1. Tsawra ai marai langai shapraw hkrum ai shaloi nkau gara hku hkamsha ai kun?

TSAWRA ai marai langai nawku hpung kaw na shapraw hkrum ga ai kun? Grai yawn na re. “Dinghku prat 41 ning hta, nye madu wa n nga mat ai shaloi, yawn dik htum re ngu shadu wa ai. Raitim, nye kasha gaw nawku hpung, kanam, kashu ni hpe kau da mat ai shaloi grau sawng ai” ngu nauna Hida tsun ai. *

2-3. Shakawn 78:40, 41 hku nga yang, tinang hpe mayam ni kau da mat ai shaloi Yehowa gara hku hkamsha ai kun?

² Lamu kasa kun dinghku kaw na nkau mi Yehowa hpe kau da mat ai shaloi Karai Kasang grai yawn na re. (Yud 6) Tsawra ai Israela amyu masha ni chyahkring hkring gumlau ai shaloi, kade daram hkamsha na hpe myit yu u. (Shakawn 78:40, 41 hpe hti u.) Marai langai Karai Kasang hpe kau da ai shaloi hta mung, shi grai hkamsha na re. Anhte a hkamsha lam hpe shi chye na ai. Anhte ra nga ai shalan shabran lam hpe jaw na re.

³ Yehowa a karum shingtau lam lu na matu, anhte hpa galaw mai ai lam, shapraw hkrum ai wa a jinghku ni hpe gara hku karum ya mai ai lam, ndai sumhpa hta bawngban na re. Shawng nnan, koi ging ai myit jasat nkau hpe bawngban yu ga.

4. Kasha langai Yehowa hpe kau da mat ai shaloi kanu kawa ni gara hku hkamsha ai kun?

⁴ Tsawra ai kasha langai Yehowa hpe kau da mat ai shaloi, kanu kawa ni hku nna, tinang atsawm n chye sharin ai majaw,  shanhte tengman ai lam hta matut n nga ai re ngu hkamsha chye ai. Kasha shapraw hkrum ai shaloi, “tinang hkum tinang mara shagun ai. Dai lam hpe yup mang pyi mu ai. Kalang lang grai yawn nna, hkrap ai du hkra re” ngu hpunau Luk tsun ai. Nauna Elizabet a kasha mung nawku hpung kaw na shapraw hkrum ai. “Ngai hpa mara ni galaw hkrup wa ai kun? Yehowa hpe tsawra wa hkra atsawm n lu sharin ya dat ai majaw re ngu chyahkring hkring myit hkrup ai.”

5. Yehowa hpe kau da mat ai gaw kadai hta lit nga ai kun?

⁵ Yehowa gaw yawng hpe wanglu wanglang lata na ahkang jaw da ai hpe dum u. Shi a ga hpe madat na, n madat na hpe lata mai ai. Yehowa hpe n nawku ai kanu kawa ni nga ai ramma nkau mi gaw, sadi dung let matut nawku na matu lata ma ai. Ramma nkau chyawm gaw, Chyum Laika tara hte maren kanu kawa ni sharin ya tim, hpang de Yehowa hpe kau da mat ai. Hpa mi raitim, Yehowa hpe nawku na lam hpe tinang nan dawdan ra ai. (Ysh 24:15) Dai majaw, kasha ni Yehowa hpe kau da mat ai shaloi, yawn nga ai kanu kawa ni gaw tinang hkum tinang mara n shagun ging ai.

6. Kanu kawa ni Karai Kasang hpe kau da mat ai shaloi kasha ni gara hku hkamsha chye ai kun?

⁶ Kalang lang, kanu kawa ni gaw nta masha ni hte tengman ai tara hpe kau da mat ai. (Shk 27:10) Kanu kawa hpe kasi la ai kasha ni a matu gaw grai yawn hpa re. Nawku hpung kaw na kawa shapraw hkrum ai shaloi, Esta ndai hku tsun ai: “Ngai chyahkring hkring hkrap ai. Wa gaw tengman ai lam kaw na tsan mat ai n re ai sha, Yehowa hpe dingsang kau da mat ai re. Wa hpe ngai tsawra ai. Shi shapraw hkrum ai shaloi, shi a hkamja lam a matu myit tsang ai. Ngai grai hkrit ai.”

7. Shapraw hkrum ai kanu kawa ni a kasha ni hte seng nna Yehowa gara hku hkamsha ai kun?

⁷ Ramma ni e, nanhte a kanu kawa langai ngai shapraw hkrum ai nga yang, anhte mung grai yawn ai. Nanhte a hkamsha lam hpe Yehowa chye na ai hpe kam u. Nanhte hpe Yehowa mung, hpunau nauna ni mung tsawra ai. Sadi dung ai lam hpe manu shadan ai. Kanu kawa ni a dawdan lam a matu, nanhte hta lit n nga ai ngu ai hpe dum u. Shawng hta tsun wa ai hte maren, Yehowa gaw yawng hpe wanglu wanglang lata na ahkang jaw da ai. Dai majaw, apnawng nna hkalup hkam ngut sai Hkristan shagu gaw “tinang a lit gun hpai” ra ai.​—Gal 6:5.

8. Tsawra ai marai langai Yehowa hpang de bai wa na aten hpe la nga ai laman sadi dung ai nta masha ni hpa galaw mai ai kun? (“ Yehowa Hpang De Bai Wa Rit” ngu ai lawk hpe yu u.)

⁸ Tsawra ai marai langai Yehowa hpe kau da mat tim, lani mi hta bai wa na ngu nang myit mada nga na re. Ndai laman hpa galaw mai ai kun? Tinang a makam masham grau ngangkang hkra galaw ra ai. Dai lam hku nna, nang gaw ngam ai nta masha ni a matu sha n-ga, shapraw hkrum ai wa a matu mung kasi kaja rai na re. Yawn hkyen ai lam hpe hkamjan lu na matu, ra nga ai n-gun atsam mung lu na re. Makam masham grau ngangkang hkra galaw lu ai lam nkau hpe bawngban yu ga.

9. Gara lam ni gaw Yehowa kaw na n-gun lu shangun ai kun? (“ Marai Langai Yehowa Hpe Kau Da Mat Ai Shaloi Shalan Ya Lu Ai Chyum Daw Ni” ngu ai lawk hpe yu u.)

⁹ Wenyi lam ni hpe matut galaw nga u. Tinang hte ngam ai nta masha ni a makam masham matut ngangkang hkra galaw na matu grai ahkyak ai. Gara hku galaw lu ai kun? Yehowa kaw na n-gun lu la na matu, Chyum Laika ayan hti ai, myit sawn sumru ai, zuphpawng ni lung ai hku nna re. Nauna Joanna a kawa hte kanau tengman ai lam hpe kau da mat ai. “Chyum Laika hta lawm ai Abigela, Eshta, Yoba, Yaku hte Yesu a lam ni hpe hti ai shaloi, myit simsa lam hkamsha ai. Shanhte a kasi ningli gaw, jaw ai ningmu matut nga shangun nna, hkamsha lam ni hpe hkyamsa shangun ai. JW mahkawn ni mung n-gun lu shangun ai” ngu shi tsun ai.

10. Hkamsha lam ni hpe hkamjan lu na matu Shakawn 32:6-8 gaw gara hku karum ya ai kun?

¹⁰ Na a myit tsang ai lam ni hpe Yehowa hpe tsun dan u. Myit daw nga ai aten hta, akyu hpyi ai hpe hkum jahkring kau. Masa lam ni hpe Karai mu ai zawn, mu chye hkra karum ya na matu, “sharin ya” nna “lam madun ya” na matu Karai kaw akyu hpyi u. (Shakawn 32:6-8 hpe hti u.) Yehowa hpe tinang a hkamsha lam ni tsun dan na matu yak chye ai. Raitim, na a hkamsha lam hpe Yehowa chye na ai. Nang hpe grai tsawra ai majaw, hkamsha lam yawng tsun dan na matu n-gun jaw da ai.​—Pru 34:6; Shk 62:7, 8.

11. Hebre 12:11 hku nga yang, Yehowa a tsawra myit lawm ai sharin shaga ai lam hpe hpa majaw kam mai ai kun? (“ Shapraw Ai Lam Gaw Yehowa A Tsawra Myit Lawm Ai Sharin Shaga Ai Lam Re” ngu ai lawk hpe yu u.)

¹¹ Myitsu salang ni a dawdan lam hpe madi shadaw u. Shapraw ai lam gaw, Yehowa a lamang re. Karai a tsawra myit lawm ai sharin  shaga ai lam gaw, mara galaw ai wa hte hpawn, yawng a matu akyu nga ai. (Hebre 12:11 hpe hti u.) Myitsu salang ni a sharin shaga ai lam hte seng nna, n kaja ai hku tsun ai ni nkau gaw, mara galaw ai wa a mara hpe gaw n tsun ma ai. Lam yawng hpe anhte n chye ai. Dai majaw, tara jeyang ai myitsu salang ni gaw, Chyum Laika tara ni hpe hkan sa nna, “Yehowa amu” hpe atsawm hparan lu hkra, kaja htum galaw nga ai hpe anhte kam ai gaw hpaji rawng ai lam re.​—2 Hl 19:6.

12. Yehowa a sharin shaga ai lamang hpe madi shadaw ai majaw, nkau mi gara hku akyu lu ai kun?

¹² Tsawra ai marai langai hpe shapraw ai, myitsu salang ni a dawdan lam hpe madi shadaw ai gaw, shi hpe Yehowa hpang de bai wa hkra karum ya ai re. “Kasha hte matut mahkai lam n mai galaw ai gaw grai yak ai. Shi hpe shapraw ai gaw jaw ai. Grai sharin la lu wa ai ngu Yehowa kaw bai wa ngut ai hpang she kasha tsun ai. Yehowa a sharin shaga ai lam gaw galoi mung jaw ai ngu ai hpe ngai chye na wa ai” ngu Elizabet tsun dan ai. Madu wa Mak mung ndai hku tsun ai: “An gaw kasha hpe tsep kawp n matut mahkai ai. Aten loi na ai hpang, bai wa mayu ai ngu kasha tsun ai. An hpe madat mara lam nga hkra, Yehowa karum ya ai majaw grai kabu ai.”

13. Hkamsha lam ni hpe hkamjan lu na matu hpa gaw karum ya lu ai kun?

¹³ Chye na ya lu ai manang ni hpe tsun dan u. Jaw ai ningmu matut nga hkra karum ya lu ai kunghpan ai Hkristan ni hte kanawn mazum u. (Gsh 12:25; 17:17) Nnan hta tsun wa ai Joanna gaw “garen gari ai ngu hkamsha ai shaloi, kamhpa mai ai manang ni hpe tsun dan ai majaw, myit hkyamsa lam lu ai” ngu tsun ai. Raitim, nawku hpung hta nga ai nkau mi a ga gaw, hkra machyi shangun ai nga yang gaw gara hku kun?

14. “Shada da hkam mana ai hte, mara langai ngai nga yang gaw, shada da raw dat kau hkat” na matu hpa majaw ra ai kun?

¹⁴ Hpunau nauna ni hpe myit galu u. Yawng gaw kaja ai hku sha bai htang na n re. (Yak 3:2) Anhte yawng n hkum tsup ai majaw, nkau gaw hpa tsun ra na n chye ai zawn, n yaw shada ai sha hkra machyi ai ga ni tsun hkrup chye ai. “Shada da hkam mana ai hte, mara langai ngai nga yang gaw, shada da raw dat kau hkat” na matu kasa Pawlu tsun da ai. (Kol 3:13) Nauna langai a jinghku shapraw hkrum ai. “Hpunau nauna ni a n-gun jaw ga gaw n yaw shada ai sha, hkra machyi ai ga ni byin mat ai. Dai aten hta shanhte hpe mara raw ya na matu Yehowa karum ya ai” ngu tsun ai. Sadi dung ai nta masha ni hpe nawku hpung gaw gara hku karum ya lu ai kun?

15. Tsawra ai marai langai shapraw hkrum ai shaloi nta masha ni hpe gara hku karum ya lu ai kun?

¹⁵ Sadi dung ai nta masha ni hpe alum ala hte hkap tau la u. Kanau shapraw hkrum ai hpang, zuphpawng lung na matu, htingnut ai ngu nauna Mirian tsun ai. “Masha ni gara hku  tsun na kun? ngu ai hpe myit tsang ai. Raitim, hpunau nauna ni gaw, shapraw hkrum ai kanau a lam hpe n kaja ai lam n tsun ma ai. Shanhte mung myit n pyaw ya ai. Ngai yawn hkyen nga tim, garen gari ai ngu n hkamsha ra ai majaw, shanhte hpe chyeju dum ai” ngu tsun ai. Kaga nauna langai mung “kasha shapraw hkrum ai shaloi, manang ni sa shalan ya ai. Nkau gaw hpa tsun ra na n chye ai ngu tsun ai. Nkau nga yang, ngai hte rau hkrap ai. N-gun jaw laika ni shagun ma ai. Shanhte a galaw ai lam gaw ngai hpe grai karum ya ai” ngu tsun ai.

16. Nawku hpung gaw matut nna gara hku karum ya lu ai kun?

¹⁶ Shapraw hkrum ai wa a sadi dung ai nta masha ni hpe matut madi shadaw ya u. Tsawra myit hte n-gun jaw lam hpe shawoi na hta grau ra ai. (Heb 10:24, 25) Kalang lang, shanhte hpe nawku hpung gaw kau tawn da ai ngu hkamsha chye ai. Dai zawn n hkamsha ging ai. Tengman ai lam hpe kau da mat ai kanu kawa ni a kasha ni gaw, n-gun jaw lam hte shakawn ai lam grau ra ai. Maria a madu wa shapraw hkrum nna nta masha ni hpe kau da mat ai. “Manang nkau gaw nta de sa nna shat shadu ya ai. Dinghku nawku galaw ya ai. Ngai hte rau hkamsha nna rau hkrap ma ai. N kaja ai hku tsun hkrum ai aten hta ngai na maga tsap ya ma ai. Shanhte a majaw, ngai n-gun bai lu wa ai” ngu tsun ai.​—Rom 12:13, 15.

17. Yawn hkyen nga ai ni hpe myitsu salang ni gara hku shalan shabran ya lu ai kun?

¹⁷ Myitsu salang ni e, sadi dung ai nta masha ni hpe n-gun jaw na matu, ahkaw ahkang tam u. Shapraw hkrum ai wa a sadi dung ai nta masha ni hpe shalan shabran ya na matu, nanhte hta laksan lit nga ai. (1 Ht 5:14) Zuphpawng n hpang shi ai aten hte ngut ai aten hta, tinang maga kaw na n-gun jaw ga tsun u. Shanhte a nta de sa chyai nna akyu hpyi ya u. Hkaw tsun bungli rau sa u. Kalang lang, dinghku nawku hta lawm na matu saw shaga u. Myitsu salang ni gaw, yawn hkyen nga ai sagu ni hpe matsan dum ra ai. Tsawra myit hte lanu lahku ra ai.​—1 Ht 2:7, 8.

18. 2 Petru 3:9 hku nga yang, mara galaw ai ni hpe Yehowa gara hku byin shangun mayu ai kun?

¹⁸ Yehowa gaw ‘yawng mayawng myit kayin wa nna, kadai hpe mung, hten bya’ n hkrum shangun mayu ai. (2 Petru 3:9 hpe hti u.) Marai langai mara kaba galaw hkrup yang pyi, shi a asak gaw Yehowa a matu, manu dan nga dingyang re. Yubak masha ni a matu, gawng malai jahpu hku nna, tsawra dik ai kasha hpe pyi Yehowa jaw wa ai. Yesu a ga shadawn kaw na myit n su ai ma zawn, yubak masha ni shi hpang de bai wa na hpe myit mada let tsawra myit hte karum ya nga ai. (Luk 15:11-32) Tengman ai lam hpe kau da mat ai ni gaw, hpang de tsawra myit nga ai sumsing Kawa hpang de bai wa ma ai. Nawku hpung mung kabu gara let hkap tau ma ai. Elizabet gaw, nawku hpung de kasha bai wa ai majaw grai pyaw wa ai. “Myit mada lam hpe n kau da na matu, n-gun jaw wa ai ni hpe grai chyeju dum ai” ngu tsun ai.

19. Yehowa hpe hpa majaw matut kamhpa mai ai kun?

¹⁹ Yehowa hpe galoi shagu kamhpa mai ai. Karai a lam matsun ni gaw, anhte hpe galoi mung hkra machyi shangun na n re. Karai Kasang gaw shi hpe tsawra nna, nawku ai ni hpe n hpaw n-ya jaw ai. Matsan dum ai, tsawra ai. Nang yawn hkyen nga ai aten hta, kau da na n re ai hpe kam u. (Heb 13:5, 6) Shawng hta tsun wa ai Mak gaw, “anhte hpe Yehowa galoi mung n kau da ai. Yakhkak hkrum ai aten ni hta, anhte a makau hta nga nga ai” ngu tsun ai. Nang hpe “chyahtum chyalai re ai n-gun atsam” Yehowa matut jaw na re. (2 Ko 4:7) Dai majaw, tsawra ai marai langai Yehowa hpe kau da mat tim, nang matut sadi dung lu ai. Shi bai kayin wa na ngu matut myit mada mai ai.