1. Masha law law hpa majaw myit shuk nga ai kun?

KARAI KASANG ra sharawng ai hte maren, nawku nga ai ngu tsun ai Hkristan nawku hpung ni hkying lam law law nga ai. Dai majaw, masha ni grai myit shuk nga ai gaw mauhpa n re. “Tengman ai nawku htung langai nga ai kun? (sh) Nawku htung yawng hpe Karai Kasang hkap la ai kun?” ngu shanhte san ma ai. Anhte sharin ya ai lam ni gaw tengman lam re ai, dai ni aten na Yehowa Sakse ni a nawku dawjau ai lam hpe Karai Kasang hkap la ai ngu ai hte seng nna teng sha kam ai kun? Dai zawn kam ai myit nga na matu teng sha byin mai na kun? Madi madun lam ni hpe yu yu ga.

2. 1 Htesaloni 1:5 hku nga yang, tengman ai lam hpe kasa Pawlu hpa majaw tsep kawp kam ai kun?

² Tengman ai lam hpe kasa Pawlu tsep kawp kam ai. (1 Htesaloni 1:5 hpe hti u.) Dai zawn kam ai myit gaw, hkamsha lam daram sha n re. Pawlu gaw Chyum Laika hpe sharawng shara hkaja ai wa re. ‘Karai Kasang shung ya ai Chyum laika’ re ai hpe shi kam ai. (2 Tm 3:17) Chyum Laika hkaja ai shaloi, Pawlu hpa chye wa ai kun? Yesu gaw ga sadi tawn da ai Meshia re ai hpe hkrak lu tsun ai madi madun lam ni chye wa ai. Dai madi madun lam ni hpe Yuda nawku htung ningbaw ni n hkap la ai. Karai Kasang a lam hpe jaw ai hku sharin ya ai ngu tsun tim, shanhte galaw ai lam gaw, Karai Kasang hpe nyet kau nga ai. (Tit 1:16) Pawlu gaw shanhte zawn n re. Chyum Laika kaw na tinang ra ai daw nkau hpe sha hkap la na malai, “Karai Kasang a ra ai hku hte tup” sharin ya na, hkan sa na matu jin jin re.​—Kas 20:27.

3. Kam ai myit nga na matu, ga san yawng a mahtai hpe chye ra ai kun? (“ Yehowa A Galaw Ai Lam Ni, Myit Mang Ai Lam Ni​—‘N Dang Hti Hkra Law La Nga’” ngu ai lawk hpe yu u.)

 ³ Tengman ai nawku htung gaw, ga san shagu (sh) Chyum Laika hta tup hkrak n tsun da ai ga san ni hpe pyi, htai ya ra ai ngu nkau sawn la ma ai. Dai gaw tatut re ai kun? Pawlu a lam myit yu u. “Lam yawng mayawng hpe chyam dinglik yu” na matu, kamsham ai ni hpe shi n-gun jaw tim, tinang nan n chye na ai lam law law nga ai hpe mung yin la ai. (1 Ht 5:21) “Daw chyen sha mi anhte chye ga ai” ngu tsun ai. “Jamna shingna sha anhte naw mu nga ga ai” ngu nna mung tsun ai. (1 Ko 13:9, 12) Pawlu gaw lam yawng mayawng hpe chye na ai n re. Raitim, tengman ai lam re ai hpe kam na matu, ra nga ai madung lam ni, madi madun lam ni hpe gaw chye da ai.

4. Kam ai myit grau nga wa hkra, gara hku galaw lu ai kun? Jet ai Hkristan ni hte seng nna gara lam bawngban na kun?

⁴ Kam ai myit grau nga wa hkra galaw lu ai lam langai gaw, Yesu madun wa ai nawku dawjau lam hpe dai ni aten na Yehowa Sakse ni a nawku dawjau lam hte shingdaw yu ai hku nna re. Jet ai Hkristan ni gaw, (1) gawngngu sumla nawku ai hpe nyet kau ai lam, (2) Yehowa a mying hpe hkungga ai lam, (3) tengman ai lam hpe tsawra ai lam, (4) shada da tsawra ai lam ni hpe ndai sumhpa hta bawngban na re.

5. Karai Kasang hpe jaw ai hku nawku ai hte seng nna, Yesu kaw na hpa chye lu ai kun? Yesu a sharin achyin ai lam hpe gara hku hkan sa mai ai kun?

⁵ Yesu gaw Karai Kasang hpe grai tsawra ai majaw, sumsing lamu hta mung, ginding aga hta mung myit masin mahkra hte nawku dawjau ai. (Luk 4:8) Sape ni hpe mung dai zawn nawku na matu sharin ya ai. Yesu mung,  sadi dung ai sape ni mung, nawku dawjau lam hta gawngngu sumla ni n lang ma ai. Karai Kasang gaw, wenyi re ai majaw masha galaw ai hpa raitim, Yehowa a hpung shingkang hpe dep lu na n re. (Esa 46:5) Chyoi pra ai masha a gawngngu sumla ni galaw nna, shanhte hpang akyu hpyi ai gaw gara hku kun? Tara Kanu Shi a lahkawng ngu na tara hta: “Lamu a lahta tang, lamu a npu ga ntsa tsang, ga a npu . . . hta rawng ai baw a hkrang hte bung ai sumla, nang na a matu hkum galaw hkum shachyaw et; dai hpe hkum naw hkum ku, hkum jaw hkum jau et” ngu Yehowa tsun ai. (Pru 20:4, 5) Karai ra sharawng ai lam lu mayu ai ni a matu ndai ga ni gaw asan sha re.

6. Dai ni aten na Yehowa Sakse ni gaw gara nawku dawjau ai lam hpe hkan nga ai kun?

⁶ Tsa ban langai na Hkristan ni gaw Karai Kasang hpe sha, myit masin mahkra hte nawku ai lam labau hpaji du ni hkap la ai. Ga shadawn, tsa ban langai na Hkristan ni gaw, nawku dawjau ai lam hta, gawngngu sumla lang ra na ngu ai lam hpe “matsat na re” ngu laika buk langai (History of hte Christian Church) hta tsun da ai. Dai ni aten na Yehowa Sakse ni mung, tsa ban langai na Hkristan ni galaw wa ai hte maren hkan sa ma ai. “Chyoi pra ai masha” (sh) lamu kasa sumla ni a man hta akyu n hpyi ma ai. Yesu kaw pyi akyu n hpyi ma ai. Dawnghkawn hkungga jaw ai, asuya hpe nawku ai zawn byin shangun ai gara lam hpe mung n galaw ma ai. Hpa mi hkrum tim, “na a Karai Kasang hpe nang naw ku” ra ai ngu ai Yesu a ga madat na matu dawdan da ma ai.​—Mat 4:10.

7. Yehowa Sakse ni hte kaga nawku htung ni gara hku shai ai kun?

⁷ Dai ni aten hta, masha law law gaw mying kaba ai tara hkaw sara ni hpang hkan ma ai. Shanhte hpe grai hkungga ai majaw nawku na daram re. Shanhte hkaw ai nawku jawng de sa ma ai. Shanhte ka ai laika buk ni mari hti ai. Shanhte madi shadaw ai uhpung ni hpe alu law law jaw ai. Shanhte tsun matsun kam ai. Yesu hpe mu lu ai zawn grai kabu ma ai. Yehowa hpe tengman ai hku nawku ai ni hta gaw, tara hkaw sara ngu ai tsang madang n nga ai. Woi awn ai ni hpe hkungga tim, “nanhte yawng kahpu kanau ni rai nga myit dai” ngu ai Yesu sharin ya ai lam hpe hkap la ma ai. (Mat 23:8-10) Nawku htung ningbaw raitim, mungdan uphkang du raitim, kadai hpe mung anhte n nawku ai. Shanhte a yaw shada ai lam ni hpe n madi shadaw ai. Mung masa lam hta lapran nga nna, mungkan hte san san nga ai. Dai lam ni hta, Hkristan ngu amying hkam la da ai ni law law hte anhte grai shai ai.​—Yhn 18:36.

8. Tinang a mying hpe Yehowa shagrau shangun mayu ai lam, masha law law hpe chye shangun mayu ai lam gara hku chye lu ai kun?

⁸ “Na a mying ningsang hpe sha shagrau u” ngu nna kalang mi hta Yesu akyu hpyi ai. Akyu hpyi ga hpe Yehowa gaw sumsing lamu kaw na mu agung ai nsen hte mahtai jaw nna, naw shagrau na ngu ga sadi jaw ai. (Yhn 12:28) Hkaw tsun bungli galaw nga ai laman, Kawa a mying hpe Yesu shagrau wa ai. (Yhn 17:26) Dai majaw, jet ai Hkristan ni gaw Karai a mying hpe akyu jashawn ai, kaga ni chye hkra galaw lu ai ahkang hpe arawng la ma ai.

9. Tsa ban langai na Hkristan ni gaw Karai a mying hpe hkungga ai lam gara hku sakse madun ai kun?

⁹ Tsa ban langai na Hkristan nawku hpung gawde ngut nna, kade n na yang, “Karai Kasang gaw maigan amyu ni hta na, shi a amying ningsang a matu, masha amyu mi hpe shaw la” ai. (Kas 15:14) Tsa ban langai na Hkristan ni gaw, Karai a mying hpe akyu jashawn  ai, kaga ni chye hkra galaw na ahkang lu ai hpe arawng la ma ai. Hkaw tsun bungli hta, Chyum Laika ka ai aten hta, Karai a mying hpe law law lang wa ai. * Karai a mying ningsang a matu amyu masha ni re ai lam sakse madun wa ai.​—Kas 2:14, 21.

10. Yehowa Sakse ni gaw Yehowa a mying ningsang a matu amyu masha re ai lam gara madi madun lam ni nga ai kun?

¹⁰ Yehowa Sakse ni gaw, Yehowa a mying ningsang a matu amyu masha re ai kun? Madi madun lam ni hpe yu yu ga. Dai ni na aten hta, nawku htung ningbaw law law gaw, Karai Kasang hta mying nga ai hpe makoi magap na matu grai shakut ma ai. Ga gale Chyum Laika ni kaw na Karai a mying hpe shaw kau ma ai. Church hta akyu hpyi ai shaloi, Karai a mying lang ai hpe hkum pat ma ai. * Yehowa Sakse ni sha, Yehowa a mying hpe hkungga ai ngu ai hpe kadai nyet kau lu na kun? Karai a mying hpe masha law law chye hkra, kaga nawku htung ni hta na grau galaw nga ma ai. Yehowa Sakse ngu ai mying hte maren, shakut nna asak hkrung nga ai. (Esa 43:10-12) Mungkan Nnan Ga Gale Chyum Laika hpe wan 240 jan shapraw ngut nna, kaga ga gale Chyum Laika ni hta shaw da ai Yehowa a mying hpe shi shara hte shi bai bang da ai. Yehowa a mying lang da ai Chyum Laika hta madung tawn ai laili laika ni hpe mung amyu ga 1000 jan hte shapraw nga ai.

11. Tsa ban langai na Hkristan ni gaw tengman ai lam hpe ra sharawng ai lam gara hku madun dan ai kun?

¹¹ Karai Kasang hte seng ai, Karai a yaw shada lam hte seng ai tengman ai lam hpe Yesu ra sharawng ai. Dai tengman ai lam hte maren asak hkrung ai. Kaga ni chye wa hkra karum ya ai. (Yhn 18:37) Yesu a jet ai sape ni mung, tengman ai lam hpe ra sharawng ai. (Yhn 4:23, 24) Hkristan prat hkrun lam gaw, “teng man ai lam” re ai ngu kasa Petru tsun ai. (2 Pe 2:2) Tengman ai lam hpe ra sharawng ai majaw, tsa ban langai na Hkristan ni gaw, tengman ai lam hte n htan shai ai nawku dawjau lam ni, htunghking ni, tinang a ningmu ni hpe n hkap la ai. (Kol 2:8) Dai ni aten hta mung, jet ai Hkristan ni gaw, makam masham hte prat hkrun lam hpe Yehowa a mungga hta madung tawn ai hku nna, ‘teng man ai lam hta hkan nang’ na matu shakut nga ma ai.​—3 Yh 3, 4.

12. Tengman ai lam nkau hpe bai sharai ra ai hpe woi awn ai ni chye ai shaloi hpa galaw ai kun? Hpa majaw kun?

¹² Dai ni aten Karai Kasang a amyu masha ni gaw, tengman ai lam hpe tsep kawp chye na ai ngu n tsun ma ai. Kalang lang, hkam la ai lam, uhpung hte seng ai lam matsun ni hta shut ai aten mung nga ai. Dai hpe n mau ging ai. Tup hkrak re ai machye machyang angwi ngwi rawt jat wa na ngu Chyum Laika hta dan dan leng leng tsun da ai. (Kol 1:9, 10) Tengman ai lam hpe Yehowa angwi ngwi hpaw dan ai. Nhtoi grau htoi wa ai aten du hkra, anhte myit galu let la ra ai. (Gsh 4:18) Tengman ai lam nkau hpe bai sharai ra ai hpe woi awn ai ni chye wa ai shaloi, ra ang ai hku kalang ta galai shai ma ai. Dai ni aten na church law law mung galai shai ai lam ni galaw tim, hpung masha ni ra ai hku hkan na matu, mying gumhkawng na matu sha re. Yehowa Sakse ni galai shai ai lam gaw, Karai Kasang hte grau hku hkau na matu, Yesu a lam matsun hte maren Karai hpe nawku lu na matu re. (Yak 4:4) Anhte galai shai ai gaw mungkan masha ni a myit mang ai lam ni galai shai mat ai majaw n re. Chyum Laika hpe grau chye na wa ai majaw re. Tengman ai lam hpe anhte ra sharawng ai.​—1 Ht 2:3, 4.

13. Jet ai Hkristan ni a madung atsam ningja gaw hpa rai kun? Dai hpe ya prat na Yehowa Sakse ni gara hku madun nga ai kun?

¹³ Tsa ban langai na Hkristan ni a atsam ningja ni hta na laklai dik htum gaw tsawra myit re. “Nanhte shada tsaw ra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na ma ra ai” ngu Yesu tsun ai. (Yhn 13:34, 35) Dai ni aten na Yehowa Sakse ni gaw mungkan grup hku nna tsawra myit, zinlum ai lam hkamsha nga ma ai. Kaga uhpung ni hte n bung ai sha, mungdan, amyu, garan ginhka ai lam tsep kawp n nga ai. Zuphpawng ni, ninghtawn zuphpawng ni, ginwang zuphpawng ni hta jet ai tsawra myit madun ai lam ni hpe mu lu ai. Dai lam ni a majaw, anhte a nawku dawjau lam hpe Yehowa ra sharawng ai lam kam ai myit grau nga wa ai.

14. Kolose 3:12-14 hku nga yang, shada da tsawra myit madun lu ai ahkyak htum lam langai gaw hpa rai kun?

¹⁴ “Shada da tsaw ra ai myit makyit rawng nga” na matu, Chyum Laika hta n-gun jaw da ai. (1 Pe 4:8) Dai zawn tsawra myit madun lu ai lam langai gaw, shada da mara raw ya nna, n hkum tsup ai lam ni hpe hkam sharang ai hku nna re. Tinang hpe myit hkra machyi hkra galaw ai ni hte hpawn, nawku hpung hta nga ai ni yawng hpe gam jaw gam ya na matu, manam daw na matu anhte ahkaw ahkang tam ga ai. (Kolose 3:12-14 hpe hti u.) Dai zawn tsawra myit makyit sumri gaw, jet ai Hkristan ni a laklai ai masat dingsat re.

15. Tsa ban langai na Hkristan ni galaw wa ai nawku dawjau ai lam hpe kaga gara lam ni hte anhte hkan sa ai kun?

¹⁵ Tsa ban langai na Hkristan nawku hpung galaw wa ai nawku dawjau ai lam hpe, kaga lam ni hku nna mung anhte hkan sa ai. Ga shadawn, hpung kawan ni, myitsu salang ni, magam tau ni lawm ai uhpung hpawng de da ai lam gaw, tsa ban langai na kasa ni galaw wa ai hte maren sha re. (Hpl 1:1; Tit 1:5) Ngang hte seng ai lam, hkungran ai lam a ntsa anhte a myit jasat, sai a chyoi pra ai hpe hkungga ai lam, myit malai n la ai mara galaw ai ni hpe hpung kaw na shapraw kau ai zawn re ai lam yawng gaw, tsa ban langai hta galaw wa ai lam hpe madung tawn ai.​—Kas 15:28, 29; 1 Ko 5:11-13; 6:9, 10; Heb 13:4.

16. Ehpesu 4:4-6 hta lawm ai ga ni kaw na hpa chye lu ai kun?

¹⁶ Tinang a sape ngu tsun tim, yawng gaw sape ajet n re ai ngu Yesu tsun wa ai. (Mat 7:21-23) Hpang jahtum nhtoi hta, law malawng gaw, “tara hkungga ai htung hkan” ai raitim, “makam masham langai sha” Karai Kasang hkap la na ngu Chyum Laika hta tsun da ai.​—Ehpesu 4:4-6 hpe hti u. 2 Tm 3:1, 5.

17. Dai ni aten hta Yesu hpang hkan nga ai, jet ai makam masham langai hpe sha hkan sa nga ai ni gaw kadai ni rai kun?

¹⁷ Dai ni aten hta, jet ai makam masham langai hpe sha hkap la nna hkan sa nga ai ni gaw kadai ni rai? Madi madun lam ni hpe bawngban wa sai. Yesu sharin achyin ya wa ai lam, tsa ban langai na Hkristan ni hkan sa wa ai nawku dawjau lam ni hpe mung bawngban wa sai. Mahtai gaw dan leng nga ai. Yehowa Sakse ni sha re. Yehowa a amyu masha byin lu ai ahkang, Yehowa hte Shi a yaw shada lam ni hte seng nna chye lu ai gaw ahkaw ahkang kaba re. Tengman lam hpe kam ai myit hte matut magra da ga.