1, 2. (a) Pawlu a aten hta mayam prat hte lawt lu ai lam gaw hpa majaw ahkyak ai lam re ai kun? (b) Jet ai lawt lu ai lam a npawt gaw kadai re ai hpe Pawlu tsun wa ai kun?

TSA BAN langai na Hkristan ni gaw, Roma Hkaw Seng Mung hta nga ma ai. Dai mung masha ni gaw, shanhte hta nga ai tara ni, rap ra ai ladat hte lawt lu ai lam ni hpe, grai arawng la ma ai. Dai n-gun atsam kaba ai mungdan gaw, bungli law malawng hpe galaw na matu, mayam ni a ntsa hta sha shamyet shanat ai. Roma hta nga ai masha marai 3 hta 1 gaw mayam re. Hkristan ni hte hpawn, yu maya masha ni a matu mayam prat hte lawt lu ai lam gaw ahkyak ai lam rai nga ai.

² Kasa Pawlu gaw lawt lu ai lam hte seng nna, chyahkring hkring ka wa ai. Raitim, shi gaw dai aten na masha law law galaw mayu ai mungkan a manghkang ni hpe hparan na matu n shakut wa ai. De a malai, Pawlu hte shi hpang hkan ai Hkristan ni gaw, masha ni hpe Karai Mungdan a kabu gara shiga hpe sharin ya na matu shakut ai. Yesu Hkristu a gawng malai jahpu gaw, kade daram manu dan ai lam hpe, chye na hkra karum ya ai. Pawlu gaw Hkristan ni hpe jet ai lawt lu lam a npawt hpe tam  na matu tsun wa ai. Shi ndai hku ka wa ai: “Madu [Yehowa] chyawm gaw dai Wenyi rai nga ai rai nna, dai Madu a Wenyi nga ai shara hkan e shanglawt mung rai nga ai.”​—2 Korinhtu 3:17.

3, 4. (a) 2 Korinhtu 3:17 hpe garai n tsun shi yang, kaga daw kaji ni hta Pawlu hpa tsun wa ai kun? (b) Yehowa kaw nna lawt lu ai lam lu na matu anhte hpa galaw ra ai kun?

³ Korinhtu ni kaw shagun dat ai laika lahkawng hta, Mawshe gaw Yehowa a lamu kasa hte hkrum ngut ai hpang, Sina Bum kaw nna yu wa ai shaloi, hpa byin wa ai lam hpe Pawlu tsun wa ai. Mawshe a myi man htoi kabrim nga ai. Israela ni gaw shi hpe mu ai shaloi hkrit mat ai majaw, shi gaw myi man hpe magap kau ai. (Pru Mat 34:29, 30, 33; 2 Korinhtu 3:7, 13) Pawlu ndai hku tsun wa ai: “Rai ti mung, dai Madu hpang de galoi kayin a yang gaw, dai man magap shaloi jang kun di kau ya na ru ai.” (2 Korinhtu 3:16) Pawlu hpa tsun mayu ai kun?

⁴ Yawng mayawng a Hpan Madu Yehowa langai sha, hkum tsup ai lawt lu lam nga ai wa re ai hpe shawng na sumhpa hta anhte hkaja wa sai. Dai majaw, Yehowa nga ai shara hte shi a “Wenyi nga ai shara” hta sha, lawt lu ai lam nga ai. Anhte gaw dai lawt lu ai lam hpe lu mayu yang, Yehowa hpang kayin wa ra ai nga nna Pawlu tsun ai. De a lachyum gaw, Yehowa hte hku hkau lam nga ra ai ngu tsun mayu ai re. Nam maling hta nga wa ai Israela ni gaw, Yehowa a ningmu hku n re ai sha, masha a ningmu hku mu wa ai. Shanhte a myit masin hpe magap da ai hte bung ai. Shanhte a lawt lu lam hpe, shanhte a myit ra ai lam shadik na matu sha jailang mayu ma ai.​—Hebre 3:8-10.

5. (a) Yehowa a wenyi jaw ai lawt lu ai lam gaw hpa rai kun? (b) Marai langai gaw mayam byin nga ai (sh) htawng hkrat nga ai raitim, Yehowa jaw ai lawt lu ai lam nga ai hpe anhte gara hku chye lu ai kun? (c) Hpa ga san ni a mahtai hpe anhte chye ra ai kun?

⁵ Yehowa a wenyi jaw ai lawt lu ai lam gaw, mayam byin ai kaw nna lawt lu ai lam hta grau ai. Dai wenyi lawt lu ai lam gaw masha lawt lu ai lam ni hta grau kaja ai. Dai gaw, yubak hte si ai a mayam prat hte shut shai ai nawku htung a mayam byin ai kaw nna anhte hpe shalawt ya lu ai. (Roma 6:23; 8:2) Dai gaw grai kaja ai lawt lu ai lam re. Marai langai gaw mayam byin ai (sh) htawng hkrat nga ai rai yang pyi, dai lawt lu ai lam lu mai ai. (Ningpawt 39:20-23) Nauna Nansi Yun hte hpunau Hero Kin gaw shanhte a makam masham a majaw, shaning law law htawng hkrat nga tim, ndai zawn lawt lu ai lam hpe lu wa ai. Shanhte a mahkrum madup ni hpe JW TV lamang hta yu mai ai. (လူတွေ့မေးမြန်းခန်းနဲ့ တွေ့ကြုံမှုများ > စမ်းသပ်မှုများရင်ဆိုင်ရချိန် ngu ai hta yu u.) Ya, ndai ga san lahkawng a mahtai hpe yu yu ga. Anhte a lawt lu ai lam gaw, grai manu dan ai hpe gara hku sakse madun mai ai kun? Anhte a lawt lu ai lam hpe hpaji rawng let gara hku akyu jashawn mai na kun?

6. Israela ni gaw shanhte hpe Yehowa jaw ai lawt lu ai lam a matu chyeju n dum ai lam gara hku madun wa ai kun?

⁶ Grai manu dan ai kumhpa hpe lu la ai shaloi, kumhpa jaw ai wa hpe anhte grai chyeju dum na re. Raitim, Israela ni gaw,  shanhte hpe Yehowa jaw ai lawt lu ai lam a matu chyeju n dum ma ai. Shanhte hpe Egutu mung kaw nna Yehowa shalawt ya ai shata loi mi na ai hpang, shanhte lu sha wa ai malu masha ni hpe bai marit wa ai. Shanhte hpe Yehowa madi shadaw ya ai manna muk hte seng nna aput angun tsun wa ai. Egutu mung de pyi shanhte bai nhtang wa mayu ma ai. Shanhte gaw, Yehowa hpe nawku dawjau na matu, Yehowa jaw da ai lawt lu ai ahkang hta grau nna, “anga, kumgyin, gyinshau, gaubawng, shakau, hparaw” ni hpe ahkyak shatai wa ai. Shanhte hpe Yehowa masin pawt wa ai gaw mauhpa n re. (Bu Hkawm 11:5, 6, 10; 14:3, 4) Ndai mabyin gaw anhte hpe grai ahkyak ai lam sharin ya ai.

7. Pawlu gaw shi a hpaji jaw ga re ai 2 Korinhtu 6:1 hpe shi nan gara hku hkan sa wa ai kun? Anhte mung dai hte maren gara hku hkan sa mai ai kun?

⁷ Kasha Yesu Hkristu hku nna Yehowa jaw ai lawt lu ai lam hpe chyeju n chye dum ai baw n byin mat na matu, Hkristan yawng hpe Pawlu sadi jaw wa ai. (2 Korinhtu 6:1 hpe hti u.) Pawlu gaw n hkum tsup nna, yubak hte si hkrung si htan a mayam re. Dai gaw shi hpe grai myitru shangun ai. Raitim, shi ndai hku tsun wa ai: “Anhte a Madu Yesu Hkristu a marang e, Karai Kasang hpe ngai sha-a nga nngai.” Shi hpa majaw dai hku tsun wa ai kun? Pawlu gaw Hkristan ni hpe ndai hku sanglang dan wa ai: “Hkristu Yesu hta e jahkrung ya ai Wenyi a tara gaw, yubak a tara hta na rai ti mung, si mat ai tara hta na rai ti mung, ngai hpe shalawt dat ni ai.” (Roma 7:24, 25; 8:2) Pawlu zawn, anhte mung yubak hte si ai a mayam byin ai kaw nna, Yehowa shalawt ya ai lam hpe galoi mung n malap ging ai. Gawng malai hkungga gaw, Karai Kasang hpe san seng ai myit nsam hte nawku dawjau na matu karum ya nna, jet ai ngwi pyaw lam lu shangun ai.​—Shakawn 40:8.

8, 9. (a) Anhte a lawt lu ai lam hpe gara hku akyu jashawn na hte seng nna kasa Petru hpa hpe sadi jaw wa ai kun? (b) Marai langai gaw shi a lawt lu ai lam hpe gara hku nna shut ai hku jailang hkrup chye ai kun?

⁸ Anhte a lawt lu ai lam a matu Yehowa hpe chyeju dum ai lam tsun ai sha n-ga, dai  hpe shut ai hku n jailang na matu mung anhte sadi ra ai. Ga shadawn, anhte gaw shut ai lam hpe galaw nna lawt ga tsun na matu lawt lu ai ahkang hpe n mai jailang ai ngu kasa Petru sadi jaw wa ai. (1 Petru 2:16 hpe hti u.) Ndai sadi jaw ga gaw, nam maling hta Israela ni byin wa ai lam hpe bai dum shangun ai. Dai ni aten hta, ndai sadi jaw ga gaw anhte a matu grau nna pyi ra ai. Satan hte shi a mungkan gaw, bu hpun ai lam, malu masha hte shangwi shapyaw lam zawn re ai lam ni hku nna hkalem nga ai. Ndau shabra ai ni gaw, tsawm ai masha ni hpe akyu jashawn nna, anhte gaja wa n ra ai arai ni hpe mari mayu wa hkra galaw nga ai. Dai gaw, anhte a lawt lu ai lam hpe shut ai hku jailang wa hkra aloi sha hkalem lu ai ladat re.

⁹ Anhte a prat hta jawng hpaji, kan bau bungli zawn re ai lam ni lata ai hta mung Petru a hpaji jaw ga hpe grai ahkyak shatai nna hkan sa ra ai. Ga shadawn, kaja htum dakkasu kaw lu lung hkra, jawng hta grai shakut shaja na matu ramma ni laja lana shadut hkrum nga ai. Madang tsaw ai hpaji lu da yang she, kaja ai bungli hte gumhpraw law law lu nna, masha ni hkungga na re ngu shanhte hpe masha law law tsun ma ai. Dakkasu jawng ngut ai ni gaw, lahta tsang jawng ngut ai ni hta grau nna shang gumhpraw law ai ngu shadu hkra dai masha ni gaw tsun nga ai. Htawm hpang prat akyu a matu, madang tsaw hpaji hpe hkaja yang kaja na ngu ramma ni shadu chye ai. Raitim, shanhte hte shanhte a kanu kawa ni gaw hpa hpe myit dum ra ai kun?

10. Tinang hte seng ai lam ni hpe lata ai shaloi, anhte hpa hpe myit dum ra ai kun?

¹⁰ Ndai zawn lam ni gaw, tinang hte seng ai lam re nga nna nkau mi myit la chye ai. Dai majaw, myit nsam hta hpa n byin ai nga yang, tinang kam ai hpe mai galaw ai ngu nna hkamsha ma ai. Shanhte ndai hku myit chye ai: “Nye a lawt lu ai ahkang hpe kaga ni a myit nsam hte hpa majaw tara jeyang hkam na kun?” Jawng hpaji hte kan bau bungli hpe wanglu wanglang lata lu ai ahkang anhte hta nga ai raitim, anhte a wanglu wanglang lata mai ai ahkang gaw shadawn sharam sha rai nna, anhte a dawdan ai lam ni hta, shi akyu hte shi nga ai hpe myit dum ra ai. Dai majaw Pawlu ndai hku tsun wa ai: “Yawng mayawng galaw na ahkang nga ai; rai ti mung, yawng mayawng hte wa akyu byin ai n rai; yawng mayawng galaw na ahkang nga ai; rai ti mung, yawng mayawng hte wa shadaw shagrin lu ai n rai.” (1 Korinhtu 10:23) Dai majaw, tinang hte seng ai lam ni hpe lata ai shaloi, lawt lu ai ahkang anhte hta nga tim, anhte a myit ra ai lam gaw ahkyak htum ai lam n re.

11. Yehowa gaw anhte hpe hpa majaw shalawt ya ai kun?

¹¹ Petru gaw anhte a lawt lu ai lam hpe shut ai hku n jailang na matu sadi jaw wa ai. “Karai Kasang a shangun ma ni zawn” jaw ai hku akyu jashawn na matu shi tsun wa ai. Yehowa gaw Yesu hpe akyu jashawn nna anhte hpe yubak hte si ai kaw nna shalawt ya wa sai. Dai majaw, Yehowa hpe nawku dawjau na matu anhte a prat ting hpe akyu jashawn mai sai.

12. Noa hte shi a dinghku gaw anhte a matu gara hku kasi ningli madun wa ai kun?

¹² Anhte a lawt lu ai lam hpe kaja htum akyu jashawn mai ai lam gaw, Yehowa hpe nawku dawjau ai hta, anhte a ahkying aten hte n-gun atsam hpe jailang ai hku nna re. Ndai zawn galaw ai gaw, mungkan a bandung  ni de n du na matu hte tinang a myit ra ai lam gaw tinang a prat hta ahkyak htum ai lam n byin mat na matu makawp maga ya ai. (Galati 5:16) Noa hte shi a nta masha ni hpa galaw wa ai hpe myit yu u. Grai nhkru nna akyang hten ai mungkan hta shanhte asak hkrung wa ai. Raitim, shanhte grup yin hta nga ai masha ni galaw ai zawn, shanhte n hkan galaw ai. Yehowa shanhte hpe galaw shangun ai bungli hta sha, myit maju jung nga na matu lata wa ai. Sanghpaw li hpe shanhte shachyaw nna dusat ni hte shanhte a matu malu masha ni hpe mahkawng ai. Hka sha-u ing na lam kaga masha ni hpe sadi jaw wa ai. “Karai Kasang shi hpe hkang da wu ai hte maren, lam shagu” Noa galaw wa ai. (Ningpawt 6:22) Dai majaw, Noa hte shi a dinghku gaw mungkan a jahtum du ai shaloi asak lawt wa ai.​—Hebre 11:7.

13. Dai ni aten hta anhte hpe hpa galaw na matu Yehowa matsun da ai kun?

¹³ Dai ni aten hta, hpa galaw na matu anhte hpe Yehowa matsun da ai kun? Yesu a sape ni hku nna, hkaw tsun na matu anhte hpe matsun da ai. (Luka 4:18, 19 hpe hti u.) Satan gaw, dai ni aten na masha law law hpe shut shai ai nawku htung, arung arai hte mung masa lam ni a mayam byin hkra myi shamak da ya ai. (2 Korinhtu 4:4) Lawt lu ai ahkang nga ai Yehowa Karai Kasang hpe masha ni chye wa na matu hte, nawku dawjau wa na matu Yesu zawn anhte mung, karum ya lu ai. (Mahte 28:19, 20) Kaga ni hpe hkaw tsun na matu n loi ai. Shara nkau mi hta, masha ni gaw Karai Kasang a lam n chye mayu ma ai. Nkau mi gaw, shanhte hpe hkaw tsun ai shaloi, masin pyi pawt wa ai. Raitim, hkaw tsun na matu anhte hpe Yehowa matsun da ai majaw, tinang hkum tinang ndai hku san ra ai: ‘Nye a lawt lu ai ahkang hpe Yehowa a magam hta grau nna akyu jashawn lu na kun?’

14, 15. Yehowa a masha law law gaw hpa galaw na matu dawdan ma ai kun? (Ndai sumhpa shawng na sumla hpe yu u.)

¹⁴ Yehowa a masha ni gaw, ndai mungkan htum na grai ni sai hpe chye nna, prat hpe asan sha tawn na matu hte ningshawng galaw hpang na matu dawdan ai gaw, n-gun lu hpa re. (1 Korinhtu 9:19, 23) Ningshawng nkau mi gaw shanhte a buga kaw sha magam gun nna, nkau mi gaw grau ra ai shara de htawt nna magam gun ma ai. Lai wa sai manga ning hta, 250,000 jan ningshawng galaw hpang nna, ya nga yang 1,100,000 jan gaw ningshawng galaw nga ai. Masha law law gaw, shanhte a lawt lu ai ahkang hpe Yehowa a magam gun na matu akyu jashawn nga ai gaw kabu hpa re.​—Shakawn 110:3.

¹⁵ Shanhte a lawt lu ai ahkang hpe hpaji rawng ai hku akyu jashawn na matu hpa gaw karum ya ai kun? Lai wa sai shaning 30 hta, mungdan law law kaw magam gun wa ai Jon yan Judit a lam hpe myit yu ga. 1977 hta Lam Woi Ningshawng Jawng hpang ai shaloi, grau ra ai shara de htawt nna magam gun na matu jawng ma ni hpe n-gun jaw wa ai lam shan tsun dan ai. Bandung de du na matu Jon yan Judit gaw prat hpe matut nna asan sha tawn ra ai. Dai majaw, Jon gaw, bungli hpe chyahkring hkring galai shai nna galaw ai. Hpang jahtum hta, shanhte gaw  kaga mungdan de htawt nna magam gun ma ai. Amyu ga nnan sharin na matu, du hkra ladaw hte htung hking nnan ni hte htap htuk hkra nga na matu grai yak ai. Dai lam ni hpe tawt lai lu hkra, shan hpe hpa gaw karum ya wa ai kun? Shan hpe karum ya na matu, Yehowa hpe akyu hpyi nna shamyet shanat ai hku nna re. Dai aten ni hta, Yehowa hpe magam gun ai hte seng nna shan gara hku hkamsha ai kun? Jon ndai hku tsun ai: “Ngai galoi mung n chye wa ai, n hkrum ga ai kaja htum mahkrum madup ni hpe hkrum wa ai. Yehowa gaw nye a matu tsawra myit nga ai kawa langai zawn byin wa ai. Ya nga yang, Yaku 4:8 hta tsun da ai ‘Karai Kasang hpang de sit sa wa mu; shaloi shi nanhte hpang de sit wa na ra ai’ ngu ai lachyum hpe ngai grau chye na wa sai. Ngai hpa hpe myit mada nga nna, myit dik lam lu ai yaw shada lam gaw hpa re ai hpe ngai mu sai.”

16. Hkying lam hku law ai masha ni gaw shanhte a lawt lu ai lam hpe hpaji rawng let gara hku akyu jashawn wa ai kun?

¹⁶ Jon yan Judit zawn, nkau mi gaw shaning law law ningshawng lu galaw ai. Nkau mi chyawm gaw, masa amyu myu a majaw aten loi mi sha ningshawng lu galaw ai. Mungkan ting na gawgap bungli hta mung, shawang lit gun masha law law shang lawm nga ma ai. Ga shadawn, hpunau, nauna 27,000 daram gaw, Warwick, New York kaw nga ai gin jaw rung gawgap ai hta karum ya na matu sa ma ai. Nkau mi gaw bat lahkawng, nkau mi gaw shata loi mi hte nkau mi gaw laning mi (sh) dai hta grau na hkra sa magam gun ma ai. Shanhte kaw nna law law gaw, Warwick de sa nna magam gun na matu sak jaw ai lam ni galaw wa ai. Karai Kasang Yehowa hpe shakawn shagrau na matu, shanhte a lawt lu ai ahkang hpe akyu jashawn wa ai. Dai gaw kaja ai kasi ningli madun ai re.

17. Anhte a lawt lu ai ahkang hpe hpaji rawng ai hku akyu jashawn na nga yang, anhte hpa hpe myit mada mai ai kun?

¹⁷ Yehowa hpe chye wa nna, shi hpe nawku dawjau ai kaw nna lu la ai lawt lu lam, anhte hta nga ai majaw anhte chyeju dum ga ai. Ndai lawt lu ai lam gaw, grai manu dan ai hpe anhte a galaw ai lam ni hte sakse madun ga. Dai hpe shut ai hku jailang na malai, Yehowa a magam hta dang lu ai daram anhte akyu jashawn nga ga. “Hpan da hkrum ai ni gaw hten za chye ai mayam prat kaw nna lawt lu nna, Karai Kasang a kashu kasha ni a hpung shing kang hte hkum tsup ai lawt lu ai lam hpe hkamsha lu na” ngu ai myihtoi ga hpring tsup wa ai shaloi, dai aten hte seng nna, Yehowa anhte hpe ga sadi jaw da ai shaman chyeju ni hpe lu la na re.​—Roma 8:21, NW.