1. Hpa galaw na matu anhte hpe Yehowa n-gun jaw ai kun?

N-GAW NWAI ai tsawra myit madun ai hpe Yehowa ra sharawng ai. * (Hos 6:6) Shi a mayam ni hpe mung, dai tsawra myit madun na matu n-gun jaw ai. “Tsawra matsan dum ai” myit madun na matu myihtoi Mihka hku nna n-gun jaw ai. (Mik 6:8) Raitim, n-gaw nwai ai tsawra myit gaw hpa hpe tsun mayu ai lam shawng chye ra ai.

2. N-gaw nwai ai tsawra myit ngu ai gaw hpa rai kun?

² Mungkan Nnan Ga Gale Chyum Laika hta “n-gaw nwai ai tsawra myit” ngu ai ga hpe 230 lang daram mu lu ai. “N-gaw nwai ai tsawra myit” ngu ai gaw hpa rai kun? “Marai langai ngai hpe dai tsawra myit hte tsawra yang, shi hpe grai tsawra na, matut tsawra na, shi hpe galoi mung sadi dung na re. Shinggyim masha ni hpe madun ai Karai a tsawra myit hta chyahkring hkring lang da ai. Masha shada da madun ai tsawra myit hta mung lang ai.” Dai tsawra myit hpe Yehowa gaw kaja htum madun wa ai. Masha ni hpe dai tsawra myit hte Yehowa gara hku tsawra ai lam, ndai sumhpa hta bawngban na re. Shada da dai tsawra myit madun ai hku nna, Yehowa hpe gara hku kasi la lu ai lam hpang na sumhpa hta bawngban na re.

3. Yehowa gaw Mawshe hpe tinang a lam gara hku tsun dan ai kun?

³ Egutu mung kaw na Israela ni pru wa nna, kade n na yang tinang a mying hte atsam ningja ni a lam Mawshe hpe Yehowa tsun dan ai. “Yehowa, Yehowa sumnung ai myit hte chyeju  hpring ai, myit galu ai hte n-gaw nwai re ai, matsan dum ai hte sadi sahka hpring ai: masha hkying hkying mun mun hpe matsan dum ai myit madun nna, shut hpyit ai, tara tawt lai ai, yubak mara raw dat kau ya ai” ngu tsun ai. (Pru 34:6, 7) Dai ga ni hku nna, tinang a n-gaw nwai ai tsawra myit hte seng nna Mawshe hpe Yehowa tsun dan ai.

4-5. (a) Tinang a lam hpe Yehowa gara hku tsun dan ai kun? (b) Gara ga san ni hpe bawngban na kun?

⁴ N-gaw nwai ai tsawra myit nga ai sha n-ga, “n-gaw nwai myit law htam” ai ngu, Yehowa gaw tinang hkum tinang tsun da ai. (Shy 3:32) Dai hpe ka shagu, shinggyim masha hpe n re ai sha, Yehowa hpe sha tsun mayu ai. Tinang hte seng nna, Yehowa dai zawn tsun ai gaw laklai ai. N-gaw nwai ai tsawra myit gaw, Karai a matu grai ahkyak ai gaw dan leng nga ai. * Dai majaw, Hkawhkam Dawi gaw, “Yehowa e, na a chyeju sumsing lamu du hkra, . . . Karai Kasang e, na a chyeju gade wa hpu nga lit hka! Masha kasha ni, na singkaw a shingnip hta shingbyi nga ma ai” ngu tsun ai re. (Shk 36:5, 7) Dawi zawn, Karai a n-gaw nwai ai tsawra myit hpe anhte teng sha chyeju dum ai kun?

⁵ N-gaw nwai ai tsawra myit a lam grau chye na matu, ndai ga san 2 hpe bawngban yu ga: Kadai ni hpe Yehowa n-gaw nwai ai tsawra myit madun ai kun? Yehowa a n-gaw nwai ai tsawra myit kaw na gara hku akyu lu la mai ai kun?

6. Kadai ni hpe Yehowa n-gaw nwai ai tsawra myit madun ai kun?

⁶ Kadai ni hpe Yehowa n-gaw nwai ai tsawra myit madun ai kun? Chyum Laika hta, “sun hkauna amu,” “tsabyi jahku hte asau,” “sharin achyin ai,” “chye chyang ai,” “hpaji byeng-ya” zawn re ai lam ni hpe anhte tsawra ai ngu tsun da ai. (2 Hl 26:10; Gsh 12:1; 21:17; 29:3) Raitim, n-gaw nwai ai tsawra myit hpe arung arai a lam, lama ma a lam tsun ai shaloi n lang ai. Shinggyim masha hpe tsun ai shaloi hta she lang ai. Raitim, masha yawng hpe gaw dai tsawra myit Yehowa n madun ai. Tinang hte laksan hku hkau lam nga ai ni hpe sha madun ai. Shi gaw jinghku ni a ntsa sadi dung ai. Shanhte hte seng nna grai kaja ai yaw shada lam nga ai. Dai tsawra myit galoi mung kawp mat na n re.

7. Shinggyim masha yawng hpe Yehowa tsawra myit gara hku madun ai kun?

⁷ Shinggyim masha yawng hpe Yehowa tsawra myit madun ai. “Karai Kasang a Kasha hpe kam sham ai ni nlang hte gaw, hten bya n hkrum ai sha, htani htana asak lu la mu ga  nga, Karai Kasang gaw shi a Kasha shingtai hpe jaw kau ai kaw du hkra, mungkan ga [shinggyim masha ni] hpe tsaw ra wu ai” ngu Nikodi hpe Yesu tsun ai.​—Yhn 3:1, 16; Mat 5:44, 45.

8-9. (a) Mayam ni hpe Yehowa hpa majaw n-gaw nwai ai tsawra myit madun ai kun? (b) Ya, gara lam bawngban na kun?

⁸ Shawng hta tsun wa ai hte maren, Yehowa gaw tinang hte laksan hku hkau lam nga ai mayam ni hpe sha n-gaw nwai ai tsawra myit madun ai. Dai hpe Hkawhkam Dawi hte myihtoi Daniela a ga ni kaw na chye lu ai. Ga shadawn, “nang hpe chye chyap ai ni a matu na a chyeju, . . . a madun nga u,” “Yehowa hpe hkrit kamyin ai ni a ntsa e, Shi a chyeju gaw chyaloi nhkoi kaw nna prat dingsa du hkra, a nga nga ai” ngu Dawi tsun ai. “Madu e, nang hpe tsaw ra nna, na a hkang da ai ga hkan shatup ai ni hpe, ga shaka shagrin da nna, n-gaw nwai ai myit madun ai” ngu Daniela tsun ai. (Shk 36:10; 103:17; Dan 9:4) Dai ga ni hku nga yang, tinang hpe chye chyap ai, hkrit kamyin ai, hkang da ai ga hkan shatup ai, tengman ai hku nawku nga ai mayam ni hpe sha dai tsawra myit madun ai.

⁹ Yehowa hpe garai n nawku shi yang, masha yawng hpe madun ai Karai a tsawra myit hpe anhte hkamsha lu ai. (Shk 104:14) Karai a mayam byin wa ai shaloi, Shi a n-gaw nwai ai tsawra myit hkamsha lu ai. “Nye a n-gaw nwai ai myit nang kaw na sit lu na n rai” ngu Yehowa ga sadi jaw da ai. (Esa 54:10) “Yehowa gaw myit ding ai masha hpe shi a matu san da” ai lam Dawi shi nan hkamsha lu ai. (Shk 4:3) Yehowa laksan lanu lahku ai hpe gara hku bai htang ging ai kun? “Hpaji rawng ai wa kadai rai ti mung, ndai amu hpe myit yu nna, Yehowa a chyeju hpe dum nga mu ga law” ngu shakawn kungdawn sara tsun ai. (Shk 107:43) Dai lam hpe myit hta bang da nna, Yehowa a n-gaw nwai ai tsawra myit kaw nna, mayam ni akyu lu la nga ai lam 3 hpe bawngban yu ga.

10. Karai a n-gaw nwai ai tsawra myit gaw anhte hpe gara hku karum ya ai kun? (Shakawn 31:7)

¹⁰ Karai a n-gaw nwai ai tsawra myit gaw agrin nga ai. N-gaw nwai ai tsawra myit a lam hpe Shakawn 136 hta 26 lang mu lu ai. Daw kaji 1 hta, “Yehowa gaw mai kaja nga ai majaw, shi hpe shakawn kungdawn mu; Shi a chyeju  [n-gaw nwai ai tsawra myit] htani htana a grin nga ai” ngu tsun da ai. (Shk 136:1) “Shi a chyeju htani htana a grin nga ai” ngu ai ga hpe daw kaji 2 kaw nna 26 du hkra dingyang lu hti ai. Dai gaw mayam ni a ntsa tawn ai Karai a tsawra myit galai shai na n re ai hpe kam shangun ai. Mayam ni hpe lam amyu myu hku nna dai tsawra myit ayan madun ai gaw mauhpa re. Mayam ni a ntsa loi loi hte tsawra myit n kawp mat ai gaw n-gun lu hpa re. Laksan hku nna, shanhte yakhkak hkrum nga ai aten hta Karai Kasang n kau da ai. Anhte akyu lu ai lam: Anhte hte rau Yehowa nga ai lam chye lu ai gaw, ngwi pyaw lam lu shangun nna, manghkang ni hpe hkam jan lu hkra, asak lam hta matut hkawm lu hkra n-gun lu shangun ai.​—Shakawn 31:7 hpe hti u.

11. Shakawn 86:5 hku nga yang mara raw ya na matu Yehowa hpe hpa gaw shadut ya ai kun?

¹¹ Karai a n-gaw nwai ai tsawra myit gaw mara raw ya na matu shadut ya ai. Mara galaw ai wa gaw myit malai lu nna, shut ai lam hpe kau da ai shaloi, n-gaw nwai ai tsawra myit gaw mara raw ya na matu, Karai Kasang hpe shadut ya ai. “Anhte a yubak hte maren, shi bai tai mi ai n rai. Mara lu ai hte maren, anhte hpe ari jaw mi ai, n rai” ngu nna Dawi tsun ai. (Shk 103:8-11) Mara nga ai ngu ai myit gaw, grai li ai lit hte bung ai hpe Dawi chye wa ai. Yehowa gaw “mara raw kau ya” na matu jin jin re ai hpe mung chye wa ai. Mara raw ya na matu Karai hpe hpa gaw shadut ya ai kun? Mahtai hpe Shakawn 86:5 hta mu lu ai. (Hti u.) Yehowa gaw n-gaw nwai ai tsawra myit kaba ai majaw, akyu hpyi ai ni yawng hpe mara raw ya ai lam Dawi a ga kaw na chye lu ai.

12-13. Moi galaw wa ai mara ni a majaw mara nga ai ngu hkamsha nga yang hpa gaw myit simsa lam lu shangun ai kun?

¹² Mara galaw hkrup ai shaloi, yawn ai gaw kaja ai. Myit malai lu na matu, shut ai lam hpe sharai na matu shadut ya lu ai majaw re. Raitim, nkau gaw moi galaw hkrup wa ai mara ni a majaw, mara nga ai ngu hkamsha nga dingyang re. Kade daram myit malai lu tim, Yehowa galoi mung mara raw ya na n re ngu nna tinang hkum tinang mara shagun nga dingyang re. Nang dai zawn hkamsha nga yang, mayam ni hpe Karai Kasang n-gaw nwai ai tsawra myit hpe sharawng awng let madun ai hpe chye na da ai gaw myit simsa lam lu shangun na re.

 ¹³ Anhte akyu lu ai lam: Anhte n hkum tsup tim, Yehowa hpe san seng ai myit nsam hte ngwi pyaw let nawku lu ai. “Kasha Yesu a asai gaw, anhte hta na yubak nlang hte hpe jasan jaseng kau ya” ai majaw sha, dai zawn nawku lu ai re. (1 Yh 1:7) Tinang a gawngkya ai lam nkau mi a majaw myit daw nga yang, myit malai lu ai ni hpe Yehowa mara raw ya na matu, jin jin re ai hpe dum u. N-gaw nwai ai tsawra myit gaw mara raw ya ai lam hte matut mahkai nga ai hpe Dawi ndai hku tsun ai: “Lamu gaw aga hta tsaw nga ai hte maren, Shi a n-gaw nwai myit, shi hpe hkrit kamyin ai ni a ntsa e, a galu kaba nga lu ai. Sinpraw maga gaw, sinna maga hte tsan nga ai hte maren, Shi anhte a yubak hpe anhte hte shatsan kau ya mi ai.” (Shk 103:11, 12) Yehowa gaw, “yubak hpe htum hkra raw dat kau ya na” matu jin jin rai nga ai.​—Esa 55:7.

14. Karai a n-gaw nwai ai tsawra myit a makawp maga ai lam hpe Dawi gara hku madun dan ai kun?

¹⁴ Karai Kasang a n-gaw nwai ai tsawra myit gaw wenyi lam hpe makawp maga ya ai. Yehowa kaw Dawi ndai hku akyu hpyi ai: “Nang gaw nye a makoi magap shara rai nga ndai, Ru tsang ai lawt u ga, nang ngai hpe sin nga ndai: Padang nlaw mahkawn ga hte nang ngai hpe kawan da ni ai. . . . Yehowa hta shamyet shanat nga ai ni hpe, chyeju hte kawan da nga mu ai.” (Shk 32:7, 10) Moi prat na mare bunghku ni gaw, mare masha ni hpe makawp maga ya ai zawn, Yehowa a dai tsawra myit mung wenyi lam hpe hkra machyi shangun chye ai lam yawng kaw na makawp maga ya ai. Dai sha n-ga, anhte hpe shi hpang de lau la na matu, dai tsawra myit gaw Karai Kasang hpe shadut ya ai.​—Yer 31:3.

15. Yehowa a n-gaw nwai ai tsawra myit gaw shingbyi shara, wahpang nta hte gara hku bung ai kun?

¹⁵ Karai a masha ni hkamsha lu ai makawp maga lam hpe Dawi gaw kaga lam langai hte shingdaw nna ndai hku tsun dan ai: “Karai Kasang gaw nye a langchyi hte Ngai hpe chyeju jaw ai Karai Kasang, rai nga ai.” “Shi gaw nye a chyeju, nye a wahpang nta, Nye a langchyi hte ngai hpe shalawt ai wa, Nye a n-gang hte ngai shingbyi nga ai wa, rai nga ai” ngu nna mung tsun ai. (Shk 59:17; 144:2) Yehowa a n-gaw nwai ai tsawra myit hpe shingbyi shara, wahpang nta hte Dawi hpa majaw shingdaw ai kun? Anhte gara shara kaw mi nga nga, Karai a mayam byin nga dingsa, Shi hte manu dan ai hku hkau lam matut nga hkra Karai makawp maga ya na re. Dai lam hpe Shakawn 91 hta mung mu lu ai. “Ngai gaw Yehowa hpe, Nye a shingbyi shara hte wahpang, . . . rai nga ndai, nga nna tsun” na ngu shakawn kungdawn sara tsun ai. (Shk 91:1-3, 9, 14) Mawshe mung dai hte maren shingdaw da ai. (Shk 90:1) “Chyi nma Karai Kasang gaw na shingbyi shara rai nga ai, Htani htana lahpum ta gaw nang hpe pawn la nga ai” ngu garai n si shi ai aten hta Mawshe ahkyak shatai tsun ai. (Trj 33:27) “Htani htana lahpum ta gaw nang hpe pawn la nga ai” ngu ai ga gaw Yehowa hte seng nna hpa chye lu ai kun?

16. Gara shaman chyeju 2 anhte lu da ai kun? (Shakawn 136:23)

¹⁶ Yehowa gaw shingbyi shara re ai majaw, anhte shim lum lam hkamsha lu ai. Raitim, myit daw nga ai aten ni, bai rawt na matu shakut ra ai aten ni nga chye ai. Dai aten ni hta Yehowa hpa galaw ya na kun? (Shakawn 136:23 hpe hti u.) Lata hte sharawt la nna, bai tsap lu hkra karum ya na re. (Shk 28:9; 94:18) Anhte akyu lu ai lam: Karai madi shadaw ya ai hpe ayan kamhpa mai ai lam chye lu ai gaw, Karai a shaman chyeju 2 hpe dum shangun ai. Langai, gara shara kaw mi nga nga anhte hta shim lum ai shingbyi shara nga ai. Lahkawng, anhte hpe sumsing Kawa grai lanu lahku ai.

17. Karai a n-gaw nwai ai tsawra myit a majaw hpa hpe kam mai ai kun? (Shakawn 33:18-22)

¹⁷ Bawngban wa sai hte maren, chyam dinglik hkrum ai shaloi sadi dung lu hkra, madi shadaw ya ai hku nna, n-gaw nwai ai tsawra myit Yehowa madun na hpe kam mai ai. (2 Ko 4:7-9) “Yehowa a chyeju majaw sha, anhte n htum mat ga ai; shi a matsan dum ai myit ma mat chye ai, n rai” ngu nna myihtoi Yeremia tsun ai. (Shy 3:22) “Yehowa hpe hkrit kamyin ai ni hte, Shi a chyeju ala nga ai ni a ntsa e, . . . Shi a myi a yu nga ai” ngu shakawn kungdawn sara tsun ai. Dai majaw, anhte hpe dai tsawra myit hte Yehowa matut tsawra mat na hpe kam mai ai.​—Shakawn 33:18-22 hpe hti u.

18-19. (a) Gara lam hpe myit hta bang da ging ai kun? (b) Hpang na sumhpa hta hpa lam bawngban na kun?

¹⁸ Gara lam hpe myit hta bang da ging ai kun? Yehowa hpe garai n nawku shi ai aten hta, masha yawng hpe madun ai Karai a tsawra myit hpe anhte hkamsha wa ai. Shi hpe nawku ai anhte gaw, Shi a n-gaw nwai ai tsawra myit kaw na akyu lu ai. Dai tsawra myit a majaw, anhte hpe Yehowa makawp maga ya ai. Shi hte nihtep lu hkra ayan bau sin ya nna, ga sadi ni hpring tsup hkra galaw ya na re. Anhte hpe shi hte htani htana hku hkau lam nga shangun mayu ai. (Shk 46:1, 2, 7) Dai majaw, gara mayak mahkak mi hkrum tim, sadi dung lu hkra, ra nga ai n-gun atsam hpe Yehowa jaw na re.

¹⁹ Mayam ni hpe Yehowa dai tsawra myit gara hku madun ai hpe chye wa sai. Anhte shada da dai tsawra myit madun na matu mung, Karai myit mada ai. Gara hku madun mai ai lam hpe hpang na sumhpa hta bawngban lu na re.