamsha ai. “Yehowa a lata ngai hta numdan [ari jaw, JCLB] nga ai,” “N-gun Chyalai rawng ai wa gaw, nachying hka ai hku ngai hpe shatai ni ai,” “Yehowa  ngai hpe shagrit kau nna, N-gun Chyalai rawng ai wa, ngai hpe matsan shangun kau ni” ai ngu tsun ai.​—Rut 1:13, 20, 21.

10. Naomi a mara shagun ai ga hpe Yehowa gara hku bai htang ai kun?

¹⁰ Naomi a mara shagun ai ga hpe Yehowa gara hku bai htang ai kun? “Lawhpa myit [adip arip lam, NWT] gaw hpaji rawng ai wa hpe mana shangun nga ai” hpe Yehowa chye na ai. (Hpj 7:7) Tinang a makau hta Yehowa nga ai hpe Naomi chye na na matu, karum shingtau lam ra nga ai. Karai Kasang gara hku karum ya ai kun? (1 Sa 2:8) Naomi hpe dai tsawra myit madun na matu, Ruhta hpe shadut ya ai. N-gun bai lu wa na matu, Yehowa naw tsawra nga ai hpe chye na na matu, Naomi hpe Ruhta tsawra myit hte karum ya ai. Ruhta kaw na hpa sharin la mai ai kun?

11. Myit daw nga ai ni hpe tsawra myit nga ai hpunau nauna ni hpa majaw karum ya ai kun?

¹¹ Jamjau hkrum nga ai ni hpe karum ya na matu, n-gaw nwai ai tsawra myit gaw shadut ya ai. Naomi hpe Ruhta n kau da ai zawn, dai ni aten hta mung, tsawra myit nga ai hpunau nauna ni gaw myit daw nga ai ni hpe n kau da ai. Dang lu ai daram, matut karum ya ma ai. Hpunau nauna ni hpe shanhte tsawra ai. (Gsh 12:25; 24:10) Kasa Pawlu mung, “myit kaji nga ai ni hpe shalan shabran nga mu, gawngkya ai ni hpe shadaw shangang nga mu, masha yawng hte hpe galu kaba ai myit madun nga mu” ngu nna n-gun jaw da ai.​—1 Ht 5:14.

12. Myit daw nga ai hpunau nauna ni hpe karum ya lu ai tang du ai lam gaw hpa rai kun?

¹² Myit daw nga ai hpunau nauna ni hpe tang du hkra karum ya lu ai lam gaw, shanhte tsun ai hpe madat ya ai, shanhte hpe tsawra ai lam kam hkra galaw ai hku nna re. Manu dan ai sagu ni hpe lanu lahku ya ai hpe Yehowa sadi hkrup ai. (Shk 41:1) Ga Shagawp 19:17 hta, “matsan mayan wa hpe matsan dum ai wa gaw, Yehowa hpe hkoi ya ai rai nna, shi galaw ai hte maren bai hkam la na ra ai” ngu tsun da ai.

13. Ruhta hte Orpa hpa shai ai kun? Naomi hpe n-gaw nwai ai tsawra myit madun na matu Ruhta hpa majaw dawdan ai kun? (Makawp sumla hpe yu u.)

¹³ Madu wa hte kasha yan si mat ai hpang, Naomi hpa byin ai hpe hkaja ai kaw na, dai tsawra myit a lam hpe grau chye lu ai. “Yehowa shi a amyu hpe kawan katsan yu wu ai rai nna, lusha bai jaw sai” ngu ai shiga Naomi na ai shaloi, bai wa na matu dawdan ai. (Rut 1:6) Nnan hta, kanam 2 yan hkan wa ai. Raitim, lam hta Moba mung de bai wa na matu kanam ni hpe Naomi 3 lang tsun ai shaloi, “Orpa mahtang gaw kamoi hpe pup shakram kau da wu ai; Ruhta chyawm gaw shi hta a manoi nga ai.” (Rut 1:7-14) Naomi tsun ai hte maren, Orpa nta de bai wa mat  ai. Ruhta chyawm gaw nta de bai wa mai tim, Naomi hpe n-gaw nwai ai tsawra myit hte tsawra ai majaw matut nga na matu dawdan ai. (Rut 1:16, 17) Dai gaw lit nga ai majaw n re ai sha, myit majing hte dawdan ai re. Naomi hpe Ruhta dai tsawra myit matut madun ai. Hpa sharin la lu ai kun?

14. (a) Dai ni aten hta, tsawra myit nga ai hpunau nauna ni hpa galaw nga ai kun? (b) Hebre 13:16 hku nga yang, gara zawn hkungga ni hpe Karai Kasang ra sharawng ai kun?

¹⁴ N-gaw nwai ai tsawra myit gaw myit mada ai lam hta n-ga galaw na matu shadut ya ai. Moi prat na zawn, ya aten hta mung hpunau nauna ni gaw shada da n chye hkat tim, dai tsawra myit madun nga ai. Ga shadawn, shingra tsin-yam hkrum ai shaloi, gara hku karum ya lu ai hpe chye mayu ma ai. Nawku hpung hta marai langai ngai yakhkak hkrum yang, kalang ta karum ya ai. Tsa ban langai na Makedoni Hkristan ni zawn sha, myit mada da ai hta grau galaw nga ai. Sak jaw nna karum ya ai. Matsan ai hpunau nauna ni hpe dang lu ai “hta n-ga” karum ya ai. (2 Ko 8:3) Dai zawn tsawra myit madun ai hpe Yehowa ra sharawng na re.​—Hebre 13:16 hpe hti u.

15-16. Asum n jaw ai lam Ruhta gara hku madun wa ai kun?

¹⁵ Naomi hpe Ruhta karum ya ai lam kaw na law law sharin la lu ai. Nkau hpe hkaja yu ga.

¹⁶ Asum hkum jaw. Kamoi hte rau Yuda mung de Ruhta hkan wa ai shaloi, nnan hta Naomi n hkap la ai. Raitim, Ruhta asum n jaw ai. “Ruhta mahtang hkan mayu ai myit, ting ting rai nga ai hpe, Naomi mu wu yang, shi atsin sha nga nga kau wu ai.”​—Rut 1:15-18.

17. Aloi sha asum n jaw na matu hpa gaw karum ya ai kun?

¹⁷ Hkan sa mai ai lam: Myit daw nga ai ni hpe karum ya ai shaloi, myit galu ra ai. Shanhte hpe asum n jaw ging ai. Karum shingtau lam ra nga ai nauna langai gaw nnan hta karum ya ai lam hpe nyet kau chye ai. * Raitim, dang lu ai daram karum ya na matu, n-gaw nwai ai tsawra myit gaw shadut ya na re. (Gal 6:2) Hpang de, anhte karum ya ai lam hpe hkap la wa na hpe myit mada mai ai.

18. Ruhta hpa majaw myit hkra machyi chye ai kun?

¹⁸ Loi loi hte masin hkum pawt. Betlehem mare de Naomi hte Ruhta du nna, htingbu ni hte hkrum ai shaloi, Naomi gaw, “lu su hpring chyat pru wa nngai, Yehowa ngai hpe kaman woi wa ni ai” ngu tsun ai. (Rut 1:21) Dai ga ni na ai shaloi, Ruhta gara hku hkamsha na hpe myit yu u. Naomi hpe dang lu ai daram karum ya ai. Rau hkrap ai. Shalan shabran ya ai. Nhtoi law law rau lam hkawm wa ai. Dai pyi, “Yehowa ngai hpe kaman woi wa ni ai” ngu Naomi tsun ai. Makau hta nga ai Ruhta a karum shingtau lam hpe hpa zawn n nawn ai. Ruhta grai myit hkra machyi na re. Raitim, Naomi hpe n kau da ai.

19. Myit daw nga ai ni hpe n kau da na matu hpa gaw karum ya ai kun?

¹⁹ Hkan sa mai ai lam: Dai ni aten hta mung myit daw nga ai nauna hpe dang lu ai daram karum ya nga tim, anhte hpe myit hkra machyi hkra tsun wa chye ai. Raitim,  loi loi hte masin hkum pawt. Karum shingtau ra nga ai nauna hpe hkum kau da. Shi hpe shalan shabran ya lu ai lam mu tam hkra Yehowa hpang karum hpyi u.​—Gsh 17:17.

20. Ruhta matut hkawm sa lu na matu hpa majaw n-gun lu wa ai kun?

²⁰ Htap htuk ai aten hta n-gun jaw ga tsun u. Naomi hpe Ruhta n-gaw nwai ai tsawra myit madun tim, Ruhta mung n-gun jaw lam ra nga ai. Ruhta hpe n-gun jaw na matu, Bua hpe Yehowa shadut ya ai. “Na marai a akyu Yehowa nang hpe htang ya u ga law; shi a singkaw shingnip shingwung na nga, nang sit sa ai lsraela Karai Kasang Yehowa gaw, chyeju hkum sumhpa, nang hpe jaw u ga” ngu nna Ruhta hpe Bua tsun ai. Ruhta grai n-gun lu mat na re. “Ga ngwi ga pyaw hte ngai hpe shalan nna, na a mayam jan hpe kabu shangun ni ai” ngu Ruhta tsun ai. (Rut 2:11-13) Aten hkrak tsun ai Bua a n-gun jaw ga a majaw, matut hkawm sa lu na matu Ruhta n-gun lu wa ai.

21. Esaia 32:1, 2 hku nga yang myitsu salang ni hpa galaw ra ai kun?

²¹ Hkan sa mai ai lam: Kaga ni hpe n-gaw nwai ai tsawra myit madun ai ni gaw, tinang nan kalang lang n-gun jaw lam ra chye ai. Ruhta a tsawra myit hte galaw ai lam hpe Bua sadi hkrup nna shakawn ya ai zawn, dai ni aten na myitsu salang ni mung kaga ni hpe karum ya nga ai hpunau nauna ni hpe shakawn ya ai. Dai zawn, aten hkrak tsun ai shakawn ai ga ni gaw, matut hkawm sa na matu n-gun lu shangun ai.​—Esaia 32:1, 2 hpe hti u. 

22-23. Naomi a myit jasat gara hku galai shai mat ai kun? Hpa majaw kun? (Shakawn 136:23, 26)

²² Bua gaw Ruhta yan Naomi hpe lusha ni sharawng awng let madi shadaw ya ai.  (Rut 2:14-18) Shi a gam jaw gam ya ai lam hpe Naomi gara hku bai htang ai kun? “Hkrung nga ai ni hpe mung, si mat sai ni hpe mung chyeju jaw n jin ai Yehowa gaw shi hpe shaman ya u ga” ngu Naomi tsun ai. (Rut 2:20, NWT) Naomi a myit jasat galai shai mat sai. Nnan hta, “Yehowa ngai hpe shagrit kau” ai ngu grai yawn let tsun wa tim, ya, Yehowa hpe “chyeju jaw n jin ai” ngu kabu gara let tsun wa ai. Hpa majaw dai zawn myit jasat galai shai mat ai kun?

²³ Yehowa karum ya ai hpe Naomi mu wa ai majaw re. Yuda mung de bai wa ai lam dingyang hta Ruhta hpe akyu jashawn nna, shi hpe Yehowa karum ya ai. (Rut 1:16) “Nta chyen rai nga ai” Bua gaw shan lahkawng hpe sharawng awng let karum ya ai aten hta mung, Yehowa karum ya ai hpe Naomi hkamsha lu ai. * (Rut 2:19, 20) ‘Yehowa ngai hpe n kau da ai. Ngai hte galoi mung rau nga ai hpe ngai chye sai’ nga nna Naomi myit hkrup na re. (Shakawn 136:23, 26 hpe hti u.) Shi hpe n kau da ai majaw, Ruhta yan Bua hpe Naomi grai chyeju dum na re. Shanhte 3 kade daram kabu nga na hpe shingran yu mai ai.

24. Hpunau nauna ni hpe hpa majaw n-gaw nwai ai tsawra myit madun ging ai kun?

²⁴ Ruhta Laika kaw na n-gaw nwai tsawra myit a lam hpa chye lu ai kun? Myit daw nga ai hpunau nauna ni hpe loi loi hte asum n jaw na matu, dai tsawra myit gaw shadut ya ai. Sak jaw nna karum ya na matu mung shadut ya ai. Myitsu salang ni hku nna, dai tsawra myit madun nga ai ni hpe, htap htuk ai aten hta n-gun jaw ra ai. Karum shingtau ra nga ai ni n-gun bai lu wa ai hpe mu ai shaloi, anhte grai kabu ai. (Kas 20:35) N-gaw nwai ai tsawra myit matut madun ging ai madung lam gaw, “n-gaw nwai re ai” Karai Yehowa hpe kasi la mayu ai majaw, Karai a myiman lu mayu ai majaw re.​—Pru 34:6; Shk 33:22.