1. Yesu hte seng nna myihtoi Esaia gara hku tsun da ai kun? Dai myihtoi ga gaw gara hku nna shalan shabran ya ai kun?

YESU HKRISTU hte seng nna Esaia a myihtoi ga gaw, anhte hpe shalan shabran ya nna myit mada lam jaw ai. Yesu hte seng nna Esaia ndai hku myihtoi htoi da ai: “Mu hkrup ai hte maren n daw dan ai hte, na hkrup ai hte maren n jeyang na ra ai.” Matsan mayan ni hpe rap rap ra ra tara dara na re. (Esaia 11:3, 4) Dai gaw anhte hpe hpa majaw shalan shabran ya ai kun? Anhte asak hkrung nga ai mungkan hta lachyen lahka ai lam ni hpring nga nna, masha ni mung tinang a ningmu hta hkan nna dawdan nga ai. Anhte hpe ntsa lam yu nna dawdan na n re ai tara agyi Yesu hpe anhte teng sha ra ga ai.

2. Yesu gaw anhte hpe hpa galaw na matu matsun da ai kun? Ndai sumhpa hta hpa lam hkaja na kun?

² Shani shagu kaga masha ni hpe, anhte tara dawdan nga ai. Anhte gaw Yesu zawn hkum tsup ai ni n re ai majaw, anhte a dawdan lam gaw hkum tsup na n re. Anhte a ningmu gaw anhte hpe grai shingkang ka-up lu ai. Yesu ndai hku tsun ai: “Myi man tau nna hkum jeyang myit, ding man ai hku she jeyang mu.” (Yawhan 7:24) Myi man tau nna n jeyang na matu, Yesu myit mada ai. Ndai sumhpa hta, anhte a ningmu hpe shingkang ka-up lu ai  amyu rusai, matsan lusu ai hte asak kaji kaba ngu ai lam masum hpe hkaja mat na re. Ntsa lam yu nna n dawdan ai sha, Yesu a ga hpe gara hku madat lu na lam hkaja mat na re.

3, 4. (a) Maigan amyu masha ni hte seng nna Petru a ningmu hpa majaw galai shai mat ai kun? (Sumhpa shawng na sumla hpe yu u.) (b) Petru hpe Yehowa sharin ya wa ai teng man lam nnan gaw hpa rai kun?

³ Kesare mare hta nga ai maigan masha Korneli a nta de sa na matu, matsun hkrum ai shaloi, kasa Petru gara hku hkamsha wa ai hpe myit yu u. (Kasa 10:17-29) Maigan masha ni gaw n san seng ai ngu nna hkam la ai makam masham hta shi kaba wa ai. Raitim, shi a myit mang ai lam hte grai shai ai lam langai byin wa ai. Karai Kasang madun ai shingran hpe shi mu wa ai. (Kasa 10:9-16) Dai shingran hta, n san seng ai ngu masat da ai dusat ni lawm ai hpajawng kaba langai lamu kaw nna hkrat wa ai hpe shi mu ai. Shi hpe ndai hku tsun ai: “Petru e, rawt u, sat sha u.” Masum lang shi nyet kau ai. Lang shagu hta shi hpe ndai hku tsun ai: “Karai Kasang jasan jaseng ai rai hpe, n sha mai ai hkum nga et.” Shingran mu ngut ai hpang pyi, Karai Kasang hpa tsun mayu ai hpe Petru n chye na wa ai. Dai aten hta Korneli a kasa du wa ai. Chyoi pra ai wenyi gaw Korneli a nta de sa na matu Petru hpe matsun ai majaw, Korneli a kasa hte arau hkan nang mat ai.

⁴ Lama wa, Petru gaw myi man lata na nga yang, Korneli a nta de sa na n re. Yuda masha ni gaw kaga amyu masha ni a nta de galoi mung n sa ai. Rai yang, Petru hpa majaw sa ai kun? Maigan amyu masha ni hte seng nna lachyen lahka ai myit shi hta nga wa tim, shi mu wa ai shingran hte chyoi pra ai wenyi gaw shi a myit mang ai lam hpe galai shai ya ai. Korneli tsun ai hpe shi madat ngut ai hpang shi ndai hku tsun ai: “Karai Kasang masha myi man n tau ai gaw, ya ngai gaja wa chye se ai: amyu baw shagu hta shi hpe hkrit hkungga ai hte ding man ai amu galaw ai wa gaw, shi kaw myi man pa nga ai.” (Kasa 10:34, 35) Chye na wa ai lam nnan gaw, Petru hpe grai myit kahpra shangun nna Hkristan yawng hpe akyu shabyin ya ai. Gara lam hku nna kun?

5. (a) Hkristan yawng hpe Yehowa hpa chye na shangun mayu ai kun? (b) Anhte gaw teng man ai lam hpe chye da tim pyi, gara myit naw nga chye ai kun?

⁵ Karai Kasang myi man n lata ai lam, Hkristan ni yawng chye na hkra Petru hpe Yehowa akyu jashawn wa ai. Yehowa a man hta, anhte a amyu rusai (sh) amyu ga gaw ahkyak n re. Shi hpe hkrit hkungga nna jaw ai hpe galaw na nga yang, anhte hpe shi hkap la na re. (Galati 3:26-28; Shingran 7:9, 10) Dai lam hpe nang chye da chyalu rai na re. Lachyen lahka ai myit nga ai makau grup yin hta nang kaba wa yang gara hku kun? Myi man n chye lata ai ngu, na hkum nang sawn la da tim pyi, lachyen lahka myit nkau mi nang hta naw nga chye ai. Karai Kasang gaw myi man n lata ai lam, kaga ni chye hkra Petru karum ngut ai hpang hta pyi, lachyen lahka myit Petru hta naw nga nga ai. (Galati 2:11-14) Dai majaw, masha ni hpe ntsa lam  yu nna dawdan ai lam n galaw na matu hte Yesu a ga madat na matu anhte gara hku galaw lu na kun?

6. (a) Lachyen lahka ai myit n nga mat na matu anhte hpe hpa gaw karum ya lu ai kun? (b) Lit kaba lu da ai hpunau langai a laika hpe yu yang shi a lam hpa chye lu ai kun?

⁶ Lachyen lahka ai myit anhte hta nga ai, n nga ai hpe chye na matu, Chyum Laika hkaja nna anhte a myit jasat hpe san jep ra ai. (Shakawn 119:105) Anhte hkum anhte n sadi hkrup chye ai majaw, anhte hta lachyen lahka ai myit nga ai, n nga ai hpe chye na matu manang langai hpe san mai ai. (Galati 2:11, 14) Dai myit gaw anhte hpe shingkang ka-up da ai majaw, anhte hta dai myit nga ai hpe pyi n sadi hkrup mat sai rai na re. Lit kaba lu da ai hpunau langai dai hku byin wa ai. Aten hpring magam gun nga ai yan la hte seng nna ginjaw garan rung de shi laika ka ra ai. Madu wa gaw, madang nem ai ngu masha law malawng mu mada ai amyu masha langai re. Lit kaba lu da ai hpunau gaw, dai madu wa hte seng nna kaja ai lam ni law law ka shalawm ai. Matut nna shi ndai hku ka ai: “Shi gaw [dai amyu] raitim, shi a lailen hte kaga masha ni hpe karum ya ai lam hpe yu yang [dai amyu] shagu gaw, matsat shabat nga chye nna, madang nem ai nga sat nga sa nga ai [dai amyu] a lailen n nga ai hpe chye lu ai.” Anhte hpa sharin la lu ai kun? Yehowa a uhpung hta, anhte kade daram lit kaba lu da tim, lachyen lahka ai myit nga ai, n nga ai hpe ginhka lu hkra, tinang hkum tinang san jep ra nna karum shingtau ai lam hpe shagrit shanem let hkap la ra ai. Anhte hpa naw galaw lu na kun?

7. “Anhte a myit gaw dam lada” ai hpe gara hku madun na kun?

⁷ “Anhte a myit gaw dam lada” ai nga yang, lachyen lahka myit a shara hta tsawra myit malai shang wa na re. (2 Korinhtu 6:11-13) Nang hte amyu bung ai, ga bung ai ni hte sha nang kanawn na matu ra sharawng nga ai kun? Rai yang, kaga amyu n bung ai ni hte mung kanawn na matu shakut u. Hkaw tsun arau sa na matu, nang hte shingdu labau n bung ai hpunau nauna ni hpe nang saw shaga mai ai. Shing nrai, shat daw na matu, kanawn mazum na matu na a nta de saw shaga mai ai. (Kasa 16:14, 15) Aten na wa yang, anhte a salum hta tsawra myit hpring taw ai majaw, lachyen lahka ai myit a matu shara nga sana n re. Ntsa lam yu nna tara jeyang chye ai lam hpe hkaja yu ga.

8. Jaw Jau 19:15 hku nga yang, matsan ai (sh) lusu ai lam hte seng nna anhte a ningmu gara hku byin chye ai kun?

⁸ Kaga ni a ntsa anhte a ningmu gaw, matsan ai (sh) lusu ai hpe yu nna galai shai chye ai. Chyum Laika hta ndai hku tsun da ai: “Matsan ai majaw myi man hkum lata u. Lusu ai majaw mung myi man hkum jaw u. Masha shada da rap ra ai hku jeyang u.” (Jaw Jau 19:15, NW) Marai langai a lusu ai (sh) matsan ai lam gaw anhte a ningmu hpe gara hku galai shai chye ai kun?

9. Gara yawn hpa lam hpe Shawlumon ka wa ai kun? Anhte hpe hpa sharin ya ai kun?

 ⁹ Yawn hpa lam langai hpe Shawlumon ka wa ai: “Matsan mayan wa hpe, tinang htingbu wa pyi, n dawng nga ai; Sut su ai wa chyawm gaw jinghku jing-yu law nga ai.” (Ga Shagawp 14:20) Dai gaw anhte hpe hpa sharin ya ai kun? Anhte n sadi yang, matsan ai ni hte n re ai sha, lusu ai ni hte sha kanawn ai baw byin mat chye ai. Arung arai nga ai, n nga ai hta hkan nna masha ni hpe kanawn ai gaw, hpa majaw shoihpa nga ai kun?

10. Hkristan ni hpe Yaku gara manghkang hte seng nna sadi jaw wa ai kun?

¹⁰ Hpunau nauna ni hpe matsan, lusu garan ginhka nna kanawn ai gaw, nawku hpung hpe dumbru dumbra byin shangun chye ai. Tsa ban langai na nawku hpung hta dai zawn byin wa ai majaw, Yaku sadi jaw wa ai. (Yaku 2:1-4 hpe hti u.) Nawku hpung kata hta dumbru dumbra byin na ahkang n jaw ging ai. Matsan, lusu garan ginhka ai lam hpe anhte gara hku koi lu na kun?

11. Arung arai gaw Yehowa hte anhte a hku hkau lam hte seng ai kun? Sang lang dan u.

¹¹ Anhte a hpunau ni hpe Yehowa mu mada ai zawn mu ra ai. Masha langai hpe, matsan ai majaw (sh) lusu ai majaw, Yehowa manu shadan ai n re. Anhte hte Yehowa a hku hkau lam gaw, anhte hta arung arai kade daram madu ai ngu ai hte tsep kawp n seng ai. “Sut su ai wa gaw, sumsing lamu a mungdan hta  nachying wa shang yak nga ai” ngu Yesu tsun wa ai raitim, shang na matu n mai byin ai ngu nna gaw n tsun ai. (Mahte 19:23) Yesu ndai hku mung tsun ai: “Matsan mayan ni a lu myit dai.” (Luka 6:20) Raitim, matsan ai ni yawng Yesu a ga madat nna, wenyi shaman chyeju lu la na ngu ai lachyum n re. Yesu hpang n hkan ai matsan ai masha law law nga wa ai. Dai majaw, Yehowa hte hku hkau ai lam hpe, masha langai hta arung arai kade daram madu ai ngu ai hpe yu nna n mai dawdan ai.

12. Lusu ai raitim, matsan ai raitim, Chyum Laika gaw hpa sharin ya ai kun?

¹² Anhte a hpunau nauna ni hta, lusu ai ni mung nga ai, matsan ai ni mung nga ai. Raitim, shanhte yawng Yehowa hpe tsawra nna, myit masin mahkra hte nawku ma ai. “N grin ai sut gan hpe n shamyet nga ai sha, . . . Karai Kasang hpe shamyet shanat nga na” matu, Chyum Laika hta tsun da ai. (1 Timohti 6:17-19 hpe hti u.) Matsan ai raitim, lusu ai raitim, gumhpraw ra marin ai gaw shoihpa nga ai lam, shi a mayam ni yawng hpe Karai Kasang sadi jaw da ai. (1 Timohti 6:9, 10) Anhte a hpunau ni hpe, Yehowa mu mada ai zawn mu na nga yang, matsan, lusu ginhka sana n re. Asak kaji kaba hte seng nna gaw gara hku kun? Asak n bung ai majaw, garan ginhka mai na kun?

13. Asak kaba ai ni hpe hkungga ra na hte seng nna Chyum Laika hta hpa tsun da ai kun?

¹³ Asak kaba ai ni hpe hkungga na matu, Chyum Laika hta tsun da ai. Jaw Jau 19:32 hta ndai hku tsun ai: “Baw hpraw sai wa a man e nang rawt tsap lu na rai ndai; dingla wa a myi man hpe hkungga lu na rai ndai; na a Karai Kasang hpe hkrit hkungga nga lu na rai ndai.” Ga Shagawp 16:31 hta mung, “Baw hpraw ai gaw, ding hpring ai lam hta grin nga yang, Arawng sadang janmau rai nga ai” ngu tsun da ai. Asak kaba ai ni hpe mara tam na malai, kawa zawn shadum shahprang na matu, Timohti hpe Pawlu n-gun jaw ai. (1 Timohti 5:1, 2) Asak kaba ai hpunau ni ntsa, Timohti ahkang aya nga ai raitim, shanhte hpe myit tau ya nna hkungga ra na hku re.

14. Asak kaba ai raitim, gara masa hta shading sharai ya ra chye ai kun?

¹⁴ Asak kaba ai marai langai ngai gaw, dingsang mara galaw ai (sh) Karai Kasang n ra ai hpe n-gun jaw taw ai nga yang gaw gara hku kun? Dingsang mara galaw ai wa gaw, asak kaba ai majaw, Yehowa ahkyak la na n re ngu n mai sawn la ai. Chyum Laika hta ndai hku tsun ai: “Mara galaw ai wa gaw, asak latsa rai yang pyi dagam hkrum na re.” (Esaia 65:20, NW) Ezekela a shingran hta mung dai hte bung ai npawt tara hpe mu lu ai. (Ezekela 9:5-7) Ahkyak htum gaw, asak kaba htum re ai Yehowa hpe hkungga ra na re. (Daniela 7:9, 10, 13, 14) Yehowa hpe hkungga ai nga yang, marai langai hpe shading sharai ra ai shaloi, shi asak kade daram raitim, marai rawng let sharai ya lu na re.​—⁠Galati 6:1.

15. Asak kaji ai hpunau ni hpe hkungga lam madun ai hte seng nna, Pawlu kaw nna anhte hpa sharin la lu ai kun?

¹⁵ Asak kaji ai hpunau ni rai yang gaw gara hku kun? Asak kaji ai majaw hkungga lam n lu ging ai ngu sawn la ra na kun? Dai hku n re. Timohti hpang de Pawlu ndai hku ka wa ai: “Na a brang ram prat e, nang hpe kadai mung n shatan u ga: tsun ai ga hte mung, arawn alai hte mung, tsaw ra ai hte mung, kam sham nna chyoi pra ai hte mung, kam sham ai ni a matu mara, kasi kamang tai nga  u.” (1 Timohti 4:12) Ndai ga hpe Pawlu ka ai shaloi, Timohti asak 30 daram rai na re. Raitim, Pawlu gaw shi hpe grai kaba ai lit ni jaw da ai. Hpa sharin la lu ai kun? Asak kaji ai hpunau ni hpe, shanhte a asak hku hkan nna n dawdan ging ai. Yesu asak 33 hta hpa lam ni galaw awng dang wa ai hpe myit yu u.

16, 17. (a) Hpunau langai gaw, myitsu salang (sh) magam tau hku nna atsam hpring, n hpring myitsu salang ni gara hku dawdan ai kun? (b) Tinang a ningmu (sh) htung hking ni gaw, Chyum Laika tsun ai hte gara hku nhtan shai chye ai kun?

¹⁶ Htung lailen nkau hta, asak kaji ai ni hpe hkungga ai lam n madun ma ai. Dai majaw, myitsu salang nkau gaw, asak kaji ai hpunau ni hpe atsam hpring yang pyi, myitsu salang hte magam tau byin na matu myit n hkrum ma ai. Raitim, myitsu salang hte magam tau byin lu ai asak hpe Chyum Laika hta n masat da ya ai. (1 Timohti 3:1-10, 12, 13; Titu 1:5-9) Myitsu salang ni gaw, htung hking a majaw dai zawn galaw ai nga yang, Karai mungga hpe n hkan sa nga ai re. Myitsu salang ni gaw, shanhte a htung hking hku (sh) shanhte a ningmu hku hkan nna asak kaji ai hpunau ni hpe n mai dawdan ai. De a malai, Karai Kasang a tsang madang hku sha dawdan ging ai.​—⁠2 Timohti 3:16, 17.

¹⁷ Myitsu salang hte magam tau lit shatsam ai hte seng ai Chyum Laika tara hpe, myitsu salang ni n hkan sa ai nga yang, atsam hpring ai hpunau ni htingnut mat chye ai. Mungdan langai hta, magam tau langai gaw lit kaba ni hpe atsawm sha galaw lu nga ai. Myitsu salang langai nga ra na atsam ningja ni mung nga sai. Raitim, dai hpunau gaw asak grai kaji ai zawn nsam rai nga ai ngu, myitsu salang nkau tsun ma ai. Dai majaw, shi hpe lit shatsam na matu, myit n hkrum dat ai. Dai hpunau aya n tang hkrum ai gaw, shi a asak kaji ai hkrang nsam a majaw sha re. Ndai zawn myit jasat gaw, mungkan a shara law law hta nga nga ai. Dai majaw, anhte a ningmu (sh) buga htung hking hku n re ai sha, Chyum Laika ningmu hpe hkan sa na matu grai ahkyak ai. Dai hku rai yang, masha ni hpe ntsa lam yu nna n dawdan ai sha, Yesu a ga madat lu na re.

18, 19. Anhte a hpunau ni hpe Yehowa mu mada ai zawn mu hkra, hpa gaw karum ya na kun?

¹⁸ Anhte n hkum tsup ai raitim, masha ni hpe lachyen lahka myit n nga ai sha, Yehowa mu mada ai zawn mu lu hkra sharin la lu ai. (Kasa 10:34, 35) Dai majaw, Karai mungga kaw nna sadi jaw ga hpe anhte ayan na myit maju jung nga ra ai. Dai tara ni hpe hkan sa ai nga yang, “myi man tau nna hkum jeyang myit” ngu ai Yesu a ga hpe hkan sa nga ai re.​—⁠Yawhan 7:24.

¹⁹ Kade n na yang, anhte a hkawhkam Yesu gaw masha yawng hpe tara jeyang sana re. Shi gaw, shi na ai, mu ai hku n re ai sha, Karai a tsang madang ni hku hkan nna dawdan na re. (Esaia 11:3, 4) Dai aten hpe anhte myit mada nga ga ai.