1. Yehowa gaw gam jaw gam ya ai lam gara hku madun ai kun?

MOI chyaloi nhkoi hta Yehowa chyu sha nga ai. Shi gaw, sumsing lamu hte ginding aga hta asak hkrung nna nyan hpaji nga ai ni hpe hpan na matu dawdan wa ai. “A rawng ai Karai Kasang” Yehowa gaw, tsawra myit hte kaja ai arai ni hpe jaw wa ai. (1 Timohti 1:11; Yaku 1:17) Anhte hpe mung pyaw shangun mayu ai majaw, gam jaw gam ya na matu, Yehowa sharin ya wa ai.​—⁠Roma 1:20.

2, 3. (a) Gam jaw gam ya yang anhte hpa majaw ngwi pyaw ai kun? (b) Ndai sumhpa hta hpa lam ni anhte sharin la lu na kun?

² Shinggyim masha ni hpe shi a hkrang sumla hte maren Karai Kasang hpan wa ai. (Ningpawt 1:27) Tsun mayu ai gaw, shi hta nga ai atsam ningja ni hte maren anhte hpe hpan da ai. Yehowa a shaman chyeju lu nna ngwi pyaw lu na matu, shi a kasi ningli hpe anhte hkan sa ra na re. Kaga masha ni hpe myit lawm nna, shanhte hpe gam jaw gam ya ra ai. (Hpilipi 2:3, 4; Yaku 1:5) Hpa majaw kun? Dai hku galaw na matu Yehowa anhte hpe hpan da ai majaw re. Anhte gaw n hkum tsup ai ni raitim pyi,  Yehowa hpe kasi la nna gam jaw gam ya mai ai.

³ Gam jaw gam ya ai hte seng nna Chyum Laika hta tsun da ai lam nkau hpe hkaja mat wa ga. Anhte gam jaw gam ya ai nga yang, Yehowa hpa majaw ra sharawng ai lam hpe mung hkaja mat wa ga. Yehowa a magam gun hpai lu na matu, gam jaw gam ya ai gaw gara hku karum ya ai hte gam jaw gam ya yang hpa majaw ngwi pyaw na hpe mung hkaja mat wa ga. Hpa majaw, matut nna gam jaw gam ya ra ai lam hpe mung bawngban mat wa ga.

4, 5. Yehowa hte Yesu gaw gam jaw gam ya ai lam hpe gara hku madun wa ai kun? Shan a kasi ningli hpe anhte gara hku kasi la mai na kun?

⁴ Anhte gaw Yehowa hpe kasi la nna gam jaw gam ya na nga yang, shi myit pyaw na re. (Ehpesu 5:1) Yehowa gaw shinggyim masha ni hpe mung pyaw shangun mayu ai. Mauhpa lam hku anhte hpe hpan da nna, anhte ngwi pyaw lu na matu tsawm htap la ai mungkan jaw da ai hpe yu yang chye lu ai. (Shakawn 104:24; 139:13-16) Dai majaw, kaga masha ni pyaw hkra anhte shakut na nga yang, Yehowa hpe anhte shagrau nga ai re.

⁵ Shinggyim masha langai hku nna, gam jaw gam ya ai hta kaja htum kasi madun wa ai Yesu hpe mung anhte kasi la mai ai. Yesu ndai hku tsun ai: “Masha Kasha wa pyi, shangun ma hpe yam sha na nga du sa ai n rai; shangun ma a amu hpe galaw daw ya na hte, masha law law a matu mara, shi a asak hpe gawng malai jahpu shatai ya na nga nna du sa ai.” (Mahte 20:28) Kasa Pawlu mung, Hkristan ni hpe ndai hku n-gun jaw wa ai: “Hkristu Yesu hta e rawng ai myit nan, nanhte hta e mung rawng nga myit ga: . . . mayam a ahpraw nsam dagraw let, shinggyim masha hte bung hkra tai wa sai.” (Hpilipi 2:5, 7) Dai majaw, Yesu a kasi ningli hpe htep lahti hkan lu na kun? ngu nna tinang hkum tinang san ra ai.​—⁠1 Petru 2:21 hpe hti u.

6. Samari masha ga shadawn kaw nna Yesu hpa sharin ya ai kun? (Sumhpa shawng na sumla hpe yu u.)

⁶ Yehowa gaw, shi hte shi a kasha Yesu madun wa ai kasi ningli hpe anhte hkan sa yang myit pyaw ai. Kaga masha ni hpe myit lawm ai lam madun nna, shanhte hpe karum ya ai hku nna anhte kasi la mai ai. Samari masha ga shadawn hpe Yesu tsun dan ai shaloi, dai lam kade daram ahkyak ai hpe madun wa ai. (Luka 10:29-37 hpe hti u.) Kadai hpe raitim karum ya na matu, sape ni hpe Yesu sharin ya wa ai. Hpa majaw dai ga shadawn hpe Yesu tsun ai lam naw dum ai kun? Yesu hpe Yuda masha langai gaw, “nye htingbu wa gaw kadai wa rai na a ta?” ngu nna san wa ai majaw re. Yehowa ra sharawng ai lam lu mayu yang, Samari masha zawn gam jaw gam ya ra ai lam hpe Yesu tsun wa ai lam kaw nna sharin la lu ai.

7. Yehowa a lam ni gaw kaja htum re ai hpe kamhpa ai lam anhte gara hku madun na kun? Sang lang dan u.

⁷ Gam jaw gam ya ging ai kaga lam langai gaw, Edin sun hta byin wa ai mabyin hte matut mahkai nga ai. Adam yan Ewa gaw Yehowa a ga n madat nna, tinang hkum tinang sha lanu lahku na nga yang, grau nna ngwi pyaw na ngu Satan tsun wa ai. Ewa gaw tingkyeng myit nga wa nna Karai Kasang hte bung mayu wa ai. Adam mung tingkyeng myit nga wa ai majaw, Karai Kasang hta na Ewa a myi man grau lu mayu wa ai. (Ningpawt 3:4-6) Dai majaw, manu mana hkra machyi wa ai. Adam tingkyeng akyu tam ai majaw, kadai mung n pyaw lu ai hpe  mu lu ai. Raitim, anhte gaw tingkyeng akyu n tam ai sha, gam jaw gam ya na nga yang, Yehowa a lam ni gaw kaja htum re ai hpe kamhpa nga ai re.

8. Adam yan Ewa gaw kaga lam ni hpe hpa majaw myit ra ai kun?

⁸ Edin sun hta Adam yan Ewa hkrai sha raitim, kaga lam ni hpe mung shan yan myit ging ai. Hpa majaw kun? Yehowa gaw shan yan hpe bungli jaw da ai. Shan yan hpe kashu kasha shaprat nna mungkan ting hparadisu byin hkra galaw na matu matsun ai. (Ningpawt 1:28) Mungkan hta nga ai masha yawng hpe Yehowa ngwi pyaw shangun mayu ai zawn, Adam yan Ewa mung shan a kasha ni hpe ngwi pyaw shangun mayu na re. Shanhte yawng, bungli arau galaw nna mungkan ting hparadisu byin wa hkra galaw na hpe Yehowa myit mada ai. Grai kaba ai amu bungli rai nga ai.

9. Mungkan hpe hparadisu byin hkra galaw ai bungli gaw hpa majaw ngwi pyaw lam lu shangun ai kun?

⁹ Hkum tsup ai Adam yan Ewa a kashu kasha ni gaw, mungkan hpe hparadisu byin hkra galaw nna Yehowa a myit ra ai lam jahpring shatsup lu hkra, Yehowa hte arau bungli galaw ra na re. Dai hku nna Yehowa a ban sa ai de shang lu na re. (Hebre 4:11) Ndai bungli gaw kade daram myit dik nna, ngwi pyaw lam lu shangun na hpe shingran yu u. Kaga ni hpe lanu lahku ya nna tingkyeng akyu n tam ai majaw, Yehowa shanhte hpe shaman chyeju grai law hkra jaw wa na re.

10, 11. Hkaw tsun bungli hte sape shatai ai bungli hpe galaw lu hkra hpa gaw karum ya na kun?

 ¹⁰ Dai ni na aten hta, Yehowa gaw anhte hpe laksan bungli jaw da ai. Hkaw tsun nna sape shatai ai bungli hta anhte hpe shang lawm shangun mayu ai. Dai bungli hpe anhte galaw lu na matu, masha ni hpe anhte lanu lahku ra ai. Ndai bungli hpe matut nna galaw lu hkra anhte hpe shadut ya lu ai gaw, Yehowa hte masha ni hpe tsawra ai myit sha re.

¹¹ Masha ni hpe teng man lam hkaw tsun nna sharin ya ai tsa ban langai na Hkristan ni hte shi gaw, “Karai Kasang a shingdep shingtau ni” re ngu Pawlu tsun wa ai. (1 Korinhtu 3:6, 9) Dai ni na aten hta mung, Karai Kasang anhte hpe shangun da ai hkaw tsun bungli a matu, anhte a aten, n-gun atsam hte arung arai ni hpe gam jaw gam ya nna “Karai Kasang a shingdep shingtau ni” tai lu ai. Laklai ai ahkaw ahkang kaba rai nga ai.

12, 13. Sape shatai ai bungli kaw nna lu la ai shaman chyeju ni gaw hpa ni kun?

¹² Hkaw tsun ai hte sharin achyin ya ai hta anhte a aten hte n-gun atsam hpe akyu jashawn ai gaw, anhte hpe ngwi pyaw shangun ai. Chyum ga sharin ya nga ai hpunau nauna law law gaw, dai hku tsun ma ai. Chyum ga sharin ni gaw, Chyum Laika teng sha sharin ya ai hpe chye na wa ai, makam masham nga wa ai, prat hpe galai shai wa nna kaga masha ni hpe mung teng man lam tsun dan nga ai hpe anhte mu ai shaloi, anhte pyaw ga ai. Sape 70 gaw, hkaw tsun bungli hta grai kaja ai mahkrum madup ni lu la nna, “kabu gara ai myit hte bai wa” ai majaw, Yesu grai kabu ai.​—⁠Luka 10:17-21.

¹³ Chyum Laika shiga gaw, masha ni a prat hpe grau kaja wa hkra karum ya lu ai hpe mu ai shaloi, mungkan ting na hpunau nauna ni kabu ma ai. Ga shadawn, ramma nauna Ena gaw Yehowa a matu grau nna sak jaw mayu ai. * Dai majaw, hkaw tsun masha grau ra ai Sinpraw Urawpa de htawt mat ai. Shi ndai hku tsun ai: “Ndai shara kaw Chyum ga sharin grai law hkra lu wa ai. Dai hpe ngai grai sharawng ai. Hkaw tsun bungli gaw ngai hpe grai pyaw shangun ai. Nta de du ai shaloi, ngai na matu ngai n myit ai. Chyum ga sharin ni a mayak mahkak ni hte myit tsang lam ni hpe sha myit nga ai. Shanhte hpe karum ya mai na lam ni hte n-gun jaw lu na lam ni hpe myit ai. ‘Hkam la ai hta jaw ya ai gaw grau nga ai’ ngu ai hpe ngai teng sha kam wa ai.”​—⁠Kasa 20:35.

14. Masha ni n madat tim, hkaw tsun bungli hta hpa majaw ngwi pyaw lu ai kun?

¹⁴ Anhte hkaw tsun ai hpe masha ni n madat tim, kabu gara shiga hpe na lu na ahkaw ahkang shanhte hpe anhte jaw lu ai majaw, kabu ga ai. Ezekela hpe galaw shangun ai lam hpe anhte galaw na matu Yehowa myit mada ai: “Madat ti mung, n madat ti mung, nang shanhte hpe nye a ga tsun dan na rai ndai.” (Ezekela 2:7; Esaia 43:10) Dai majaw, masha ni gara hku mi bai htang tim, anhte a shakut shaja ai lam hpe, Yehowa manu shadan ai. (Hebre 6:10 hpe hti u.) Hpunau  langai gaw hkaw tsun bungli hte seng nna ndai hku tsun ai: “Anhte gaw hkai ai, hka jaw ai. Myit lawm ai ni hpe rawt jat galu kaba wa hkra Yehowa karum ya rit ngu akyu hpyi ai.”​—⁠1 Korinhtu 3:6.

15. Chyeju dum ai lam madun yang she anhte gam jaw gam ya ging ai kun? Sang lang dan u.

¹⁵ Gam jaw gam ya ai gaw, ngwi pyaw lam lu shangun ai majaw, Yesu mung anhte hpe gam jaw gam ya shangun mayu ai. Anhte gam jaw gam ya yang, masha ni mung anhte hpe bai nhtang jaw na re. Dai majaw anhte hpe shi ndai hku n-gun jaw ai: “Jaw mu, shing rai jang, nanhte hpe jaw na ma rin dai: hpring kabrat hkra anin garin, man ai dang hte nanhte a lahpyen e shanhte jaw na ma ra ai: kaning rai nme law, nanhte hteng ya ai dang hte, nanhte hpe bai hteng ya na ma rin dai.” (Luka 6:38) Nang gam jaw gam ya ai shaloi, masha yawng chyeju dum ai lam madun na gaw n re. Masha ni chyeju dum ai lam n madun tim, matut nna jaw nga u. Gam jaw gam ya ai lam langai gaw, kade daram akyu nga na hpe anhte n lu tsun ai.

16. Kadai ni hpe anhte gam jaw ging ai kun? Hpa majaw kun?

¹⁶ Myit madung hte gam jaw gam ya ai wa gaw lama ma bai lu na matu n myit mada ai. Yesu ndai hku tsun ai: “Nang poi galaw daw n yang gaw, matsan mayan ni, jahten labye ni, lagaw hten ai ni hte myi kyaw ai ni hpe shaga la u: shing rai jang gaw, nang a lu na ndai: shanhte nang hpe chyeju htang lu na ma ai n rai.” (Luka 14:13, 14) Chyum Laika hta ndai hku tsun ai: “Gam jaw ai majaw, shaman ai hkrum na ra ai.” “Matsan mayan ni hpe dum ai wa gaw, a nga ai.” (Ga Shagawp 22:9; Shakawn 41:1) Kaga masha ni hpe anhte karum ya mayu ai majaw, gam jaw gam ya ai.

17. Anhte hpe ngwi pyaw shangun na lam nkau gaw hpa ni rai kun?

 ¹⁷ “Hkam sha ai hta jaw ya ai mahtang grau a nga ai” ngu nna Yesu tsun ai ga hpe Pawlu lakap nna tsun wa ai. Arung arai jaw na matu sha tsun nga ai n re. Masha ni hpe Chyum Laika kaw nna hpaji jaw ga ni hte n-gun jaw mai ai. Tatut karum ya mai ai. (Kasa 20:31-35) Anhte a n-gun atsam, ahkying aten, tsawra myit hte gam jaw gam ya ai gaw kade daram ahkayk ai hpe tatut kasi ningli madun nna, Pawlu sharin ya wa ai.

18. Sawk sagawn ai ni gaw, gam jaw gam ya ai hte seng nna hpa tsun ai kun?

¹⁸ Gam jaw gam ya ai ni gaw ngwi pyaw ai ngu, shinggyim lailen sawk sagawn ai ni tsun ai. Kaga masha ni a matu kaja ai lama ma galaw ya ngut ai hpang, masha ni gaw grau ngwi pyaw ai ngu nna, sumhpa langai hta tsun da ai. Kaga masha ni hpe anhte karum ya ai nga yang, anhte a prat gaw lachyum rawng nna yaw shada lam nga wa ai ngu nna mung, sawk sagawn ai ni tsun ai. Shawang lit gun yang, hkam kaja nna ngwi pyaw ai ngu masha nkau tsun ma ai. Shanhte dai hku tsun ai hpe anhte n mau ga ai. Hpa majaw nga yang, anhte a Hpan Madu Yehowa gaw, gam jaw gam ya yang ngwi pyaw na ngu ayan na tsun ai majaw re.​—⁠2 Timohti 3:16, 17.

19, 20. Hpa majaw nang gam jaw gam ya mayu ai kun?

¹⁹ Anhte a makau grup-yin na masha ni gaw, tinang hkum tinang sha lanu lahku ai nga yang, anhte matut nna gam jaw gam ya na matu yak chye ai. Raitim, Yehowa hpe anhte a myit masin mahkra, myit mang mahkra, n-gun lagaw mahkra hte tsawra nna tinang a htingbu wa hpe mung, tinang a hkum hte maren tsawra ra ai ngu ai grau htum ai tara lahkawng hpe hkan sa na matu Yesu matsun da ai. (Marku 12:28-31) Yehowa hpe tsawra ai ni gaw shi hpe kasi la ai lam ndai sumhpa hta anhte chye wa saga ai. Yehowa hte Yesu lahkawng yan gaw gam jaw gam ya ai. Dai zawn galaw ai gaw teng sha ngwi pyaw ai majaw, shan a kasi ningli hpe hkan sa na matu anhte hpe n-gun jaw da ai. Yehowa hte masha ni hpe gam jaw gam ya ai nga yang, Yehowa hpe shagrau ai rai nna, anhte mung, kaga masha ni mung akyu lu la na re.

²⁰ Nang gaw, kaga masha ni hpe karum nna, kaja htum gam jaw gam ya nga na re. Laksan hku nna gaw hpunau nauna ni hpe gam jaw gam ya nga na re. (Galati 6:10) Nang matut nna gam jaw yang, masha ni gaw nang hpe chyeju dum nna tsawra na re. Nang mung ngwi pyaw na re. Chyum Laika hta ndai hku tsun ai: “N daw n hta jaw ai wa gaw, hpum wa na ra ai; Ntsin jaw bun ai wa gaw, jaw bun ai bai hkrum na ra ai.” (Ga Shagawp 11:25) Hkristan prat hkrun lam hte hkaw tsun magam hta tingkyeng akyu n tam ai sha, gam jaw gam ya mai na lam law law nga ai. Dai hte seng nna hpang na sumhpa hta matut hkaja yu ga.