1-2. Yesu gaw hpang jahtum ga n tsun shi yang hpa byin wa ai kun?

A.D. 33, Nisan 14 shani aten re. Yesu gaw, tara n tawt lai wa tim, shut ai hku mara shagun hkrum ai, tara jeyang hkrum ai. Dai hpang, jahpoi asawng hkrum ai, grai zingri zingrat hkrum nna hpun shadaw hta jen da hkrum ai. Lagaw lata ni hpe hpri hte adit bang hkrum ai. Nsa sa shagu, ga shaga shagu, grai machyi ai. Raitim, shi hta grai ahkyak ai lam ni tsun ra ai majaw, ga shaga ra ai.

² Hpun shadaw hta, jen da hkrum ai shaloi, Yesu tsun wa ai ga ni hte, dai ga ni kaw na anhte sharin la lu ai lam ni hpe hkaja yu ga. “Shi a ga madat mara mu” ngu tsun wa ai lam hpe mung bawngban yu ga.​—Mat 17:5.

3. “Wa e, shanhte a mara dat kau ya mu” ngu Yesu tsun wa ai gaw kadai ni a matu rai kun?

³ Yesu hpa tsun wa ai kun? Hpun shadaw hta jen da hkrum ai shaloi, “Wa e, shanhte a mara dat kau ya mu” ngu nna akyu hpyi wa ai. Kadai ni a matu rai kun? “Shanhte galaw ai lam hpe shanhte n chye nga ma ai” ngu tsun wa ai ga kaw na, kadai ni hpe tsun mayu ai lam chye lu ai. (Luk 23:33, 34) Shi a lagaw, lata ni hpe hpri hte adit ai Roma hpyen la ni hpe tsun mayu ai rai na re. Shanhte gaw shi kadai re ai hpe n chye ma ai. Shi hpe sat na matu hpyi shawn wa tim, hpang de shi hpe kamsham wa na masha hpawng kaw na nkau mi hpe tsun mayu ai mung rai na re. (Kas 2:36-38) Yesu gaw dai hku n si ging ai. Raitim, shi hpe zingri zingrat wa ai ni hpe mung, masin n pawt ai. Masin n si ai baw mung n byin ai. (1 Pe 2:23) Shanhte hpe mara raw ya na matu pyi Yehowa kaw hpyi shawn ya ai.

4. Ninghkap ai ni hpe sharawng awng let mara raw ya ai Yesu a lam kaw na hpa sharin la lu ai kun?

 ⁴ Yesu a ga ni kaw na anhte hpa sharin la lu ai kun? Yesu zawn, anhte mung kaga ni hpe sharawng awng let mara raw ya ra ai. (Kol 3:13) Jinghku ni hte masha nkau mi gaw, anhte a makam masham, anhte a prat hkrun lam hpe n chye na ai majaw ninghkap chye ai. Anhte hte seng nna, n teng ai ga ni tsun ai, kaga ni a man hta jahpoi asawng ai, anhte a laili laika ni hpe jahten ai, hkum hkrang hkra machyi hkra pyi, jahkrit shama chye ai. Ninghkap ai ni hpe myit machyi nga na malai, shanhte tengman ai lam chye wa hkra Yehowa kaw akyu hpyi ya mai ai. (Mat 5:44, 45) Kalang lang, grai sawng ai n tara ai lam hte hkrum wa yang, mara raw ya na matu yak chye ai. Raitim, matut nna masin pawt nga na, myit machyi nga na nga yang, anhte nan hkra machyi wa chye ai. Nauna langai ndai hku tsun ai: “Mara raw ya ai ngu ai gaw, shanhte galaw ai gaw jaw ai (sh) tinang hpe n hkru ai hku kanawn mazum na matu ahkang jaw kau ai n re ai hpe ngai chye mat ai. Myit n machyi nga na matu dawdan kau ai lachyum re.” (Shk 37:8) Anhte mara raw ya na nga yang, hkra machyi shangun ai lam ni n byin hkra karum ya ai.​—Ehp 4:31, 32.

5. Yesu gaw makau hta nga ai tara tawt lai ai wa hpe hpa ga sadi jaw wa ai kun? Shi hpa majaw dai ga sadi jaw wa ai kun?

⁵ Yesu hpa tsun wa ai kun? Tara tawt lai ai marai lahkawng mung Yesu a makau hta jen da hkrum ai. Shawng nnan hta, shan lahkawng yan shi hpe jahpoi asawng ai. (Mat 27:44) Raitim, marai langai a myit gaw galai shai mat ai. Yesu gaw, “shut ai amu” hpa mung n galaw da ai hpe shi chye mat ai. (Luk 23:40, 41, JCLB) Yesu gaw si ai kaw na bai hkrung rawt wa na, lani mi hta hkawhkam hku nna uphkang na hpe mung shi kam ai lam madun wa ai. Yesu hpe shi ndai hku tsun ai: “Yesu e, nang na a mungdan hta du wa yang, ngai e dum rit law.” (Luk 23:42) Dai wa gaw Yesu hpe kamsham ai lam madun wa ai. Shi hpe Yesu ndai hku ga sadi jaw ai: “Ngai nang hpe teng teng tsun de ga, Dai ni jang nang ngai hte rau [Mungdan hta n re ai sha,] Hparadisu e nga na rai nga ai.” (Luk 23:43) “Ngai,” “nang hpe,” “ngai hte” ngu nna Yesu tsun wa ai ga si ni hpe yu yang, dai wa hpe nan san san tsun wa ai hpe chye lu ai. Yehowa gaw matsan dum myit nga ai hpe chye ai majaw, Yesu gaw sat hkrum na tara tawt lai ai wa hpe myit mada lam jaw wa ai re.​—Shk 103:8.

6. Tara tawt lai ai wa hpe tsun wa ai Yesu a ga ni kaw na hpa sharin la lu ai kun?

⁶ Yesu a ga ni kaw na anhte hpa sharin la lu ai kun? Yesu gaw shi kawa zawn sha re. (Heb 1:3) Lai wa sai aten hta anhte galaw shut wa ai mara ni a matu myit malai lu ai lam madun nna, Yesu Hkristu a gawng malai hkungga a majaw, anhte mara raw dat hkrum ai hpe kam ai lam madun ra ai. Rai yang, Yehowa gaw mara raw ya na matu, matsan dum myit madun na matu jin jin rai nga na re. (1 Yh 1:7) Nkau mi gaw, lai wa sai aten hta galaw shut wa ai mara ni hpe Yehowa mara raw ya ai hpe kam na matu yak chye ai. Kalang lang nang dai zawn hkamsha nga yang, ndai lam hpe myit dum u: Yesu si na mahka hta, shi hpe ya sha kamsham ai lam madun wa ai tara tawt lai ai wa hpe matsan dum myit madun wa ai. Dai majaw, Yehowa gaw shi a hkang da ai tara ni hpe hkan sa nna, kaja htum galaw nga ai, sadi dung let nawku nga ai ni hpe matsan dum myit grau nna madun na re.​—Shk 51:1; 1 Yh 2:1, 2.

7. Yawhan 19:26, 27 hku nga yang, Yesu gaw Mari hte Yawhan hpe hpa tsun wa ai kun? Hpa majaw dai hku tsun wa ai kun?

⁷ Yesu hpa tsun wa ai kun? (Yawhan 19:26, 27 hpe hti u.) Yesu gaw gaida rai na masa nga ai kanu hpe myit tsang wa ai. Shi a kahpu  kanau ni gaw, kanu a ra kadawn ai lam ni hpe lanu lahku ya lu na re. Raitim, wenyi lam hpe kadai lanu lahku ya na kun? Dai aten hta shi a kahpu kanau ni gaw sape garai n byin shi ai rai na re. Yawhan gaw sadi dung ai kasa rai nna, Yesu a hkau dik htum manang re. Yehowa hpe nawku ai ni hpe shi a nta masha ni zawn sha Yesu mu mada ai. (Mat 12:46-50) Kanu hpe tsawra nna myit tsang ai majaw, lanu lahku ya na matu, Yawhan kaw ap ai. Kanu a wenyi lam hpe atsawm lanu lahku ya na hpe kam ai. “Ning sha hpe yu u” ngu nna kanu hpe tsun ai. Yawhan hpe mung “Ning nu hpe yu u” ngu tsun wa ai. Dai shani kaw nna, Yawhan gaw Mari a kasha zawn byin wa nna, kanu langai zawn lanu lahku ya wa ai. Mari gaw kasha hpe shangai ai aten hta mung tsawra myit hte lanu lahku ya nna, si ai aten hta mung makau hta nga nga ya ai. Dai manu dan ai num hpe Yesu tsawra myit madun wa ai.

8. Mari hte Yawhan hpe tsun wa ai Yesu a ga ni kaw na hpa sharin la lu ai kun?

 ⁸ Yesu a ga ni kaw na anhte hpa sharin la lu ai kun? Anhte a nta masha ni hta na hpunau nauna ni hpe grau hku hkau ra ai. Nta masha ni gaw anhte hpe ninghkap ai (sh) tawn kau da ai raitim pyi, Yehowa hte Shi a uhpung hte nihtep hkra matut nga ra ai. Rai yang, anhte sum mat ai hta na “htam latsa” bai lu la na ngu Yesu ga sadi jaw da ai. Hpunau nauna ni gaw anhte a kashu kasha, kanu kawa zawn byin wa na re. (Mrk 10:29, 30) Yehowa hpe tsawra let kamsham nga ai, shada da tsawra nna zinlum nga ai wenyi kun dinghku hta nang lawm lu ai majaw gara hku hkamsha ai kun?​—Kol 3:14; 1 Pe 2:17.

9. Mahte 27:46 hta Yesu tsun wa ai ga ni kaw na hpa chye lu ai kun?

⁹ Yesu hpa tsun wa ai kun? Shi si na mahka hta, “Nye a Karai Wa e, nye a Karai Wa e, hpa rai nang ngai hpe kau da nga n ta?” ngu nna jahtau wa ai. (Mat 27:46) Hpa majaw dai hku tsun wa ai hpe gaw Chyum Laika hta n sanglang da ai. Raitim, dai ga ni kaw na anhte hpa sharin la lu ai hpe myit yu u. Langai, dai ga ni hpe Yesu tsun ai hku nna, Shakawn 22:1 * hta mu lu ai myihtoi ga hpring tsup wa ai hpe chye lu ai. Lahkawng, Yehowa gaw shi a Kasha hpe “grup hkra nhpan” n kum da ya ai hpe mung asan sha chye lu ai. (Yob 1:10) Shinggyim masha kadai mung n hkrum ga ai chyam dinglik lam hpe hkrum na matu, si ai du hkra shi a makam masham hpe chyam dinglik na matu, Kawa gaw hpyen ni a lata de ap kau ai hpe Yesu chye na ai. Masum, tara n tawt lai da ai, mara n nga ai sha, si dam jahkrat hkrum ai hpe dai ga ni kaw na chye lu ai.

10. Kawa hpe tsun ai Yesu a ga ni kaw na hpa sharin la lu ai kun?

¹⁰ Yesu a ga ni kaw na hpa sharin la lu ai kun? Langai, anhte a makam masham chyam dinglik n hkrum hkra, Yehowa makawp maga ya na n re ai hpe sharin la lu ai. Yesu zawn chyam dinglik hkrum wa yang, anhte mung si ai du hkra sadi dung lu na matu hkyen lajang da ra ai. (Mat 16:24, 25) Raitim, anhte n hkam jan lu hkra chyam dinglik hkrum na matu Karai Kasang ahkang jaw na n re ai hpe kam mai ai. (1 Ko 10:13) Lahkawng, Yesu zawn anhte mung n tara ai hku chyam dinglik hkrum chye ai. (1 Pe 2:19, 20) Dai zawn hkrum ai gaw, lama ma shut da ai majaw n re ai sha, mungkan hta n shang lawm ai majaw, tengman ai tara hpe sakse hkam ai majaw re. (Yhn 17:14; 1 Pe 4:15, 16) Yesu gaw shi hpe chyam dinglik na matu, Yehowa hpa majaw ahkang jaw ai hpe chye na ai. Raitim, sadi dung ai mayam nkau gaw, shanhte hta chyam dinglik hkrum na matu Yehowa hpa majaw ahkang jaw ai hpe kalang lang mau na re. (Hab 1:3) Dai zawn hkamsha ai gaw shanhte a makam masham yawm mat ai n re ai hpe matsan dum chye nna, myit galu ai Karai Kasang chye na ya ai. Shanhte gaw shi chyu sha jaw ya lu ai shalan shabran lam ra nga ai she re.​—2 Ko 1:3, 4.

11. Yawhan 19:28 hta mu lu ai ga ni hpe Yesu hpa majaw tsun wa ai kun?

¹¹ Yesu hpa tsun wa ai kun? (Yawhan 19:28 hpe hti u.) “Ngai hpang kara nngai” ngu nna Yesu hpa majaw tsun ai kun? “Nye a n-gun di chyen zawn hkraw mat nga ai, Nye a shinglet nye a gumra hta kap mat sai” ngu tsun da ai Shakawn 22:15 hta mu lu ai myihtoi ga hpe “shadik na matu” tsun wa ai re. Yesu gaw hpun shadaw hta grai nni nhkri hkamsha ngut ai hpang, hka grai “hpang kara” wa ai. Hpang kara mai na matu shi karum hpyi wa ai.

12. “Ngai hpang kara nga nngai” ngu tsun wa ai Yesu a ga ni kaw na hpa sharin la lu ai kun?

 ¹² Yesu a ga ni kaw na anhte hpa sharin la lu ai kun? Tinang a hkamsha lam hpe tsun dan ai gaw gawng kya ai lam re ai ngu Yesu n shadu ai. Dai majaw, anhte mung tinang a hkamsha lam hpe tsun dan ging ai. Raitim, anhte gaw tinang a ra kadawn nga ai lam ni hpe kaga ni hpe n tsun dan mayu ai. Karum shingtau lam ra wa yang gaw, kaga ni hpe karum hpyi na matu n htingnut ging ai. Ga shadawn, asak kaba ai (sh) hkam n kaja ai nga yang, seng kaw lama ma sa mari ya na matu, sarawun sa madun na matu karum hpyi ra chye ai. Myit daw ai ngu hkamsha nga yang, anhte tsun ai hpe madat ya na matu (sh) n-gun jaw ga ni hpe na lu na matu, myitsu salang langai (sh) kung hpan ai Hkristan marai langai hpe karum hpyi ra chye ai. (Gsh 12:25) Hpunau nauna ni gaw anhte hpe tsawra ai, “ru yak hkrum ai nhtoi” hta karum ya mayu ai hpe dum nga ga. (Gsh 17:17) Raitim, shanhte gaw anhte a myit kraw hta gara hku hkamsha nga ai hpe n chye lu ai. Dai majaw, tinang maga hku nna tsun dan ra ai.

13. Yesu gaw si ai du hkra sadi dung wa ai majaw hpa ni hpe galaw ngut kre awng dang wa ai kun?

¹³ Yesu hpa tsun wa ai kun? Nisan 14, shana maga hkying 3 daram hta, Yesu gaw “ngut ma sa li ai” ngu jahtau wa ai. (Yhn 19:30) Yehowa galaw shangun mayu ai lam yawng hpe, galaw ngut kre awng dang wa sai lam shi chye ai hpe dai ga ni kaw na chye lu ai. Si ai du hkra sadi dung wa ai majaw lam law law hpe galaw ngut kre lu wa ai. Langai, Satan gaw masu ai wa re ai hpe sakse madun wa ai. Satan hpa mi galaw tim, hkum tsup ai shinggyim masha gaw, matut sadi dung lu ai hpe madun wa ai. Lahkawng, Yesu gaw shi a asak hpe gawng malai hkungga hku nna jaw wa ai. Dai hkungga a majaw, n hkum tsup ai shinggyim masha ni gaw Karai a man hta ding hpring let asak hkrung lu nna, htani htana asak hkrung na matu myit mada lam lu wa ai. Masum, Yehowa a awm dawm ahkang gaw ding hpring ai ngu ai hpe sakse madun wa nna, Kawa a amying san seng chyoi pra hkra galaw ya wa ai.

14. Shani shagu na sak hkrung hkawm sa lam hta gara hku galaw na matu dawdan da ging ai kun? Sanglang dan u.

¹⁴ Yesu a ga ni kaw na anhte hpa sharin la lu ai kun? Shani shagu na sak hkrung hkawm sa lam hta sadi dung na matu dawdan da ra ai. Gilead Sin Langchyi Chyum Jawng hta sharin ya ai wa re ai Hpunau Mek-we Hpren tsun ai ga hpe yu yu ga. Mungdan ga daga zuphpawng langai hta Hpunau Hpren gaw, sadi dung ai hte seng nna ndai hku tsun wa ai: “Dai ni galaw lu ai, tsun lu ai lam hpe hpawt ni galaw na ngu hkum myit. Hpawt ni hpa byin na hpe nang chye ai kun? Htani htana asak hkrung na matu, ging dan ai lam hpe madun na matu, hpang jahtum ahkaw ahkang re ngu sawn la nna shani shagu asak hkrung hkawm sa u.” Anhte mung matut sadi dung lu na matu, hpang jahtum ahkaw ahkang re ngu sawn la nna shani shagu asak hkrung nga ga. Rai yang anhte si mat tim pyi, “Yehowa e, nang hpe matut sadi dung lu na matu, na a amying hte awm dawm ahkaw ahkang hpe shachyoi shapra na matu, Satan gaw masu ai wa re ai hpe sakse madun lu na matu kaja htum galaw wa sai” ngu lu tsun na re.

15. Luka 23:46 hku nga yang Yesu gaw shi a kam ai myit hpe gara hku madun wa ai kun?

¹⁵ Yesu hpa tsun wa ai kun? (Luka 23:46 hpe hti u.) Yesu gaw tsep kawp kam ai myit hte, “Wa e, nye a Wenyi na a lata hta ngai ap ya de ai” ngu nna tsun wa ai. Shi a htawm hpang gaw, Yehowa a ntsa madung nga ai hpe Yesu chye ai. Kawa gaw shi hpe dum nga na hpe tsap kawp kam ai.

16. Asak 15 ning re ai hpunau a mabyin kaw na hpa sharin la lu ai kun?

 ¹⁶ Yesu a ga ni kaw na anhte hpa sharin la lu ai kun? Yehowa a lata hta, na a prat hpe sharawng awng let ap da u. Dai hku galaw lu na matu, “na a myit masin mahkra hte Yehowa hpe kam hpa” ra ai. (Gsh 3:5) Asak si sum chye ai yawga byin nga ai asak 15 ning re ai hpunau Jawshuwa a mabyin hpe yu yu ga. Karai a tara ni hpe tawt lai ra ai tsi tsi ai ladat hpe shi n dang kau ai. Si na mahka hta, “Nu, ngai Yehowa a lata hta nga nga ai. . . . Ngai hpe shi bai jahkrung ya na hpe kam ai. Dai hpe ngai gaja wa lu tsun ai. Nye a salum hpe shi mu ya ai. Ngai mung shi hpe teng sha tsaw ra ai” ngu kanu hpe tsun wa ai. * Anhte langai hpra mung tinang hkum tinang ndai hku san ging ai: ‘Nye a makam masham hte seng nna, asak shoihpa nga ai daram chyam dinglik hkrum wa yang, nye a asak hpe Yehowa a lata hta ap da na kun? Ngai hpe shi dum nga ai hpe gaja wa kam ai kun?’

17-18. Anhte hpa hpe chye wa sai kun? (“ Yesu Hpang Jahtum Tsun Wa Ai Ga Ni Kaw Na Sharin La Lu Ai Lam” ngu ai lawk hpe mung yu u.)

¹⁷ Yesu hpang jahtum tsun wa ai ga ni kaw na grai ahkyak ai lam ni hpe sharin la lu ai. Kaga ni hpe mara raw ya ra nna, anhte hpe Yehowa mara raw ya ai hpe mung kam na matu bai shadum ya ai. Anhte hpe karum ya na matu, jin jin rai nga ai wenyi kun dinghku na hpunau nauna ni lu da ai gaw ahkaw ahkang kaba re. Raitim, karum shingtau lam ra wa yang, anhte maga hku nna karum hpyi ra ai. Gara chyam dinglik ai lam hpe raitim hkam jan lu hkra, Yehowa karum ya na hpe chye wa sai. Sadi dung ai hpe sakse madun lu na hpang jahtum shani re ngu sawn la nna shani shagu asak hkrung na matu, anhte a asak gaw Yehowa a lata hta re ai hpe kam na matu grai ahkyak ai hpe anhte chye wa sai.

¹⁸ Hpun shadaw hta jen da hkrum ai shaloi, Yesu tsun wa ai ga ni kaw na lam law law hpe sharin la lu ai. Dai lam ni hpe hkan sa ai gaw, “shi a ga madat mara mu” ngu Kasha hte seng nna Yehowa tsun wa ai ga ni hpe madat nga ai re.​—Mat 17:5.