1-2. Yesu a hkang hpe gara hku nna hkan nang lu na kun? Sanglang dan u.

HKYEN ni grai htat nna, grai shoihpa nga ai nam maling hta kaga ni hte rau lam hkawm nga ai ngu shingran yu u. Mahkrum madup nga ai wa gaw nang hpe lam woi nga ai. Shi hkawm mat ai shaloi, shi a lagaw hkang gaw hkyen hta ngam taw nga ai. Kalang lang gaw, lam woi wa hpe nang mu lu na n re. Raitim, nang hkrit na n re. Nang hte manang ni gaw lam woi wa a lagaw hkang hpe ani sha hkan nang taw ai majaw re.

² Jet ai Hkristan ni gaw, grai shoihpa nga ai nam maling hte bung ai nhkru ai mungkan hta hkawm nga ma ai. Raitim, Yehowa gaw kaja htum lam woi wa re ai Kasha Yesu Hkristu hpe jaw da ai. Shi a hkang hpe anhte htep lahti hkan nang lu ai. (1 Pe 2:21) Chyum Laika hpe lakap da ai laika buk langai hku nga yang, dai Chyum daw hta, Petru gaw Yesu hpe lam woi wa hte shing daw da ai. Lam woi wa a lagaw hkang zawn, Yesu mung anhte hkan nang lu hkra shi a lagaw hkang hpe ngam da ya ai. Yesu a lagaw hkang hpe hkan nang ai ngu ai gaw hpa lachyum rai kun? Anhte hpa majaw hkan nang ging ai kun? Gara hku hkan nang lu na kun? ngu ai ga san masum hpe bawngban mat ga.

3. Marai langai ngai a lagaw hkang hpe hkan nang ai ngu ai gaw hpa lachyum rai kun?

³ Marai langai ngai a lagaw hkang hpe hkan nang ai ngu ai gaw hpa lachyum rai kun? Chyum Laika hta, ‘hkawm sa ai,’ “sa wa ai lam” ngu ai ga si ni hpe kalang lang masha langai a prat hkrun lam hpe tsun mayu ai re. (Nin 6:9; Gsh 4:26) Masha langai madun ai kasi ningli hpe, shi hkawm mat ai shaloi ngam taw ai lagaw  hkang hte shing daw mai ai. Marai langai ngai a lagaw hkang hpe hkan nang ai ngu ai lachyum gaw, shi a kasi ningli hpe hkan sa nna, kasi la ai hpe tsun mayu ai re.

4. Yesu a kasi ningli hpe hkan sa ai ngu ai gaw hpa lachyum rai kun?

⁴ Yesu a lagaw hkang hpe hkan nang ai ngu ai gaw hpa lachyum rai kun? Shi a kasi ningli hpe hkan sa ai ngu ai lachyum re. Nni nkri hkrum ai shaloi, hkamjan lu ai Yesu a kaja ai kasi ningli hpe ndai sumhpa a madung Chyum daw hta kasa Petru gaw laksan hku nna tsun da ai. Raitim, Yesu hpe kasi la lu ai lam law law naw nga ai. (1 Pe 2:18-25) Yesu a prat ting hta, shi galaw ai, tsun ai lam yawng gaw anhte hkan sa lu ai kasi ningli re.

5. Hkum tsup ai Yesu a kasi ningli hpe n hkum tsup ai shinggyim masha ni hkan sa lu na kun? Sanglang dan u.

⁵ N hkum tsup ai shinggyim masha ni hku nna, Yesu a kasi ningli hpe gaja wa hkan sa lu na kun? Hkan sa lu ai. Petru gaw anhte hpe “Shi [Yesu] a hkang” hpe raw hkan nang na matu n tsun da ai sha, htep lahti hkan nang na matu sha n-gun jaw da ai. Shi a lagaw hkang hpe atsawm hkan nang na nga yang, n hkum tsup ai shinggyim masha ni raitim, kaja htum galaw lu na re. “Yesu hkawm sa wa ai lam hte maren, matut hkawm sa u” ngu ai kasa Yawhan a ga hpe hkan sa lu na re.​—1 Yh 2:6, NW.

6-7. Yesu a hkang hpe hkan sa ai nga yang Yehowa hte grau nihtep wa na ngu hpa majaw lu tsun ai kun?

⁶ Yesu a hkang hpe hkan nang na nga yang Yehowa hte nihtep lu na re. Hpa majaw dai hku lu tsun ai kun? Langai, Yesu gaw Karai Kasang ra sharawng ai hte maren, sak hkrung hkawm sa lam hta kaja htum kasi ningli madun wa ai. (Yhn 8:29) Dai majaw, Yesu a hkang hpe hkan nang na nga yang, Yehowa ra sharawng ai lam lu la na re. Anhte a sumsing Kawa gaw shi hte jinghku byin na matu, shakut nga ai ni hpang de sit sa wa na ngu ai hpe mung anhte kam mai ai.​—Yak 4:8.

⁷ Lahkawng, Yesu gaw Kawa a kasi ningli hpe  raw hkan sa ai. Dai majaw, “ngai hpe mu yu ai wa gaw, Wa hpe mu yu nu ai” ngu Yesu lu tsun wa ai. (Yhn 14:9) Yesu a atsam ningja ni, kaga ni hpe shi kanawn mazum ai lam ni hpe anhte kasi la mai ai. Ga shadawn, manggang kap ai wa hpe matsan dum myit madun ai, grai machyi jung nga ai num hpe myit tau ya ai, tsawra ai ni si mat ai majaw yawn hkyen nga ai ni hpe matsan dum myit madun ai. Yesu hpe anhte kasi la yang, Yehowa hpe mung kasi la nga ai re. (Mrk 1:40, 41; 5:25-34; Yhn 11:33-35) Yehowa hpe grau nna kasi la yang, shi hte grau nihtep wa na re.

8. Yesu a hkang hpe hkan nang ai gaw mungkan hpe “dang kau” lu hkra hpa majaw karum ya ai hpe sanglang dan u.

⁸ Yesu a hkang hpe hkan nang ai gaw ndai nhkru ai mungkan a majaw myit n bra mat hkra karum ya ai. Yesu gaw ginding aga asak aprat hpang jahtum shana hta “ngai gaw mungkan ga hpe dang kau da ni ai” ngu lu tsun wa ai. (Yhn 16:33) Mungkan a lailen ni, bandung ni, myit mang ai lam ni a shingkang ka-up ai lam hpe ahkang n jaw ai ngu tsun mayu ai re. Yesu gaw, Yehowa a amying san seng chyoi pra na matu, shi hpe ginding aga de shangun dat ai madung lam hpe galoi n malap ai. Anhte gaw gara hku kun? Ndai mungkan hta, myit bra mat shangun lu ai lam law law nga ai. Yesu zawn, Yehowa a myit ra ai lam hpe myit maju jung yang, anhte mung mungkan hpe “dang kau” lu na re.​—1 Yh 5:5.

9. Htani htana asak lam hta hkawm nga lu na matu anhte hpa galaw ra ai kun?

⁹ Yesu a hkang hpe hkan nang ai gaw htani htana asak lam de lam woi ya ai. Lusu ai la langai gaw, htani htana asak lu na matu hpa galaw ra na kun? ngu nna Yesu hpe san ai shaloi, ngai kaw “hkan nang rit” ngu tsun ai. (Mat 19:16-21) Hkristu hku nna n kam ai Yuda masha nkau hpe mung Yesu ndai hku tsun ai: “Nye a sagu ni gaw, . . . nye a hpang hkan nang ma ai: ngai shanhte hpe n htum n wai asak jaw da we ai.” (Yhn 10:24-29) Yesu gaw shi hpe “kam sham ai ni nlang hte” gaw “htani htana asak lu la” na ngu shi a sharin achyin ai lam hpe myit lawm wa ai Yuda Tara Rung hpung shang masha Nikodi hpe tsun ai. (Yhn 3:16) Yesu a sharin achyin ai lam, galaw ai lam ni hpe kasi la hkan sa ai hku nna shi hpe kam ai lam anhte madun ai. Dai hku galaw yang, htani htana asak lam hta anhte hkawm nga lu na re.​—Mat 7:14.

10. Yesu hpe grau “chye chyang lu” hkra hpa galaw ra ai kun? (Yawhan 17:3)

¹⁰ Yesu a hkang hpe garai n hkan nang shi yang, shi a lam hpe shawng chye ra ai. (Yawhan 17:3 hpe hti u.) Yesu hpe “chye chyang lu” na matu matut galaw ra ai lam ni nga ai. Shi a tsang madang ni, myit mang ai lam ni, atsam ningja ni hpe grau hkaja yang, shi a lam hpe grau chye wa na re. Tengman ai lam hta, kade daram na sai raitim, Yehowa hte shi a Kasha  hpe chye chyang lu hkra matut nna shakut ra ai.

11. Dai Laika mali hta hpa ni lawm ai kun?

¹¹ Kasha a lam hpe grau chye wa na matu, Yehowa gaw Chyum Laika hta Kabu Gara Shiga Laika mali hpe shalawm da ya ai. Dai Laika mali hta, Yesu a prat hkrun lam hte magam bungli hte seng ai labau lawm ai. Dai hta, Yesu tsun ai lam, galaw ai lam hte shi a hkamsha ai lam ni lawm ai. Dai Laika mali gaw, Yesu a kasi ningli hpe atsawm myit sawn sumru na matu karum ya ai. (Heb 12:3) Dai hta lawm ai lam ni gaw, Yesu ngam da ai lagaw hkang ni re. Dai Laika mali hpe hkaja na nga yang, Yesu a lam hpe grau chye wa na re. Rai yang, shi a hkang hpe htep lahti hkan nang lu na re.

12. Dai Laika mali kaw nna akyu hpring tup lu la na matu gara hku galaw lu ai kun?

¹² Dai Laika mali kaw na akyu hpring tup lu la na matu, hti ai daram hte sha n-ga, galaw ra ai. Dai lam ni hpe atsawm hkaja na matu, aten la ra nna, sung sung myit sawn sumru ra ai. (Yawshu 1:8 hte shingdaw yu u.) Dai Laika mali hpe myit sawn sumru na matu hte chye wa ai lam ni hpe tatut hkan sa lu na matu, karum ya lu ai lam lahkawng hpe hkaja yu ga.

13. Kabu Gara Laika mali hta lawm ai labau ni hpe gara hku shingran yu mai ai kun?

¹³ Langai, Laika mali hta lawm ai labau ni hpe shingran yu u. Byin wa ai lam ni hpe mu lu, na lu, hkamsha lu hkra shingran yu u. Dai hku galaw lu na matu, Yehowa a uhpung kaw na lajang da ya ai laili laika ni hta lawm ai lam ni hpe sawk sagawn yu u. Nang hkaja nga ai labau ni a shawng hpang mabyin ni hpe mung atsawm myit yu u. Shingdu labau hte mabyin masa ni hpe sanglang da ai lam ni hpe mung tam sawk sagawn yu u. Nang hkaja nga ai labau hte bung ai Laika mali kaw lawm ai kaga mabyin ni hte mung shingdaw yu u. Kalang marang, Kabu Gara Shiga Laika ka ai marai langai gaw, mabyin langai hpe ahkri ahkrai ka shalawm tim, kaga langai gaw n ka da ai.

14-15. Kabu Gara Shiga Laika mali hta lawm ai labau ni hpe anhte a prat hta gara hku hkan sa lu na kun?

¹⁴ Lahkawng, Kabu Gara Shiga Laika mali hta lawm ai labau ni hpe na a prat hta hkan sa u. (Yhn 13:17) Kabu Gara Shiga Laika hta  lawm ai labau langai hpe atsawm hkaja ngut ai hpang, tinang hkum tinang ndai hku san yu u: ‘Ndai labau hta ngai hkan sa lu ai lam langai nga ai kun? Kaga ni hpe karum ya na matu ndai labau hpe gara hku akyu jashawn lu na kun?’ Sharin la wa ai lam ni hpe tinang chye ai marai langai ngai hpe tsawra myit hte hpaji rawng ai hku tsun dan mai ai.

¹⁵ Ndai hpaji jaw ga lahkawng hpe gara hku hkan sa lu ai ngu ai ga shadawn langai hpe yu yu ga. Nawku Htingnu hta Yesu sadi hkrup wa ai matsan ai gaida jan a labau re.

16. Marku 12:41 hta lawm ai lam hpe tsun dan u.

¹⁶ Ndai labau hpe shingran yu u. (Marku 12:41 hpe hti u.) Mabyin hpe shingran yu u. A.D. 33, Nisan 11, Yesu garai n si shi ai nhtoi loi mi daram hta re. Yesu gaw, dai shani a aten law law hpe nawku htingnu hta sharin achyin na matu, jailang wa ai. Nawku htung ningbaw ni gaw, shi hpe ninghkap ma ai. Shanhte kaw na nkau mi gaw, shi a ahkang aya hte seng nna ga san san ai lam ni mung nga wa ai. Nkau mi nga yang htai yak na zawn re ai ga san ni hpe mung san wa ai. (Mrk 11:27-33; 12:13-34) Ya, Yesu gaw nawku htingnu a kaga shara kaw bai du taw ai. Dai shara gaw Num Ni Hpawng Ai Shara ngu shaga ai shara rai na masa nga ai. Dai majaw, shi gaw shakum dingyang hta tawn da ai alu sutdek ni hpe mu lu taw ai. Alu sutdek hta alu bang nga ai ni hpe mung mu nga ai. Lusu ai ni gaw, den-ga law law bang ai hpe mu ai. Alu sutdek hta den-ga bang dat ai nsen hpe na lu ai daram ni ai shara kaw dung nga ai rai na re.

17. Marku 12:42 hta lawm ai matsan mayam re ai gaida jan gaw hpa galaw wa ai kun?

¹⁷ Marku 12:42 hpe hti u. Dai shaloi, Yesu gaw num langai hpe sadi hkrup ai. Shi gaw “matsan mayan re ai gaida jan” re. (Luk 21:2) Shi a prat gaw, ra kadawn ai lam ni hpe mari na matu pyi grai yak na masa nga ai. Raitim, shi gaw alu sutdek de sa nna kaji ai den-ga lahkawng hpe akatsi sha bang dat ai. Dai majaw, den-ga shang mat ai nsen pyi n na ai daram re. Dai aten hta jailang wa ai manu yawm dik htum den-ga lahkawng bang dat ai hpe Yesu chye ai. Dai gaw, lusha a matu dut ai manu yawm dik htum u tsa langai hpe mari na matu pyi n law ai.

18. Marku 12:43, 44 hku nga yang, gaida jan a alu hte seng nna Yesu hpa tsun wa ai kun?

¹⁸ Marku 12:43, 44 hpe hti u. Ndai gaida jan galaw ai hpe Yesu grai ra sharawng mat ai. Dai majaw, sape ni hpe shaga la nna, gaida jan hpe madun let ndai hku tsun ai: “Ndai matsan mayan re ai gaida jan gaw, . . . grau nna bang dat nu ai.” Dai hpang, ndai hku sanglang dan ai: “Shanhte nlang, [laksan hku nna lusu ai masha ni gaw] tinang a n taw n tsang lu ai hta na jan ai hpe bang da ma ai; shi chyawm gaw shi a matsan mayan re ai hta na lu malu mahkra hpe, . . . shi a nsa bau na arai yawng hpe, bang kau nu ai.” Sadi dung ai gaida jan gaw, dai shani shi hta nga ai gumhpraw yawng hpe bang kau ai hku nna, Yehowa lanu lahku na hpe kam ai lam madun wa ai.​—Shk 26:3.

19. Matsan ai gaida jan hte seng nna Yesu tsun ai ga ni kaw na gara ahkyak ai lam hpe sharin la lu ai kun?

¹⁹ Ndai labau hpe na a prat hta tatut hkan sa u. Tinang hkum tinang ndai hku san u: ‘Matsan ai gaida jan hte seng nna Yesu tsun ai ga ni kaw na ngai hpa sharin la lu na kun?’ Gaida jan a lam hpe myit yu u. Shi gaw Yehowa hpe dai hta grau nna jaw mayu wa na re. Shi galaw lu ai lam yawng hpe galaw wa ai. Yehowa hpe kaja htum jaw wa ai. Kawa a man hta shi a alu gaw grai manu dan ai hpe Yesu chye ai. Ndai kaw na grai ahkyak ai lam langai hpe sharin la lu ai. Anhte gaw, Yehowa hpe myit kraw lawang mahkra, myit masin mahkra hte kaja htum jaw yang, shi ra sharawng ai hpe chye lu ai. (Mat 22:37; Kol 3:23, 24) Anhte dang lu ai daram galaw nga ai hpe mu ai shaloi Yehowa grai kabu ai. Anhte  a ahkying aten, n-gun atsam ni hpe nawku dawjau ai lam hta akyu jashawn ai hku nna dai npawt tara hpe hkan sa mai ai. Dai hta, hkaw tsun bungli galaw ai, zuphpawng lung ai lam ni lawm ai.

20. Gaida jan a labau kaw na sharin la wa ai lam hpe gara hku hkan sa lu na kun? Ga shadawn tsun dan u. 

²⁰ Gaida jan hte seng ai labau kaw nna, sharin la lu ai lam hpe nang gara hku hkan sa lu na kun? Tinang shakut shaja ai lam hpe Yehowa ra sharawng na kun? ngu nna myit nga ai ni hpe myit yu u. Ga shadawn, hkam ja lam a majaw, hkaw tsun bungli hta galaw mayu ai daram n lu galaw mat sai majaw, akyu n rawng ai, mara nga ai ngu hkamsha nga ai asak kaba ai nauna langai hpe nang chye ai kun? (sh) Grai machyi jung nna Nawku Htingnu hta galaw ai zuphpawng shagu hpe n lu lung ai majaw, myit daw nga ai hpunau langai hpe nang myit yu mai na kun? Shanhte hpe “shadaw shalan na matu, mai kaja ai ga” tsun ai hku nna karum ya u. (Ehp 4:29) Matsan ai gaida jan a labau kaw na anhte n-gun lu la wa ai lam ni hpe shanhte hpe tsun dan u. Anhte kaja htum galaw ai hpe Yehowa ra sharawng ai lam na a n-gun jaw ya lu ai ga ni hte shanhte hpe bai shadum ya mai ai. (Gsh 15:23; 1 Ht 5:11) Kade daram kaji kajaw re ai lam raitim, Yehowa a matu kaja htum galaw nga ai ni hpe shakawn ya ai gaw, Yesu a hkang hpe htep lahti hkan nang nga ai re.

21. Hpa galaw na matu dawdan da ai kun?

²¹ Yesu a kasi ningli hpe hkan sa na matu, shi a hkang hpe htep lahti hkan nang lu na matu, Yesu a prat hte seng nna ahkri ahkrai lam ni hpe Kabu Gara Shiga Laika mali hta bang da ya ai majaw, grai chyeju dum ai. Dai Laika mali hta lawm ai lam ni hpe tinang hkrai hkaja ai lamang (sh) dinghku nawku hta hkaja mai ai n re i? Dai zawn hkaja ai lam kaw na akyu grau lu la hkra, dai labau ni hpe shingran yu ra ai, tatut hkan sa ra ai. Dai sha n-ga, Yesu galaw wa ai lam ni hpe kasi la ra ai. Shi tsun wa ai lam ni hpe madat ra ai. Hpang na sumhpa hta Yesu garai n si shi yang, hpang jahtum tsun wa ai ga ni kaw na hpa sharin la lu ai lam hpe hkaja lu na re.