Lit hpe ngut kre hkra galaw lu na matu, Chyum Jawngma ni hta nden marai nga ra ai. Shagrit shanem ai ni a matu “kabu gara shi ga” byin na lam hte nhkru ai masha ni hpe “matai dawp ai shani” a lam hpe hkaw tsun ra ai.

Kaneda kaw na Hpunau J. H. Hawkin gaw, ninghkap ai ni a lapran nden marai hte hkaw tsun wa ai. 1921, ginhtawng hta hpung sara langai hte hkrum ai. Garai n bawngban shi yang, Hpunau Hawkin gaw “Chyum Laika kaw na an myit hkrum lu na lam ni hpe tsun yu ga. Myit n hkrum ai lam ni nga wa yang mung, jinghku zawn sha angwi apyaw hte hka bra ga” ngu tsun ai. Raitim, dai zawn n byin wa ai. “Anhte minit loi mi daram sha naw lu tsun ai. Shi chyinghka hpe adup dat ai majaw, pat ni pyi ga na daram re” ngu Hpunau Hawkin tsun ai.

“Hkristan n re ai ni hpang de hpa majaw n sa hkaw ai kun?” ngu nna ngai hpe marawn ai. Hpunau Hawkin hpa mung n tsun ai sha bai pru wa ai. Myit hta gaw ‘Hkristan n re ai nang hpe ngai hkaw nga ai le’ ngu myit nga ai.

Hpang shani church hta dai sara tara hkaw ai shaloi, Hpunau Hawkin hte seng nna n kaja ai hku tsun ai. “Ngai hte seng nna shi a hpung masha ni hpe sadi jaw ai. Ndai mare de sa ai masha ni kaw na ngai gaw n kaja dik htum masu ai wa re. Sat pyi sat kau ging ai ngu tsun ai” ngu Hpunau Hawkin tsun dan ai. Raitim, shi kachyi mi pyi n hkrit ai sha, matut hkaw tsun ai majaw, awng dang lam lu wa ai. “Hkaw tsun bungli hta pyaw dik htum aten re. Nkau mi nga yang, ‘nang gaw Karai a masha re’ ngu tsun nna ra ai lam ni nga yang karum ya na ngu tsun ma ai.”

Myit lawm ai ni rawt jat hkra karum ya na matu, Chyum Jawngma ni shapraw ai Aja Prat * laika buk hta, Chyum Laika hkaja ai lamang hpe bang da ya ai. Dai hta kanu kawa ni hte ma ni bawngban lu ai Chyum Laika ga san ni lawm ai. Kanu kawa ni gaw, “dai hta lawm ai ga san ni san nna, ma ni Chyum Laika kaw na mahtai tam mu hkra karum ya ai.” “Chyum Laika hta buk kaji kade lawm ai kun?” ngu ai zawn re ai ga san ni gaw, madung lam ni hpe chye hkra karum ya ai.  “Jet ai Hkristan ni gaw zingri zingrat ai lam langai ngai hkrum chye ai kun?” ngu ai ga san ni gaw nden marai hte hkaw tsun na matu karum ya ai.

Shaning ni laman, Karai a lamang ni hpe kahtap hkaja ngu ai lamang gaw, kunghpan ai Chyum Jawngma ni a matu re. Dai lamang hta, shawng nnan lang shapraw ai Chyum Laika Kaw Na Hkaja Na Lam Ni ngu ai laika buk hpe madung tawn ai myit lawm hpa ga san ni lawm ai. Dai lamang kaw na laika hti ai ni akyu law law lu la ma ai. Raitim, 1921, December 21 hta shapraw ai Aja Prat laika buk hta, dai lamang lahkawng yan hpe hkring kau na lam ndau shana wa ai. Hpa majaw kun?

Chyum Laika nnan hkaja ai ni gaw, madung tengman lam hpe atsawm hkaja ra ai lam, woi awn ai ni sadi hkrup ma ai. Dai majaw, 1921, November hta Karai Kasang A Wanai Tingse laika buk hpe dip shapraw wa ai. Laika buk hpe hkap la ai ni gaw, tinang hkrai hkaja ai lamang hta lawm na matu jahpan jaw mai ai. Dai lamang gaw, “masha ni hpe htani htana asak shaman chyeju jaw na Karai a lamang” hte seng nna, laika hti ai ni hpe chye shangun ai. Dai lamang gaw tang du ai kun?

Laika buk hpe hkap la ai wa gaw, hti ai lamang hta lit ang ai kat hpe mung lu ai. Hpang na bat hta, shi hti da ai daw kaw na ga san ni lawm ai kat langai bai lu ai. Dai kat a jahtum hta, hpang na bat a matu hti ra na daw lawm ai.

Chyum ga sharin gaw, bat 12 du hkra bat shagu kat nnan ni hpe ni dik htum nawku hpung kaw na lu la na re. Law malawng hku nna, nawku hpung hta nga ai asak kaba ai ni (sh) nta langai hpang langai n lu sa ai ni gaw shagun ya ai. Ga shadawn, Amerikan, Pensibeniya mungdaw, Mibeli mare kaw na Enna K. Gatna ndai hku tsun ai: “Karai Kasang A Wanai Tingse laika buk dip shapraw dat ai majaw, hkam kaja lam n nga ai nye kana Te mung bat shagu ga san kat ni sa ya nna, hkaw tsun magam hta grau lawm lu wa ai.” Dai lamang ngut mat ai shaloi, Chyum ga sharin Chyum Laika matut hkaja lu hkra nawku hpung kaw na marai langai ngai sa karum ya ai.

Shaning htum na mahka hta, Hpunau J. F. Radahpawt gaw nawku hpung yawng hpe laika shagun ai. Laika hta, “mungdan a lam sakse hkam ai gaw, kaga shaning ni hta dai ning na dan la ai aten ladaw gaw grau dam lada ai, grau tang du ai” ngu tsun ai. Matut “galaw na lam ni grai law hkra nga ai. Ndai bungli hta lawm na matu kaga ni hpe n-gun jaw u” ngu matut tsun ai. Dai hpaji jaw ga hpe Chyum Jawngma ni hkan sa wa ai gaw dan leng nga ai. 1922, mungdan shiga hkaw tsun ai bungli hta shawoi na hta nden marai rawng let shang lawm wa ma ai.