1, 2. (a) Kade daram na hkra kun, ngu ai ga san hpe anhte galoi aten hta san chye ai kun? (b) Lai wa sai aten na sadi dung ai mayam ni a kasi ningli ni gaw hpa majaw n-gun lu shangun ai kun?

Kade daram na hkra kun? Dai ga san hpe sadi dung ai myihtoi Esaia hte Habaku san wa ai. (Esaia 6:11; Habaku 1:​2) Hkawhkam Dawi gaw Shakawn Kungdawn 13 hpe ka wa ai shaloi, dai ga san hpe mali lang san wa ai. (Shakawn 13:​1, 2) Makau grupyin hta nga ai makam masham n rawng ai ni a majaw, Yesu Hkristu mung dai zawn san wa ai. (Mahte 17:17) Dai ni aten hta mung anhte ni dai ga san hpe san nga na re.

² Kade daram na hkra kun, ngu ai ga san hpe anhte galoi aten hta san chye ai kun? N tara ai lam lama ma hkrum ai shaloi, machyi makaw ai hte asak kung wa ai shaloi hta mai byin ai. “Yak la ai aten” hta asak hkrung nga ai majaw, anhte myit hki lit li ai lam hkamsha chye ai. (2 Timohti 3:​1) Shing nrai, anhte a  makau grupyin hta nga ai n kaja ai masha ni a majaw myit pu ba ai, myit htum ai lam ni hkamsha chye ai. Hpa mi raitim, lai wa sai aten hta Yehowa a sadi dung ai mayam ni dai ga san hpe san wa ai shaloi, Yehowa chye na ya ai hpe chye lu ai majaw myit shalan lu ai.

3. Yakhkak ai masa ni nga ai aten hta hpa gaw anhte hpe karum ya na kun?

³ Hkam sharang na matu yak ai masa ni nga ai aten hta anhte hpe hpa gaw karum ya lu ai kun? Yesu a kanau Yaku anhte hpe ndai hku tsun wa ai: “Hpunau ni, Madu du wa ai aten du hkra myit galu nga mu.” (Yaku 5:​7, NW) Dai majaw anhte yawng myit galu ra ai. Raitim, myit galu ai gaw hpa rai, ndai atsam ningja hpe anhte gara hku madun lu na kun?

4, 5. (a) Myit galu ai gaw hpa rai kun? Anhte gara hku myit galu mai ai kun? (b) Myit galu ai hte seng nna Yaku gara hku sang lang dan wa ai kun? (Ndai sumhpa shawng na sumla hpe yu u.)

⁴ Myit galu ai gaw Karai Kasang a chyoi pra ai wenyi a majaw byin wa ai atsam nga nna Chyum Laika hta tsun da ai. Karai Kasang a karum shingtau lam n nga yang, n hkum tsup ai masha ni a matu grai yakhkak ai masa ni hta myit galu na matu yak chye ai. Myit galu ai gaw Karai Kasang kaw na kumhpa re. Dai hpe anhte madun ai shaloi, Yehowa hte kaga ni hpe tsawra ai lam sakse madun ai re. Myit n galu ai shaloi, shada da hte kaga ni hpe tsawra ai myit yawm wa ai. (1 Korinhtu 13:4; Galati 5:22) Myit galu ai hta hpa lam lawm ai kun? Yakhkak ai masa ni hta pyi, kaja ai ningmu nga let matut hkam sharang lu ai lam re. (Kolose 1:11; Yaku 1:​3, 4) Anhte hpa manghkang mi hkrum tim, myit galu ai gaw Yehowa hpe matut sadi dung na matu anhte hpe karum ya ai. N ni n kri hkrum ai shaloi, matai n htang na matu anhte hpe karum ya ai. Anhte gaw, la ra ai ngu ai hpe hkap la ra ai ngu Chyum Laika hta tsun da ai. Dai hpe Yaku 5:​7, 8 kaw nna chye na lu ai. (Hti u.)

⁵ Yehowa galaw ya na aten hpe sharawng awng let hpa majaw la ra ai kun? Yaku gaw anhte a masa hpe hkauna galaw ai wa hte shing daw wa ai. Hkauna galaw ai wa gaw nsi naisi hpe shakut shaja nna hkai lu tim, alawan galu kaba wa na matu hte lamu marang masa hpe shi n lu hkang ai. Shi gaw “ga a asau asi” lu la na matu myit galu let la ra ai. Dai hte maren, Yehowa a ga sadi ni hpring tsup wa na aten hpe la ai shaloi, anhte n hkang lu ai lam law law nga ai. (Marku 13:​32, 33; Kasa 1:​7) Hkauna galaw ai wa zawn, anhte mung myit galu let la ra ai.

6. Myihtoi Mihka kaw na anhte hpa sharin la lu ai kun?

⁶ Anhte zawn sha, myihtoi Mihka mung yakhkak ai masa ni hta hkam sharang ra wa ai. Shi gaw Hkawhkam Ahaza uphkang ai aten hta asak hkrung wa ai. Ahaza gaw grai n hkru ai hkawhkam re. Dai majaw, mungdan hta n hkru n hkra ai lam law law nga wa ai. Mabyin masa ni gaw grai sawng nna masha ni gaw “n hkru n hkra ai amu galaw na, shanhte a lata tsam mari shakut ma ai” nga nna Chyum Laika hta tsun da ai. (Mihka 7:​1-3 hpe hti u.) Mihka gaw dai masa hpe shi n galai shai lu ai hpe chye ai. Rai yang, shi hpa galaw wa ai kun? Shi anhte hpe ndai hku tsun ai: “Ngai chyawm gaw, Yehowa hpe a mada nga na nngai; ngai e hkye hkrang la ai Karai Kasang hpe, ngai ala nga na nngai: nye a Karai Kasang gaw, ngai hpe madat na ra ai.” (Mihka 7:​7) Mihka zawn, anhte mung la mayu ai myit jasat nga ra ai.

7. Yehowa a ga sadi ni hpring tsup hkra galaw ya na aten hte seng nna hpa majaw la ai daram sha n-ga galaw ra ai kun?

 ⁷ Anhte mung Mihka zawn makam masham nga yang, sharawng awng let Yehowa hpe la nga na re. Anhte la taw ai ngu ai gaw, bawng masha langai si dam hkrum na nhtoi hpe la taw ai hte n bung ai. Shi gaw dai n htoi hpe n kam la tim la taw ra ai re. Anhte la ai masa hte grai shai ai. Yehowa hpe sharawng awng let anhte la taw ai gaw, htani htana asak jaw na ngu ai ga sadi hpe aten du yang, Yehowa hpring tsup ya na hpe chye ai majaw re. Dai majaw anhte gaw, “shakut sharang nna kabu gara ai hte myit galu” let la nga ai re. (Kolose 1:​11, 12) Anhte la nga ai laman, Yehowa gaw alawan n galaw ai nga nna aput angun n tsun na matu sadi ra ai. Anhte dai zawn galaw na nga yang, shi ra sharawng na n re.​​—⁠​Kolose 3:​12.

8. Moi na sadi dung ai num, la ni kaw nna anhte hpa sharin la lu ai kun?

⁸ Sharawng awng ai hte la na matu anhte hpe hpa gaw karum ya na kun? Yehowa a ga sadi ni hpring tsup wa na aten hpe myit galu let la wa ai moi na sadi dung ai num, la ni a lam hpe anhte myit yu mai ai. (Roma 15:​4) Shanhte a lam ni hpe anhte myit ai shaloi, shanhte kade daram na hkra la ra ai, sharawng awng let hpa majaw la wa ai, shanhte myit galu ai majaw Yehowa gara hku shaman chyeju jaw wa ai ngu ai lam ni hpe myit dum ging ai.

9, 10. Abraham hte Sara gaw Yehowa hpe kade na hkra la wa ai kun?

⁹ Abraham hte Sara a lam hpe myit yu ga. Shanhte “kam sham ai hte myit galu  kaba” ai lam madun ai majaw, “ga sadi hte seng ai” sali wunli lu la wa ai. Abraham myit galu let la ngut ai hpang, Yehowa gaw shi hpe amyu kaba shatai nna shaman chyeju jaw na nga nna ga sadi jaw wa ai. (Hebre 6:​12, 15, JCLB) Abraham hpa majaw myit galu ra ai kun? Amyu kaba shatai na ngu ai ga sadi hpring tsup na matu aten ra ai majaw re. Hkristu n shangai shi ai shaning 1943, Nisan 14 hta, Abraham, Sara hte shi a nta masha yawng gaw U-hprat hka nu hpe lai nna Ga Ndat Hte Seng Ai Mung de shang wa ai. Raitim, shi a kasha Isak shangai ai du hkra shaning 25 naw la ra nna, shi a kashu Esaw hte Yaku shangai ai du hkra shaning 60 naw kahtap nna la ra ai.​​—⁠​Hebre 11:​9.

¹⁰ Ga Ndat Hte Seng Ai Mung a shara kade daram hpe Abraham sali wunli lu wa ai kun? Chyum Laika hta ndai hku tsun da ai: Yehowa gaw “dai mung e, sali wunli ngu na, lagaw hkang daram pyi shi e n jaw wu ai; Rai ti mung, shi hta kashu kasha myi man garai n mu kaw nna, lamu ga ndai, shi hpe mung, htawm hpang na shi a kashu kasha ni hpe mung, jaw na nga ga ndat tawn da wu ai.” (Kasa 7:​5) Abraham gaw U-hprat hka nu hpe lai ngut ai hpang shaning 430 na ai shaloi she, shi a aru arat ni gaw Ga Ndat Hte Seng Ai Mung hpe lu la na amyu langai byin wa ai.​​—⁠​Pru Mat 12:​40-42; Galati 3:​17.

11. Abraham gaw sharawng awng let hpa majaw la wa ai kun? Shi myit galu ai majaw hpa shaman chyeju ni mu lu na kun?

¹¹ Yehowa gaw ga sadi ni hpe hpring tsup hkra galaw ya na hpe Abraham kam ai majaw, sharawng awng let la wa ai re. Shi gaw Yehowa hpe kamsham ai. (Hebre 11:​8-12 hpe hti u.) Abraham gaw shi n si shi ai du hkra, Karai Kasang a ga sadi ni hpring tsup wa ai hpe n mu lu wa tim, apyaw sha la wa ai. Abraham gaw mungkan hparadisu hta asak bai hkrung wa ai shaloi shi kade pyaw na hpe shingran yu u. Chyum Laika a shara law law hta, shi a lam hte nta masha ni a lam hpe lu hti ai shaloi, shi mau mat na re. * Ga sadi tawn ai Meshia hte seng nna Yehowa a yaw shada lam ni hpring tsup wa ai hta, shi a ahkyak ai daw hpe chye mat ai shaloi, shi kade daram kabu na hpe shingran yu u. Dai shaman chyeju ni a majaw shi la wa ai gaw ging dan ai ngu hkamsha na re.

12, 13. Yosep hpa majaw myit galu ra ai kun? Shi hta gara myit jasat nga ai kun?

¹² Abraham a kashi Yosep mung sharawng awng let myit galu wa ai. Shi gaw grai sawng ai n tara ai lam nkau hpe hkrum wa ai. Shawng nnan, shi a kahpu ni gaw, shi asak 17 daram hta mayam hku nna dut kau ai. Dai hpang, shi madu a madu jan hpe roi rip na matu shakut ai ngu n teng n man ai hku mara shagun hkrum nna, htawng hkrat mat ai. (Ningpawt 39:​11-20; Shakawn 105:​17, 19) Yosep gaw Karai Kasang a sadi dung ai mayam raitim, shaman chyeju n lu ai sha ari jaw hkrum nga ai zawn rai nga ai. Raitim, 13 ning na ai hpang, yawng mayawng galai shai mat ai. Yosep gaw htawng kaw na lawt wa nna, Egutu mung a nambat lahkawng ahkaw ahkang kaba htum nga ai wa byin wa ai.​​—⁠​Ningpawt 41:​14, 37-43; Kasa 7:​9, 10.

¹³ Dai zawn n tara ai lam ni a majaw Yosep myit machyi wa ai kun? Yehowa shi hpe kabai kau sai ngu hkamsha wa ai kun? N re. Yosep gaw myit galu let la wa ai. Shi hpe hpa gaw karum ya wa ai kun? Yehowa hpe  kamsham ai lam re. Yawng mayawng hpe Yehowa hkang nga ai hpe shi chye na ai. Dai hpe shi a kahpu ni hpe tsun ai ga kaw na anhte chye lu ai: “Myit hkum ru myit; ngai gaw Karai Kasang a malai rai nga a ni? Nanhte ngai hpe n hkru ai hku gaw maw myit dai; rai ti mung, dai ni nanhte mu lu nga ai hte maren, masha law law hpe asak jahkrung na matu, Karai Kasang dai hpe kaja ai hku maw dat nu ai.” (Ningpawt 50:​19, 20) Dai shaman chyeju ni a majaw shi la wa ai gaw ging dan ai ngu Yosep chye ai.

14, 15. (a) Dawi a myit galu ai lam gaw hpa majaw laklai ai kun? (b) Dawi myit galu let ala nga na matu hpa gaw karum ya wa ai kun?

¹⁴ Hkawhkam Dawi mung n tara ai lam law law hkrum wa ai. Yehowa gaw Dawi naw kaji ai shaloi, Israela hkawhkam byin na matu namman jaw ya ai. Raitim, Dawi gaw shi amyu lakung a hkawhkam byin na matu pyi, 15 ning naw la ra ai. (2 Samuela 2:​3, 4) Dai aten ni hta, Hkawhkam Shawlu shi hpe sat na matu shakut ai majaw hprawng taw ra ai. * Dawi hta shi madu ai nta n nga ai. Shi gaw, kaga mungdan (sh) nam maling na lungpu ni hta nga ra ai. Hpang jahtum, Shawlu gaw majan hta sat hkrum wa ai. Raitim, Dawi gaw lsraela mung ting a hkawhkam byin na matu, sanit ning jan naw la ra ai.​​—⁠​2 Samuela 5:​4, 5.

¹⁵ Dawi hpa majaw myit galu ai hte sharawng awng let la wa ai kun? Kade daram na hkra kun, ngu nna shi mali lang san wa ai shakawn kungdawn ga hta sha, dai mahtai hpe mu lu ai. Shi ndai hku tsun ai: “Ngai chyawm gaw, na a chyeju hta shamyet nga nngai, Na a hkye la ai lam hta nye a myit kabu nga ai; Yehowa ngai hpe chyeju kaba jaw nngai majaw, Ngai shi hpe mahkawn mangoi na nngai.” (Shakawn 13:​5, 6) Dawi gaw Yehowa shi hpe tsawra nna shi a ntsa galoi mung sadi dung ai hpe chye ai. Lai wa sai aten hta Yehowa shi hpe karum ya wa ai lam ni hpe myit nna, yakhkak jamjau ai lam ni hpe yeng seng kau ya na aten hpe shi myit mada wa ai. Yehowa a shaman chyeju lu na matu la ai gaw, ging dan ai ngu Dawi chye wa ai.

16, 17. Yehowa Karai Kasang hte Yesu Hkristu gaw sharawng awng let la ai hta kaja htum kasi hpe gara hku madun wa ai kun?

¹⁶ Yehowa gaw shi nan n galaw mayu ai amu hpe galaw na matu anhte hpe hpyi shawn na n re. Shi gaw sharawng awng let la ai hta kaja htum kasi re. (2 Petru 3:9 hpe hti u.) Ga shadawn, Edin sun hta byin wa ai manghkang hpe hparan na matu Yehowa shaning hkying hku la wa ai. Yehowa gaw shi a amying chyoi pra na aten hpe myit galu let la nga ai. Shi hpe myit rawt let “ala nga ai ni” gaw grai kaja ai shaman chyeju ni lu la na re.​​—⁠​Esaia 30:18.

¹⁷ Yesu mung sharawng awng let la wa ai. Shi mungkan ntsa nga wa ai shaloi, si ai du hkra sadi dung wa ai. A.D. 33 ning hta, shi a shagu hkungga manu hpe sumsing lamu hta Yehowa hpe sak jaw wa ai. Raitim,  Hkawhkam hku nna uphkang na matu 1914 ning du hkra naw la ra ai. (Kasa 2:​33-35; Hebre 10:​12, 13) Dai sha n-ga, Yesu gaw shi a hpyen ni yawng hpe yeng seng kau na matu, Shaning Hkying Mi Uphkang ai aten htum ai du hkra naw la ra ai. (1 Korinhtu 15:25) Dai gaw la na matu grai na ai. Raitim, shaman chyeju ni gaw la na matu ging dan ai.

18, 19. Myit galu let la na matu anhte hpe hpa gaw karum ya na kun?

¹⁸ Yehowa gaw anhte hpe sharawng awng let la na matu myit galu shangun mayu ai. Dai hku galaw lu na matu anhte hpe hpa gaw karum ya na kun? Karai Kasang a chyoi pra ai wenyi lu na matu akyu hpyi ra ai. Myit galu ai gaw Karai Kasang a chyoi pra ai wenyi a majaw nga wa ai re. (Ehpesu 3:16; 6:18; 1 Htesaloni 5:​17-19) Dai majaw, myit galu let hkam sharang lu hkra, Yehowa hpe akyu hpyi ra ai.

¹⁹ Yehowa a ga sadi ni hpring tsup wa na hpe myit galu let la na matu Abraham, Yosep hte Dawi hpe hpa gaw karum ya wa ai lam myit dum u. Yehowa hpe kamhpa ai lam re. Shanhte gaw tinang byin mayu ai hpe sha n myit ai. Shanhte lu la wa ai shaman chyeju ni hpe myit ai shaloi, anhte mung la mayu ai myit nga wa na re.

20. Anhte hpa galaw na matu dawdan da ging ai kun?

²⁰ Dai majaw, manghkang ni hkrum tim, la mayu ai myit jasat madun lu na matu anhte dawdan da ga ai. Kalang lang, Yehowa e kade daram na hkra kun nga nna anhte san chye ai. (Isaiah 6:11) Raitim, chyoi pra ai wenyi a karum ya ai lam hte myihtoi Yeremia hpe anhte kasi la nna ndai hku tsun ga: “Yehowa gaw nye a kumhtaw rai nga ai,” “shi hpe myit galu let ala nga na nngai.”​​—⁠​Sharung 3:​21, 24, NW.