Shakawn 22:1 hta mu lu ai Dawi a ga hpe Yesu gaw shi si na mahka hta hpa majaw lakap wa ai kun?

Yesu si na mahka hta, hpang jahtum tsun wa ai ga hpe Mahte 27:46 hta ndai hku ka da ai: “Nye a Karai Wa e, nye a Karai Wa e, hpa rai nang ngai hpe kau da nga n ta?” Yesu dai ga hpe tsun ai gaw, Shakawn 22:1 hta lawm ai shakawn kungdawn sara Dawi tsun wa ai ga hpe hpring tsup hkra galaw wa ai re. (Mrk 15:34) Dai ga ni hpe Yesu tsun ai gaw, myit htum mat ai majaw (sh) chyahkring mi na laman makam masham n nga mat ai majaw tsun ai re ngu sawn la yang shut mat na re. Hpa majaw si hkam ra ai hpe shi atsawm chye na ai. Sharawng awng let mung si hkam mayu ai. (Mat 16:21; 20:28) Si ai aten hta, Yehowa makawp maga ya na n re ai hpe mung shi chye ai. (Yob 1:10) Yehowa dai hku galaw yang she, Yesu gaw si ai aten hta kade daram yakhkak tim, sadi dung lu ai hpe sakse madun lu na re.​—Mrk 14:35, 36.

Rai yang, Yesu gaw ndai shakawn kungdawn laika hta lawm ai ga hpe hpa majaw tsun wa ai kun? Anhte hkrak gaw n lu tsun tim, mai byin ai lam nkau hpe yu yu ga. *

Yesu dai ga ni tsun ai gaw, shi si ai lam hta Yehowa gaw lapran shang nna karum ya na n re ai hpe ahkyak shatai tsun nga ai mai byin ai. Yesu gaw Yehowa a karum shingtau lam n nga ai sha, gawng malai jahpu jaw ra ai. Shi gaw shinggyim masha langai hku nna, “masha yawng mayawng a matu, si hkam” ra ai.​—Heb 2:9.

 Dai shakawn kungdawn daw kaba 22 kaw na ga kachyi mi hpe Yesu lakap wa ai gaw, daw kaba ting hpe myit maju jung shangun mayu ai mai byin ai. Dai aten na Yuda masha law malawng gaw, shakawn kungdawn laika law law hpe matsing ma ai. Shakawn kungdawn laika hta lawm ai daw kaji langai hpe matsing ai nga yang, daw kaba ting hpe kalang ta matsing mat ai. Yesu a myit hta dai lam nga ai rai yang, ndai shakawn kungdawn laika hta shi si ai mabyin hte seng nna myihtoi da ai lam ni hpe shi hpang hkan ai Yuda masha ni bai dum na matu karum ya wa ai rai na re. (Shk 22:7, 8, 15, 16, 18, 24) Ndai daw kaba 22 a jahtum hta gaw, Yehowa hpe ginding aga ting hpe uphkang na hkawhkam hku nna shakawn da ai ga ni mung lawm ai.​—Shk 22:27-31.

Dawi a ga ni hpe Yesu lakap wa ai gaw shi hta mara n nga ai ngu ai hpe tsun mayu ai mai byin ai. Shi garai n si shi yang, Yuda tara rung daju gaw, Karai Kasang hpe jahpoi asawng ga tsun ai wa re ngu mara shangun nna, tara n shang ai hku dawdan ai hpe shi hkam sharang wa ai. (Mat 26:65, 66) Yuda tara rung daju gaw, shana yup tung hta, alawan sha masha mahkawng la nna, tara n shang ai hku san jep wa ma ai. (Mat 26:59; Mrk 14:56-59) Mahtai n ra ai dai ga san hpe Yesu tsun wa ai gaw, hpa mara mung n nga ai sha sat hkrum ai ngu ai lam hpe chye shangun mayu ai majaw rai na re.

Ndai shakawn kungdawn laika hpe ka ai Dawi gaw nni nkri hkrum wa ai. Dai gaw Yehowa a myiman sum mat ai lachyum n re ai hpe Yesu gaw kaga ni hpe bai shadum ya mayu ai majaw mai byin ai. Dawi a ga san gaw, makam masham gawngkya mat ai hpe madun dan nga ai n re. Dai ga san hpe tsun ngut ai hpang, Yehowa a hkye la lu ai atsam hpe kam ai lam tsun dan ai. Shi hpe mung Yehowa matut nna shaman chyeju jaw wa ai. (Shk 22:23, 24, 27) Dai hte maren, “Dawi a Kasha” Yesu mung hpun shadaw hta nni nkri hkrum wa ai gaw, Yehowa a myiman sum mat ai lachyum n re.​—Mat 21:9.

Sadi dung ai lam hpe Yesu tsep kawp madun lu hkra, makawp maga ya ai lam ni hpe Yehowa dawm la kau ai majaw, shi grai yawn ai ngu tsun mayu ai mai byin ai. Kasha hpe nni nkri hkrum let si hkam shangun na matu, shawng nnan kaw na Yehowa hta yaw shada lam n nga wa ai. Adam yan Ewa gumlau ngut ai hpang she, dai hku galaw ra wa ai. Yesu gaw hpa mara mung n galaw tim, Satan a ga san hpe mahtai jaw na matu hte shinggyim masha ni sum mat wa ai hpe bai mari la na matu, gawng malai jahpu jaw ra wa ai majaw, nni nkri hkrum let si hkam ra wa ai. (Mrk 8:31; 1 Pe 2:21-24) Dai aten hta, Yehowa a makawp maga ya ai lam hpe Yesu a prat hta shawng nnan hku nna dawm la kau ai nga yang she, dai lam ngut kre lu na re.

Hpun shadaw hta si hkam na matu Yehowa hpa majaw ahkang jaw ai hpe myit maju jung lu hkra Yesu gaw shi hpang hkan ai ni hpe karum ya nga ai mai byin ai. * Tara tawt lai ai wa hku nna hpun shadaw hta sat hkrum ai lam gaw, masha law law a matu ahtu kataw shara rai na hpe Yesu chye ai. (1 Ko 1:23) Shi hpa majaw si hkam ai ngu ai a tengman ai lam hpe shi hpang hkan ai ni myit maju jung ai nga yang, dai gaw shanhte a matu grai lachyum nga ai hpe chye na wa na re. (Gal 3:13, 14) Dai shaloi, shanhte gaw shi hpe tara tawt lai ai wa hku n re ai sha, Hkye Hkrang La Ai Wa hku nna mu wa na re.

Dai ga ni hpe Yesu hpa a majaw mi lakap nna tsun wa tim, hpun shadaw hta si hkam ai gaw Yehowa ra sharawng ai lam hpe galaw nga ai re ai hpe shi chye ai. Dai shakawn kungdawn laika kaw na ga hpe lakap ngut ai hte “ngut ma sa li ai” ngu nna Yesu tsun wa ai. (Yhn 19:30; Luk 22:37) Yehowa a makawp maga lam hpe chyahkring mi dawm la kau ai gaw, ginding aga de shangun dat ai lam hpe ngut kre hkra galaw na matu Yesu hpe Yehowa ahkang jaw kau ai re. “Mawshe a tara hta mung, myihtoi ni a laika hta mung, Shakawn Kungdawn laika ni hta mung” lawm ai shi hte seng ai lam ni hpe hpring tsup hkra galaw na matu mung ahkang jaw kau ai re.​—Luk 24:44.